Romanos

5 Jin chaʼan, wʌle cheʼ tsaʼix ajli chaʼan tojonla chaʼan jiñi lac ñopoñel, laʼ lac ñusan lac bʌ ti jiñi ñʌchʼtʌlel* la quicʼot Dios tsaʼ bʌ lac taja tiʼ tojlel lac Yum Jesucristo. 2 Tiʼ sujm, tiʼ caj jiñi lac ñopoñel tiʼ tojlel tsaʼ jambentiyonla jumpʼejl bij chaʼan mi lac taj jiñi ñuc bʌ i yutslel Dios, jin chaʼan laʼ la cubin lac tijicñʌyel* cheʼ bʌ wolito lac pijtan chaʼan Dios miʼ yʌqʼueñonla lac ñuclel. 3 Cheʼto jaʼel, laʼ la cubin lac tijicñʌyel* cheʼ bʌ mi lac ñusan wocol tac come la cujil chaʼan jiñi wocol tac miʼ coltañonla laj cuch, 4 jiñi i cuchol wocol miʼ yʌcʼ chaʼan utsʼat mi laj qʼuejlel ti Dios, i cheʼ utsʼat mi laj qʼuejlel ti Dios miʼ yʌqʼueñonla lac pijtaya. 5 Tiʼ sujm joñonla miʼ mejlel lac ñop ti jiñi pijtaya am bʌ lac chaʼan come Dios miʼ cʼʌn jiñi chʼujul bʌ i yespíritu muʼ bʌ i yʌqʼueñonla chaʼan miʼ pʌs chaʼan miʼ cʼuxbiñonla.

6 Tiʼ sujm, cheʼ bʌ cʼuñontola, Cristo tsaʼ chʌmi tiʼ caj jiñi xmulilob cheʼ tiʼ yorajlel bajcheʼ waʼchocobil. 7 Wocol chaʼan juntiquil lac piʼʌl miʼ yʌcʼ i bʌ ti chʌmel tiʼ caj juntiquil toj bʌ wiñic, pero tajol añʌch majqui miʼ yʌcʼ i bʌ ti chʌmel tiʼ caj juntiquil wem bʌ wiñic. 8 Pero Dios tsiʼ pʌsbeyonla i cʼuxbiya bajcheʼ iliyi: Cheʼ bʌ xmulilontola, Cristo tsaʼ chʌmi chaʼañonla. 9 I wʌleʼli cheʼ tsaʼix sujbiyonla ti toj chaʼan i chʼichʼel, ñumen añix chucoch mi caj laj coltʌntel tiʼ tojlel Jesús ti jiñi i michʼajel Dios. 10 Come mi tsaʼ utsʼayonla la quicʼot Dios cheʼ bʌ tsaʼ chʌmi jiñi i Yalobil cheʼ bʌ i contrajontola, ñumento mi caj laj coltʌntel chaʼan jiñi i cuxtʌlel wʌleʼli cheʼ chaʼ utsoñixla la quicʼot. 11 I mach cojic jach jiñi, tijicña mi la cubin lac bʌ ti Dios tiʼ tojlel jiñi lac Yum Jesucristo, tiʼ tojlel tsaʼ mejliyonla ti chaʼ utsʼan la quicʼot Dios.

12 Tiʼ tojlel juntiquil wiñic, jiñi mulil tsaʼ ochi ti pañimil i tiʼ caj jiñi mulil tsaʼ ochi jiñi chʌmel, i cheʼʌch tsaʼ pam pujqui jiñi chʌmel tiʼ tojlel pejtelel wiñicob come tiʼ pejtelelob tsiʼ chaʼleyob mulil... 13 Come jiñi mulil añix ti pañimil cheʼ bʌ maxto añic jiñi Mandar, pero maʼañic miʼ mejlel ti ajlel chaʼan juntiquil lac piʼʌl tsiʼ chaʼle mulil cheʼ bʌ maxto añic jiñi mandar. 14 Pero jiñi chʌmel tsiʼ chaʼle yumʌntel tiʼ yorajlel Adán cʼʌlʌl tiʼ yorajlel Moisés, cheʼto jaʼel tiʼ tojlel jiñi mach bʌ lajalic tsiʼ chaʼleyob mulil bajcheʼ Adán, lʌcʼʌ lajal bʌ bajcheʼ jiñi muʼ bʌ caj i tilel.

15 Pero jiñi majtan mach lajalic bajcheʼ jiñi mulil. Come tiʼ caj i mul juntiquil wiñic cabʌlob woliʼ chʌmelob, cheʼ jaʼel chaʼan jiñi ñuc bʌ i yutslel Jesucristo cabʌl lac piʼʌlob tsiʼ tajayob jiñi ñuc bʌ i yutslel Dios yicʼot jiñi i majtan. 16 Cheʼ jaʼel, jiñi majtan tilem bʌ ti Dios mach cheʼic miʼ yujtel bajcheʼ tsaʼ ujti tiʼ caj i mul juntiquil wiñic: Jiñi tsaʼ bʌ tajle tiʼ caj jumpʼejl mulil jiñʌch cheʼ tsaʼ sujbi chaʼan laj xmulilob, pero jiñi majtañʌl jiñʌch cheʼ tsaʼ sujbiyob ti toj anquese tsiʼ wen chaʼleyob mulil. 17 Come mi tiʼ caj i mul juntiquil wiñic tsiʼ chaʼle yumʌntel jiñi chʌmel, ¡ñumento jiñi muʼ bʌ i wen tajob jiñi ñuc bʌ i yutslel Dios yicʼot jiñi majtañʌl chaʼan bʌ tojel mi caj i chaʼleñob yumʌntel yicʼotob i cuxtʌlel wocolix i yʌlʌ juntiquil wiñic, Jesucristo!

18 Jin chaʼan, cheʼ bajcheʼ jumpʼejl jach mulil tsiʼ yʌcʼʌ chaʼan pejtelel wiñicob miʼ sujbelob ti xmulil, cheʼ jaʼel, chaʼan jach junchajp chuqui toj bʌ tsaʼ mejli miʼ yʌcʼ chaʼan pejtelel wiñicob miʼ sujbelob ti toj yicʼot miʼ tajob i cuxtʌlel. 19 Come cheʼ bajcheʼ cabʌlob tsaʼ sujtiyob ti xmulil tiʼ caj i ñusatʼan juntiquil wiñic, cheʼ jaʼel, tiʼ caj tsiʼ jacʼʌ tʼan juntiquil wiñic cabʌlob mi caj i sujtelob ti toj. 20 Dios tsiʼ yʌcʼʌ jiñi Mandar chaʼan jiñi lac piʼʌlob miʼ qʼuelob chaʼan miʼ wen chaʼleñob mulil. Pero cheʼ bʌ jiñi lac piʼʌlob tsiʼ wen chaʼleyob mulil, Dios tsiʼ pʌsbeyob ñuc bʌ i yutslel. 21 ¿Chucoch? Chaʼan, cheʼ bajcheʼ jiñi mulil tsiʼ chaʼle yumʌntel yicʼot jiñi chʌmel, jiñi ñuc bʌ i yutslel Dios miʼ chaʼlen yumʌntel jaʼel chaʼan toj miʼ qʼuel jiñi lac piʼʌlob. Cheʼʌch miʼ yujtel bajcheʼ ili chaʼan jiñi lac piʼʌlob miʼ mejlel i tajob i cuxtʌlel mach bʌ añic miʼ jilel tiʼ tojlel jiñi lac Yum Jesucristo.