Romanos

1 I chaʼan Pablo, xyaj eʼtel i chaʼan Cristo Jesús i pʌybil bʌ chaʼan miʼ sujtel ti apóstol, yajcʌbil bʌ chaʼan miʼ sub jiñi wen tʼan tilem bʌ ti Dios, 2 wʌn albilix bʌ i chaʼan Dios tiʼ tojlel jiñi xʼaltʼañob i chaʼan yaʼ ti Tsʼijbujel tac 3 muʼ bʌ i taj ti tʼan jiñi i Yalobil. Tsaʼ tili tiʼ pʼolbal David bajcheʼ juntiquil lac piʼʌl, 4 tiʼ pʼʌtʌlel jiñi chʼujul bʌ espíritu tsaʼ cʌjñi bajcheʼ i Yalobil Dios. Ili tsaʼ ujti cheʼ bʌ tsaʼ chʼojyesʌnti* yaʼ baqui an chʌmeñoʼ bʌ (cheʼʌchi, jiñi lac Yum Jesucristo, 5 tiʼ tojlel tsaʼ aqʼuentiyonla jiñi ñuc bʌ i yutslel Dios yicʼot chaʼan mi la cochel ti apóstol chaʼan jiñi lac piʼʌlob tiʼ pejtelel tejclum miʼ mejlel i jacʼbeñob i tʼan chaʼan jiñi i ñopoñelob i miʼ yʌqʼuentel i ñuclel i cʼabaʼ, 6 jatetla ochemetla jaʼel ti jiñi tejclum tac, i Dios tsiʼ pʌyʌyetla jaʼel chaʼan mi laʼ wochel ti jiñi i chaʼañoʼ bʌ Jesucristo). 7 Tiʼ tojlel pejtelel jiñi cʼuxbibiloʼ bʌ ti Dios añoʼ bʌ ti Roma yicʼot pʌybiloʼ bʌ chaʼan chʼujul miʼ yajñelob:

Laʼ i yʌqʼueñetla Dios jiñi lac Tat yicʼot jiñi lac Yum Jesucristo jiñi ñuc bʌ i yutslel yicʼot i ñʌchʼtʌlel.

8 Ñaxan mi cʌqʼuen wocolix i yʌlʌ c Dios tiʼ tojlel Jesucristo chaʼañetla, come tiʼ petol pañimil miʼ yʌjlel chaʼan jiñi laʼ ñopoñel. 9 Come Dios, jiñi muʼ bʌ c melben chʼujul bʌ i yeʼtel tiʼ pejtelel c pusicʼal cheʼ bʌ mic sub jiñi wen tʼan tiʼ tojlel i Yalobil, c testigojʌch chaʼan maʼañic mic lujbʼan c tajetla ti tʼan ti coración, 10 i mij cʼajtin ti wocol tʼan chaʼan, mi mucʼʌch i mejlel i mi cheʼʌch yom Dios, muqʼuix c mejlel c julaʼtañetla. 11 Wen comix j qʼueletla chaʼan mij coltañetla tiʼ chaʼan bʌ Dios chaʼan mic pʼʌtʼesañetla, 12 o chaʼan mi laj comol pʼʌtʼesan lac bʌ chaʼan jiñi lac ñopoñel, jiñi laʼ chaʼan yicʼot c chaʼan.

13 Pero, hermanojob, com mi laʼ ñaʼtan chaʼan mach junsujtelic jach tsaʼ c ñaʼta majlel j qʼueletla chaʼan mij qʼuel jiñi wem bʌ i wut c subtʼan ti laʼ tojlel cheʼ bajcheʼ ti yambʌ tejclum tac, anquese cʼʌlʌl ili ora an chuqui mʌctʌbil i chaʼañon. 14 An c bet tiʼ tojlel griegojob yicʼot mach bʌ griegojobic, tiʼ tojlel añoʼ bʌ i ñaʼtʌbal yicʼot mach bʌ añobic i ñaʼtʌbal. 15 Jin chaʼan, wen com c subeñetla jaʼel jiñi wen tʼan añetbʌla ti Roma. 16 Come maʼañic mij quisñin c bʌ chaʼan jiñi wen tʼan tac. Tiʼ sujm, jiñʌch i pʼʌtʌlel Dios chaʼan miʼ coltʌntel pejtelel añoʼ bʌ i ñopoñel, ñaxan jiñi judío i cheʼ jaʼel jiñi griego. 17 Come jiñi añoʼ bʌ i ñopoñel miʼ qʼuelob chaʼan ti jiñi wen tʼan, Dios miʼ pʌs jiñi i tojel i jiñi miʼ pʼʌtʼesʌbeñob i ñopoñel, cheʼ bajcheʼ tsʼijbubil: «Pero jiñi toj bʌ cuxul mi caj i yajñel tiʼ caj i ñopoñel».

