1 Juan

1 Mic tsʼijbubeñet lojon chaʼan jiñi añix bʌ cʼʌlʌl tiʼ cajibal, jiñi tsaʼ bʌ lon cubi, jiñi tsaʼ bʌ lon j qʼuele ti lon c wut, jiñi tsaʼ bʌ lon c tsaji* i jiñi tsaʼ bʌ lon c tʌlʌ ti lon j cʼʌb, mic tsʼijbubeñet lon chaʼan bʌ jiñi tʼan chaʼan cuxtʌlel 2 (cheʼʌchi, jiñi cuxtʌlel tsaʼ tsictiyi, i joñon lon tsaʼ lon j qʼuele i woli lon cʌcʼ ti cʌñol yicʼot lon c subeñetla chaʼan bʌ jiñi cuxtʌlel mach bʌ añic miʼ jilel yaʼ bʌ lon an yicʼot jiñi Tatʌl i tsaʼ bʌ aqʼuentiyon lon j cʌn), 3 jiñi tsaʼ bʌ lon j qʼuele yicʼot tsaʼ bʌ lon cubi, woli lon c subeñetla, chaʼan jatetla jaʼel temeletla laʼ wicʼoton lojon. I joñon lojon temel lon quicʼot jiñi Tatʌl yicʼot Jesucristo, jiñi i Yalobil. 4 Mic tsʼijbun lon iliyi chaʼan tsʼʌcʌl jiñi lac tijicñʌyel.

5 Ili jiñʌch jiñi tʼan tsaʼ bʌ lon cubi i yʌl yicʼot woli bʌ lon c subeñetla: Dios jiñʌch jiñi sʌcjamañiyel i mach wis añic icʼyochʼañiyel tiʼ tojlel. 6 Mi tsaʼ la cʌlʌ «Temelonla la quicʼot» pero bej añontola ti icʼyochʼañiyel, woli lac chaʼlen lot i maʼañic woli lac mel cheʼ bajcheʼ miʼ yʌl jiñi i sujmlel. 7 Pero mi añonla ti sʌcjamañiyel, cheʼ bajcheʼ Dios an ti sʌcjamañiyel, temelonla, i jiñi i chʼichʼel Jesús, jiñi i Yalobil, miʼ sʌqʼuesañonla tiʼ pejtelel mulil.

8 Mi tsaʼ la cʌlʌ chaʼan «Maʼañic lac mul», woli lac bajñel lotin lac bʌ i maʼañic ti lac tojlel jiñi i sujmlel. 9 Mi tsaʼ lac subu lac mul, Dios miʼ ñusan lac mul yicʼot miʼ sʌqʼuesañonla tiʼ pejtelel chuqui mach bʌ weñic tsaʼ lac mele come xucʼulʌch yicʼot tojʌch. 10 Mi tsaʼ la cʌlʌ chaʼan «Maʼañic chaʼlebil lac chaʼan mulil» woli laj cuy ti xlot i maʼañic ti lac tojlel jiñi i tʼan.