Mateo
3 Ti jimbʌ ora, Juan jiñi Xʼacʼ chʼʌmjaʼ tsaʼ caji ti subtʼan yaʼ tiʼ tiquiñal lum am bʌ ti Judea. 2 Tsiʼ yʌlʌ: «Chaʼ ñaʼtañix laʼ bʌ* come tsaʼix lʌcʼtiyi jiñi i Yumʌntel panchan». 3 Tiʼ sujm, jiñʌch tsaʼ bʌ i taja ti tʼan jiñi xʼaltʼan Isaías: «I tʼañʌch juntiquil woli bʌ ti oñel tiʼ tiquiñal lum: ‹¡Chajpʌbenla i bijlel Jehová!* Tojach yom mi laʼ chajpan›». 4 Juan lʌpʌl i chaʼan i pislel melbil bʌ tiʼ tsutsel camello yicʼot an i cʌjchil i ñʌcʼ melbil bʌ ti pʌchi. Miʼ weʼsan i bʌ ti sajcʼ yicʼot teʼlechab. 5 Jiñi chʼoyoloʼ bʌ ti Jerusalén, ti Judea yicʼot yaʼ ti tejclum tac am bʌ tiʼ joytʌlel Jordán tsaʼ majli i qʼuelob. 6 Juan tsiʼ yʌcʼʌ chʼʌmjaʼ* yaʼ ti Jordán jaʼ, i jiñi lac piʼʌlob tsiʼ jamʌ subuyob i mul.
7 Cheʼ bʌ tsiʼ qʼuele yaʼ tilel fariseojob* yicʼot saduceojob* yaʼ baqui woliʼ yʌcʼ chʼʌmjaʼ, tiʼ subeyob: «I yaletla lucum am bʌ i venenojlel, ¿majqui tiʼ subeyetla chaʼan mi laʼ putsʼtan jiñi michʼajel muʼ bʌ caj i tilel? 8 Ñaxan chaʼlenla wut muʼ bʌ i pʌs chaʼan tsaʼix laʼ chaʼ ñaʼta laʼ bʌ. 9 Mach laʼ lon ñaʼtan laʼ wʌl: ‹Jiñi lon c tat jiñʌch Abrahán›. Come mic subeñetla chaʼan Dios miʼ mejlel i techben i yalobilob Abrahán ti ili xajlel* tac. 10 Jiñi jacha yaʼix an tiʼ tʼejl i wiʼ jiñi teʼ tac. Jin chaʼan, pejtelel jiñi teʼ mach bʌ añic miʼ yʌcʼ wem bʌ i wut mi caj i sejqʼuel i mi caj i chojquel ti cʼajc. 11 Joñon mi cʌqʼueñetla chʼʌmjaʼ chaʼan tsaʼ laʼ chaʼ ñaʼta laʼ bʌ. Pero jiñi tal bʌ ñumen pʼʌtʌl bajcheʼ joñon, i mach ñucoñic chaʼan mic jochben i warach. Mi caj i yʌqʼueñetla chʼʌmjaʼ ti chʼujul bʌ espíritu yicʼot ti cʼajc. 12 An i yeʼtijib i mi caj i junyajl sʌqʼuesan yaʼ baqui miʼ locʼsʌbentel i pat jiñi trigo.* Mi caj i tempan jiñi trigo i mi caj i lot yaʼ tiʼ yototlel, pero jiñi i pat mi caj i pul ti cʼajc mach bʌ yujilic yʌjpel».
13 Cheʼ jiñi, Jesús tsaʼ loqʼui ti Galilea i tsaʼ majli ti Jordán jaʼ chaʼan Juan miʼ yʌqʼuen chʼʌmjaʼ. 14 Pero Juan tsiʼ jopʼo i mʌctan. Tiʼ sube: «Jatet yom bʌ maʼ wʌcʼon ti chʼʌmjaʼ, ¿i a wom chaʼan joñon mi cʌqʼuet ti chʼʌmjaʼ?». 15 Jesús tsiʼ jacʼbe: «Wʌleʼli, laʼ mejlic bajcheʼ ili come weñʌch cheʼ mi lac tsʼʌctesan chuqui toj». Cheʼ jiñi, Juan tsiʼ cʌyʌ i mʌctan. 16 Cheʼ bʌ Jesús tsiʼ chʼʌmʌ jaʼ, tsaʼ loqʼui yaʼ ti jaʼ, i ti jiñi bʌ ora tsaʼ jajmi jiñi panchan i tsiʼ qʼuele* jiñi i yespíritu Dios woliʼ jubel tilel bajcheʼ xʼujcuts tiʼ tojlel Jesús. 17 Cheʼ jiñi, tsaʼ loqʼui tʼan ti panchan: «Ili jiñʌch cʼuxbibil bʌ Calobil, utsʼat mij qʼuel».