1 Juan

4 Cʼuxbibiletbʌla, mach laʼ ñop baqui jach bʌ tʼan poj tilem bʌ ti Dios yilal, ñaxan wen qʼuelela mi jiñi tʼan tilemʌch ti Dios, come loqʼuemob cabʌl xlot bʌ xʼaltʼañob ti pañimil.

2 Ili jiñʌch bajcheʼ miʼ mejlel laʼ ñaʼtan mi jumpʼejl tʼan tilem ti Dios: Pejtelel tʼan muʼ bʌ i pʌs chaʼan Jesucristo tsajñi bajcheʼ wiñic tilemʌch ti Dios. 3 Pero mach tilemic ti Dios mi jumpʼejlic tʼan maʼañic bʌ miʼ jamʌ sub Jesús. Jiñi tʼan tilem ti jiñi muʼ bʌ i contrajin Cristo,* jiñi tsaʼ bʌ laʼ wubi chaʼan mi caj i tilel yicʼot wʌʼix bʌ an ti pañimil.

4 Cʼuxbibil bʌ calobilob, jatetla tilemetla ti Dios i tsaʼix laʼ mʌlbeyob* come jiñi temel bʌ yicʼotetla ñumen ñuc bajcheʼ jiñi temel bʌ yicʼot jiñi pañimil. 5 Jiñiyob tilemob ti pañimil, jin chaʼan miʼ yʌlob chuqui tac tilem bʌ ti pañimil i jiñi pañimil miʼ ñʌchʼtañob. 6 Joñonla tilemonla ti Dios. Jiñi muʼ bʌ i cʌn Dios miʼ ñʌchʼtañonla, jiñi mach bʌ tilemic ti Dios maʼañic miʼ ñʌchʼtañonla. Cheʼ bajcheʼ jiñi miʼ mejlel laj cʌn baqui bʌ jiñi tʼan tilem bʌ tiʼ sujmlel yicʼot baqui bʌ jiñi tʼan mach bʌ i sujmic.

7 Cʼuxbibiletbʌla, laʼ lac chʌn cʼuxbin lac bʌ, come jiñi cʼuxbiya i chaʼañʌch Dios, i pejtelel jiñi muʼ bʌ pʌs cʼuxbiya i yalobilʌch Dios yicʼot i cʌñʌyʌch Dios. 8 Jiñi mach bʌ yujilic cʼuxbiya maxto i cʌñʌyic Dios, come Dios cʼuxbiyajʌch. 9 Cheʼ bajcheʼ iliyi tsaʼ tsictiyi i cʼuxbiya Dios ti lac tojlel: Dios tsiʼ choco tilel ti pañimil jiñi cojim bʌ i Yalobil chaʼan mi lac taj laj cuxtʌlel tiʼ coltaya. 10 Dios tsiʼ choco tilel i Yalobil bajcheʼ majtañʌl chaʼan miʼ ñusʌntel lac mul. Tsiʼ mele iliyi come tsiʼ cʼuxbiyonla, mach chaʼañic joñonla tsaʼ laj cʼuxbi.

11 Cʼuxbibiletbʌla, mi Dios tsiʼ cʼuxbiyonla bajcheʼ jiñi, joñonla jaʼel yom mi lac wersa cʼuxbin lac bʌ. 12 Maʼañic majqui wis qʼuelbil i chaʼan Dios. Mi mucʼʌch lac bej cʼuxbin lac bʌ, Dios miʼ bej ajñel ti lac tojlel i jiñi i cʼuxbiya tsʼʌcʌlix miʼ yajñel ti lac tojlel. 13 La cujil chaʼan chʌn temelonla la quicʼot yicʼot chaʼan chʌn temel yicʼotonla chaʼan iliyi: Come tsiʼ yʌqʼueyonla jiñi i yespíritu. 14 Cheʼ jaʼel, joñon lojon tsaʼ lon j qʼuele chaʼan jiñi Tatʌl tsiʼ choco tilel jiñi i Yalobil bajcheʼ xcoltaya i chaʼan jiñi pañimil i mi lon cʌcʼ ti cʌñol jiñi. 15 Mi an muʼ bʌ i sub ti jumpʼejl i pusicʼal chaʼan Jesús i Yalobilʌch Dios, Dios temel miʼ yajñel yicʼot i jiñi lac piʼʌl temel miʼ yajñel yicʼot Dios. 16 I joñonla tsaʼix laj cʌñʌ jiñi i cʼuxbiya Dios ti lac tojlel i mi lac ñop ti jiñi cʼuxbiya.

Dios cʼuxbiyajʌch, i jiñi muʼ bʌ i chʌn ajñel ti jiñi cʼuxbiya temel miʼ yajñel yicʼot Dios, i Dios temel miʼ yajñel yicʼot. 17 Cheʼ bajcheʼ iliyi, jiñi cʼuxbiya tsʼʌcʌl miʼ yajñel ti lac tojlel chaʼan cheʼ tiʼ qʼuiñilel meloñel maʼañic lac bʌqʼuen mi lac chaʼlen tʼan, come ti ili pañimil joñonla lajalonla bajcheʼ Cristo. 18 Maʼañic bʌqʼuen ti jiñi cʼuxbiya, jiñi tsʼʌcʌl bʌ cʼuxbiya miʼ choc loqʼuel jiñi bʌqʼuen, come jiñi bʌqʼuen miʼ mʌctañonla. Tiʼ sujm, jiñi am bʌ i bʌqʼuen maxto tsʼʌcʌlic i cʼuxbiya. 19 Joñonla la cujil cʼuxbiya come Dios tsiʼ ñaxan cʼuxbiyonla.

20 Mi an muʼ bʌ i yʌl «Joñon mij cʼuxbin Dios» pero miʼ tsʼaʼlen i yermañu, juntiquilʌch xlot. Come jiñi maʼañic bʌ miʼ cʼuxbin i yermañu, muʼ bʌ i taj i qʼuel, maʼañic miʼ mejlel i cʼuxbin Dios, maʼañic bʌ miʼ taj i qʼuel. 21 Dios tsiʼ yʌqʼueyonla ili mandar: Jiñi muʼ bʌ i cʼuxbin Dios laʼ i cʼuxbin i yermañu jaʼel.