2 Corintios

13 Ili i yuxyajlelix woli c chajpan c bʌ chaʼan mic majlel c julaʼtañetla. «Chaʼan miʼ ñaʼtʌntel miʼ sujmʌch o mach i sujmic jiñi tsaʼ bʌ ajli, yom an chaʼtiquil o uxtiquil testigo». 2 Anquese wʌleʼli mach yaʼic añon, lajal bajcheʼ i chaʼyajlelix yaʼañon. Jin chaʼan mic wʌn subeñob jiñi tsaʼ bʌ i chaʼleyob mulil yicʼot pejtelel jiñi yambʌlob chaʼan mi mucʼʌch c chaʼ mejlel ti majlel maʼañic mi caj laʼ putsʼtan jiñi laʼ tojʼesʌntel, 3 cheʼ mic mel iliyi mi caj c pʌs chaʼan Cristo woliʼ cʼʌñon chaʼan miʼ chaʼlen tʼan. I Cristo mach cʼuñic, mucʼʌch i pʌs jiñi ñuc bʌ i pʼʌtʌlel ti laʼ tojlel. 4 I sujmʌch chaʼan cʼun cheʼ bʌ tsaʼ tsʌnsʌnti yaʼ ti teʼ, pero wʌleʼli cuxulʌch tiʼ coltaya i pʼʌtʌlel Dios. I sujmʌch chaʼan cʼuñonla jaʼel cheʼ bajcheʼ cʼun ti ñaxan, pero mi caj lac chumtʌl la quicʼot tiʼ coltaya jiñi i pʼʌtʌlel Dios muʼ bʌ i mel i yeʼtel ti laʼ tojlel.

5 Chʌn tsajin laʼ bʌ* chaʼan mi laʼ qʼuel mi xucʼulʌch laʼ ñopoñel. Chʌn qʼuelela majquiyetla tiʼ sujm. ¿O maʼañic ba mi laʼ cʌn chaʼan Jesucristo temel yicʼotetla? Cojach mi mach utsʼatic miʼ qʼueletla Dios maʼañic mi caj laʼ cʌn iliyi. 6 Tiʼ sujm mic pijtan chaʼan mi laʼ cʌn chaʼan utsʼatʌch mi lon j qʼuejlel ti Dios.

7 Mi lon j cʼajtiben Dios chaʼan maʼañic mi laʼ mel mach bʌ weñic. Mach chaʼañic utsʼat mi lon j qʼuejlel yilal cheʼ woli lon j cʼajtin iliyi, chaʼañʌch mi laʼ mel chuqui utsʼat, anquese joñon lon maʼañic mi lon j qʼuejlel ti utsʼat yilal. 8 Come maʼañic chuqui miʼ mejlel lon c mel tiʼ contra jiñi i sujmlel, mucʼ jach i mejlel lon j coltan. 9 Tiʼ sujm tijicña mi lon cubin cheʼ bʌ cʼuñon lon i jatetla pʼʌtʌletla. Ili jiñʌch muʼ bʌ j cʼajtin lon ti oración: Chaʼan mi laʼ tojʼesan laʼ bʌ. 10 Jin chaʼan, woli c tsʼijbubeñetla iliyi cheʼ bʌ maxto yaʼic añon. Cheʼ bajcheʼ jiñi, cheʼ bʌ mij cʼotel, mach yomic tsʌts mic mel c bʌ cheʼ mij cʼʌn jiñi queʼtel tsaʼ bʌ i yʌqʼueyon lac Yum, mi caj i mejlel j cʼʌn chaʼan mic pʼʌtʼesañetla i mach chaʼañic mic jisañetla.

11 Hermanojob, jiñi cojix bʌ jiñʌch iliyi: Chʌn ubinla laʼ tijicñʌyel, tojʼesan laʼ bʌ, chʼʌmʌla jiñi i ñuqʼuesʌntel laʼ pusicʼal, yom junlajal laʼ ñaʼtʌbal yicʼot mi laʼ wajñel ti ñʌchʼtʌlel, i cheʼ bajcheʼ jiñi, jiñi Dios chaʼan bʌ cʼuxbiya yicʼot ñʌchʼtʌlel mi caj i yajñel yicʼotetla. 12 Tsʼujtsʼun laʼ bʌ cheʼ mi laʼ chaʼlen laʼ bʌ ti saludar.* 13 Pejtelel jiñi chʼujuloʼ bʌ miʼ chocbeñetla majlel saludo.

14 Laʼ ajñic laʼ wicʼot jiñi ñuc bʌ i yutslel lac Yum Jesucristo, jiñi i cʼuxbiya Dios yicʼot jiñi chʼujul bʌ espíritu muʼ bʌ i yʌqʼueñetla laʼ wenlel ti laʼ pejtelel.