Romanos
13 Ti laʼ pejtelel yom mi laʼ chuc laʼ bʌ tiʼ tojlel jiñi añoʼ bʌ i yeʼtel come pejtelel jiñi añoʼ bʌ i yeʼtel acʼbilob ti Dios, Dios tsiʼ waʼchocoyob ti jujuntiquilob. 2 Jin chaʼan, jiñi maʼañic bʌ miʼ jacʼben i tʼan jiñi am bʌ i yeʼtel woliʼ yʌcʼ i bʌ tiʼ contra chuqui waʼchocobil i chaʼan Dios, jiñi am bʌ i yʌcʼʌyob i bʌ tiʼ contra ili tsaʼ bʌ i waʼchoco Dios mi caj i yʌqʼuentelob i toj i mul. 3 Jiñi muʼ bʌ i melob chuqui tac wen maʼañic miʼ bʌcʼñañob jiñi yumʌlob, pero jiñi muʼ bʌ i melob chuqui tac mach weñic mucʼʌch i chaʼleñob bʌqʼuen. Jin chaʼan, ¿a wom ba cheʼ maʼañic a bʌqʼuen tiʼ tojlel jiñi am bʌ i yeʼtel? Chaʼancu chʌn mele chuqui wen i jiñi am bʌ i yeʼtel mi caj i qʼuelet ti ñuc, 4 come xʼeʼtel* i chaʼan Dios chaʼan a wenlel. Pero mi woli a mel chuqui tac mach weñic, chaʼlen bʌqʼuen, come mach toʼolic jach an i yespada jiñi am bʌ i yeʼtel. Xʼeʼtel i chaʼan Dios chaʼan miʼ yʌqʼuen i toj i mul jiñi muʼ bʌ i mel mach bʌ wentaquic.
5 Jin chaʼan, cʼʌñʌlʌch mi laʼ chuc laʼ bʌ tiʼ tojlelob, i mach chaʼañic jach maʼañic mi laʼ wʌqʼuentel laʼ toj laʼ mul, chaʼañʌch wen miʼ yajñel jaʼel jiñi laʼ conciencia. 6 Jin mecu chaʼan mi laʼ chaʼlen tojoñel jaʼel come jiñi yumʌlob xʼeʼtelob i chaʼan Dios muʼ bʌ i melob ili eʼtel ti jujumpʼejl qʼuin. 7 Aqʼuenla chuqui yom bʌ miʼ yʌqʼuentelob tiʼ pejtelelob: Jiñi muʼ bʌ i cʼajtin tojoñel, aqʼuenla baqui jach bʌ tojoñel, jiñi muʼ bʌ i cʼajtin i bʌcʼñʌntel, bʌcʼñanla, jiñi muʼ bʌ i cʼajtin i ñuclel, aqʼuenla i ñuclel.
8 Maʼañic majqui yom an laʼ bet tiʼ tojlel, cojach yom mi laʼ cʼuxbin laʼ bʌ come jiñi muʼ bʌ i cʼuxbin i piʼʌl tsaʼix i tsʼʌctesa jiñi mandar. 9 Come jiñi mandar tac, «mach a piʼlen yambʌ mach bʌ a piʼʌlic, mach a chaʼlen tsʌnsa, mach a chaʼlen xujchʼ, mach a wen mulan chuqui an» yicʼot baqui jach bʌ yambʌ mandar, jumpʼejl jach mandar tiʼ pejtelel, jiñʌch iliyi: «Cʼuxbin a piʼʌl cheʼ bajcheʼ maʼ bajñel cʼuxbin a bʌ». 10 Jiñi yujil bʌ cʼuxbiya maʼañic chuqui miʼ tumben i piʼʌl. Jin chaʼan, jiñi cʼuxbiya jiñʌch i tsʼʌctesʌntel jiñi mandar.
11 Yom mi laʼ mel jiñi tsaʼ bʌ c subeyetla, i yorajlelix jaʼel chaʼan miʼ cajñel laʼ wut* come ñumen lʌcʼʌlix jiñi laj coltʌntel, mach chʌn cheʼix bajcheʼ cheʼ bʌ tsaʼ sujtiyonla ti xñoptʼan. 12 Wen tamix jiñi acʼʌlel, talix jiñi qʼuin. Laʼ laj cʌy jiñi melbalʌl tac chaʼan bʌ icʼyochʼañiyel i laʼ lac chʼʌm* jiñi eʼtijib tac chaʼan bʌ qʼuiñil. 13 Yom wen jiñi lac melbal cheʼ bajcheʼ yilal ti qʼuiñil, mach lac chaʼlen qʼuiñijel tac ñumeñix bʌ ti pʼis mi yomicto mi lac chaʼlen yʌcʼʌjel,* tsʼiʼlel yicʼot mach yomic an quisintic jax bʌ lac melbal,* mi yomicto mi lac chaʼlen leto* o an lac michʼ pusicʼal. 14 Tsajcʌbenla i melbal jiñi lac Yum Jesucristo i mach laʼ wʌn chajpan laʼ mel jiñi yom bʌ laʼ bʌcʼtal.