Juan

21 Cheʼ bʌ tsaʼix ujti iliyi, Jesús tsiʼ chaʼ pʌsʌ i bʌ tiʼ tojlel jiñi xcʌntʼañob yaʼ tiʼ tʼejl jiñi mar chaʼan Tiberíades. Cheʼʌch tsiʼ pʌsʌ i bʌ bajcheʼ iliyi. 2 Yaʼan Simón Pedro, Tomás (jiñi cʌmbil bajcheʼ Xloj),* Natanael chʼoyol bʌ ti Caná am bʌ ti Galilea, i yalobilob Zebedeo, yicʼot yambʌ chaʼtiquil xcʌntʼañob i chaʼan. 3 Simón Pedro tiʼ subeyob: «Mi caj c majlel ti chuc chʌy». I jiñi yambʌlob tiʼ subeyob: «Mic majlel lon quicʼotet». Jin chaʼan tsaʼ majliyob i tsaʼ letsiyob yaʼ ti barco, pero ti jiñi bʌ acʼʌlel mi juncojtic chʌy tsiʼ chucuyob.

4 Ti sʌcʼan, Jesús yaʼan tiʼ tiʼ mar, pero jiñi xcʌntʼañob maʼañic tsiʼ cʌñʌyob chaʼan jiñʌch Jesús. 5 Cheʼ jiñi, Jesús tiʼ subeyob: «Calobilob, ¿am ba chuqui mi laʼ cʼux?». Tsiʼ jacʼbeyob: «Maʼañic». 6 I Jesús tiʼ subeyob: «Chocola ochel jiñi chimoʼchʌy yaʼ ti laʼ ñoj i an chuqui mi caj laʼ taj yaʼi». Cheʼ bʌ tsiʼ chocoyob ochel, tsaʼ wen bujtʼi ti chʌy i maʼañix woliʼ mejlel i locʼsañob. 7 Cheʼ jiñi, jiñi xcʌntʼan cʼuxbibil bʌ ti Jesús tiʼ sube Pedro: «¡Jiñʌch lac Yum!». Cheʼ bʌ Simón Pedro tsiʼ yubi chaʼan jiñʌch lac Yum, tsiʼ lʌpʌ i pislel, come chacal,* i tsiʼ choco i bʌ yaʼ ti mar. 8 Pero jiñi yambʌ xcʌntʼañob ti alʌ barco tsaʼ majliyob, woliʼ tujcʼañob majlel jiñi chimoʼchʌy butʼul bʌ ti chʌy, come mach ñajtic añob yaʼ tiʼ tiʼ jiñi mar, cheʼ jach bʌ 90 metro.

9 Cheʼ bʌ tsaʼ cʼotiyob tiʼ tiʼ jiñi mar, tsiʼ qʼueleyob cʼajc. An chʌy yaʼ ti ñich cʼajc, i an pan jaʼel. 10 Jesús tiʼ subeyob: «Chʼʌmʌla tilel chaʼcojt uxcojt chʌy ujtel bʌ laʼ chuc». 11 Jin chaʼan, Simón Pedro tsaʼ letsi yaʼ ti barco i tsiʼ tujcʼa tilel ti lum jiñi chimoʼchʌy, butʼul bʌ ti colem tac bʌ chʌy: An 153. Pero, anquese wen cabʌl, maʼañic tsaʼ tujqʼui jiñi chimoʼchʌy. 12 Jesús tiʼ subeyob: «Laʼla ti uchʼel». Pero mi juntiquilic xcʌntʼan yom i cʼajtiben: «¿Majquiyet?», come yujilob chaʼan jiñʌch lac Yum. 13 Jesús tsiʼ lʌcʼtesa i bʌ, tsiʼ chʼʌmʌ jiñi pan i tsiʼ yʌqʼueyob, i cheʼʌch tsiʼ mele yicʼot jiñi chʌy jaʼel. 14 Ili jiñʌch i yuxyajlel cheʼ bʌ Jesús tsiʼ pʌsʌ i bʌ tiʼ tojlel jiñi xcʌntʼañob cheʼ bʌ tsaʼix chʼojyi* yaʼ baqui an chʌmeñoʼ bʌ.

