1 Pedro

4 Cristo tsiʼ ñusa wocol cheʼ bʌ tsajñi bajcheʼ wiñic, jin chaʼan jatetla jaʼel chajpan laʼ bʌ chaʼan cheʼ laʼ ñaʼtʌbal bajcheʼ i chaʼan, come majqui jach miʼ ñusan wocol miʼ pʌs chaʼan tsaʼix i cʌyʌ jiñi mulil 2 chaʼan cheʼ bʌ bej cuxulto maʼañix miʼ mel chuqui yom jiñi wiñicob, jiñix miʼ mel chuqui yom Dios. 3 Come cabʌlix ora an laʼ mele tilel chuqui yom jiñi tejclum tac, tsaʼ laʼ pʌsʌ quisintic jax bʌ laʼ melbal,* tsaʼ laʼ cʌlʌx mulaj tsʼiʼlel, tsaʼ laʼ cʌlʌx japʌ lembal, tsaʼ laʼ mele qʼuiñijel tac ñumeñix bʌ ti pʼis, qʼuiñijel tac chaʼan mi laʼ jap lembal yicʼot biʼtic jax bʌ i chʼujutesʌntel melbil tac bʌ dios. 4 Toj sajtelob i pusicʼal cheʼ jatetla mach cheʼix chumuletla cheʼ bajcheʼ jiñi biʼtic jax bʌ i melbalob tiʼ cuxtʌlel, jin chaʼan ñumeñix ti pʼis chuqui miʼ yʌlob ti laʼ tojlel. 5 Pero mi caj i yujtel meloñel tiʼ tojlel ili lac piʼʌlob chaʼan chuqui tac tsiʼ meleyob, jiñi chajpʌbil bʌ chaʼan miʼ chaʼlen meloñel tiʼ tojlel jiñi cuxuloʼ bʌ yicʼot jiñi chʌmeñoʼ bʌ miʼ caj ti meloñel. 6 Tiʼ sujm, jiñʌch chaʼan tsaʼ subentiyob wen tʼan jiñi chʌmeñoʼ bʌ, come anquese jiñi wiñicob tsaʼ jach i qʼueleyob bajcheʼ yilalob chaʼan miʼ chaʼleñob meloñel tiʼ tojlelob, tiʼ wut Dios miʼ mejlel ti tojʼesʌntelob majlel tiʼ coltaya jiñi espíritu.

7 Pero tsaʼix lʌcʼtiyi i jilibal pejtelel chuqui an. Jin chaʼan, yom an wem bʌ laʼ ñaʼtʌbal i yom chajpʌbiletla tiʼ pejtelel ora chaʼan mi laʼ mel oración. 8 Pero ñumen ñuc bʌ i cʼʌjñibal jin cheʼ mi laʼ wen cʼuxbin laʼ bʌ, come jiñi cʼuxbiya miʼ ñusan cabʌl mulil. 9 Yom mi laʼ qʼuel bajcheʼ mi laʼ coltan yambʌlob i mach yicʼotic wulwul tʼan. 10 Mach yʌlʌyic chuqui ti majtan tsaʼ aqʼuentiyetla ti jujuntiquiletla, cʼʌñʌla chaʼan mi laʼ comol coltan laʼ bʌ bajcheʼ xucʼul bʌ xʼeʼtelob chaʼan jiñi ñuc bʌ i yutslel Dios, mach bʌ junsujmic jach bajcheʼ miʼ tsictiyel. 11 Mi an muʼ bʌ i chaʼlen tʼan, laʼ i mel cheʼ bajcheʼ juntiquil muʼ bʌ i sub i tʼan tac Dios, i mi an muʼ bʌ i coltan yambʌlob, laʼ i mel bajcheʼ juntiquil cʌyʌl bʌ ti jiñi pʼʌtʌlel muʼ bʌ i yʌcʼ Dios, chaʼan tiʼ pejtelel chuqui miʼ mejlel miʼ yʌqʼuentel i ñuclel Dios tiʼ tojlel Jesucristo. Jiñʌch yom bʌ miʼ yʌqʼuentel i ñuclel yicʼot i pʼʌtʌlel tiʼ pejtelel ora. Amén.

12 Cʼuxbibiletbʌla, mach yomic miʼ toj sajtel laʼ pusicʼal chaʼan jiñi wocol tac lajal bʌ bajcheʼ cʼajc woli bʌ laʼ ñusan, cheʼ bajcheʼ maxto laʼ cʌñʌyic chuqui woliʼ yujtel ti laʼ tojlel. 13 Yom bʌ mi laʼ mel jiñʌch cheʼ mi laʼ bej ubin laʼ tijicñʌyel cheʼ bajcheʼ cʼamel woli laʼ ñusan jiñi wocol tac tsaʼ bʌ i ñusa Cristo, chaʼan mi laʼ wen ubin laʼ tijicñʌyel jaʼel cheʼ bʌ miʼ tsictiyel i ñuclel. 14 Mi woli laʼ pʼajtʌl* tiʼ caj i cʼabaʼ Cristo, tijicñayetla, come an laʼ chaʼan jiñi espíritu chaʼan bʌ ñuclel, cheʼʌchi, jiñi i yespíritu Dios.

15 Weno, mi juntiquileticla yom miʼ ñusan wocol tiʼ caj yujil tsʌnsa, xujchʼ, tiʼ caj jontol o tiʼ caj miʼ yotsan i bʌ baqui mach i wentajic. 16 Pero mi an muʼ bʌ i ñusan wocol tiʼ caj xñoptʼan, mach yomic miʼ quisñin i bʌ, laʼ i chʌn aqʼuen i ñuclel Dios chaʼan cheʼʌch chumul bajcheʼ xñoptʼan. 17 Come ili jiñʌch i yorajlel wʌn waʼchocobil bʌ chaʼan miʼ tejchel meloñel tiʼ yotot Dios. Pero mi ñaxan tsaʼ tejchi ti lac tojlel, ¿bajcheʼ yilal mi caj i yujtelob jiñi maʼañic bʌ miʼ jacʼob jiñi wen tʼan chaʼan bʌ Dios? 18 «I mi wocol miʼ coltʌntel jiñi toj bʌ, ¿chuqui mi caj i yujtel tiʼ tojlel jiñi maʼañic bʌ miʼ chʼujutesan Dios yicʼot jiñi xmulil?». 19 Jin chaʼan, jiñi woli bʌ i ñusañob wocol chaʼan woliʼ melob chuqui yom Dios laʼ i chʌn melob chuqui wen i laʼ i chʌn acʼob i bʌ tiʼ cʼʌb jiñi Tsaʼ bʌ i mele pejtelel chuqui an come xucʼulʌch.