1 Pedro
3 Cheʼ jaʼel, ijñamʌlob, chucu laʼ bʌ tiʼ tojlel laʼ ñoxiʼal chaʼan mi maʼañic miʼ jacʼben i tʼan Dios miʼ sujtel ti xjacʼtʼan chaʼan laʼ melbal i mach chaʼañic laʼ tʼan, 2 come tsiʼ qʼueleyob jiñi wem bʌ laʼ melbal yicʼot chaʼan mi laʼ qʼuelob ti ñuc. 3 Mach jiñic yom ti laʼ chʼʌjlib jiñi cʼajpan tsiquil tac bʌ, bajcheʼ jiñi wen jalbil laʼ jol, laʼ chʼʌjlib melbil bʌ ti oro yicʼot wen lets tac bʌ i tojol laʼ pislel. 4 Acʼʌla chaʼan jiñi laʼ wutsʼatlel muʼ bʌ i qʼuejlel jiñʌch am bʌ ti la’ pusicʼal. Jin chaʼan, jiñi laʼ wutslel yicʼot laʼ ñʌchʼtʌlel jiñʌch yom bʌ ti laʼ chʼʌjlib, ili jiñʌch ñumen ñuc bʌ i cʼʌjñibal miʼ qʼuel Dios, cheʼ jaʼel ili chʼʌjlibʌl maʼañic miʼ jilel. 5 Come ti wajali cheʼʌch tsiʼ chʼʌlʌyob i bʌ jiñi chʼujul bʌ xʼixicob tsaʼ bʌ i yʌcʼʌyob i pijtaya ti Dios, cheʼ bʌ chuculob tiʼ ñoxiʼal, 6 cheʼ bajcheʼ Sara tsiʼ jacʼbe i tʼan Abrahán i tsiʼ pejca tiʼ yum. Jatetla i yixicʼaletla Sara, pero cojach mi mucʼʌch laʼ chʌn mel chuqui wen yicʼot mi maʼañic mi laʼ wʌqʼuen i mʌlbeñetla* jiñi bʌqʼuen.
7 Cheʼ jaʼel, ñoxi’aletʌlbʌla, bej chumlenla laʼ wicʼot laʼ wijñam i chʼʌmʌyobla ti ñuc.* Jiñi xʼixicob ñumen cʼuñob bajcheʼetla, jin chaʼan qʼuelela ti ñuc cheʼ bajcheʼ mi laʼ cʌntan jumpʼejl vaso yujil bʌ tojpʼel, i cheʼ bajcheʼ jiñi maʼañic miʼ mʌctʌntel jiñi laʼ woración, come Dios, ti jiñi i yutslel, tsiʼ yʌqʼueyob jiñi majtañʌl chaʼan bʌ cuxtʌlel cheʼ bajcheʼ tsiʼ yʌqʼueyetla jaʼel.
8 Chaʼan mi cujtesan ili j carta mic subeñetla chaʼan yom junlajal laʼ ñaʼtʌbal, ubinla i wocol yambʌlob, pʌsben laʼ bʌ cʼuxbiya cheʼ bʌ bajcheʼ muʼ bʌ i pʌstʌl ti jumpʼejl familia, pʌsʌla pʼuntaya yicʼot pecʼlel. 9 Mach laʼ chaʼ sutqʼuin chuqui mach bʌ weñic mi laʼ melbentel mi yomicto mi laʼ chaʼ sutqʼuin jiñi pʼajoñel* cheʼ an majqui miʼ pʼajetla. Acʼʌla jumpʼejl bendición come jiñʌch chaʼan tsaʼ pʌjyiyetla, chaʼan mi laʼ wʌqʼuentel jumpʼejl bendición.
