Gálatas

3 Jatetla añetbʌla ti Galacia maʼañic bʌ laʼ ñaʼtʌbal, ¿majqui tsiʼ lotiyetla, jatetla tsaʼ bʌ jamʌ subentiyetla bajcheʼ tsaʼ chʌmi Jesucristo yaʼ ti teʼ? 2 Com jach j cʼajtibeñetla* iliyi: ¿Tsaʼ ba laʼ chʼʌmʌ jiñi espíritu chaʼan tsaʼ laʼ tsajca jiñi mandar, o chaʼan tsaʼ laʼ ñopo jiñi tsaʼ bʌ laʼ wubi? 3 ¿Tiʼ sujm ba junyajl maʼañic laʼ ñaʼtʌbal? Jatetla tsaʼ laʼ teche laʼ ñop ti jiñi espíritu, pero wʌle, ¿wolix laʼ ñop ti chuqui tac tilem bʌ ti wiñic xmulil bʌ? 4 ¿Lolom jach ba tsaʼ laʼ wen ñusa wocol tac? Mucʼʌch c ñop chaʼan mach lolomic jach. 5 Yubil cheʼ jiñi, jiñi muʼ bʌ i yʌqʼueñetla jiñi espíritu yicʼot miʼ mel milagro tac baʼañetla, ¿tiʼ caj ba mi laʼ tsajcan mandar miʼ mel, o chaʼan jiñi laʼ ñopoñel ti chuqui tsaʼ laʼ wubi? 6 Jiñʌch tsaʼ bʌ ujti tiʼ tojlel Abrahán: «Tsiʼ yʌcʼʌ i ñopoñel ti Jehová* i tsaʼ qʼuejli ti toj».

7 Mi cʌl jatetla laʼ wujilʌch chaʼan jiñi muʼ bʌ i chucob i bʌ tiʼ ñopoñel i yalobilobʌch Abrahán. 8 Weno, Dios tsiʼ wʌn alʌ yaʼ ti tsʼijbubil bʌ i tʼan chaʼan mi caj i sub ti toj jiñi lac piʼʌlob ti yambʌ tejclum tac chaʼañob i ñopoñel, tsiʼ wʌn sube Abrahán jiñi wen tʼan cheʼ bʌ tsiʼ yʌlʌ: «Ti a tojlel mi caj i taj bendición pejtelel jiñi tejclum tac». 9 Jin chaʼan, jiñi muʼ bʌ i chucob i bʌ tiʼ ñopoñel mi caj i tajob bendición tac yicʼot Abrahán, tsaʼ bʌ i pʌsʌ i ñopoñel.

10 Pejtelel muʼ bʌ i yʌcʼob i ñopoñel tiʼ tsajcʌntel jiñi mandar mi caj i yʌqʼuentelob i toj i mul, come tsʼijbubil: «Laʼ aqʼuentic i toj i mul pejtelel jiñi mach bʌ añic miʼ chaʼlen wersa i mel chuqui tac tsʼijbubil yaʼ ti bʌlbil bʌ jun chaʼan bʌ Mandar». 11 Cheʼ jaʼel, wen tsiquil chaʼan maʼañic majqui mi caj i sujbel ti toj tiʼ tojlel Dios tiʼ caj jach miʼ tsajcan jiñi mandar, come tsʼijbubil chaʼan «jiñi toj bʌ cuxul mi caj i yajñel tiʼ caj i ñopoñel». 12 Jiñi Mandar mach chuculic ti jiñi ñopoñel, muʼ bʌ i yʌl jiñʌch chaʼan jiñi «muʼ bʌ i mel chuqui toj cheʼ bajcheʼ miʼ yʌl jiñi Mandar cuxul mi caj i yajñel». 13 Cristo tsiʼ mʌñʌyonla i tsiʼ locʼsayonla tiʼ pʼʌtʌlel jiñi Mandar muʼ bʌ i yʌqʼueñonla lac toj lac mul i jiñix tsiʼ tojo lac mul, come tsʼijbubil: «Laʼ aqʼuentic i toj i mul pejtelel muʼ bʌ i jichʼchocontel ti teʼ». 14 Ili tsaʼ ujti chaʼan jiñi i bendición Abrahán miʼ cʼotel ti jiñi tejclum tac tiʼ coltaya Cristo Jesús, chaʼan mi la cʌqʼuentel jiñi espíritu tsaʼ bʌ wʌn ajli tiʼ caj añʌch lac ñopoñel.

