2 Corintios
5 Come la cujil chaʼan, mi jiñi la cotot am bʌ ti lum (ili pisil bʌ otot) mi caj i jisʌntel, Dios mi caj i yʌqʼueñonla jumpʼejl otot mach bʌ añic miʼ jilel yaʼ ti panchan, jumpʼejl otot mach bʌ melbilic tiʼ cʼʌb wiñic. 2 Tiʼ sujm, mi lac chaʼlen ajacñiyel ti lac c pusicʼal ti ili otot, wen la comix lac chʼʌm jiñi otot am bʌ ti panchan, iliyi mi caj i mʌconla bajcheʼ lac pislel, 3 chaʼan cheʼ bʌ mi lac chʼʌm, mach chacaloñixla. 4 Tiʼ sujm, jiñi añonbʌla ti ili pisil bʌ otot mi lac chaʼlen ajacñiyel ti lac pusicʼal yicʼot lujboñixla, pero mach chaʼañic la comix lac locʼsan ili pisil bʌ otot, la comix lac chʼʌm jiñi yambʌ, chaʼan jiñi cuxtʌlel tiʼ pejtelel ora miʼ yochel tiʼ qʼuexol jiñi lac bʌcʼtal yujil bʌ chʌmel. 5 Weno, Dios jiñʌch tsaʼ bʌ i chajpayonla chaʼan iliyi, i jiñʌch tsaʼ bʌ i yʌqʼueyonla jiñi espíritu chaʼan miʼ pʌs jiñi muʼto bʌ caj i tilel.
6 Jin chaʼan, mucʼʌch lac wen ñop tiʼ pejtelel ora i la cujil chaʼan, mi bej chumulontola ti ili lac bʌcʼtal, bej ñajtto añonla la quicʼot lac Yum, 7 joñonla chumulonla cheʼ bajcheʼ an lac ñopoñel i mach chaʼañic chuqui mi lac taj laj qʼuel. 8 Pero mucʼʌch lac wen ñop i ñumen wen mi laj qʼuel cheʼ ñajt añonla ti lac bʌcʼtal i mi lac chumtʌl la quicʼot lac Yum. 9 Jin chaʼan, mi chumulonla la quicʼot o mi ñajt añonla tiʼ tojlel, jiñi la com bʌ jiñʌch chaʼan utsʼat miʼ qʼuelonla. 10 Come ti lac pejtelel yom mi lac majlel yaʼ baqui miʼ chaʼlen meloñel Cristo chaʼan jujuntiquil miʼ yʌqʼuentel jiñi yom bʌ miʼ taj chaʼan jiñi wem bʌ o mach bʌ weñic tsiʼ mele cheʼ bʌ anto tiʼ bʌcʼtal.
11 I sujmʌch chaʼan mi lon c bej ñijcʌbeñob i pusicʼal jiñi lac piʼʌlob chaʼan miʼ ñopob come cujil lojon chuquiyes jiñi i bʌcʼñʌntel lac Yum, pero Dios wen i cʌñʌyon lojon i mic pijtan chaʼan wen i cʌñʌyon lon jaʼel jiñi laʼ conciencia. 12 Mach comic c chaʼ qʼuel lon c bʌ ti ñuc chaʼañetla, woli lon cʌqʼueñetla junchajp chucoch yom mi laʼ qʼuel laʼ bʌ ti ñuc chaʼañon lojon i cheʼ bajcheʼ jiñi miʼ mejlel laʼ wʌqʼuen i jacʼbal jiñi muʼ bʌ i qʼuelob i bʌ ti ñuc chaʼan bajcheʼ yilalob i mach chaʼañic chuqui añob tiʼ pusicʼal. 13 Come mi sojquemon lon ti ñaxan, chaʼañʌch Dios tsaʼ lon c mele, mi tojʌch jiñi lon c ñaʼtʌbal, chaʼañʌch laʼ wenlel. 14 Jiñi i cʼuxbiya Cristo miʼ xicʼon lojon, come iliyi jiñʌch tsaʼ bʌ cʼoti lon c ñaʼtan: Chaʼan juntiquil wiñic tsaʼ chʌmi chaʼan pejtelel lac piʼʌlob, come ti ñaxan lajal bajcheʼ laj chʌmeñobix. 15 I tsaʼ chʌmi chaʼan tiʼ pejtelel lac piʼʌlob, chaʼan jiñi cuxuloʼ bʌ mach cuxulobix chaʼan miʼ melob chuqui bajñel yomob, chaʼañix jiñi tsaʼ bʌ chʌmi tiʼ tojlelob i tsaʼ chʼojyesʌnti.*
16 Jin chaʼan, cʼʌlʌl ili ora, maʼañix majqui cheʼ yilal mi lon j qʼuel cheʼ bajcheʼ miʼ qʼuelob jiñi lac piʼʌlob. Mi an tsaʼ bʌ lon j qʼuele Cristo i cheʼ yilal tsaʼ lon j qʼuele bajcheʼ miʼ qʼuelob jiñi lac piʼʌlob, tiʼ sujm mach cheʼix yilal mi lon j qʼuel. 17 Jin chaʼan, mi an majqui temel yicʼot Cristo, tsijib melbilix. Jiñi chuqui tac ñoxix bʌ tsaʼix ñumi. ¡Qʼuelela! Añix chuqui tac tsijiʼ bʌ. 18 Pero pejtelel chuqui an tilem ti Dios, tsaʼ bʌ i chaʼ acʼʌyon lon ti utsʼan lon quicʼot tiʼ tojlel Cristo, i tsiʼ yʌqʼueyon lon ili eʼtel chaʼan mij coltan lojon yañoʼ bʌ chaʼan miʼ chaʼ utsʼañob yicʼot. 19 Yom i yʌl chaʼan tiʼ tojlel Cristo, Dios woliʼ chaʼ utsʼesan i bʌ yicʼot jiñi pañimil, maʼañic tsiʼ chʼʌmʌ ti ñuc jiñi i mulob, i tsiʼ yʌqʼueyon lon jiñi eʼtel chaʼan mi lon c sub jiñi tʼan chaʼan bʌ ñʌchʼtʌlel.
20 Jin chaʼan, chocbilon lojon tilel* ti Dios tiʼ qʼuexol Cristo, Dios woliʼ cʼʌñon lojon i cheʼʌch bajcheʼ jin woliʼ pejcañetla ti wocol tʼan. Come añon lon tiʼ qʼuexol Cristo, mi lon c subeñetla ti wocol tʼan: «Utsʼesan laʼ bʌ laʼ wicʼot Dios». 21 Cristo maʼañic tsiʼ chaʼle mulil i Dios tsiʼ yʌcʼʌ bajcheʼ majtañʌl chaʼan lac mul, chaʼan tiʼ tojlel mi lac mejlel ti qʼuejlel ti toj tiʼ wut Dios.