Hebreos

11 Jiñi ñopoñel jiñʌch muʼ bʌ i yʌqʼueñonla lac ñop chaʼan mucʼʌch caj i tsʼʌctiyel jiñi woli bʌ lac pijtan, jiñʌch muʼ bʌ i pʌs chaʼan i sujmʌch jiñi woli bʌ lac ñop anquese maʼañic mi lac taj laj qʼuel. 2 Jiñi wiñicob ti wajali* añob i chaʼan ili ñopoñel, jin chaʼan Dios tsiʼ pʌsʌ chaʼan tijicñayʌch yicʼotob.

3 Chaʼan jiñi lac ñopoñel, mi laj qʼuel chaʼan chuqui tac an ti panchan yicʼot ti pañimil tsaʼ waʼchoconti come cheʼʌch tsiʼ yʌlʌ Dios, jin chaʼan Dios miʼ cʼʌn jiñi mach bʌ tsiquilic chaʼan miʼ mel chuqui tac mi lac taj laj qʼuel.

4 Chaʼan jiñi ñopoñel, Abel tsiʼ yʌqʼue Dios ñumen wem bʌ majtañʌl bajcheʼ i chaʼan Caín. Chaʼan jiñi i ñopoñel tsaʼ aqʼuenti i ñaʼtan chaʼan toj, come Dios tsiʼ chʼʌmbe jiñi i majtan. I anquese tsaʼ chʌmi, wolito i chaʼlen tʼan tiʼ tojlel jiñi i ñopoñel.

5 Chaʼan jiñi ñopoñel, Enoc tsaʼ pʌjyi loqʼuel chaʼan maʼañic miʼ qʼuel jiñi chʌmel, i maʼañic majqui tsaʼ mejli i taj come Dios tsiʼ pʌyʌ loqʼuel. I cheʼ bʌ muʼto caj i pʌjyel loqʼuel, tsaʼ aqʼuenti i ñaʼtan chaʼan Dios utsʼat miʼ qʼuel. 6 Cheʼ jaʼel, Dios mach mejlic i qʼuelonla ti utsʼat mi maʼañic lac ñopoñel, come jiñi muʼ bʌ i lʌcʼtesan i bʌ ti Dios yom miʼ ñop chaʼan añʌch yicʼot chaʼan miʼ yʌqʼuen i majtan jiñi muʼ bʌ i wen sʌclañob.

7 Chaʼan jiñi ñopoñel, cheʼ bʌ Dios tiʼ sube Noé chaʼan an chuqui mi caj i yujtel maxto bʌ añic baʼ ora ujtem, tsiʼ pʌsʌ chaʼan miʼ bʌcʼñan Dios i tsiʼ mele jumpʼejl arca chaʼan miʼ coltan jiñi añoʼ bʌ tiʼ yotot. Tiʼ tojlel jiñi i ñopoñel tsiʼ pʌsʌ chaʼan yom miʼ jisʌntel jiñi pañimil i tsaʼ qʼuejli ti toj chaʼan jiñi i ñopoñel.

8 Chaʼan jiñi ñopoñel, Abrahán tsiʼ jacʼʌ jiñi i pʌyol, i tsaʼ majli ti jumpʼejl lum muʼ bʌ caj i yʌqʼuentel. Tsaʼ loqʼui majlel anquese mach yujilic baqui woliʼ majlel. 9 Chaʼan jiñi ñopoñel tsaʼ chumle bajcheʼ juntiquil chʼoyol bʌ ti yambʌ país yaʼ ti lum tsaʼ bʌ wʌn subenti, lajal bajcheʼ chumul ti jumpʼejl lum mach bʌ i lumalic. Tsaʼ chumle ti pisil bʌ otot yicʼot Isaac yicʼot Jacob, muʼ bʌ caj i yʌqʼuentelob jaʼel jiñi tsaʼ bʌ subenti Abrahán. 10 Come woliʼ pijtan jiñi tejclum tsʌtsʌch bʌ baqui chucul, Dios bʌ tsiʼ chajpa bajcheʼ yilal yom yicʼot tsiʼ mele.

11 Chaʼan jiñi ñopoñel, Sara tsaʼ aqʼuenti i pʼʌtʌlel chaʼan miʼ yʌcʼ i pʼolbal anquese ñoxix,* come tsiʼ qʼuele chaʼan xucʼulʌch jiñi tsaʼ bʌ i yʌqʼue jiñi tʼan. 12 Jin chaʼan, tiʼ tojlel juntiquil wiñic chʌmeñix bʌ yilal tsaʼ tili cabʌl i yalobil, wen cabʌlob bajcheʼ jiñi ecʼ am bʌ ti panchan i maʼañic miʼ mejlel ti tsijquel bajcheʼ jiñi jiʼ am bʌ tiʼ tiʼ mar.

