Romanos

7 Hermanojob, ¿mach ba laʼ wujilic chaʼan jiñi Mandar an i pʼʌtʌlel tiʼ tojlel jiñi wiñic cheʼ bʌ cuxulto? (Come woli c pejcan jiñi i cʌñʌyoʼ bʌ mandar). 2 Jumpʼejl ejemplo, cheʼ bajcheʼ miʼ yʌl jiñi mandar jiñi xʼixic ñujpuñem bʌ chucul tiʼ ñoxiʼal cheʼ bʌ cuxulto, pero mi tsaʼ chʌmi i ñoxiʼal, librejix miʼ cʌytʌl ti jiñi mandar chaʼan yom chucul tiʼ tojlel. 3 Jin chaʼan, mi tsaʼ sujti tiʼ yijñam yambʌ wiñic cheʼ bʌ cuxulto i ñoxiʼal, mi caj i subentel ti xtsʼiʼlel.* Pero mi tsaʼ chʌmi jiñi i ñoxiʼal, mach chʌn chuculix tiʼ tojlel, jin chaʼan mi tsiʼ taja yambʌ wiñic mach xtsʼiʼlelic.

4 Cheʼ jaʼel, quermañujob, jatetla jaʼel lon cʌchʌletla ti jiñi Mandar. Pero mach chʌn cʌchʌletixla come Cristo tsiʼ yʌcʼʌ i cuxtʌlel, i chaʼañetixla Cristo, jiñi tsaʼ bʌ chʼojyesʌnti* chaʼan mi lac mel chuqui tac miʼ mulan Dios. 5 Come cheʼ bʌ chumulontola cheʼ bajcheʼ yom lac bʌcʼtal, jiñi Mandar tsiʼ jamʌ pʌsʌ chaʼan jiñi mach bʌ weñic yaʼʌch tilem ti lac bʌcʼtal chaʼan mi lac chaʼlen mulil, i jiñi mulil miʼ yʌcʼonla ti chʌmel. 6 Pero wʌle tsaʼix cojliyonla tiʼ pʼʌtʌlel jiñi Mandar, jin chaʼan wʌleʼli maʼañoñixla tiʼ pʼʌtʌlel jiñi Mandar. Jin chaʼan, mach jiñix jiñi ñoxix bʌ Mandar yom bʌ miʼ sujtesañonla ti xyaj eʼtel i chaʼan Dios, yom bʌ miʼ tojʼesañonla majlel chaʼan mi lac sujtel ti xyaj eʼtel i chaʼan Dios jiñʌch jiñi espíritu.

7 Cheʼ jiñi, ¿chuqui mi caj la cʌl? ¿Mulil ba jiñi Mandar? ¡Mach cheʼiqui! Tiʼ sujm, machic an jiñi Mandar maʼañic tsaʼ cʼoti c ñaʼtan chuqui jiñi mulil. Jumpʼejl ejemplo, machic miʼ yʌl jiñi Mandar: «Mach a wen mulan chuqui an», maʼañic tsaʼ j cʌñʌ chuqui jiñi i wen mulʌntel chuqui an. 8 Pero jiñi mulil tsiʼ cʼʌñʌ jiñi mandar chaʼan miʼ yʌcʼ ti loqʼuel tic tojlel jiñi i wen mulʌntel chuqui an, come mi maʼañic jiñi mandar chʌmen jiñi mulil. 9 Tiʼ sujm, joñon cuxulon cheʼ bʌ maxto añic jiñi mandar. Pero cheʼ bʌ tsaʼ juli jiñi mandar, tsaʼ chaʼ cuxtʌyi jiñi mulil i joñon tsaʼ chʌmiyon. 10 I tsaʼ j qʼuele chaʼan jiñi mandar yom bʌ miʼ lon aqʼueñon j cuxtʌlel, tiʼ sujm woliʼ pʌyon majlel ti chʌmel. 11 Come jiñi mulil tsiʼ cʼʌñʌ jiñi mandar chaʼan miʼ lotiñon i miʼ tsʌnsañon. 12 Jin chaʼan, jiñi i Mandar Moisés chʼujulʌch, i jiñi muʼ bʌ i yʌl yaʼi chʼujulʌch yicʼot toj.

13 Cheʼ jiñi, ¿wem ba* chuqui mi caj i yʌcʼon ti chʌmel? ¡Maʼañic baʼ ora yom miʼ yujtel jiñi! Jiñi mulil jiñʌch muʼ bʌ i mel jiñi. Tiʼ tsʌnsayon tiʼ caj chuqui wem bʌ. Ili chaʼañʌch miʼ pʌstʌl chuquiyes jiñi mulil. Jiñi Mandar tsiʼ jamʌ pʌsʌ chaʼan mach junyajl weñic jiñi mulil. 14 Come la cujil chaʼan jiñi Mandar i chaʼañʌch Dios, pero joñon xmulilon, xyaj eʼtelon i chaʼan jiñi mulil. 15 Come maʼañic mic chʼʌmben i sujm jiñi c melbal: Maʼañic mic mel jiñi com bʌ c mel, jin mic mel jiñi muʼ bʌ c tsʼaʼlen. 16 Pero mi tsaʼ c mele jiñi mach bʌ comic c mel, mic pʌs chaʼan mic ñaʼtan chaʼan weñʌch jiñi Mandar. 17 Pero wʌleʼli mach joñoñix mic meleʼ tac jiñi, jiñʌch jiñi mulil am bʌ tic tojlel. 18 Come cujil chaʼan maʼañic chuqui wem bʌ tic tojlel, com cʌl tic bʌcʼtal, anquese com c mel chuqui wen, maʼañic miʼ mejlel c mel. 19 Come maʼañic mic mel jiñi wen tac bʌ com bʌ c mel, jin mic mel jiñi mach bʌ weñic, jiñi mach bʌ comic c mel. 20 Yubil cheʼ jiñi, mi jin mic mel jiñi mach bʌ comic, mach joñoñix woli c mel, jiñʌch jiñi mulil am bʌ tic tojlel.

21 Jin chaʼan, mij qʼuel chaʼan an tic tojlel ili mandar: Cheʼ bʌ com c mel chuqui wen, jiñi mach bʌ weñic an tic tojlel. 22 Tic pusicʼal mic wen mulan i mandar Dios, 23 pero tic bʌcʼtal mij qʼueleʼ yambʌ mandar muʼ bʌ i contrajin jiñi mandar am bʌ tic ñaʼtʌbal i miʼ cʌchon tiʼ mandar jiñi mulil am bʌ tic bʌcʼtal. 24 ¡Pʼumpʼuñon jax! ¿Majqui mi caj i coltañon ti ili c bʌcʼtal woli bʌ i chʌmel? 25 ¡Mi cʌqʼuen wocolix i yʌlʌ Dios tiʼ tojlel lac Yum Jesucristo! Cheʼʌchi, tic ñaʼtʌbal xyaj eʼtelon i chaʼan jiñi i mandar Dios, pero tic bʌcʼtal xyaj eʼtelon i chaʼan jiñi i mandar mulil.