2 Corintios
4 Jin chaʼan, come an c chaʼan lojon ili eʼtel tiʼ caj tsaʼ pʼuntʌntiyon lojon, maʼañic mi lon c lujbʼan. 2 Tsaʼix lon j cʌyʌ jiñi quisintic jax bʌ muʼ bʌ i mucu mejlel i maʼañic mi lon c chaʼlen lot yicʼot maʼañic chuqui mi cotsan lojon o mi lon c locʼsan yaʼ tiʼ tʼan Dios. Joñon lojon mi lon cʌcʼ ti cʌjñel jiñi i sujmlel i cheʼ bajcheʼ jiñi mic pʌs lojon tiʼ wut Dios chaʼan woli lon c mel chuqui toj chaʼan jiñi i conciencia lac piʼʌlob miʼ cʌñob. 3 Mi jiñi wen tʼan muʼ bʌ lon c sub lajal bajcheʼ mosol ti pisil, mucul tiʼ tojlel jiñi majlel bʌ mucʼob ti jisʌntel,* 4 tiʼ tojlelob jiñi mach bʌ xñoptʼañobic, tsaʼ bʌ mʌcbentiyob i ñaʼtʌbal tiʼ tojlel i dios ili pañimil, chaʼan maʼañic miʼ tsʼʌjyel tiʼ tojlelob jiñi ñuc bʌ sʌclel chaʼan bʌ jiñi wen tʼan tiʼ tojlel Cristo, muʼ bʌ i pʌsbeñonla bajcheʼ yilal Dios. 5 Come maʼañic mi lon c sub chaʼan bʌ joñon lojon, mi lon c sub chaʼan Jesucristo jiñʌch lac Yum yicʼot chaʼan xyaj eʼtel lon lojon laʼ chaʼan tiʼ caj Jesús. 6 Come Dios jiñʌch tsaʼ bʌ i yʌlʌ: «Laʼ tsictiyic jiñi tsʼʌylaw bʌ sʌclel tiʼ yojlil icʼyochʼañiyel». I tsʼʌylawix i sʌclel ti lac pusicʼal chaʼan tiʼ tojlel jiñi i ñiʼ i wut Cristo miʼ tsʼʌycʼʌcʼañonla* yicʼot jiñi ñuc bʌ ñaʼtʌbalʌl tilem bʌ ti Dios.
7 An lon c chaʼan ili ñuc bʌ eʼtel anquese lajalon lojon bajcheʼ pʼejt melbil bʌ ti lum am bʌ i chaʼan wen lets bʌ i tojol, cheʼ bajcheʼ iliyi miʼ jamʌ tsictiyel chaʼan an lon c pʼʌtʌlel mach bʌ añic miʼ mejlel i tajob jiñi lon c piʼʌlob, ili pʼʌtʌlel mach lon c chaʼañic, tilem ti Dios. 8 Bajcheʼ jach mi lon c tsʌtsʌ ñejtʼel, pero maʼañic mi lon c ñejtʼel jinto maʼañix miʼ mejlel c ñijcan lon c bʌ, maʼañic mi lon c ñaʼtan chuqui yom mi lon c mel, pero añʌch lon c loqʼuib,* 9 mi lon j contrajintel, pero mach bajñel cʌybiloñic lojon, mi lon c chojquel ti lum, pero maʼañic mi lon c jisʌntel. 10 Lʌcʼʌ tiʼ pejtelel ora mi lon j cuch jiñi ticʼlʌntel tsaʼ bʌ i ñusa Jesús, chaʼan jiñi i cuxtʌlel Jesús miʼ tsictiyel ti lon c bʌcʼtal jaʼel. 11 Come joñon lojon, cheʼ bʌ cuxulonto lon, tiʼ pejtelel ora bʌbʌqʼuen jax mi lon c chʌmel tiʼ caj Jesús, chaʼan jiñi i cuxtʌlel Jesús miʼ tsictiyel ti lon c bʌcʼtal yujil bʌ chʌmel. 12 Jin chaʼan, c chaʼañʌch lojon cheʼ bʌbʌqʼuen mi lon c chʌmel, pero jiñi cuxtʌlel laʼ chaʼañʌch.
13 Wʌle, an lon c chaʼan jaʼel jiñi ñopoñel tsaʼ bʌ tsʼijbunti: «Tsaʼ c ñopo i jin chaʼan tsaʼ c chaʼle tʼan». Jin chaʼan, joñon lojon an lon c ñopoñel jaʼel i jin chaʼan mi lon c chaʼlen tʼan, 14 come cujil lojon chaʼan jiñi tsaʼ bʌ i chʼojyesa* Jesús mi caj i chʼojyesañon lojon jaʼel chaʼan mi cajñel lojon quicʼot Jesús i mi caj i pʌyonla majlel tiʼ tojlel. 15 Come pejtelel iliyi chaʼañʌch laʼ wenlel, chaʼan muʼto i ñumen pʼojlel jiñi ñuc bʌ i yutslel Dios come cabʌl lac piʼʌlob woliʼ yʌqʼueñob wocolix i yʌlʌ, i cheʼ bajcheʼ jiñi miʼ yʌqʼueñob i ñuclel.
16 Jin chaʼan, maʼañic mi lac lujbʼan. Anquese jiñi lac bʌcʼtal miʼ ñoxʼan majlel, jiñi lac pusicʼal miʼ chaʼ tsijibʌyel ti jujumpʼejl qʼuin. 17 Come, anquese jiñi lac wocol tac maʼañic miʼ wen jalʼan yicʼot mach wen ñuquic, miʼ yʌqʼueñonla lac taj lac ñuclel muʼ bʌ i ñumen colel majlel i chaʼañʌch tiʼ pejtelel ora, 18 jin chaʼan mi lac chʌn acʼ lac wut ti chuqui tac mach bʌ tsiquilic, i mach yaʼic ti chuqui tac tsiquil bʌ. Come jiñi tsiquil tac bʌ an jach i yorajlel, pero jiñi mach bʌ tsiquil taquic chaʼañʌch tiʼ pejtelel ora.