Filipenses
2 Yubil cheʼ jiñi, mi mucʼʌch i mejlel laʼ tijicñesʌben i pusicʼal yambʌlob ti Cristo, mi mucʼʌch i mejlel laʼ ñuqʼuesʌben i pusicʼal yambʌlob yicʼot cʼuxbiya, mi mucʼʌch i mejlel laʼ pʌs chaʼan mi laʼ ñaʼtan yambʌlob i mi laʼ pʌs cʼuxbiya yicʼot pʼuntaya, 2 aqʼueñonla cabʌl c tijicñʌyel cheʼ mi laʼ pʌs chaʼan jumpʼejl jach laʼ ñaʼtʌbal yicʼot laʼ cʼuxbiya, chaʼan wen juntemeletla yicʼot chaʼan junlajal chuqui mi laʼ ñaʼtan. 3 Maʼañic chuqui yom mi laʼ wis mel tiʼ caj jach mi laʼ contrajin yambʌlob o tiʼ caj jach mi laʼ bajñel ñaʼtan laʼ bʌ, yicʼot laʼ pecʼlel yom mi laʼ ñaʼtan chaʼan jiñi yambʌlob ñumen ñucob bajcheʼetla, 4 cheʼ bʌ mach bajñel laʼ wenlelic mi laʼ sʌclan, mi laʼ sʌclan i chaʼan yambʌlob jaʼel.
5 Cheʼ yom laʼ ñaʼtʌbal bajcheʼ Cristo Jesús, 6 anquese ti ñaxan cheʼ yilal bajcheʼ Dios, mi tsaʼicto i ñaʼta sujtel bajcheʼ Dios. 7 Maʼañic, tsiʼ cʌyʌ pejtelel chuqui an i chaʼan i tsaʼ ochi bajcheʼ juntiquil xyaj eʼtel i tsaʼ sujti bajcheʼ juntiquil wiñic. 8 Cheʼto jaʼel, cheʼ bʌ tsajñi bajcheʼ wiñic, tsiʼ peqʼuesa i bʌ i xjacʼtʼan tsiʼ mele i bʌ cʼʌlʌl cheʼ tsaʼ chʌmi, cheʼʌchi, cheʼ bʌ tsaʼ chʌmi ti jiñi teʼ chaʼan bʌ wocol.* 9 Jin chaʼan, Dios tsiʼ yʌqʼue ñumen ñuc bʌ i yeʼtel i tiʼ yutslel tsiʼ yʌqʼue jiñi cʼabaʼʌl ñumen ñuc bʌ bajcheʼ yambʌ cʼabaʼʌl, 10 chaʼan tiʼ cʼabaʼ Jesús miʼ laj ñocchocoñob i bʌ, jiñi añoʼ bʌ ti panchan, añoʼ bʌ ti pañimil yicʼot tiʼ yebal lum, 11 chaʼan tiʼ pejtelelob miʼ jamʌ subob tiʼ wut lac piʼʌlob chaʼan Jesucristo lac Yumʌch chaʼan i ñuclel Dios jiñi Tatʌl.
12 Jin chaʼan, cʼuxbibiletbʌla, cheʼ bajcheʼ an laʼ jacʼʌ c tʼan tiʼ pejtelel ora, mach cojic jach cheʼ yaʼañon quicʼotetla, ñumento wʌle cheʼ bʌ mach yaʼic añon, chʌn chaʼlenla wersa yicʼot laʼ bʌqʼuen i yicʼot tsiltsilñiyel chaʼan mi laʼ taj laʼ coltʌntel. 13 Dios jiñʌch muʼ bʌ i yʌqʼueñetla laʼ pʼʌtʌlel, come cheʼʌch yom, i jiñʌch miʼ yʌqʼueñetla ili chaʼchajp, jiñi laʼ pʼʌtʌlel yicʼot jiñi i mulʌntel i melol chuqui miʼ mulan. 14 Chʌn melela pejtelel yom bʌ miʼ mejlel pero mach yicʼotic wulwul tʼan mi yicʼoticto leto,* 15 chaʼan maʼañic miʼ wis tajtʌl laʼ sajtemal, chaʼan maʼañic laʼ mul, chaʼan cheʼ bajcheʼ i yalobiletla Dios maʼañic laʼ mul, anquese chumuletla baqui an jontoloʼ bʌ lac piʼʌlob maʼañic bʌ miʼ melob chuqui wen ili ora. Jatetla tsʼʌylawetla tiʼ tojlelob bajcheʼ i sʌcjamanlel pañimil, 16 cheʼ bʌ mi laʼ chʌn chuc laʼ bʌ ti jiñi tʼan chaʼan bʌ cuxtʌlel. Cheʼ bajcheʼ jiñi, añʌch chucoch mi caj cubin c tijicñʌyel tiʼ qʼuiñilel Cristo cheʼ bʌ cujil chaʼan mach lolomic jach tsaʼ c chaʼle ajñel yicʼot mach lolomic jach tsaʼ c chaʼle tsʌts bʌ eʼtel. 17 Anquese mic bejqʼuel bajcheʼ lʌmʌl bʌ majtañʌl yaʼ baqui an jiñi tsʌnsʌbil bʌ majtañʌl yicʼot tiʼ tojlel jiñi chʼujul bʌ laʼ weʼtel tsaʼ bʌ i yʌqʼueyetla laʼ mel jiñi laʼ ñopoñel, tijicña mi cubin c bʌ i mic tʼox jiñi c tijicñʌyel quicʼotetla. 18 Cheʼʌch jatetla jaʼel, yom tijicñayetla i yom mi laʼ tʼoxbeñon jiñi laʼ tijicñʌyel.
