1 Corintios
4 Tiʼ pejtelelob yom miʼ qʼueloñobla bajcheʼ xcoltayajob i chaʼan Cristo yicʼot jiñi añoʼ bʌ tiʼ wenta jiñi chʼujul bʌ tʼan tac mucul bʌ i chaʼan Dios. 2 Pero muʼ bʌ i pijtʌntel tiʼ tojlel jiñi añoʼ bʌ tiʼ wenta otot jiñʌch cheʼ xucʼulob. 3 Joñon mach cʌlʌx c wentajic mi jatetla o jiñi añoʼ bʌ i yeʼtel ti meloñibʌl miʼ chaʼleñob meloñel tic tojlel. Tiʼ sujm, mi joñoñicto mic bajñel chaʼlen meloñel tic tojlel. 4 Come sʌc jiñi j conciencia, pero jiñi maʼañic miʼ pʌs chaʼan tojon. Jiñi muʼ bʌ i chaʼlen meloñel tic tojel jiñʌch Jehová.* 5 Jin chaʼan, mach laʼ chaʼlen meloñel cheʼ bʌ maxto i yorajlelic, jinto miʼ tilel jiñi lac Yum. Jin mi caj i yʌcʼ ti cʌñol jiñi mucul tac bʌ yaʼ ti icʼyochʼañiyel i mi caj i yʌcʼ ti tsictiyel chuqui tac yom i pusicʼal lac piʼʌlob. Cheʼ jiñi jujuntiquil mi caj i yʌqʼuentel jiñi ñuclel yom bʌ miʼ yʌqʼuentel ti Dios.
6 Hermanojob, tsaʼ j cʼʌñʌ c bʌ joñon yicʼot Apolos bajcheʼ ejemplo chaʼan mi cʌleʼ tac iliyi chaʼan laʼ wenlel, chaʼan mi laʼ cʌn ti lon c tojlel iliyi: «Cojach yom mi laʼ mel jiñi tsʼijbubil bʌ». Cheʼ bajcheʼ jiñi maʼañic mi caj laʼ chañʼesan laʼ bʌ i maʼañic mi caj laʼ coltan juntiquil i mi laʼ sujtel tiʼ contra yambʌ. 7 ¿Chuqui an a chaʼan muʼ bʌ i yʌqʼueñet a ñaʼtan chaʼan ñumen ñuquet bajcheʼ yambʌlob? Tiʼ sujm, ¿chuqui an a chaʼan mach bʌ aqʼuebiletic? Yubil cheʼ jiñi, mi tsaʼ aqʼuentiyet, ¿chucoch maʼ pʌs a bʌ ti ñuc i cheʼ bajcheʼ mach aqʼuebiletic maʼ mel?
8 ¿Añix ba laʼ chaʼan pejtelel chuqui laʼ wom? ¿Cabʌlix ba laʼ chubʌʼan? ¿Tsaʼix ba laʼ techeʼ yumʌntel cheʼ bʌ maxto yaʼic añon lon? Yomtoca cheʼ tsaʼix laʼ techeʼ yumʌntel, chaʼan joñon lon jaʼel mi lon c chaʼlen yumʌntel quicʼotetla. 9 Come mij qʼuel chaʼan, jiñi apóstolonbʌlon, Dios wiʼilix tsiʼ pʌyʌyon lon tilel ti jumpʼejl teatro cheʼ bajcheʼ wiñicob yom bʌ miʼ tsʌnsʌntelob chaʼan pejtelel pañimil miʼ qʼueloñob lon, jiñi ángelob yicʼot jiñi wiñicob. 10 Mi lon j qʼuejlel ti tonto tiʼ caj mi lon c tsajcan Cristo, pero jatetla añʌch laʼ ñaʼtʌbal tiʼ coltaya Cristo, joñon lojon cʼuñon lon, pero jatetla pʼʌtʌletla, jatetla mi laʼ qʼuejlel ti ñuc, pero joñon lojon mi lon c tsʼaʼlentel. 11 Cʼʌlʌl ili ora woli lon c ñusan wiʼñal yicʼot tiquin tiʼ, mach cabʌlic lon c pislel, mi lon c jajtsʼel,* maʼañic lon cotot 12 i mi lon c chaʼlen tsʌts bʌ eʼtel yicʼot lon j cʼʌb. Cheʼ bʌ mi lon c pʼajtʌl,* mi lon cʌcʼ bendición, cheʼ bʌ mi lon j contrajintel, mi lon c chʌn lʌtʼ yicʼot lon c pijt, 13 cheʼ bʌ miʼ chaʼleñob jopʼtʼan ti lon c tojlel, wen jach bajcheʼ mi lon c jacʼ. Cʼʌlʌl ili ora, basurajon lon chaʼan pañimil tiʼ wut lac piʼʌlob, i tsuculel pejtelel chuqui an.
14 Mach chaʼañic mi cʌqʼuetla ti quisin woli c tsʼijbubeñetla iliyi, chaʼañʌch mic tiqʼuetla bajcheʼ cʼuxbibil bʌ calobilob. 15 Come, anquese an 10 mil muʼ bʌ i pʌsbeñetla bajcheʼ yom mi laʼ tsajcan Cristo, mach cabʌlic laʼ tatob. Come temelon quicʼot Cristo Jesús, tsaʼ sujtiyon ti laʼ tat cheʼ bʌ tsaʼ c subeyetla jiñi wen tʼan. 16 Jin chaʼan, mij cʼajtibeñetla ti wocol tʼan chaʼan mi laʼ lajiñon. 17 Jin chaʼan mic chocbeñetla majlel Timoteo come jiñʌch cʼuxbibil bʌ calobil yicʼot xucʼul ti lac Yum. Jin mi caj i c’ajtesʌbeñetla bajcheʼ mic melben i yeʼtel Cristo Jesús, cheʼ bajcheʼ woli c pʌs ñumel ti jujumpʼejl congregación.
18 Chaʼtiqui uxtiquil chan miʼ yubiñob i bʌ, cheʼ bajcheʼ maʼañic mi caj c majlel c julaʼtañob yilal. 19 Pero mi cheʼ yom Jehová,* tsʼitaʼ yom chaʼan mic majlel c julaʼtañetla i maʼañic mi caj cʌcʼ c ñaʼtʌbal chaʼan mi cubin chuqui miʼ yʌlob jiñi chan bʌ miʼ yubiñob i bʌ, mi caj j cʌn bajcheʼ cʼamelob i pʼʌtʌlel. 20 Jiñi i Yumʌntel Dios tsiquil tiʼ cuxtʌlel juntiquil i mach tiʼ tʼañic jach, jiñʌch cheʼ an i chaʼan i pʼʌtʌlel Dios. 21 ¿Chuqui laʼ wom? ¿Jimba cheʼ mic majlel quicʼot c teʼ o jin cheʼ yicʼot j cʼuxbiya i yicʼot cutslel?