Apocalipsis

21 Cheʼ jiñi tsaʼ j qʼuele jumpʼejl tsijiʼ bʌ panchan yicʼot jumpʼejl tsijiʼ bʌ pañimil, come jiñi panchan yicʼot jiñi pañimil am bʌ ti ñaxan tsaʼix jili, i jiñi mar tsaʼix jili. 2 Tsaʼ j qʼuele jaʼel jiñi chʼujul bʌ tejclum, jiñi Tsijiʼ bʌ Jerusalén, woliʼ jubel tilel ti panchan, cʼʌlʌl yaʼ baqui an Dios. I chajpʌbil bajcheʼ juntiquil noviajʌl chʼʌlbil bʌ chaʼan i ñoxiʼal. 3 Cheʼ jiñi tsaʼ cubi cʼam bʌ tʼan woli bʌ i loqʼuel tilel yaʼ ti trono i woliʼ yʌl: «¡Qʼuele! Jiñi i chumlib Dios yaʼan yicʼot jiñi quixtañujob. Dios mi caj i chumtʌl yicʼotob i mi caj i sujtelob tiʼ tejclum. Dios mi caj i yajñel yicʼotob. 4 I mi caj i sujcubeñob i yaʼlel i wut, maʼañix miʼ cajel chʌmel, mi muqʼuicto i cajel chʼijyemlel, uqʼuel yicʼot cʼuxyajiyel. Jiñi an tac bʌ ti ñaxan tsaʼix jili».

5 Jiñi yaʼ bʌ buchul ti trono tsiʼ yʌlʌ: «¡Qʼuele! Woli c tsijibtesan pejtelel chuqui an». Tsiʼ yʌlʌ jaʼel: «Tsʼijbun ili tʼan tac, come xucʼulʌch* yicʼot i sujmʌch». 6 I tiʼ subeyon: «¡Tsaʼix tsʼʌctiyi! Joñon jiñi i Tejchibal yicʼot i Yujtibal.* Pejtelel jiñi tiquin bʌ i tiʼ mi caj cʌqʼuen i majtan jap jiñi jaʼ muʼ bʌ i loqʼuel yaʼ tiʼ pasibal jaʼ chaʼan bʌ cuxtʌlel. 7 Pejtelel jiñi muʼ bʌ i mʌjlel* i chaʼan mi caj i yʌqʼuentel tac iliyi, joñon mi caj c sujtel tiʼ Dios i mi caj i sujtel ti calobil. 8 Pero jiñi xbʌqʼueñoʼ bʌ, jiñi maʼañobic bʌ i ñopoñel, jiñi bibiʼoʼ bʌ, jiñi biʼlebiloʼ bʌ, jiñi xtsʌnsajoʼ bʌ, jiñi xtsʼiʼleloʼ bʌ,* jiñi muʼ bʌ i melob i chaʼan tac bʌ espiritismo,* jiñi muʼ bʌ i chʼujutesañob melbil tac jach bʌ dios yicʼot pejtelel jiñi xlotob mi caj i chojquelob majlel yaʼ ti cʼajc yicʼot bʌ azufre, ili yom i yʌl jiñi i chaʼyajlel bʌ chʌmel».

9 Juntiquil ti jiñi 7 ángelob añoʼ bʌ i chaʼan jiñi 7 colem tsima butʼul bʌ ti jiñi 7 cojix bʌ wocol tsaʼ tili i tiʼ subeyon: «Laʼ, mi caj c pʌsbeñet jiñi noviajʌl, i yijñam jiñi Tiñʌmeʼ». 10 Jin chaʼan, tiʼ coltaya jiñi espíritu, tsiʼ pʌyʌyon majlel ti jumpʼejl wits colem bʌ yicʼot chan bʌ, i tsiʼ pʌsbeyon jiñi chʼujul bʌ tejclum Jerusalén, woliʼ jubel tilel ti panchan, cʼʌlʌl yaʼ baqui an Dios, 11 i an i chaʼan i ñuclel Dios. Tsʼʌylaw bajcheʼ jumpʼejl xajlel* wen utsʼatax bʌ, cheʼ bajcheʼ jaspe sʌc tsʼʌyan bʌ. 12 An i murojlel wen colem bʌ yicʼot chan bʌ, an i chaʼan 12 puerta yicʼot 12 ángelob yaʼ tiʼ puertajlel, i jiñi i cʼabaʼ jiñi 12 i pʼolbal i yalobilob Israel tsʼijbubil yaʼ ti puerta tac. 13 Yaʼ ti este an uxpʼejl puerta, yaʼ ti norte an uxpʼejl puerta, yaʼ ti sur an uxpʼejl puerta i yaʼ ti oeste an uxpʼejl puerta. 14 Cheʼ jaʼel, jiñi i cʼʌclib i murojlel jiñi tejclum jiñʌch 12 xajlel, i yaʼ tsʼijbubilob i cʼabaʼ jiñi 12 i yapóstolob jiñi Tiñʌmeʼ.

