Efesios

1 I chaʼan Pablo, apóstol i chaʼan Cristo Jesús come cheʼʌch yom Dios, tiʼ tojlel jiñi chʼujuloʼ bʌ ti Éfeso xucʼul bʌ añob bajcheʼ xcʌntʼañob i chaʼan Cristo Jesús:

2 Tajala jiñi ñuc bʌ i yutslel yicʼot i ñʌchʼtʌlel Dios jiñi lac Tat yicʼot jiñi i chaʼan lac Yum Jesucristo.

3 Laʼ aqʼuentic i ñuclel jiñi Dios yicʼot i Tat lac Yum Jesucristo come yaʼ ti panchan tsiʼ yʌqʼueyonla jujunchajp i bendición tilem bʌ tiʼ yespíritu bajcheʼ xcʌntʼañonla i chaʼan Cristo, 4 come tsiʼ wʌn yajcayonla cheʼ bʌ maxto melbilic jiñi pañimil chaʼan mi la cajñel la quicʼot,* mi lac pʌs cʼuxbiya, chʼujul mi lac sujtel yicʼot chaʼan maʼañic lac mul tiʼ tojlel. 5 Tsiʼ wʌn yajcayonla chaʼan mi lac chʼʌjmel bajcheʼ ñoj i yalobilob tiʼ tojlel Jesucristo, cheʼʌch bajcheʼ an chuqui miʼ mulan yicʼot cheʼ bajcheʼ yom, 6 ili chaʼañʌch jiñi lac piʼʌlob miʼ mejlel i ñuqʼuesañob Dios come tsiʼ cʼʌñʌ jiñi cʼuxbibil bʌ i Yalobil chaʼan miʼ pʌsbeñonla jiñi ñuc bʌ i yutslel. 7 Tiʼ tojlelʌch tsaʼ lac taja jiñi i tojol laj coltʌntel chaʼan i chʼichʼel, cheʼʌchi, jiñi i ñusʌntel lac mul, come cabʌlʌch jiñi ñuc bʌ i yutslel Dios.

8 Tsiʼ wen pʌsbeyonla jiñi ñuc bʌ i yutslel i tsiʼ yʌqʼueyonla pejtelel jiñi i ñaʼtʌbal yicʼot i chʼʌmbentel i sujm 9 cheʼ bʌ tsiʼ yʌqʼueyonla laj cʌn jiñi chʼujul bʌ tʼan mucul bʌ chaʼan chuqui yom. Cheʼʌch bajcheʼ miʼ mulan, tsiʼ wʌn ñaʼta 10 i tojʼesan bajcheʼ tac miʼ mejlel jiñi eʼtel, iliyi mi caj i yujtel cheʼ bʌ miʼ tsʼʌctiyel jiñi i yorajlel waʼchocobil bʌ i chaʼan, chaʼan tiʼ tojlel Cristo miʼ mejlel i tempan pejtelel chuqui tac an, jiñi an tac bʌ ti panchan yicʼot an tac bʌ ti lum. Cheʼʌchi, tiʼ tojlel, 11 joñon lon temel lon lojon quicʼot i Dios tsiʼ yajcayon lojon chaʼan mi lon c chʼʌm jiñi tsaʼ bʌ i wʌn alʌ. Jiñʌch tsiʼ wʌn yajcayon lojon cheʼ bajcheʼ chajpʌbil i chaʼan come miʼ mel pejtelel muʼ bʌ i ñaʼtan cheʼ bajcheʼ yom, 12 chaʼan ti lon c tojlel miʼ sujbel i ñuclel Dios, joñon lojon tsaʼ bʌ c ñaxan acʼʌ lon c pijtaya ti Cristo. 13 Pero jatetla tsaʼ laʼ wʌcʼʌ laʼ pijtaya tiʼ tojlel jaʼel cheʼ bʌ tsaʼ laʼ wubi jiñi tʼan chaʼan bʌ i sujmlel, jiñi wen tʼan chaʼan bʌ laʼ coltʌntel. Cheʼ jaʼel tiʼ tojlel Cristo, cheʼ bʌ jatetla tsaʼix laʼ ñopo, tsaʼ aqʼuentiyetla jiñi sello ti jiñi chʼujul bʌ espíritu tsaʼ bʌ i wʌn alʌ Dios, 14 ili jiñʌch muʼ bʌ i pʌs chaʼan Dios mi caj i yʌqʼueñonla jiñi tsaʼ bʌ i wʌn alʌ, chaʼan tiʼ tojlel jiñi i tojol coltʌntel muʼ bʌ i yʌqʼuen i ñuclel Dios libre miʼ cʌytʌl jiñi i tejclum.

15 Jin chaʼan joñon jaʼel, cʼʌlʌl cheʼ bʌ tsaʼ cubi jiñi laʼ ñopoñel tiʼ tojlel lac Yum Jesús yicʼot jiñi laʼ cʼuxbiya muʼ bʌ laʼ pʌsben pejtelel jiñi chʼujuloʼ bʌ, 16 maʼañic mij cʌy cʌqʼuen wocolix i yʌlʌ Dios chaʼañetla. Woli c chʌn tajetla ti tʼan ti coración 17 chaʼan jiñi i Dios lac Yum Jesucristo, jiñi ñuc bʌ lac Tat, miʼ yʌqʼueñetla laʼ pʼʌtʌlel chaʼan mi laʼ taj laʼ ñaʼtʌbal yicʼot mi laʼ chʼʌmben i sujm chuqui tac miʼ pʌs, i cheʼ bajcheʼ jiñi mi laʼ cʌn tiʼ sujm. 18 Dios miʼ jambeñetla laʼ pusicʼal chaʼan miʼ mejlel laʼ qʼuel yicʼot laʼ cʌn jiñi laʼ pijtaya muʼ bʌ i yʌqʼueñetla, jiñi wen tac bʌ maʼañic bʌ miʼ mejlel ti lajintel tsaʼ bʌ i wʌn sube jiñi chʼujuloʼ bʌ 19 yicʼot bajcheʼ cʼamel jiñi i ñuclel i pʼʌtʌlel muʼ bʌ i pʌsbeñonla jiñi xñoptʼañonbʌla. Ili ñuclel tsiquil ti bajcheʼ miʼ cʼʌn jiñi i pʼʌtʌlel, 20 tsaʼ bʌ i cʼʌñʌ ti Cristo cheʼ bʌ tsiʼ chʼojyesa* yaʼ baqui an chʌmeñoʼ bʌ i tsiʼ yʌcʼʌ ti buchtʌl tiʼ ñoj yaʼ ti panchan, 21 ñumen ñuc tiʼ tojlel jiñi yumʌlob, jiñi añoʼ bʌ i yeʼtel, pʼʌtʌlel yicʼot reyob yicʼot pejtelel cʼabaʼʌl mach bʌ cojic jach miʼ mejlel ti ajlel ti ili ora yicʼotʌch ti jiñi talto bʌ qʼuin. 22 Dios tsiʼ yʌqʼue tiʼ yebal i yoc pejtelel chuqui an i tiʼ sujtesa tiʼ jol pejtelel i chaʼan tac bʌ jiñi congregación, 23 jiñi congregación i bʌcʼtalʌch i jiñʌch muʼ bʌ i bujtʼesan, yicʼot jiñʌch muʼ bʌ i tsʼʌctesan pejtelel chuqui an.