10 Come «majqui jach yom i cʼuxbin i cuxtʌlel i tijicña yom chumtʌl laʼ i ticʼ jiñi i yacʼ ti chuqui mach bʌ weñic i laʼ i ticʼ i yej ti lot. 11 Laʼ i tʌtsʼ* i bʌ ti chuqui mach bʌ weñic i laʼ i mel chuqui wen, laʼ i sʌclan ñʌchʼtʌlel i laʼ i tsajcan majlel. 12 Come jiñi i wut Jehová* yaʼan tiʼ tojlel jiñi tojoʼ bʌ i miʼ ñʌchʼtʌbeñob jiñi i yoración muʼ bʌ i melob ti wocol tʼan, pero Jehová* miʼ tsʼaʼlen jiñi muʼ bʌ i melob mach bʌ weñic».
13 Come ¿majqui mi caj i ticʼlañetla mi tiʼ pejtelel laʼ pusicʼal mi laʼ mel chuqui wen? 14 Pero tijicñayetla anquese mi laʼ ñusan wocol tac tiʼ caj mi laʼ mel chuqui toj. Mach laʼ bʌcʼñan chuqui miʼ bʌcʼñañob* i mi yomicto mi laʼ cʼojoʼtan* laʼ bʌ. 15 Qʼuelela ti ñuc Cristo bajcheʼ laʼ Yum yaʼ ti laʼ pusicʼal, yom chajpʌbiletla tiʼ pejtelel ora chaʼan mi laʼ jacʼben majqui jach miʼ melbeñetla cʼajtiya chaʼan jiñi laʼ pijtaya, pero yicʼot laʼ wutslel yom mi laʼ mel i pʌsʌla chaʼan mucʼʌch laʼ qʼuelob ti ñuc.
16 Yom chʌn sʌc miʼ yajñel laʼ conciencia chaʼan, mach yʌlʌyic chuqui miʼ yʌlob ti laʼ contra, miʼ yubiñob quisin jiñi muʼ bʌ i chaʼleñob tʼan come an wem bʌ laʼ melbal bajcheʼ xcʌntʼañob i chaʼan Cristo. 17 Come ñumen wen cheʼ mi lac ñusan wocol chaʼan i melol chuqui wen, mi cheʼ yom Dios, i mach tiʼ cajic mi lac mel chuqui mach bʌ weñic. 18 Come Cristo junsujtel jach tsaʼ chʌmi chaʼan jiñi mulil i chaʼañʌch tiʼ pejtelel ora, juntiquil toj bʌ tiʼ tojlel mach bʌ tojobic, chaʼan miʼ mejlel i coltañetla laʼ taj Dios. Tsaʼ chʌmi bajcheʼ wiñic, pero tsaʼ aqʼuenti i cuxtʌlel yaʼ ti panchan. 19 I cheʼ bʌ espíritujix, tsaʼ majli i suben tʼan tac chaʼan bʌ meloñel jiñi ángelob cʌchʌloʼ bʌ, 20 tsaʼ bʌ i ñusayob tʼan ti wajali, cheʼ bʌ Dios woliʼ pʌs i pijt tiʼ qʼuiñilel Noé, cheʼ bʌ woliʼ mejlel jumpʼejl arca baqui chaʼtiqui uxtiquil lac piʼʌlob, yom i yʌl, 8 lac piʼʌlob, tsaʼ coltʌntiyob yaʼ ti jaʼ.
21 Miʼ mejlel lac lajin jiñi tsaʼ bʌ ujti ti wajali yicʼot jiñi chʼʌmjaʼ* woli bʌ i coltañetla ili ora tiʼ tojlel jiñi i chaʼ chʼojyesʌntel* Jesucristo (mach jiñic cheʼ miʼ locʼsan i bibiʼlel lac bʌcʼtal, jiñʌch cheʼ miʼ cʼajtiben Dios wem bʌ laj conciencia). 22 Cristo yaʼan tiʼ ñoj Dios, come tsaʼ letsi majlel ti panchan, i tsaʼ aqʼuenti tiʼ wenta ángelob, añoʼ bʌ i yeʼtel yicʼot i pʼʌtʌlel.