Santiago
3 Quermañujob, mach cabʌleticla yom bʌ mi laʼ sujtel ti xcʌntesa come laʼ wujil chaʼan ñumen tsʌts mi caj i yujtel meloñel ti lac tojlel. 2 Come ti lac pejtelel mi lac wen taj lac sajtemal. Jiñi maʼañic bʌ miʼ wis taj i sajtemal tiʼ tʼan juntiquilʌch toj bʌ lac piʼʌl i miʼ mejlel i ticʼ pejtelel i bʌcʼtal jaʼel. 3 Cheʼ bʌ mi la cotsʌben freno tiʼ yej jiñi caballo chaʼan miʼ jacʼbeñonla,* mi lac ñijcan tiʼ cottʌlel jaʼel. 4 Ñaʼtancula jaʼel ti jiñi barco tac: Anquese wen colem i miʼ ñijcʌntel ti tsʌts bʌ icʼ, miʼ tojʼesʌntel majlel ti remo i miʼ majlel baqui yom jiñi woli bʌ i ñijcan jiñi remo.
5 Cheʼʌch miʼ yujtel jaʼel yicʼot jiñi la cacʼ: Anquese cheʼ ya wistʌl ti lac bʌcʼtal, miʼ wen sub i ñuclel. ¡I ñaʼtancula, cheʼ ya wistʌl cʼajc miʼ pul ñuqui mateʼel! 6 Jiñi la cacʼ lajalʌch jaʼel bajcheʼ cʼajc. Jiñʌch junchajp am bʌ ti lac bʌcʼtal muʼ bʌ i mel chuqui mach bʌ weñic i miʼ bibʼesan pejtelel lac bʌcʼtal. Jiñi miʼ mejlel i jemben* i cuxtʌlel juntiquil lac piʼʌl i lajal bajcheʼ jiñi Gehena* come miʼ chaʼlen jisaya. 7 Come baqui jach bʌ añimal tac jontol bʌ, añimal tac am bʌ i wichʼ, añimal tac muʼ bʌ i jexpan* i bʌ yicʼot añimal tac am bʌ ti jaʼ miʼ mejlel ti utsʼesʌntel i jiñi lac piʼʌlob añʌch i meleyob iliyi. 8 Pero mi juntiquilic lac piʼʌl miʼ mejlel i ticʼ i yacʼ. Maʼañic miʼ mejlel ti tijqʼuel i miʼ ticʼlan yambʌlob, butʼul ti veneno yujil bʌ tsʌnsa. 9 Mi laj cʼʌn chaʼan mi lac sub i ñuclel Jehová,* jiñi lac Tat, pero mi laj cʼʌn jaʼel chaʼan mi lac chʼʌc jiñi wiñicob tsaʼ bʌ mejliyob «tiʼ yejtal Dios».* 10 Ti la quej mi la cʌcʼ bendición i mi lac chaʼlen chʼʌcoñel jaʼel.
Quermañujob, mach weñic cheʼ miʼ yujtel iliyi. 11 ¿Junsujm jach ba baqui miʼ loqʼuel jiñi tsaj bʌ jaʼ yicʼot jiñi chʼaj bʌ? 12 Quermañujob, jiñi higuera teʼ maʼañic miʼ yʌcʼ aceituna i jiñi i teʼel uva maʼañic miʼ yʌcʼ higo, ¿o mucʼʌch? I jiñi jaʼ am bʌ i yʌtsʼʌmlel mach mejlic i yʌcʼ tsaj bʌ jaʼ.
13 ¿Majqui ti laʼ tojlel an i ñaʼtʌbal yicʼot mucʼʌch i chʼʌmben i sujm? Yom an wem bʌ i melbal muʼ bʌ i pʌs chaʼan pejtelel muʼ bʌ i mel miʼ mel yicʼot jiñi i yutslel tilem bʌ ti jiñi ñaʼtʌbal. 14 Pero mi jatetla an i tsʌytsʌyñiyel laʼ pusicʼal yicʼot mi laʼ mulan leto* ti laʼ pusicʼal, mach laʼ chañʼesan laʼ bʌ yicʼot mach laʼ chaʼlen lot tiʼ contra jiñi i sujmlel. 15 Ili mach jiñic jiñi ñaʼtʌbalʌl tilem bʌ ti panchan, i chaʼañʌch pañimil, i chaʼan añimal yicʼot i chaʼan xibajob. 16 Come baqui an jiñi tsʌytsʌyñayoʼ bʌ i pusicʼal yicʼot jiñi muʼ bʌ i mulañob leto tiʼ pusicʼal, miʼ cajel wocol yicʼot miʼ cajel pejtelel chuqui mach weñic.
17 Pero jiñi ñaʼtʌbalʌl tilem bʌ ti panchan miʼ yʌcʼ chaʼan juntiquil lac piʼʌl sʌc i pusicʼal, miʼ pʌs ñʌchʼtʌlel, uts i pusicʼal, chajpʌbil chaʼan miʼ jacʼ tʼan, yujil pʼuntaya, an wen tac bʌ i melbal, junlajal miʼ qʼuel lac piʼʌlob yicʼot cheʼʌch miʼ pʌs i bʌ bajcheʼ ñoj yilal. 18 I melol chuqui toj miʼ yʌcʼ i wut ti ñʌchʼtʌlel tiʼ tojlel jiñi muʼ bʌ i sʌclañob ñʌchʼtʌlel.