13 Tiʼ pejtelelob xucʼulob tiʼ ñopoñel tsaʼ chʌmiyob, anquese maʼañic tsaʼ aqʼuentiyob jiñi tsaʼ bʌ wʌn subentiyob. Pero tsiʼ ñajti qʼueleyob i tijicña tsiʼ yubiyob chaʼan jiñi, i tsiʼ jamʌ subuyob chaʼan chʼoyolob ti yambʌ tejclum i ñumel jach woliyob ti lum. 14 I jiñi cheʼ bʌ miʼ chaʼleñob tʼan bajcheʼ jiñi, miʼ jamʌ pʌsob chaʼan woliʼ chaʼleñob wersa i sʌclañob jumpʼejl i chumlib. 15 Pero cheʼ tsaʼic bej caji i ñaʼtañob jiñi tejclum baqui tsaʼ loqʼuiyob, tajol tsaʼʌch mejliyob ti chaʼ sujtel. 16 Pero wʌle, woliʼ chaʼleñob wersa i sʌclan ñumen wem bʌ i chumlib, ili jiñʌch jumpʼejl chumlib am bʌ ti panchan. Jin chaʼan Dios maʼañic miʼ quisñin i bʌ tiʼ cajob mi jiñicto tiʼ caj miʼ pejcañob tiʼ Dios, come tsiʼ chajpʌbeyob jumpʼejl tejclum.

17 Chaʼan jiñi ñopoñel, cheʼ bʌ Abrahán tsaʼ qʼuelbenti i pusicʼal, lajal bajcheʼ tsiʼ yʌcʼʌ Isaac, cheʼʌchi, jiñi wiñic tsaʼ bʌ i chʼʌmʌ ti wen jiñi tʼan tsaʼ bʌ subenti tsiʼ ñopo i yʌcʼ jiñi cojach bʌ i yalobil, 18 anquese tsaʼ subenti: «Tiʼ tojlel Isaac mi caj i tilel jiñi muʼ bʌ caj i cʌjñel bajcheʼ a pʼolbal». 19 Pero yujilʌch chaʼan Dios muʼto i mejlel i chʼojyesan* yaʼ baqui an chʌmeñoʼ bʌ, ili tsiʼ pʌsʌ muʼ bʌ caj i yujtel ti talto bʌ qʼuin.

20 Chaʼan jiñi ñopoñel, Isaac tsiʼ yʌqʼue bendición jaʼel jiñi Jacob yicʼot Esaú chaʼan jiñi muʼto bʌ caj i yujtel.

21 Chaʼan jiñi ñopoñel, cheʼ bʌ Jacob muqʼuix caj i chʌmel tsiʼ yʌqʼue bendición jujuntiquil i yalobil José i tsiʼ chʼujutesa Dios anquese mucʼ jax i cʼʌn i teʼ chaʼan miʼ coltan i bʌ.

22 Chaʼan jiñi ñopoñel, cheʼ bʌ José lʌcʼʌlix mi caj i chʌmel tiʼ sube i yalobilob Israel chaʼan mi caj i loqʼuelob ti Egipto yicʼot tsiʼ yʌlʌ chuqui yom miʼ tumbentel jiñi i bʌquel.*

23 Chaʼan jiñi ñopoñel, jiñi i tat i ñaʼ Moisés uxpʼejl uw tsiʼ mucuyob cheʼ bʌ tsiʼ yila pañimil, come tsiʼ qʼueleyob chaʼan wen utsʼatax bʌ chʼiton i maʼañic tsiʼ bʌcʼñayob i mandar jiñi rey. 24 Chaʼan jiñi ñopoñel, cheʼ bʌ Moisés ñuquix maʼañic tsiʼ mulaj* miʼ subentel tiʼ yalobil i yixicʼal faraón. 25 Tsiʼ yajca miʼ ticʼlʌntel yicʼot jiñi i tejclum Dios i mach jiñic cheʼ miʼ jumucʼ ñusan i bʌ ti jiñi mulil, 26 come tsiʼ qʼuele chaʼan cheʼ bʌ miʼ ñusan quisin tiʼ caj Cristo jiñʌch ñumen ñuc bʌ i cʼʌjñibal i mach jiñic jiñi lets tac bʌ i tojol am bʌ ti Egipto, come yaʼan i wut ti jiñi i majtan muʼ bʌ caj i yʌqʼuentel. 27 Chaʼan jiñi ñopoñel, tsiʼ cʌyʌ Egipto i maʼañic tsiʼ bʌcʼñʌbe i michʼajel jiñi rey, come xucʼul tsaʼ ajñi, lajal bajcheʼ woliyʌch i qʼuel jiñi mach bʌ tsiquilic. 28 Chaʼan jiñi ñopoñel, tsiʼ mele jiñi Pascua i tiʼ tsijca ti chʼichʼ i joytʌlel jiñi puerta, chaʼan jiñi xjisaya maʼañic miʼ tsʌnsʌbeñob* jiñi ñaxam bʌ i yalobilob.

