Gálatas

6 Quermañujob, mi juntiquil wiñic woliʼ majlel ti mach bʌ weñic bij, jatetla muʼ bʌ i tojʼesañetla majlel jiñi espíritu, chaʼ pʌyʌla sujtel ti jiñi wem bʌ bij, anquese maxto i cʌñʌ chuqui woliʼ mel. Pero yicʼot laʼ wutslel yom mi laʼ mel, i cʌntan laʼ bʌ chaʼan maʼañic mi laʼ yajlel jaʼel ti jiñi yac. 2 Chʌn coltan laʼ bʌ tiʼ chʼʌmol majlel jiñi laʼ cuch, i cheʼ bajcheʼ jiñi mi caj laʼ tsʼʌctesan i mandar Cristo. 3 Come, mi an majqui miʼ ñaʼtan chaʼan ñuc i cʼʌjñibal cheʼ bʌ mach cheʼiqui, woliʼ bajñel lotin i bʌ. 4 Pero jujuntiquil yom miʼ bajñel tsajin* i melbal, i cheʼ bajcheʼ jiñi añʌch chucoch tijicña mi caj i yubin i bʌ chaʼan jiñi tsaʼ bʌ i mele, i mach cʼʌñʌlic miʼ laj i bʌ yicʼot yambʌ. 5 Come jujuntiquil mi caj i chʼʌm majlel jiñi i cuch.

6 Cheʼ jaʼel, majqui jach woliʼ pʌsbentel jiñi i tʼan Dios laʼ i tʼoxben pejtelel chuqui tac wem bʌ i chaʼan jiñi woli bʌ i cʌntesan.

7 Mach laʼ bajñel lotin laʼ bʌ: Maʼañic majqui miʼ mejlel i lotin* Dios. Come jiñʌch mi caj lac lotben i wut jiñi woli bʌ lac pʌcʼ. 8 Jiñi i bʌcʼtal bʌ miʼ ñaʼtan cheʼ bʌ miʼ chaʼlen pacʼ mi caj i taj i jisʌntel i bʌcʼtal, pero jiñi muʼ bʌ i ñaʼtan jiñi espíritu cheʼ bʌ miʼ chaʼlen pacʼ mi caj i taj i cuxtʌlel mach bʌ añic i jilibal tilem bʌ ti jiñi espíritu. 9 Jin chaʼan, mach laj cʌy lac mel chuqui wen, come cheʼ tiʼ yorajlelix mi caj lac lotben i wut mi maʼañic mi lac lujbʼan. 10 Jin chaʼan, cheʼ bʌ muʼto lac mejlel, laʼ lac mel chuqui tac wen tiʼ tojlel pejtelel lac piʼʌlob, pero ñumento tiʼ tojlel jiñi la quermañujob lajaloʼ bʌ i ñopoñel la quicʼotob.

11 Qʼuelela bajcheʼ ñojel tac bʌ letra tsaʼ c tsʼijbubeyetla tij cʼʌb.

12 Jiñi muʼ bʌ i ñopob i wersa xiqʼuetla chaʼan mi laʼ tsep laʼ pʌchʌlel* yomob chaʼan miʼ tijicñesañob yambʌlob. Mucʼ jach i melob chaʼan maʼañic miʼ contrajintelob tiʼ caj jiñi teʼ chaʼan bʌ wocol* i chaʼan bʌ Cristo. 13 Come mi jiñicto jiñi muʼ bʌ i tsepob i pʌchʌlel miʼ tsʼʌctesañob jiñi Mandar, pero yomob chaʼan mi laʼ tsep laʼ pʌchʌlel chaʼan miʼ pʌsob ti ñuc jiñi tsaʼ bʌ melbentiyetla ti laʼ bʌcʼtal. 14 Pero joñon mic pijtan chaʼan maʼañic chuqui tiʼ caj mij qʼuel c bʌ ti ñuc, cojach tiʼ caj jiñi teʼ chaʼan bʌ wocol* i chaʼan bʌ lac Yum Jesucristo, i tiʼ tojlel, chʌmeñoñix chaʼan jiñi pañimil i jiñi pañimil chʌmeñix chaʼañon jaʼel. 15 Come jiñi ñuc bʌ i cʼʌjñibal mach jiñic mi tsepbil lac pʌchʌlel o mi mach tsepbilic, jiñʌch cheʼ mi lac tsijib mejlel. 16 Laʼ ajñic ñʌchʼtʌlel yicʼot pʼuntaya tiʼ tojlelob jiñi toj bʌ woliʼ xʌñob majlel cheʼ bajcheʼ miʼ yʌl iliyi, cheʼʌchi, tiʼ tojlel jiñi Israel i chaʼan bʌ Dios.

17 Cʼʌlʌl ili ora, maʼañic majqui yom miʼ yʌqʼueñon wocol, come añʌch tic bʌcʼtal jiñi marca tac am bʌ i chaʼan juntiquil xyaj eʼtel i chaʼan Jesús.

18 Hermanojob, laʼ ajñic ti laʼ tojlel jiñi ñuc bʌ i yutslel lac Yum Jesucristo, come laʼ wom laʼ mel chuqui tac wen. Amén.