Hebreos
4 Jin chaʼan, come bej anto jiñi tʼan chaʼan mi lac mejlel ti ochel tiʼ cʼaj o Dios, laʼ laj cʌntan lac bʌ,* ame an juntiquil ti laʼ tojlel mach bʌ weñic miʼ qʼuejlel chaʼan miʼ yochel ti jiñi cʼaj o. 2 Come joñonla tsaʼ subentiyonla jaʼel jiñi wen tʼan, cheʼ bajcheʼ tsaʼ subentiyob, pero maʼañic tsiʼ tajayob i wenlel ti jiñi tʼan tsaʼ bʌ i yubiyob come mach temelobic tiʼ ñopoñel yicʼot jiñi tsaʼʌch bʌ i jacʼʌyob. 3 Pero joñonla tsaʼʌch bʌ lac pʌsʌ lac ñopoñel mucʼʌch la cochel ti i cʼaj o tsaʼ bʌ i yʌlʌ «Jin chaʼan tic michʼajel tsaʼ cʌcʼʌ c tʼan: ‹Maʼañic mi caj i yochelob tij cʼaj o›», anquese pejtelel chuqui tsiʼ mele ujtemix cʼʌlʌl cheʼ tiʼ tejchibal pañimil. 4 Come yaʼ ti Tsʼijbujel an baqui tsiʼ yʌlʌ chaʼan bʌ jiñi i sietejlel bʌ qʼuin: «I ti jiñi i sietejlel bʌ qʼuin Dios tsiʼ cʼaja i yo tiʼ pejtelel chuqui tsiʼ mele». 5 I miʼ yʌl jaʼel: «Maʼañic mi caj i yochelob tij cʼaj o».
6 Jin chaʼan, come anto yom bʌ miʼ yochelob, i jiñi ñaxam bʌ tsaʼ subentiyob jiñi wen tʼan maʼañic tsaʼ ochiyob tiʼ caj i ñusatʼañob, 7 Dios miʼ chaʼ waʼchocon yambʌ qʼuin cheʼ bʌ tsiʼ yʌlʌ «wʌle» yaʼ tiʼ salmo David anquese ñumeñix cabʌl ora. Cheʼʌch bajcheʼ tsaʼ ujti ti ajlel: «Mi wʌle mucʼʌch laʼ ñʌchʼtʌbeñon c tʼan, mach laʼ tsʌtsʼesan laʼ pusicʼal». 8 Come, cheʼ tsaʼic i pʌyʌyetla majlel Josué ti jumpʼejl ajñibʌl chaʼan cʼaj o, Dios maʼañic tsiʼ wiʼil taja ti tʼan yambʌ qʼuin. 9 Jin chaʼan cʌylemto jumpʼejl sábado chaʼan bʌ cʼaj o chaʼan jiñi i tejclum Dios. 10 Come jiñi wiñic tsaʼ bʌ ochi tiʼ cʼaj o Dios tsiʼ cʼaja i yo jaʼel ti jiñi i yeʼtel tac, cheʼ bajcheʼ Dios tsiʼ cʼaja i yo.
11 Jin chaʼan, laʼ lac chaʼlen wersa chaʼan mi la cochel ti jiñi cʼaj o, chaʼan mi juntiquilic miʼ yajlel tiʼ tsajcʌntel jiñi i ñusatʼan yambʌlob. 12 Come jiñi i tʼan Dios cuxulʌch i wen pʼʌtʌl. Ñumen jay bajcheʼ baqui jach bʌ espada am bʌ i yej tiʼ chaʼwejlel i muʼto i mejlel i tʼox bajcheʼ yilalonla yicʼot chuqui an ti lac pusicʼal, yicʼot miʼ tʼox jiñi lac bʌquel yaʼ tiʼ yojlomlel,* i muʼto i mejlel i pʌs chuqui mi lac ñaʼtan yicʼot chuqui yom lac pusicʼal. 13 Mi junchajpic chuqui melbil mucul tiʼ wut, cʼajpan tsiquil pejtelel chuqui an i miʼ taj i qʼuel jiñi muʼ bʌ caj i chaʼlen meloñel chaʼan jiñi tsaʼ bʌ lac mele.
14 Jin chaʼan, come an lac chaʼan juntiquil ñumen ñuc bʌ sacerdote tsaʼ bʌ ochi ti panchan, Jesús, jiñi i Yalobil Dios, yom tsʌts mi lac chuc lac bʌ ti jiñi muʼ bʌ lac sub tiʼ tojlel. 15 Come jiñi ñumen ñuc bʌ sacerdote lac chaʼan mach juntiquilic maʼañic bʌ miʼ mejlel i pʼuntañonla chaʼan laj cʼunlel, juntiquilʌch bajcheʼ jach bʌ tsaʼ qʼuelbenti i pusicʼal bajcheʼ joñonla, pero mach xmulilic. 16 Jin chaʼan, laʼ lac lʌcʼtesan lac bʌ tiʼ trono jiñi Dios muʼ bʌ i yʌcʼ jiñi ñuc bʌ i yutslel chaʼan mi lac pʼuntʌntel i miʼ yʌqʼueñonla jiñi ñuc bʌ i yutslel cheʼ bʌ i cʼʌjñibal lac chaʼan mi laj coltʌntel.