1 Corintios
1 I chaʼan Pablo (tsaʼ bʌ pʌjyi chaʼan miʼ sujtel tiʼ yapóstol Cristo Jesús come cheʼʌch yom Dios) yicʼot jiñi la quermañu Sóstenes, 2 tiʼ tojlel jiñi i congregación Dios am bʌ ti Corinto, jatetla, tsaʼ bʌ sʌqʼuesʌntiyetla laʼ wicʼot Cristo Jesús, tsaʼ bʌ pʌjyiyetla chaʼan chʼujul mi laʼ wajñel laʼ wicʼotob jiñi woli bʌ i subob i cʼabaʼ lac Yum Jesucristo ti baqui jach bʌ pañimil, i Yumob yicʼot lac Yumʌch jaʼel:
3 Tajala jiñi ñuc bʌ i yutslel yicʼot i ñʌchʼtʌlel Dios jiñi lac Tat yicʼot jiñi i chaʼan lac Yum Jesucristo.
4 Tiʼ pejtelel ora mi cʌqʼuen wocolix i yʌlʌ c Dios ti laʼ tojlel tiʼ caj jiñi ñuc bʌ i yutslel tsaʼ bʌ i pʌsbeyetla ti Cristo Jesús. 5 Come Dios cabʌl chuqui tsiʼ yʌqʼueyetla tiʼ tojlel, jin chaʼan miʼ mejlel laʼ sub ti wen jiñi i tʼan Dios i wen laʼ cʌñʌ jiñi i sujmlel, 6 cheʼʌch bajcheʼ tsiʼ xucʼchoco ti laʼ tojlel jiñi tʼan chaʼan bʌ Cristo, 7 jin chaʼan jatetla an laʼ chaʼan pejtelel chuqui i cʼʌjñibal laʼ chaʼan cheʼ bʌ wolito laʼ pijtan chaʼan miʼ tsictiyel lac Yum Jesucristo. 8 Mi caj i xucʼchocoñetla cʼʌlʌl tiʼ jilibal chaʼan maʼañic miʼ tajtʌl laʼ mul cheʼ tiʼ qʼuiñilel lac Yum Jesucristo. 9 Dios xucʼulʌch. Tsiʼ pʌyʌyetla chaʼan temel mi laʼ wajñel laʼ wicʼot i Yalobil, jiñi lac Yum Jesucristo.
10 Wʌleʼli, hermanojob, tiʼ cʼabaʼ lac Yum Jesucristo mic subeñetla ti wocol tʼan chaʼan yom temeletla ti laʼ tʼan yicʼot chaʼan mach yomic an tʼox bʌ ti laʼ tojlel, chaʼan junlajal chuqui mi laʼ ñaʼtan. 11 Come, quermañujob, chaʼtiqui uxtiquil añoʼ bʌ tiʼ yotot Cloe tsiʼ yʌqʼueyoñob c ñaʼtan chaʼan an wocol ti laʼ tojlel. 12 Mi cʌl iliyi come jujuntiquil woliʼ yʌl chuqui yom: «Joñon i chaʼañon Pablo», «Joñon i chaʼañon Apolos», «Joñon i chaʼañon Cefas»,* «I joñon i chaʼañon Cristo». 13 ¿Tʼoxol ba jiñi Cristo? ¿Tsaʼ ba chʼijle* ti teʼ Pablo ti laʼ caj? ¿O tiʼ cʼabaʼ ba Pablo tsaʼ aqʼuentiyetla chʼʌmjaʼ?* 14 Mi cʌqʼuen wocolix i yʌlʌ Dios chaʼan mi juntiquileticla tsaʼ cʌqʼueyetla chʼʌmjaʼ, cojach Crispo yicʼot Gayo, 15 come cheʼ bajcheʼ jiñi mi juntiquilic miʼ mejlel i yʌl chaʼan tsaʼ aqʼuentiyetla chʼʌmjaʼ tij cʼabaʼ. 16 I sujmʌch, tsaʼ cʌqʼueyob chʼʌmjaʼ jaʼel jiñi añoʼ bʌ tiʼ yotot Estéfanas. I maʼañic cʼajal c chaʼan mi an majqui yambʌ tsaʼ cʌqʼue chʼʌmjaʼ. 17 Cristo maʼañic tsiʼ chocoyon tilel chaʼan mi cʌcʼ chʼʌmjaʼ, chaʼañʌch mic sub jiñi wen tʼan, pero mach cheʼic bajcheʼ miʼ chaʼleñob tʼan jiñi wen añoʼ bʌ i ñaʼtʌbal, i cheʼ bajcheʼ jiñi maʼañic mic jisʌben i cʼʌjñibal cheʼ tsaʼ chʌmi Cristo yaʼ ti teʼ chaʼan bʌ wocol.*
