Santiago
1 I chaʼan Santiago, xyaj eʼtel i chaʼan Dios yicʼot i chaʼan lac Yum Jesucristo, tiʼ tojlel jiñi 12 pʼolbalʌl pam pujquem bʌ:
¡Chʼʌmʌla c saludo!
2 Quermañujob, yom wen tijicñayetla cheʼ bʌ mi laʼ taj wocol tac 3 come miʼ qʼuejlel chaʼan i sujmʌch jiñi laʼ ñopoñel cheʼ bʌ añetla ti wocol, i cheʼ bajcheʼ jiñi mi laʼ cʌn laʼ cuch wocol. 4 Pero acʼʌla chaʼan jiñi i cuchol wocol tsʼʌcʌl miʼ mel i yeʼtel, chaʼan tsʼʌcʌletla tiʼ pejtelel chuqui jach i maʼañic chuqui anto yom laʼ chaʼan.
5 Jin chaʼan, mi an majqui anto yom i ñaʼtʌbal, laʼ i chʌn cʼajtiben Dios, i mi caj i yʌqʼuentel come Dios miʼ wen acʼ tiʼ pejtelel i pusicʼal i maʼañic miʼ sʌclan lac mul. 6 Pero laʼ i chʌn cʼajtin yicʼot i ñopoñel, mach yomic tile bixel i pusicʼal, come jiñi tile bixel bʌ i pusicʼal lajal bajcheʼ wecʼuña bʌ jaʼ ñijcʌbil bʌ ti icʼ. 7 Tiʼ sujm, jiñi wiñic mach yomic miʼ ñaʼtan chaʼan an chuqui mi caj i yʌqʼuentel ti Jehová.* 8 Juntiquilʌch tile bixel bʌ i pusicʼal, jujumujcʼ miʼ qʼuextan i bijlel.
9 Pero jiñi pʼumpʼum bʌ hermano yom miʼ yubin i tijicñʌyel chaʼan tsaʼ aqʼuenti i ñuclel, 10 i jiñi rico, yom miʼ yubin i tijicñʌyel chaʼan tsaʼ peqʼuesʌnti come mi caj i jilel bajcheʼ jiñi ñichteʼ am bʌ ti jamil. 11 Come jiñi qʼuin miʼ loqʼuel i jiñi i ticwʌlel miʼ cʼuñʼesan jiñi ñichteʼ, cheʼ jiñi miʼ yajlel i miʼ jilel jiñi i yutsʼatlel. Cheʼʌch mi caj i jilel jaʼel jiñi rico cheʼ bʌ chumul cheʼ bajcheʼ yom.
12 Tijicña jiñi wiñic muʼ bʌ i bej cuch cheʼ bʌ an wocol, come cheʼ bʌ miʼ lʌtʼ jiñi wocol, mi caj i yʌqʼuentel jiñi corona chaʼan bʌ cuxtʌlel tsaʼ bʌ i yʌlʌ Jehová* chaʼan mi caj i yʌqʼuen jiñi muʼ bʌ i chʌn cʼuxbiñob. 13 Cheʼ bʌ an majqui miʼ ñusan wocol mach yomic miʼ yʌl: «Dios woliʼ qʼuelbeñon c pusicʼal». Come Dios maʼañic miʼ cʼʌn jiñi wocol tac chaʼan miʼ qʼuel lac pusicʼal i maʼañic miʼ mejlel laj qʼuelben i pusicʼal jaʼel. 14 Jujuntiquil miʼ qʼuelbentel i pusicʼal cheʼ miʼ pʌjyel i miʼ chujquel ti chuqui bajñel yom i pusicʼal. 15 Cheʼ jiñi, cheʼ bʌ miʼ colel chuqui yom i pusicʼal, miʼ yajlel ti mulil, i jiñi mulil, cheʼ bʌ tsaʼix mejli, miʼ yʌcʼ chʌmel.
16 Cʼuxbibil bʌ quermañujob, mach laʼ lotin laʼ bʌ. 17 Pejtelel wem bʌ yicʼot toj bʌ majtañʌl tilem ti panchan, muʼ bʌ i yʌcʼ jiñi, jiñʌch tsaʼ bʌ i Mele jiñi muʼ bʌ i yʌcʼ sʌcjamañiyel.* Maʼañic miʼ qʼuextʌyel, cheʼ bajcheʼ miʼ qʼuextʌyel jiñi axñal. 18 Tsiʼ yʌqʼueyonla laj cuxtʌlel cheʼ bʌ tsaʼ lac ñopo jiñi i sujm bʌ i tʼan come cheʼʌch yom, chaʼan mi lac sujtel ti jiñi ñaxam bʌ tsaʼ yajcʌntiyob ti jiñi tsaʼ tac bʌ i mele.
19 Cʼuxbibil bʌ quermañujob, com mi laʼ ñaʼtan chaʼan yom chajpʌbiletla chaʼan mi laʼ ñʌchʼtan tʼan, pero mach ti orajic yom mi laʼ jacʼ yicʼot mach ti orajic yom mi laʼ michʼan, 20 come i michʼajel jiñi wiñicob maʼañic miʼ coltañonla lac mel chuqui toj cheʼ bajcheʼ yom Dios. 21 Jin chaʼan, cʌyʌla pejtelel chuqui bibiʼ yicʼot pejtelel jontolil anto bʌ ti laʼ tojlel, i yicʼot laʼ pecʼlel yom mi laʼ wʌcʼ chaʼan Dios miʼ pʌcʼ ti laʼ pusicʼal jiñi tʼan muʼ bʌ i mejlel i yʌqʼueñetla laʼ coltʌntel.
22 Pero jacʼʌla jiñi tʼan i mach yomic jach mi laʼ ñʌchʼtan, i mi laʼ bajñel lotin laʼ bʌ ti muʼ bʌ laʼ ñaʼtan mach bʌ i sujmic. 23 Come mi an muʼ bʌ i yubin jiñi tʼan pero maʼañic miʼ jacʼ, lajal bajcheʼ jiñi wiñic muʼ bʌ i qʼuel i ñiʼ i wut ti espejo: 24 Miʼ qʼuel i bʌ i cheʼ bʌ miʼ majlel, ti ora miʼ ñajʌyel i chaʼan bajcheʼ yilal bʌ wiñic. 25 Pero jiñi muʼ bʌ i wen qʼuel jiñi toj bʌ mandar muʼ bʌ i yʌcʼ librejlel i maʼañic miʼ cʌy, mach muqʼuic jach i ñʌchʼtan i miʼ ñajʌyel i chaʼan, mucʼʌch i jacʼ jiñi tʼan, i tijicña mi caj i yubin ti chuqui miʼ mel.
26 Mi an muʼ bʌ i lon ñaʼtan chaʼan woliʼ chʼujutesan Dios pero maʼañic miʼ ticʼ i yacʼ, woliʼ bajñel lotin i pusicʼal i maʼañic i cʼʌjñibal jiñi i chʼujutesaya. 27 Tiʼ wut jiñi lac Dios yic’ot lac Tat, jiñi sʌc bʌ chʼujutesaya* yicʼot mach bʌ añic i bibiʼlel jiñʌch iliyi: Cheʼ mi laj cʌntan jiñi mebaʼob yicʼot jiñi mebaʼ xʼixicob cheʼ bʌ añob ti wocol yicʼot maʼañic mi lac toyben i bibiʼlel jiñi pañimil.