2 Tesalonicenses
1 I chaʼan Pablo, Silvano* yicʼot Timoteo tiʼ tojlel jiñi congregación am bʌ ti Tesalónica i chaʼan bʌ Dios jiñi lac Tat yicʼot i chaʼan lac Yum Jesucristo:
2 Tajala jiñi ñuc bʌ i yutslel yicʼot i ñʌchʼtʌlel Dios jiñi Tatʌl yicʼot jiñi i chaʼan lac Yum Jesucristo.
3 Hermanojob, tiʼ pejtelel ora mi cubin lojon chaʼan wersa yom mi cʌqʼuen lon wocolix i yʌlʌ Dios chaʼañetla. Weñʌch cheʼ mi lon c mel, come jiñi laʼ ñopoñel woliʼ ñumen colel majlel i jiñi laʼ cʼuxbiya muʼ bʌ laʼ wubin tiʼ tojlel yambʌlob i ti jujuntiquiletla woliʼ pʼojlel majlel. 4 Jin chaʼan, joñon lojon mi cʌqʼueñet lon laʼ ñuclel ti jiñi i congregación tac Dios chaʼan bajcheʼ woli laʼ cuch wocol yicʼot bajcheʼ woli laʼ pʌs laʼ ñopoñel anquese wen an laʼ contrajintel yicʼot woli laʼ ñusan wocol. 5 Pejtelel iliyi miʼ pʌs chaʼan tojʌch jiñi i meloñel Dios i miʼ yʌcʼ chaʼan jatetla weñʌch mi laʼ qʼuejlel chaʼan mi laʼ wochel tiʼ Yumʌntel Dios, jiñʌch bʌ tiʼ caj woli laʼ ñusan wocol.
6 Tiʼ sujm, i tojelʌch cheʼ Dios miʼ yʌqʼueñob wocol chaʼan miʼ tojob i mul jiñi woli bʌ i yʌqʼueñetla laʼ ñusan wocol. 7 Pero jatetla woli bʌ laʼ ñusan wocol mi caj laʼ taj laʼ coltʌntel, i cheʼʌch joñon lon jaʼel, cheʼ bʌ jiñi lac Yum Jesús miʼ tsictiyel yaʼ ti panchan yicʼot jiñi pʼʌtʌl bʌ i yángelob tiʼ yojlil cʼajc, 8 cheʼ bʌ miʼ yʌqʼuen i toj i mul jiñi mach bʌ i cʌñʌyobic Dios yicʼot jiñi mach bʌ añic miʼ jacʼob jiñi wen tʼan chaʼan bʌ jiñi lac Yum Jesús. 9 Jiñi lac Yum mi caj i chaʼlen meloñel tiʼ tojlelob. Jiñi i tojolob i mul jiñʌch i jisʌntelob tiʼ pejtelel ora, cheʼ bajcheʼ jiñi maʼañix mi caj i qʼuelob yicʼot i coltañob ti jiñi ñuc bʌ i pʼʌtʌlel, 10 cheʼ bʌ miʼ tilel chaʼan miʼ ñuqʼuesʌntel yicʼotob jiñi chʼujuloʼ bʌ i chaʼan, pejtelel jiñi añoʼ bʌ i ñopoñel tiʼ tojlel mi caj i toj sajtelob i pusicʼal. Jatetla yaʼ mi caj laʼ wajñel laʼ wicʼot come tsaʼ laʼ ñopo jiñi tsaʼ bʌ c subeyet lojon.
11 Chaʼan miʼ tajtʌl iliyi tiʼ pejtelel ora mi lon c chaʼlen oración ti laʼ tojlel, chaʼan jiñi lac Dios utsʼat miʼ qʼuel cheʼ tsiʼ pʌyʌyetla yicʼot chaʼan tiʼ pʼʌtʌlel miʼ mel ti tsʼʌcʌl chuqui wem bʌ yom i mel yicʼot miʼ tsʼʌctesan pejtelel am bʌ laʼ mele tilel chaʼan jiñi laʼ ñopoñel. 12 Cheʼ bajcheʼ iliyi, jiñi i cʼabaʼ lac Yum Jesús mi caj i ñuqʼuesʌntel ti laʼ tojlel i jatetla mi laʼ ñuqʼuesʌntel laʼ wicʼot, ili mi caj i pʌs jiñi ñuc bʌ i yutslel lac Dios yicʼot i chaʼan lac Yum Jesucristo.