29 Chaʼan jiñi ñopoñel, jiñi tejclum tsaʼ cʼaxi yaʼ ti Chʌchʌc bʌ mar bajcheʼ tiquin bʌ lum. Pero cheʼ bʌ jiñi egipciojob tsiʼ ñopoyob cʼaxel jaʼel, jiñi mar tsiʼ jisayob.

30 Chaʼan jiñi ñopoñel, jiñi tejclum 7 qʼuin tsiʼ joyoyob ñumel jiñi i murojlel Jericó, i tsaʼ jejmi. 31 Chaʼan jiñi ñopoñel, Rahab, jiñi muʼ bʌ i chon i bʌ, maʼañic tsaʼ chʌmi yicʼotob jiñi xñusatʼan, come wen jach tsiʼ yotsa tiʼ yotot jiñi xchijtob.

32 ¿I chuquito miʼ bej mejlel cʌl? Come mach jastiyic c chaʼan i yorajlel chaʼan mic tajbeñetla ti tʼan Gedeón, Barac, Sansón, Jefté yicʼot David, cheʼ bajcheʼ Samuel yicʼot jiñi yambʌ xʼaltʼañob. 33 Chaʼan jiñi ñopoñel, tsiʼ jisayob yumʌntel tac, tsiʼ meleyob chuqui toj, tsaʼ aqʼuentiyob jiñi tʼan chaʼan chuqui mi caj i tajob, tsiʼ mʌcbeyob i yej león, 34 tsiʼ yʌpbeyob i pʼʌtʌlel cʼajc, tsiʼ putsʼtayob jiñi espada chaʼan maʼañic miʼ tsʌnsʌntelob, cʼuñob pero tsaʼ pʼʌtʼayob, pʼʌtʌlob ti jiñi guerra i tsiʼ putsʼtesayob jiñi soldadojob i contrajoʼ bʌ. 35 An xʼixicob tsaʼ bʌ i chaʼ tajayob jiñi i familia chʌmeñobix bʌ cheʼ tsaʼ chaʼ chʼojyiyob, pero an wiñicob tsaʼ bʌ wen ticʼlʌntiyob tiʼ caj maʼañic tsiʼ jacʼʌyob chaʼan an bajcheʼ miʼ mejlelob ti cojlel, chaʼan miʼ mejlel i tajob jiñi ñumen wem bʌ chaʼ chʼojyel. 36 I an yambʌlob tsaʼ bʌ i ñusayob i wajlentel yicʼot i sʌsʌp jajtsʼelob,* i ñumen tsʌtsto chuqui tsiʼ ñusayob, tsaʼ cʌjchiyob ti cadena i tsaʼ ñujpʼiyob ti cárcel. 37 Tsaʼ jujliyob ti xajlel,* tsaʼ qʼuelbentiyob i pusicʼal, tsaʼ tsejpiyob ti chaʼpʼejl* i tsaʼ tsʌnsʌntiyob ti espada, tsiʼ chaʼleyob xʌmbal ñumel i lʌpʌlob i chaʼan i pʌchʌlel tiñʌmeʼ yicʼot i pʌchʌlel chivo, anto chuqui yomob i chaʼan tsaʼ ñumiyob, tsiʼ ñusayob wocol i tsaʼ ticʼlʌntiyob, 38 i jiñi pañimil mach i wentʌlelic an i chaʼan wiñicob cheʼoʼ bʌ bajcheʼ jiñi. Tsiʼ chaʼleyob xʌmbal tiʼ tiquiñal lum, ti wits, ti chʼen yicʼot tiʼ yebal xajlel.

39 I anquese tsaʼ pʌsbentiyob chaʼan utsʼatʌch miʼ qʼuejlelob ti Dios chaʼan jiñi i ñopoñelob, maʼañic tsaʼ aqʼuentiyob jiñi tsaʼ bʌ wʌn subentiyob, 40 come Dios an chuqui ñumen wem bʌ chajpʌbil i chaʼan chaʼañonla, chaʼan joñonla mi lac ñaxan sujtel ti toj i mach jiñobic.