1 Timoteo
1 I chaʼan Pablo, apóstol i chaʼan Cristo Jesús come cheʼʌch tsiʼ yʌlʌ Dios jiñi la caj Coltaya yicʼot cheʼʌch tsiʼ yʌlʌ Cristo Jesús, jiñi lac pijtaya, 2 tiʼ tojlel Timoteo,* juntiquil c piʼʌl bʌ ti xñoptʼan lajal bʌ bajcheʼ calobil:
Taja jiñi ñuc bʌ i yutslel, i pʼuntaya yicʼot i ñʌchʼtʌlel Dios jiñi lac Tat yicʼot i chaʼan jiñi lac Yum Cristo Jesús.
3 Cheʼ bʌ majlelix mij cajel ti Macedonia, tsaʼ c subeyet chaʼan maʼ cʌytʌl ti Éfeso, i jiñʌch muʼ bʌ c chaʼ subeñet wʌle chaʼan maʼ ticʼ chaʼtiqui uxtiquil lac piʼʌlob chaʼan maʼañic miʼ pʌsob yambʌ cʌntesa, 4 mi yomicto miʼ ñʌchʼtañob jiñi mach tac bʌ i sujmic muʼ bʌ i yʌjlel i mi jiñicto jiñi tsʼijbubil bʌ i cʼabaʼob i ñojteʼelob. Pejtelel iliyi maʼañic miʼ wis coltañonla, mucʼ jach i yʌcʼ ti tejchel leto* maʼañic bʌ i sujmlel i mach ochemic tac ti jiñi tsaʼ bʌ i yʌqʼueyonla Dios chaʼan miʼ pʼʌtʼesan lac ñopoñel. 5 Tiʼ sujm, tsaʼ ajqʼui ili ticʼojel* chaʼan mi laʼ pʌs cʼuxbiya loqʼuem bʌ ti jiñi sʌc bʌ laʼ pusicʼal, ti wem bʌ laʼ conciencia yicʼot ti jiñi i sujm bʌ laʼ ñopoñel. 6 Tiʼ caj an tsaʼ bʌ i cʌyʌyob iliyi, tsaʼ cajiyob ti leto mach bʌ añic i sujmlel. 7 Yomob sujtel ti xcʌntesa chaʼan jiñi mandar, pero mi muqʼuicto i chʼʌmbeñob i sujm chuqui miʼ yʌlob mi jiñicto chuqui wersa yomob i pʌs.
8 Weno, joñonla la cujil chaʼan weñʌch jiñi Mandar mi weñʌch bajcheʼ miʼ cʼʌjñel 9 i mi laj cʌn chaʼan jiñi mandar maʼañic tsaʼ ajqʼui chaʼan jiñi tojoʼ bʌ, i chaʼañobʌch jiñi muʼ bʌ i ñusañob ti pʼis jiñi mandar yicʼot jiñi xñusatʼañob, jiñi maʼañic bʌ miʼ qʼuelob ti ñuc Dios, jiñi xmulilob, jiñi mach bʌ xucʼulobic,* jiñi muʼ bʌ i tsʼaʼleñob chuqui chʼujul, jiñi muʼ bʌ i tsʌnsañob i tat i ñaʼ yicʼot yambʌlob, 10 jiñi xtsʼiʼleloʼ bʌ,* jiñi wiñicob muʼ bʌ i wʌlʌc piʼleñob i bʌ, jiñi secuestradorob, jiñi xlotob yicʼot jiñi muʼ bʌ i toʼol acʼob i tʼan, o chuqui jach yambʌ am bʌ tiʼ contra jiñi wem bʌ cʌntesa,* 11 lajal bʌ bajcheʼ jiñi wen ñuc bʌ wen tʼan tiʼ tojlel jiñi tijicña bʌ Dios tsaʼ bʌ aqʼuentiyon tic wenta.
12 Mi cʌqʼuen wocolix i yʌlʌ jiñi lac Yum Cristo Jesús, tsaʼ bʌ i yʌqʼueyon c pʼʌtʌlel, come xucʼulon tsiʼ qʼuele i tsiʼ yʌqʼueyon ili chʼujul bʌ eʼtel. 13 Ti ñaxan tsaʼ c chaʼle tʼan tiʼ contra Dios, tsaʼ c ticʼlʌbe i tejclum i tsaʼ c wen chaʼle tʼan tiʼ contrajob. Pero tsaʼ pʼuntʌntiyon come mach cujilic chuqui tsaʼ c mele yicʼot maʼañic c ñopoñel. 14 Pero jiñi lac Yum tsiʼ pʌsbeyon wen ñuc bʌ i yutslel, i tsaʼ aqʼuentiyon jiñi ñopoñel yicʼot cʼuxbiya tilem bʌ ti Cristo Jesús. 15 Ili tʼan mucʼʌch i mejlel ti ñojpel yicʼot mucʼʌch i mejlel ti chʼʌmol ti ñuc: Cristo Jesús tsajñi wʌʼ ti pañimil chaʼan miʼ coltan xmulilob. I joñon ñumen xmulilon tiʼ pejtelelob. 16 Pero joñon, ñumen xmulilon bʌ, tsaʼ pʼuntʌntiyon chaʼan tic tojlel Cristo Jesús miʼ pʌs jiñi i pijt i miʼ cʼʌñon bajcheʼ ejemplo i chaʼan jiñi muʼ bʌ i yʌcʼob i ñopoñel tiʼ tojlel chaʼan miʼ tajob jiñi cuxtʌlel mach bʌ añic miʼ jilel.
17 Laʼ chʌn aqʼuentic i ñuclel jiñi Rey am bʌ tiʼ pejtelel ora, jiñi mach bʌ yujilic jilel, mach bʌ tsiquilic, jiñi cojach bʌ Dios. Amén.
18 Timoteo, calobil, mi cʌqʼueñet ili ticʼojel* cheʼ bajcheʼ an jiñi tsaʼ bʌ wʌn ajli ti a tojlel, chaʼan maʼ chʌn chaʼlen wersa ti jiñi wem bʌ guerra, 19 yom chʌn an a ñopoñel yicʼot wem bʌ a conciencia, an chaʼtiqui uxtiquil tsaʼ bʌ i cʌyʌyob iliyi, i tiʼ caj jiñi tsaʼ jiliyob i ñopoñel cheʼ bajcheʼ miʼ sujpʼel jumpʼejl barco. 20 Yaʼʌch ochem Himeneo yicʼot Alejandro, tsaʼ bʌ cʌcʼʌyob tiʼ cʼʌb Satanás chaʼan cheʼ bʌ miʼ chʼʌmob jiñi i tojʼesʌntel miʼ cʌñob chaʼan mach yomic miʼ chaʼleñob tʼan tiʼ contra Dios.