Romanos

3 Yubil cheʼ jiñi, ¿chuqui ti wenlel an cheʼ judíojonla? ¿Chuqui ti wenlel miʼ yʌcʼ jiñi tsep pʌchʌlel?* 2 Cabʌlʌch i wenlel tiʼ pejtelel chuqui an. Jiñi judíojob jiñʌch tsaʼ bʌ aqʼuentiyob jiñi chʼujul bʌ i tʼan Dios. 3 Cheʼ jiñi, ¿chuqui miʼ yujtel? Mi an maʼañic bʌ tsiʼ pʌsʌyob i ñopoñel, ¿muʼ ba caj i jilel i xucʼtʌlel Dios tiʼ caj maʼañic tsiʼ pʌsʌyob i ñopoñel? 4 ¡Maʼañic! Dios jiñʌch jiñi i sujmlel, anquese laj xlotob jiñi wiñicob, cheʼʌch bajcheʼ tsʼijbubil: «Jiñi a tʼan mi caj i pʌs chaʼan tojetʌch i cheʼ bʌ miʼ toʼol chaʼleñob tʼan ti a contra jatet mi caj a pʌs chaʼan mach tojic añob». 5 Jin chaʼan, mi jiñi mach bʌ tojic mi lac mel miʼ yʌcʼ ti ñumen tsictiyel jiñi i tojel Dios, ¿chuqui mi caj la cʌl? ¿Chaʼan ba mach tojic Dios cheʼ bʌ miʼ pʌs i michʼajel? (Ili jiñʌch muʼ bʌ i ñaʼtañob chaʼtiqui uxtiquil lac piʼʌlob). 6 ¡Mach cheʼiqui! Mi cheʼ bajcheʼ jiñi, ¿bajcheʼ mi caj i chaʼlen meloñel Dios tiʼ tojlel ili pañimil?

7 Pero mi tiʼ caj jiñi c lot muʼto i ñumen tsictiyel jiñi i sujmlel tiʼ tojlel Dios chaʼan i ñuclel, ¿chucoch miʼ yujtel meloñel tic tojlel bajcheʼ xmulil? 8 ¿I chucoch maʼañic mi la cʌl: «Laʼ lac mel chuqui tac mach bʌ weñic chaʼan miʼ tilel chuqui tac wen», cheʼ bajcheʼ woli la cʌl miʼ toʼol alob chaʼtiqui uxtiquil? Tojʌch bajcheʼ mi caj i yʌqʼuentelob i toj i mul jiñi wiñicob.

9 ¿Yom ba i yʌl jiñi chaʼan ñumen wen bajcheʼ añonla? ¡Mach cheʼiqui! Come cheʼ bajcheʼ tsaʼix lac jamʌ alʌ, laj xmulilob, jiñi judíojob yicʼot jiñi griegojob. 10 Cheʼʌch tsʼijbubil: «Maʼañic mi juntiquilic toj bʌ wiñic, mi juntiquilicto, 11 maʼañic majqui miʼ cʌn chuqui yom bʌ miʼ mejlel, maʼañic majqui miʼ sʌclan Dios. 12 Tiʼ pejtelelob tsiʼ tʌtsʼʌyob i bʌ,* maʼañic i cʼʌjñibal tsaʼ sujtiyob tiʼ pejtelelob, mi juntiquilic miʼ pʌs i yutslel, mi juntiquilicto». 13 «Jiñi i bicʼ lajal bajcheʼ jamʌl bʌ mucoñibʌl, miʼ chaʼleñob lot yicʼotob i yacʼ». «An i venenojlel lucum tiʼ yebalob i tiʼ». 14 «I jiñi i yej butʼul ti chʼʌcoñel yicʼot ti tʼan tac chaʼan bʌ i michʼ pusicʼal». 15 «Ora miʼ chaʼleñob becʼ chʼichʼ». 16 «Tiʼ pejtelel ora miʼ ticʼlañob lac piʼʌlob yicʼot miʼ yʌqʼueñob wocol, 17 i mach i cʌñʌyobic jiñi bij chaʼan bʌ ñʌchʼtʌlel». 18 «Maʼañic miʼ bʌcʼñañob Dios».