15 Hermanojob, mi cʌqʼueñetla jumpʼejl ejemplo chaʼan chuqui miʼ yujtel ti jujumpʼejl qʼuin: Cheʼ bʌ tsaʼix aqʼuenti i cʼʌjñibal jumpʼejl trato, anquese juntiquil jach wiñic miʼ yʌqʼuen i cʼʌjñibal, maʼañic majqui miʼ mejlel i jisʌben i cʼʌjñibal yicʼot maʼañic chuqui miʼ mejlel ti otsʌntel. 16 Weno, jiñi tʼan tac wʌn albil bʌ tsaʼ subenti Abrahán yicʼot i pʼolbal. Maʼañic miʼ yʌl «yicʼot jiñi a pʼolbalob», mach cheʼic bajcheʼ cabʌlob woliʼ tajtʌlob ti tʼan, mucʼ jach i yʌl «yicʼot jiñi a pʼolbal», juntiquil jach woliʼ tajtʌl ti tʼan: Cristo. 17 Mic subeñetla jaʼel iliyi: Jiñi Mandar, tsaʼ bʌ ajqʼui cheʼ bʌ ñumeñix 430 jab, maʼañic miʼ jisan jiñi trato tsaʼix bʌ i mele Dios, jin chaʼan maʼañic miʼ jisan jiñi tʼan wʌn albilix bʌ. 18 Come cheʼ yaʼic chucul ti mandar jiñi muʼ bʌ caj la cʌqʼuentel, mach yaʼix chucul ti jiñi tʼan wʌn albil bʌ. Pero, tiʼ yutslel i pusicʼal, Dios tsiʼ yʌqʼue Abrahán tiʼ coltaya jiñi tʼan wʌn albil bʌ.

19 Yubil cheʼ jiñi, ¿chucoch tsaʼ ajqʼui jiñi Mandar? Tsaʼ ajqʼui chaʼan miʼ tsictiyel jiñi mulil jinto miʼ tilel jiñi pʼolbalʌl tsaʼ bʌ wʌn aqʼuenti jiñi tʼan, i jiñi ángelob tsiʼ yʌqʼueyob lac piʼʌlob jiñi Mandar tiʼ tojlel juntiquil xcoltaya chaʼan bʌ jiñi trato. 20 Pero, mach cʼʌñʌlic juntiquil xcoltaya mi juntiquil jach lac piʼʌl ochem, i Dios juntiquil jach. 21 Cheʼ jiñi, ¿muʼ ba i mʌctan wʌn albil tac bʌ i chaʼan Dios jiñi Mandar? ¡Maʼañic! Come, cheʼ tsaʼic ajqʼui jumpʼejl mandar muʼ bʌ i yʌcʼ cuxtʌlel, jiñi tojel miʼ tajtʌl tiʼ coltaya jiñi mandar. 22 Pero jiñi Tsʼijbujel tsiʼ yʌcʼʌ pejtelel chuqui an tiʼ pʼʌtʌlel jiñi mulil, chaʼan jiñi wʌn albil bʌ muʼ bʌ lac taj chaʼan jiñi lac ñopoñel ti Jesucristo miʼ yʌqʼuentelob jiñi muʼ bʌ i pʌsob i ñopoñel.

23 Pero cheʼ bʌ maxto añic jiñi ñopoñel, tsiʼ cʌntayonla jiñi mandar, añonla tiʼ pʼʌtʌlel, woli lac pijtan jiñi ñopoñel tsʼitaʼ jax bʌ yom chaʼan miʼ tsictiyel. 24 Jin chaʼan, jiñi Mandar jiñʌch tsaʼ bʌ i tojʼesayonla* majlel cʼʌlʌl baʼan Cristo, chaʼan mi lac mejlel ti subentel ti toj tiʼ caj lac ñopoñel. 25 Pero wʌle, cheʼ añix jiñi ñopoñel, mach cʼʌñʌlix miʼ tojʼesañonla majlel jiñi Mandar.

26 Tiʼ sujm, i yalobiletla Dios ti laʼ pejtelel chaʼan jiñi laʼ ñopoñel ti Cristo Jesús. 27 Come, pejtelel jatetla, tsaʼ bʌ laʼ chʼʌmʌ jaʼ* ti Cristo, tsaʼix sujtiyetla bajcheʼ Cristo. 28 Maʼañic mi judío mi griego, maʼañic mi xyaj eʼtel bʌ mi libre bʌ wiñic, maʼañic mi wiñic mi xʼixic, come jatetla juntiquilet jachla laʼ wicʼot Cristo Jesús. 29 Cheʼ jaʼel, mi i chaʼañetla Cristo i pʼolbaletla Abrahán, jatetla mi caj laʼ taj jiñi tsaʼ bʌ wʌn ajli.