Juan

17 Cheʼ bʌ Jesús tsaʼ ujti i yʌl tac iliyi, tsiʼ letsa i wut ti panchan i tsiʼ yʌlʌ: «C Tat, tsaʼix cʼoti i yorajlel. Ñuqʼuesan jiñi a walobil chaʼan jiñi a walobil miʼ ñuqʼuesañet, 2 cheʼ bajcheʼ tsaʼ wʌqʼue i yeʼtel tiʼ tojlel quixtañujob chaʼan miʼ yʌqʼuen i cuxtʌlel mach bʌ añic miʼ jilel jiñi tsaʼ bʌ a wʌqʼueyob. 3 Ili yom i yʌl cuxtʌlel mach bʌ añic miʼ jilel: Cheʼ miʼ cʼotel i cʌñetob,* jatet jiñi cojach bʌ i sujm bʌ Dios, yicʼot jiñi tsaʼ bʌ a choco tilel, Jesucristo. 4 Joñon tsaʼ cʌqʼueyet a ñuclel ti pañimil, tsaʼ c tsʼʌctesa jiñi eʼtel tsaʼ bʌ a wʌqʼueyon. 5 Jin chaʼan wʌleʼli, c Tat, ñuqʼuesañon ti a tʼejl yicʼot jiñi ñuclel am bʌ c chaʼan ti ñaxan cheʼ bʌ maxto mejli jiñi pañimil».

6 «Tsaʼ cʌqʼueyob i cʌn a cʼabaʼ jiñi tsaʼ bʌ a wʌqʼueyoñob ti pañimil. A chaʼañob ti ñaxan i tsaʼ wʌqʼueyoñob, i tsaʼix i jacʼʌyob a tʼan. 7 Wʌleʼli tsaʼix cʼoti i cʌñob chaʼan pejtelel tsaʼ bʌ a wʌqʼueyon tilem ti a tojlel, 8 come tsaʼ cʌqʼueyob jiñi tʼan tsaʼ bʌ a wʌqʼueyon, i tsaʼʌch i chʼʌmʌyob i tiʼ sujm tsaʼix cʼoti i cʌñob chaʼan tsaʼ tiliyon ti a wenta i tsiʼ ñopoyob chaʼan jatet tsaʼ chocoyon tilel. 9 Mij cʼajtin tiʼ tojlelob, maʼañic mij cʼajtin chaʼan jiñi pañimil, jiñʌch tiʼ tojlelob jiñi tsaʼ bʌ a wʌqʼueyoñob, come a chaʼañobʌch, 10 i pejtelel jiñi c chaʼan bʌ a chaʼañʌch, i jiñi a chaʼan bʌ c chaʼañʌch, i tsaʼ aqʼuentiyon c ñuclel tiʼ tojlelob».

11 «Joñon maʼañoñix ti pañimil, pero i bajñelob añobto ti pañimil, i joñon mi caj c majlel baqui añet. Chʼujul bʌ c Tat, cʌntañob* tiʼ caj jiñi a cʼabaʼ, jiñi tsaʼ bʌ a wʌqʼueyon, chaʼan juntiquilob jach* cheʼ bajcheʼ joñonla juntiquilon jachla.* 12 Cheʼ bʌ wʌʼto añon quicʼotob, joñon tsaʼ j qʼueleyob chaʼan tiʼ caj jiñi a cʼabaʼ, jiñi tsaʼ bʌ a wʌqʼueyon, i tsaʼ j cʌntayob, i mi juntiquilic tsaʼ jisʌnti, cojach jiñi i yalobil jisʌntel, chaʼan miʼ tsʼʌctiyel jiñi Tsʼijbujel. 13 Pero wʌleʼli mi caj c majlel baʼañet, i mi cʌl tac iliyi cheʼ bʌ wʌʼto añon ti pañimil chaʼan tsʼʌcʌl miʼ yubiñob jiñi c tijicñʌyel. 14 Tsaʼ c subeyob jiñi a tʼan, pero jiñi pañimil tsaʼix i tsʼaʼleyob come mach i chaʼañobic pañimil, cheʼ bajcheʼ joñon mach i chaʼañoñic pañimil».

15 «Maʼañic mij cʼajtibeñet chaʼan maʼ locʼsañob ti pañimil, mij cʼajtibeñet chaʼan maʼ cʌntañob* tiʼ tojlel Satanás.* 16 Mach i chaʼañobic pañimil, cheʼ bajcheʼ joñon mach i chaʼañoñic pañimil. 17 Sujtesañob ti chʼujul tiʼ coltaya jiñi i sujmlel, jiñi a tʼan jiñʌch i sujmlel. 18 Cheʼ bajcheʼ tsaʼ chocoyon tilel ti pañimil, joñon jaʼel tsaʼ c chocoyob majlel ti pañimil. 19 I chʼujul mi cajñel chaʼan i wenlelob, chaʼan chʼujul miʼ yajñelob tiʼ coltaya jiñi i sujmlel».

20 «Mach cojach mij cʼajtibeñet tiʼ tojlelob, mij cʼajtibeñet jaʼel tiʼ tojlel jiñi muʼ bʌ i yʌcʼob i ñopoñel tic tojlel chaʼan i tʼañob, 21 chaʼan tiʼ pejtelelob juntiquilob jach. Cheʼ bajcheʼ jatet c Tat, temel añet a wicʼoton i joñon temel añon quicʼotet, laʼ tem ajñicob yicʼotonla, cheʼ bajcheʼ jiñi, jiñi pañimil mi caj i ñop chaʼan jatet tsaʼ chocoyon tilel. 22 Tsaʼix cʌqʼueyob jiñi ñuclel tsaʼ bʌ a wʌqʼueyon chaʼan juntiquilob jach cheʼ bajcheʼ joñonla juntiquilon jachla: 23 Joñon temel quicʼotob i jatet temel a wicʼoton chaʼan wen temel añob. Cheʼ bajcheʼ jiñi, jiñi pañimil mi caj i ñaʼtan chaʼan jatet tsaʼ chocoyon tilel yicʼot chaʼan tsaʼ cʼuxbiyob cheʼ bajcheʼ tsaʼ cʼuxbiyon. 24 C Tat, com chaʼan jiñi tsaʼ bʌ a wʌqʼueyoñob yaʼʌch miʼ yajñelob baqui mi cajñel chaʼan miʼ qʼuelob jiñi ñuclel tsaʼ bʌ a wʌqʼueyon, come tsaʼ cʼuxbiyon cʼʌlʌl cheʼ bʌ maxto mejli jiñi pañimil. 25 Toj bʌ c Tat, tiʼ sujm jiñi pañimil maxto i cʌñʌyetic, pero joñon j cʌñʌyetʌch i jiñi xcʌntʼañob tsaʼix i cʌñʌyob chaʼan jatet tsaʼ chocoyon tilel. 26 Tsaʼ cʌqʼueyob i cʌn a cʼabaʼ, i mi caj c chʌn acʼ ti cʌñol, chaʼan miʼ mejlel i pʌsob jiñi cʼuxbiya tsaʼ bʌ a pʌsbeyon i joñon temel quicʼotob».