19 La cujil chaʼan pejtelel muʼ bʌ i yʌl jiñi Mandar i chaʼañʌch jiñi muʼ bʌ i tsajcañob jiñi Mandar, chaʼan mi juntiquilic miʼ mejlel i yʌl chaʼan maʼañic i mul yicʼot chaʼan pejtelel lac piʼʌlob miʼ chʼʌmob tiʼ wenta bajcheʼ Dios mi caj i yʌqʼueñob i tojob i mul. 20 Jin chaʼan, mi juntiquilic mi caj i sujbel ti toj tiʼ wut Dios chaʼan jach miʼ tsajcan jiñi mandar come tiʼ caj jiñi mandar wen la cujil chuqui jiñi mulil.

21 Pero wʌleʼli, anquese mach yaʼix cʌyʌl ti mandar, tsaʼix tsictiyi jiñi i tojel Dios, cheʼ bajcheʼ miʼ yʌl jiñi Mandar yicʼot jiñi Xʼaltʼañob, 22 cheʼʌchi, jiñi i tojel Dios chaʼan jiñi ñopoñel tiʼ tojlel Jesucristo, ili chaʼañʌch miʼ coltʌntel pejtelel añoʼ bʌ i ñopoñel. Come maʼañic i yajcʌntel. 23 Come tsiʼ laj chaʼleyob mulil i maʼañic miʼ mejlel i tajob jiñi i ñuclel Dios, 24 Dios miʼ qʼueletla ti toj come Cristo Jesús tsiʼ tojo jiñi laʼ coltʌntel. Ili jumpʼejlʌch majtañʌl tsaʼ bʌ i yʌcʼʌ Dios chaʼan jiñi ñuc bʌ i yutslel. 25 Dios tsiʼ yʌcʼʌ bajcheʼ majtañʌl chaʼan jiñi lac piʼʌlob utsʼat miʼ chaʼ ajñelob yicʼot cheʼ bʌ miʼ pʌsob i ñopoñel tiʼ chʼichʼel Jesús. Tsiʼ mele iliyi chaʼan miʼ pʌs chaʼan miʼ mel chuqui toj come Dios tsiʼ pʌsʌ i pijt i tsiʼ ñusa jiñi mulil tac tsaʼ bʌ laʼ mele ti wajali. 26 Tsiʼ mele chaʼan miʼ pʌs i tojel ti ili ora cheʼ bʌ miʼ yʌl chaʼan toj jiñi muʼ bʌ i pʌs i ñopoñel ti Jesús.

27 Cheʼ jiñi, ¿muʼ ba i mejlel i qʼuel i bʌ ti ñuc juntiquil lac piʼʌl? Maʼañic. ¿Baqui bʌ mandar miʼ mʌctan? ¿Jimba jiñi mandar muʼ bʌ i yʌl chaʼan ñuc i cʼʌjñibal muʼ bʌ i mel? Mach jiñiqui, jiñʌch jiñi mandar muʼ bʌ i yʌl chaʼan yom an i ñopoñel. 28 Come tsaʼ cʼoti lac ñaʼtan chaʼan juntiquil wiñic miʼ subentel ti toj tiʼ caj jiñi i ñopoñel i mach tiʼ cajic miʼ jacʼ jiñi mandar. 29 ¿Bajñel i Dios ba jiñi judíojob? ¿Mach ba i Diosic jaʼel jiñi lac piʼʌlob ti yambʌ tejclum tac? Jiñʌchi, i Diosʌch jaʼel jiñi añoʼ bʌ ti yambʌ tejclum tac. 30 Come Dios juntiquil jach, mi caj i yʌl chaʼan tojob tiʼ chaʼmojtlelob tiʼ caj jiñi i ñopoñelob, jiñi tsepbiloʼ bʌ i pʌchʌlel yicʼot jiñi mach bʌ tsepbilobic. 31 Yubil cheʼ jiñi, ¿muʼ ba lac jisʌben i cʼʌjñibal jiñi mandar tiʼ caj jiñi lac ñopoñel? ¡Maʼañic! Joñonla muʼto lac ñumen coltan jiñi mandar.