19 Mic pijtan ti lac Yum Jesús chaʼan muqʼuix c chocbeñetla majlel Timoteo chaʼan mic taj c tijicñʌyel cheʼ mi cubin ti laʼ tojlel. 20 Come maʼañic yambʌ cheʼ bʌ yilal bajcheʼ Timoteo, ti jumpʼejl bʌ i pusicʼal miʼ ñaʼtañetla. 21 Come jiñi yambʌlob miʼ bajñel sʌclañob i wenlel i mach jiñic i chaʼan Jesucristo. 22 Jatetla laʼ wujil chaʼan tsaʼix i pʌsʌ wem bʌ i melbal, come tsiʼ chaʼle eʼtel yicʼoton bajcheʼ xyaj eʼtel tiʼ subol jiñi wen tʼan, cheʼ bajcheʼ juntiquil alob yicʼot i tat. 23 Jin chaʼan, jiñʌch com bʌ c choc majlel cheʼ bʌ mic ñaʼtan chuqui mi caj i yujtel tic tojlel. 24 Cheʼ jaʼel, mic ñop ti lac Yum chaʼan mach jalix yom chaʼan mi cajñel quicʼotetla jaʼel.
25 Pero wʌle mij qʼuel chaʼan i cʼʌjñibal mic chocbeñetla majlel Epafrodito, jiñi quermañu, c piʼʌl ti eʼtel yicʼot i soldado bʌ Cristo jaʼel, jiñi tsaʼ bʌ laʼ choco tilel chaʼan miʼ coltañon ti chuqui i cʼʌjñibal c chaʼan. 26 Wen yomix i qʼueletla ti laʼ pejtelel i wen chʼijyem come tsaʼ laʼ wubi chaʼan cʼam. 27 Tiʼ sujm tsaʼʌch wen cʼamʼa i colelix i chʌmel. Pero Dios tsiʼ pʼunta, mach jiñic jach tsaʼ pʼuntʌnti, tsiʼ pʼuntayon jaʼel, chaʼan mach belecñayic jiñi c chʼijyemlel. 28 Jin chaʼan ti ora mic choc majlel baʼañetla, chaʼan mi laʼ chaʼ ubin laʼ tijicñʌyel cheʼ bʌ mi laʼ qʼuel, i cheʼ bajcheʼ jiñi maʼañix mij cʌlʌx cʼojoʼtañetla.* 29 Jin chaʼan, chʼʌmʌla cheʼ bajcheʼ ñʌmʌl laʼ chʼʌmob jiñi muʼ bʌ i tsajcañob lac Yum, yicʼot cabʌl laʼ tijicñʌyel. I chʌn qʼuelela ti ñuc jiñi wiñicob cheʼoʼ bʌ bajcheʼ Epafrodito, 30 come colelix i chʌmel tiʼ caj i melbentel i yeʼtel Cristo,* cheʼ bʌ tsiʼ yʌcʼʌ ti wocol i cuxtʌlel chaʼan miʼ yʌqʼueñon jiñi coltaya maʼañic bʌ tsaʼ mejli laʼ wʌqʼueñon come mach wʌʼic añetla.