Hebreos
5 Weno, majqui jach bʌ wiñic yajcʌbil bʌ bajcheʼ ñuc bʌ sacerdote miʼ waʼchocontel chaʼan miʼ coltan tiʼ chaʼan bʌ Dios jiñi wiñicob, chaʼan miʼ yʌcʼ jiñi majtañʌl tac yicʼot jiñi tsʌnsʌbil bʌ añimal tac chaʼan miʼ ñusʌntel jiñi mulil. 2 Miʼ mejlel i pʌsben i pʼuntaya* jiñi muʼ bʌ i tajob i sajtemal tiʼ caj mach i cʌñʌyobic chuqui wen, come an i cʼunlel jaʼel, 3 jin chaʼan yom miʼ yʌcʼ jiñi majtañʌl chaʼan miʼ ñusʌbentel i mul, cheʼ bajcheʼ miʼ mel tiʼ tojlel jiñi tejclum.
4 Mi juntiquilic wiñic miʼ mejlel ti ochel bajcheʼ ñumen ñuc bʌ sacerdote chaʼan cheʼ bajñel yom, cojach miʼ taj cheʼ miʼ pʌjyel ti Dios, cheʼ bajcheʼ tsaʼ ujti tiʼ tojlel Aarón. 5 Cheʼ jaʼel, Cristo maʼañic tsiʼ bajñel aqʼue i bʌ i ñuclel cheʼ bʌ tsaʼ ochi bajcheʼ ñumen ñuc bʌ sacerdote, tsaʼ bʌ i yʌqʼue ili i ñuclel jiñʌch tsaʼ bʌ i sube ili tʼan tac: «Jatet calobilet, wʌle tsaʼix sujtiyon ti a tat». 6 Cheʼʌch bajcheʼ miʼ yʌl ti yambʌ parte yaʼ ti tsʼijbujel: «Jatet sacerdotejet tiʼ pejtelel ora cheʼ bajcheʼ Melquisedec».
7 Cheʼ bʌ Cristo wʌʼan ti lum tsiʼ mele oración loqʼuem bʌ tiʼ pusicʼal i ti cʼam bʌ tʼan yicʼot i yaʼlel i wut tsiʼ pejca ti wocol tʼan jiñi muʼ bʌ i mejlel i coltan loqʼuel ti jiñi chʌmel, i tsaʼ ubinti come miʼ bʌcʼñan Dios. 8 Anquese i yalobil Dios, tsiʼ cʌñʌ chuqui jiñi jacʼ tʼan tiʼ caj jiñi wocol tac tsaʼ bʌ i ñusa. 9 I cheʼ bʌ tsaʼix i pʌsʌ i bʌ ti xjacʼtʼan tiʼ pejtelel,* tsaʼ ochi tiʼ wenta jiñi coltʌntel tiʼ pejtelel ora muʼ bʌ caj i yʌqʼuentel pejtelel jiñi muʼ bʌ i jacʼbeñob i tʼan, 10 come Dios tsiʼ waʼchoco bajcheʼ ñumen ñuc bʌ sacerdote cheʼ bajcheʼ Melquisedec.
11 Cabʌl chuqui miʼ mejlel la cʌl tiʼ tojlel, pero wocol ti tsictesʌntel, come jatetla mach ti orajic mi laʼ chʼʌmben i sujm.* 12 Anquese ili ora yom xcʌntesajetixla, chaʼ laʼ womto an majqui miʼ pʌsbeñetla jiñi ñaxan tac bʌ cʌntesa am bʌ yaʼ ti chʼujul bʌ i tʼan Dios, jatetla lecheto yom mi laʼ wʌqʼuentel, mach jiñic bʌlñʌcʼʌl muʼ bʌ i cʼuxob jiñi ñucobix bʌ. 13 I jiñi lecheto bʌ woliʼ jap mach i cʌñʌyic jiñi i tʼan Dios muʼ bʌ i pʌsbeñonla chuqui toj, come alʌto. 14 Pero jiñi bʌlñʌcʼʌl i chaʼañob jiñi ñucobix bʌ, muʼ bʌ i wen cʼʌñob jiñi i ñaʼtʌbal, i cheʼ bʌ miʼ melob ili miʼ chajpañob i bʌ chaʼan miʼ cʌñob chuqui wem bʌ yicʼot chuqui mach bʌ weñic.