18 Tiʼ sujm, jiñi wen tʼan chaʼan jiñi teʼ chaʼan bʌ wocol* maʼañic i cʼʌjñibal miʼ qʼuelob jiñi majlel bʌ mucʼob ti jisʌntel,* pero chaʼan joñonla, woli bʌ laj coltʌntel, i pʼʌtʌlelʌch Dios. 19 Come tsʼijbubil: «Mi caj c jisʌbeñob i ñaʼtʌbal jiñi wen añoʼ bʌ i ñaʼtʌbal i maʼañic mi caj c chʼʌm ti ñuc chuqui yujil jiñi wen yujiloʼ bʌ». 20 ¿Baqui an jiñi wen am bʌ i ñaʼtʌbal? ¿Baqui an jiñi xtsʼijbaya?* ¿Baqui an jiñi muʼ bʌ i wen mulan leto* ti ili pañimil? Dios tsiʼ jisʌbe i cʼʌjñibal i ñaʼtʌbal ili pañimil, ¿mach ba cheʼiqui? 21 Jiñi lac piʼʌlob ti pañimil maʼañic tsiʼ cʌñʌyob Dios come cʌyʌlob tiʼ bajñel ñaʼtʌbalob. Pero Dios tsiʼ pʌsʌ i ñaʼtʌbal cheʼ tsiʼ colta jiñi muʼ bʌ i ñopob jiñi tʼan muʼ bʌ lac sub mach bʌ añic i cʼʌjñibal tiʼ wut jiñi lac piʼʌlob.
22 Weno, jiñi judíojob miʼ cʼajtiñob milagro tac i jiñi griegojob miʼ sʌclañob i ñaʼtʌbal. 23 Pero joñonla mi lac sub jiñi wen tʼan tiʼ tojlel Cristo, jiñi tsaʼ bʌ jichʼchoconti ti teʼ, iliyi miʼ mʌctan* jiñi judíojob i jiñi tejclum tac maʼañic i cʼʌjñibal miʼ qʼuelob. 24 Pero tiʼ tojlel jiñi pʌybiloʼ bʌ, mach yʌlʌyic mi judíojob o griegojob, Cristo i pʼʌtʌlelʌch Dios yicʼot i ñaʼtʌbalʌch Dios. 25 Jiñi i chaʼan tac bʌ Dios mach bʌ añic i cʼʌjñibal tiʼ wut lac piʼʌlob ñumen an i ñaʼtʌbal bajcheʼ jiñi lac piʼʌlob, i jiñi i chaʼan tac bʌ Dios mach bʌ pʼʌtʌlic tiʼ wut lac piʼʌlob ñumen pʼʌtʌl bajcheʼ lac piʼʌlob.
26 Hermanojob, qʼuele laʼ bʌ, jatetla tsaʼ bʌ pʌjyiyetla: Tiʼ wut jiñi lac piʼʌlob mach cabʌleticla wen am bʌ laʼ ñaʼtʌbal mi jiñicto wen am bʌ laʼ pʼʌtʌlel i mi jiñicto tilemetbʌla ti familia tac wen ñucoʼ bʌ. 27 Dios tsiʼ yajca jiñi mach bʌ añic tac i cʼʌjñibal ti pañimil chaʼan miʼ yʌcʼ ti quisin jiñi wen añoʼ bʌ i ñaʼtʌbal. Dios tsiʼ yajca jiñi mach bʌ pʼʌtʌlic tac ti pañimil chaʼan miʼ yʌcʼ ti quisin chuqui tac pʼʌtʌl bʌ. 28 Dios tsiʼ yajca chuqui tac mach ñuquic ti pañimil yicʼot chuqui tac tsʼaʼlebil, jiñi mach bʌ añic i cʼʌjñibal tac, chaʼan miʼ jisan jiñi am bʌ i cʼʌjñibal tac, 29 chaʼan maʼañic majqui miʼ mejlel i qʼuel i bʌ ti ñuc tiʼ tojlel Dios. 30 Wocolix i yʌlʌ Dios temeletla laʼ wicʼot Cristo Jesús. Jin miʼ yʌcʼ ti cʌñol jiñi i ñaʼtʌbal yicʼot i tojel Dios. Tiʼ tojlel Jesús jiñi lac piʼʌlob miʼ mejlelob ti sujtel ti chʼujul i mi laʼ mejlel ti sujtel ti libre chaʼan tsiʼ yʌcʼʌ i cuxtʌlel, 31 chaʼan miʼ yujtel cheʼ bajcheʼ tsʼijbubil: «Jiñi muʼ bʌ i qʼuel i bʌ ti ñuc, laʼ i qʼuel i bʌ ti ñuc tiʼ caj Jehová».*