Hebreos

6 Jin chaʼan, come tsaʼix laj cʌñʌ jiñi ñaxan tac bʌ cʌntesa tiʼ tojlel Cristo, laʼ lac ñumen taj majlel lac ñaʼtʌbal i mach jiñic yom mi lac chʌn cʌn jiñi ñaxan tac bʌ cʌntesa, yom i yʌl, cheʼ miʼ chaʼ cʌjñel chaʼan yom mi lac chaʼ ñaʼtan lac bʌ* tiʼ caj jiñi mach bʌ añic tac i cʼʌjñibal tsaʼ lac mele, lac ñopoñel ti Dios, 2 jiñi cʌntesa tac chaʼan bʌ chʼʌmjaʼ,* cheʼ bʌ miʼ yʌjqʼuel cʼʌbʌl tiʼ tojlel yambʌlob, jiñi i chaʼ chʼojyesʌntel* chʌmeñoʼ bʌ yicʼot jiñi meloñel chaʼan bʌ tiʼ pejtelel ora. 3 Mi cheʼ yom Dios jiñʌch muʼ bʌ caj lac mel.

4 Come jiñi tsaʼ bʌ i chʼʌmʌyob jiñi sʌclel tilem bʌ ti Dios tsaʼ aqʼuentiyob jiñi majtan tilem bʌ ti panchan, tsiʼ tajayob jaʼel jiñi chʼujul bʌ espíritu 5 i tsiʼ chʼʌmʌyob jiñi wem bʌ i tʼan Dios yicʼot jiñi bendición tac muʼ bʌ caj i tajtʌl ti jiñi pañimil muʼto bʌ caj i tilel, 6 pero tsiʼ cʌyʌyob jiñi ñopoñel, jiñiyob maʼañix miʼ mejlel ti chaʼ cuxtesʌntelob chaʼan miʼ chaʼ ñaʼtañob i bʌ, come woliʼ chaʼ chʼijob* i Yalobil Dios yaʼ ti teʼ i woliʼ yʌcʼob ti quisin tiʼ wut lac piʼʌlob. 7 Come jiñi lum miʼ chʼʌm jumpʼejl bendición tilem bʌ ti Dios cheʼ bʌ miʼ tsʼuʼ jiñi jaʼal muʼ bʌ i wen yajlel i miʼ yʌcʼ ti colel pʌcʼʌbʌl muʼ bʌ i yʌqʼuen i wenlel jiñi tsaʼ bʌ i pʌcʼʌyob. 8 Pero mi tsiʼ yʌcʼʌ ti colel chʼix maʼañic i cʼʌjñibal mi caj i sujtel, mi caj i chʼʌjquel ti Dios, i ti wiʼil mi caj i pulel.

9 Pero, cʼuxbibiletbʌla, anquese mi lon c chaʼlen tʼan bajcheʼ ili, cujil lojon chaʼan anto chuqui tac ñumen wem bʌ chaʼañetla, muʼ tac bʌ caj i coltañetla laʼ taj laʼ coltʌntel. 10 Come Dios tojʌch i maʼañic miʼ ñajʌyel i chaʼan jiñi tsaʼ bʌ laʼ mele, mi jiñicto jiñi cʼuxbiya tsaʼ bʌ laʼ pʌsʌ tiʼ tojlel i cʼabaʼ cheʼ tsaʼ laʼ colta jiñi chʼujuloʼ bʌ yicʼot cheʼ wolito laʼ bej coltañob. 11 Pero com lojon chaʼan ti jujuntiquiletla mi laʼ chʌn pʌs laʼ bʌxlel* chaʼan chʌn xucʼul jiñi laʼ pijtaya cʼʌlʌl tiʼ yujtibal, 12 chaʼan maʼañic mi laʼ sujtel ti xtsʼuʼlel, yom mi laʼ lajin jiñi muʼ bʌ caj i yʌqʼuentelob jiñi tsaʼ bʌ wʌn ajli tiʼ caj añob i ñopoñel yicʼot i pijt.

13 Come cheʼ bʌ Dios tsiʼ yʌqʼue i tʼan Abrahán jin jach tsiʼ chaʼ bajñel taja i bʌ ti tʼan, come maʼañic yambʌ ñumen ñuc bʌ muʼ bʌ i mejlel i taj ti tʼan chaʼan miʼ waʼchocon i tʼan. 14 Tiʼ sube: «Tiʼ sujm mi caj cʌqʼueñet c bendición i tiʼ sujm mi caj c wen aqʼuet ti pʼojlel». 15 Jin chaʼan, cheʼ bʌ Abrahán tsiʼ pʌsʌ i pijt, tsaʼ aqʼuenti jiñi tʼan. 16 Come jiñi wiñicob miʼ waʼchocoñob i tʼan tiʼ cʼabaʼ jiñi ñumen ñuc bʌ bajcheʼob, i jiñi tʼan tsaʼ bʌ i waʼchocoyob miʼ jisan pejtelel leto* come jiñi miʼ pʌs chaʼan mucʼʌch caj i tsʼʌctesañob. 17 Cheʼʌch tsiʼ mele Dios jaʼel cheʼ bʌ tsiʼ ñaʼta i ñumen pʌsben jiñi muʼ bʌ caj i yʌqʼuentelob jiñi majtan chaʼan maʼañic miʼ qʼuextʌyel jiñi ñaʼtʌbil bʌ i chaʼan,* tsiʼ waʼchoco i tʼan chaʼan miʼ pʌs chaʼan mucʼʌch caj i tsʼʌctesan. 18 Ili chaʼchajp tsaʼ bʌ i mele Dios* maʼañic miʼ wis mejlel ti qʼuextʌyel, i Dios mach mejlic ti lot, i tsaʼ putsʼiyonla majlel laj coltan lac bʌ ti Dios chaʼan mi lac chuc lac bʌ ti jiñi pijtaya am bʌ lac chaʼan tiʼ tojel lac wut. 19 Ili pijtaya i sujm bʌ yicʼot xucʼul bʌ am bʌ lac chaʼan lajal bajcheʼ jumpʼejl ancla chaʼan laj cuxtʌlel i miʼ yochel yaʼ ti ajñibʌl am bʌ tiʼ junwejlel jiñi cortina, 20 Jesús jiñʌch tsaʼ bʌ ñaxan ochi, tsiʼ jambeyonla majlel i tsiʼ chajpʌbeyonla majlel jiñi bij. Tsaʼ sujti ti ñumen ñuc bʌ sacerdote chaʼan tiʼ pejtelel ora cheʼ bajcheʼ Melquisedec.