15 Jiñi tsaʼ bʌ i pejcayon an i yeʼtijib* chaʼan bʌ pʼisoñel, juntsʼijt teʼ melbil bʌ ti oro, chaʼan miʼ pʼis jiñi tejclum, jiñi puerta tac yicʼot jiñi i murojlel. 16 Jiñi tejclum an chʌmpʼejl i xujc, jiñi i tamlel yicʼot i pochtʌlel lajal jach i colemlel. Tsiʼ pʼisi jiñi tejclum: Lʌcʼʌ 2,220 kilómetro.* Jiñi i tamlel, jiñi i pochtʌlel yicʼot jiñi i chanlel lajal jach. 17 Tsiʼ pʼisi jaʼel jiñi muro: Lʌcʼʌ 64 metro, cheʼ bajcheʼ miʼ chaʼlen pʼisoñel wiñicob, i cheʼʌch bajcheʼ miʼ chaʼlen pʼisoñel jaʼel jiñi ángel. 18 Jiñi muro melbil ti jaspe i jiñi tejclum melbil ti toʼol oro, sʌc tsʼʌyan bajcheʼ jiñi vidrio. 19 Jiñi i cʼʌclib i murojlel jiñi tejclum chʼʌlbil ti baqui jach bʌ xajlel tac utsʼatax bʌ: Jiñi ñaxam bʌ i cʼʌclib melbil ti jaspe, jiñi i chaʼpʼejlel ti zafiro, jiñi i yuxpʼejlel ti calcedonia, jiñi i chʌmpʼejlel ti esmeralda, 20 jiñi i joʼpʼejlel ti sardónica, jiñi i seislel ti sardio, jiñi i sietejlel ti crisólito, jiñi i yochojlel ti berilo, jiñi i nuevejlel ti topacio, jiñi i diezlel ti crisoprasa, jiñi i yoncejlel ti jacinto i jiñi i docejlel ti amatista. 21 Cheʼ jaʼel, jiñi 12 puerta melbil ti 12 perla, jujumpʼejl puerta melbil ti jumpʼejl jach perla. I jiñi colem bij am bʌ yaʼ ti tejclum melbil ti toʼol oro, sʌc tsʼʌyan bajcheʼ jiñi vidrio.

22 Maʼañic tsaʼ j qʼuele mi jumpʼejlic templo yaʼ ti tejclum, come Jehová* Dios, jiñi Mach bʌ añic i pʼisol i pʼʌtʌlel, jiñʌch jiñi i templo, cheʼ bajcheʼ jiñi Tiñʌmeʼ. 23 Yaʼ ti tejclum mach cʼʌñʌlic miʼ tsʼʌjyel jiñi qʼuin o jiñi uw, come jiñi i ñuclel Dios jiñʌch muʼ bʌ i tsʼʌycʼʌcʼan* i jiñi i lámpara jiñʌch jiñi Tiñʌmeʼ. 24 Jiñi tejclum tac mi caj i chaʼleñob xʌmbal tiʼ coltaya i sʌclel jiñi tejclum, i jiñi reyob ti pañimil mi caj i chʼʌmob majlel i ñuclel yaʼ ti tejclum. 25 Jiñi i puertajlel tac maʼañic mi caj i wis ñujpʼel, come yaʼi maʼañic miʼ cajel acʼʌlel. 26 I yaʼi mi caj i chʼʌmob majlel i ñuclel jiñi tejclum tac. 27 Pero yaʼ ti tejclum maʼañic mi caj i yochel chuqui bibiʼ bʌ mi juntiquilic muʼ bʌ i mel biʼlentic jax bʌ yicʼot muʼ bʌ i chaʼlen lot. Cojach mi caj i yochelob jiñi tsʼijbubiloʼ bʌ i cʼabaʼ yaʼ ti bʌlbil bʌ jun chaʼan bʌ cuxtʌlel i chaʼan bʌ jiñi Tiñʌmeʼ.