15 Cheʼ bʌ tsaʼ ujtiyob ti uchʼel, Jesús tsiʼ cʼajtibe Simón Pedro: «Simón i yalobil Juan, ¿muʼ baʼ ñumen cʼuxbiñon bajcheʼ iliyi?». Tsiʼ jacʼbe: «Mucʼʌch c Yum, jatet a wujil chaʼan mij cʼuxbiñet». Jesús tiʼ sube: «Weʼsan jiñi c tiñʌmeʼ tac». 16 Tiʼ chaʼyajlel, Jesús tsiʼ cʼajtibe: «Simón i yalobil Juan, ¿muʼ baʼ cʼuxbiñon?». Tsiʼ jacʼbe: «Mucʼʌch c Yum, jatet a wujil chaʼan mij cʼuxbiñet». Jesús tiʼ sube: «Cʌntan jiñi c tiñʌmeʼ tac». 17 Tiʼ yuxyajlel tsiʼ cʼajtibe: «Simón i yalobil Juan, ¿muʼ baʼ cʼuxbiñon?». Pedro chʼijyem tsiʼ yubi i bʌ cheʼ bʌ tsiʼ qʼuele chaʼan i yuxyajlelix tsaʼ cʼajtibenti: «¿Muʼ baʼ cʼuxbiñon?». Jin chaʼan tiʼ sube: «C Yum, jatet laj a wujil, jatet a wujil chaʼan mij cʼuxbiñet». Jesús tiʼ sube: «Weʼsan jiñi calʌ tiñʌmeʼ tac. 18 Tiʼ sujm mic subeñet, cheʼ bʌ maxto wen añic a jabilel, jatet maʼ bajñel lʌp a pislel yicʼot maʼ majlel baqui jach a wom, pero, cheʼ bʌ maʼ ñoxʼan, mi caj a sʌtsʼ a cʼʌb i yambʌ mi caj i lʌpbeñet a pislel i mi caj i pʌyet majlel baqui mach a womic majlel». 19 Jesús woliʼ wʌn sub chaʼan Pedro mi caj i tsʌnsʌntel. ¿Chucoch? Chaʼan i xucʼtʌlel ti Dios. I cheʼ bʌ miʼ chʌmel, mi caj i yʌqʼuen i ñuclel Dios. Cheʼ bʌ tsaʼix i sube iliyi, tsiʼ yʌlʌ: «Chʌn tsajcañon».

20 Pedro tiʼ sutqʼui i bʌ i tsiʼ qʼuele chaʼan yaʼ tiʼ patob woliʼ tilel jiñi xcʌntʼan cʼuxbibil bʌ ti Jesús, jiñʌch jiñi tsaʼ bʌ totsʼle tiʼ tajn cheʼ bʌ tsiʼ chaʼleyob uchʼel ti icʼan i tsaʼ bʌ i cʼajtibe: «C Yum, ¿majqui jiñi muʼ bʌ caj i yʌqʼuet tiʼ cʼʌb a contrajob?». 21 Jin chaʼan, cheʼ bʌ Pedro tsiʼ qʼuele, tsiʼ cʼajtibe Jesús: «C Yum, ¿chuqui mi caj i yujtel tiʼ tojlel iliyi?». 22 Jesús tiʼ sube: «Mi com chaʼan miʼ cʌytʌl wʌʼi cʼʌlʌl cheʼ bʌ mic tilel, ¿a wenta ba? Jatet chʌn tsajcañon». 23 Jin chaʼan tiʼ tojlel jiñi xcʌntʼañob tsaʼ loqʼui jiñi tʼan chaʼan jiñi xcʌntʼan maʼañic mi caj i chʌmel. Pero Jesús maʼañic tiʼ sube chaʼan maʼañic mi caj i chʌmel. Tsaʼ bʌ i yʌlʌ jiñʌch: «Mi com chaʼan miʼ cʌytʌl wʌʼi cʼʌlʌl cheʼ bʌ mic tilel, ¿a wenta ba?».

24 Ili jiñʌch jiñi xcʌntʼan muʼ bʌ i sub pejtelel iliyi i jiñʌch tsaʼ bʌ i tsʼijbu, i la cujil chaʼan i sujmʌch muʼ bʌ i sub.

25 Tiʼ sujm, cabʌlto chuqui tsiʼ mele Jesús, cheʼ muqʼuic i laj tsʼijbuntel ti jumpʼejl bʌ qʼuin, mi cʌl maʼañic mi caj i jastiyel i yajñib pejtelel jiñi bʌlbil bʌ jun muʼ bʌ i tsʼijbuntel.