3 Juan
1 I chaʼan jiñi anciano,* tiʼ tojlel Gayo, jiñi cʼuxbibil bʌ, muʼ bʌ j cʼuxbin tiʼ sujm.
2 Cʼuxbibilet bʌ, mic chaʼlen oración ti a tojlel chaʼan bej wen miʼ loqʼuel pejtelel chuqui maʼ mel yicʼot chaʼan cʼoqʼuetʌch, cheʼ bajcheʼ wen woliʼ loqʼuel chuqui maʼ mel ili ora. 3 Come tsaʼ c wen ubi c tijicñʌyel cheʼ bʌ tsajñiyob jiñi hermanojob i tsiʼ yʌlʌyob chaʼan chʌn xucʼulet ti jiñi i sujmlel, chaʼan bej añet ti jiñi i sujmlel. 4 Maʼañic chuqui yambʌ miʼ ñumen aqʼueñon c tijicñʌyel, cojach cheʼ mi cubin chaʼan jiñi calobilob bej añobto ti jiñi i sujmlel.
5 Cʼuxbibilet bʌ, woli a pʌs chaʼan xucʼuletʌch tiʼ pejtelel chuqui maʼ mel tiʼ tojlel jiñi hermanojob, anquese mach a cʌñʌyobic. 6 Jiñi hermanojob an i subeyob jiñi congregación chaʼan bʌ jiñi a cʼuxbiya. A wocolic, coltañob ti chuqui i cʼʌjñibal i chaʼañob chaʼan jiñi i xʌmbalob, i mele cheʼ bajcheʼ miʼ mulan Dios. 7 Come chaʼañʌch i wenlel i cʼabaʼ Dios tsaʼ loqʼuiyob ti subtʼan, i maʼañic chuqui tsiʼ wis chʼʌmʌyob tiʼ tojlel jiñi lac piʼʌlob ti yambʌ tejclum tac. 8 Jin chaʼan, joñonla an ti lac wenta mi laj coltan hermanojob cheʼoʼ bʌ bajcheʼ jiñi, chaʼan mi lac tem chaʼlen eʼtel tiʼ coltʌntel jiñi i sujmlel.
9 An chuqui tsaʼ c tsʼijbube majlel jiñi congregación, pero Diótrefes, jiñi ñaxam bʌ miʼ mulan ajñel tiʼ tojlelob, maʼañic miʼ wis qʼuel ti ñuc chuqui mi lon cʌl. 10 Jin chaʼan, mi tsaʼ majliyon, mi caj cʌcʼ ti cʌñol chuqui woliʼ mel, woliʼ pam puc tʼan tac mach bʌ weñic ti lon c tojlel. I mach jasʌlic miʼ yubin jiñi, maʼañic miʼ qʼuel ti ñuc jiñi hermanojob mi muqʼuicto i chʼʌmob ti utsʼat. I miʼ ñop i mʌctan yicʼot i choc loqʼuel ti congregación jiñi yomobʌch bʌ i chʼʌmob ti utsʼat.
11 Cʼuxbibilet bʌ, mach a lajin chuqui mach bʌ weñic, lajin chuqui wem bʌ. Jiñi muʼ bʌ i mel chuqui wen tilem ti Dios. Jiñi muʼ bʌ i mel mach bʌ weñic mach qʼuelbilic i chaʼan* Dios. 12 Tiʼ pejtelelob, cheʼto jaʼel jiñi i sujmlel, an i yʌlʌyob chuqui wem bʌ tiʼ tojlel Demetrio. Tiʼ sujm, joñon lojon jaʼel mi lon cʌl chuqui wen tiʼ tojlel, i jatet a wujil chaʼan i sujmʌch muʼ bʌ lon cʌl.
13 Cabʌl chuqui com bʌ c tsʼijbubeñet, pero mach comic c bej tsʼijbubeñet ti jun. 14 Mic pijtan chaʼan mach jalix mic majlel j qʼuelet i mi lac chaʼlen tʼan.
Taja a ñʌchʼtʌlel.
Jiñi la camigojob miʼ chocbeñet majlel saludo. Aqʼueñob c saludo jiñi la camigojob yaʼi, ti jujuntiquilob.*