18 Cheʼʌchi, jiñi i michʼajel Dios miʼ pʌs tilel i bʌ cʼʌlʌl ti panchan tiʼ tojlel jiñi lac piʼʌlob mach bʌ xjacʼtʼañobic yicʼot jiñi mach bʌ tojobic. Miʼ melob tac mach bʌ tojic chaʼan jiñi lac piʼʌlob maʼañic miʼ cʌñob chuquiyes jiñi i sujmlel, 19 come jiñi muʼ bʌ i mejlel ti cʌjñel tiʼ tojlel Dios jamʌ tsiquilob tiʼ wut come Dios tsiʼ jamʌ pʌsbeyob. 20 Come jiñi melbal tac am bʌ i chaʼan mach bʌ añic miʼ mejlel ti qʼuejlel, jiñi i pʼʌtʌlel tiʼ pejtelel ora yicʼot chaʼan tiʼ sujm jiñʌch Dios, jamʌ tsiquil cʼʌlʌl cheʼ tsaʼ mejli pañimil, come miʼ mejlel ti qʼuejlel ti jiñi melbil tac bʌ, jin chaʼan maʼañic chuqui miʼ mejlel i yʌlob. 21 Anquese i cʌñʌyob Dios, maʼañic tsiʼ yʌqʼueyob i ñuclel bajcheʼ juntiquil Dios i maʼañic tsiʼ yʌqʼueyob wocolix i yʌlʌ, jiñi i ñaʼtʌbalob maʼañic i cʼʌjñibal tsaʼ majli i jiñi i tonto pusicʼalob icʼyochʼan tsaʼ majli. 22 Anquese poj añob i ñaʼtʌbal miʼ yʌlob, tsaʼ sujtiyob ti tonto, 23 anquese jin yom miʼ yʌqʼueñob i ñuclel jiñi Dios cuxul bʌ tiʼ pejtelel ora,* tsiʼ yʌqʼueyob i ñuclel jiñi melbil tac jach bʌ dios i yejtaloʼ bʌ wiñicob* muʼ bʌ i chʌmelob yicʼot i yejtal añimal tac am bʌ i wichʼ, añimal tac chʌmpʼejl bʌ i yoc yicʼot muʼ bʌ i jexpan* tac i bʌ.

24 Jin chaʼan, cheʼ bajcheʼ yomob tiʼ pusicʼal, Dios tsiʼ yʌcʼʌ chaʼan miʼ melob chuqui bibiʼ chaʼan maʼañic miʼ qʼuelob ti ñuc i bʌcʼtal. 25 Tsiʼ qʼuextayob ti lot jiñi i sujmlel chaʼan bʌ Dios, i tsiʼ chʼujutesayob yicʼot tsiʼ melbeyob chʼujul bʌ i yeʼtel jiñi melbil tac bʌ i mach jiñic jiñi tsaʼ bʌ i Mele chuqui tac an, muʼ bʌ i yʌqʼuentel i ñuclel tiʼ pejtelel ora. Amén. 26 Jin chaʼan, Dios tsiʼ cʌyʌyob i tsiʼ yʌqʼueyob i mel jiñi tsʼiʼlel* tac yomoʼ bʌ i mel come jiñi xʼixicob mach yomobic ajñel yicʼot wiñicob, yomob jach i wʌlʌc piʼleñob i bʌ. 27 Cheʼʌch jaʼel jiñi wiñicob, tsiʼ cʌyʌyob piʼleya yicʼot jiñi xʼixicob anquese Dios mach cheʼic tsiʼ meleyob bajcheʼ jiñi, wen yomob jax i wʌlʌc piʼleñob i bʌ, wiñic yicʼot wiñic tsiʼ meleyob chuqui bibiʼ, i tsʼʌcʌl tsaʼ aqʼuentiyob i tojob i mul cheʼ bajcheʼ yom miʼ yʌqʼuentelob chaʼan jiñi tsaʼ bʌ i meleyob.

28 Come tsiʼ qʼueleyob chaʼan maʼañic i cʼʌjñibal cheʼ miʼ cʌñob Dios, Dios tsiʼ yʌcʼʌ chaʼan miʼ ñaʼtañob chuqui mach bʌ weñic chaʼan miʼ melob chuqui tac mach bʌ yomic miʼ mejlel. 29 Butʼulob ti chuqui mach tojic, ti jontolil i miʼ wen mulañob chuqui tac an, butʼulob tiʼ tsʌytsʌyñiyelob i pusicʼal, ti tsʌnsa, ti jatsʼ, ti lot yicʼot miʼ mulañob i ticʼlan yambʌlob, miʼ chaʼleñob tʼan tiʼ tojlel yambʌlob 30 yicʼot xjopʼtʼañob. Miʼ tsʼaʼleñob Dios, maʼañobic i quisin, ñuc miʼ yubiñob i bʌ yicʼot chanchan jax miʼ melob i bʌ, miʼ chajpañob mach bʌ weñic, miʼ ñusʌbeñob i tʼan i tat i ñaʼ, 31 maʼañic miʼ chʼʌmbeñob i sujm, maʼañic miʼ tsʼʌctesañob i tʼan, maʼañic miʼ cʼuxbiñob i familia yicʼot maʼañobic i pʼuntaya. 32 Anquese wen i cʌñʌyob jiñi toj bʌ i mandar Dios, yom i yʌl, chaʼan jiñi muʼ bʌ i melob pejtelel iliyi yomʌch miʼ chʌmelob, mach cojach miʼ bej melob tac iliyi, utsʼat miʼ qʼuelob jaʼel jiñi muʼ bʌ i melob.