1 Corintios
6 Mi juntiquil ti laʼ tojlel an i wocol yicʼot yambʌ, ¿bajcheʼqui miʼ tilel ti laʼ pusicʼal majlel ti meloñibʌl tiʼ tojlelob wiñicob mach bʌ tojobic i mach tiʼ tojlelic jiñi chʼujuloʼ bʌ? 2 ¿Mach ba laʼ wujilic chaʼan jiñi chʼujuloʼ bʌ miʼ cajelob ti meloñel tiʼ tojlel pañimil? I mi jatetla mi caj laʼ chaʼlen meloñel tiʼ tojlel pañimil, ¿chucoch maʼañic mi laʼ mejlel ti meloñel tiʼ tojlel jiñi mach bʌ wen ñuquic tac i cʼʌjñibal? 3 ¿Mach ba laʼ wujilic chaʼan mi caj lac chaʼlen meloñel tiʼ tojlel ángelob? Cheʼ jiñi, ¿chucoch maʼañic mi lac chaʼlen meloñel tiʼ tojlel jiñi wocol tac muʼ bʌ i yujtel ili ora? 4 Jin chaʼan, mi yom mi laʼ chaʼlen meloñel tiʼ tojlel jiñi wocol tac muʼ bʌ i yujtel ili ora, ¿chucoch mi laʼ yajcan bajcheʼ juezob jiñi wiñicob mach bʌ añobic ti congregación? 5 Mic subeñetla iliyi chaʼan mi laʼ wubin quisin. ¿Mach ba añic ti laʼ tojlel mi juntiquilic wiñic am bʌ i ñaʼtʌbal muʼ bʌ i mejlel ti meloñel tiʼ tojlel jiñi wocol tac muʼ bʌ i yujtel tiʼ tojlel laʼ wermañujob? 6 Pero juntiquil hermano miʼ pʌy majlel yambʌ hermano ti meloñibʌl, ¡tiʼ tojlel mach bʌ xñoptʼañobic!
7 Cheʼ bʌ mi laʼ pʌy majlel laʼ bʌ ti meloñibʌl woli laʼ wʌcʼ laʼ bʌ ti quisin. ¿Mach ba ñumen weñic cheʼ mi laʼ wʌcʼ chaʼan mi laʼ melbentel chuqui mach bʌ tojic? ¿Mach ba ñumen weñic cheʼ mi laʼ sʌt am bʌ laʼ chaʼan? 8 Pero jatetla mi laʼ mel jiñi mach bʌ tojic yicʼot mi laʼ chaʼlen lot chaʼan mi laʼ chʼʌmben i chubʌʼan yambʌlob, ¡i tiʼ tojlel laʼ wermañujob mi laʼ mel tac iliyi!
9 ¿O mach ba laʼ wujilic chaʼan jiñi mach bʌ tojobic maʼañic mi caj i yʌqʼuentelob jiñi i Yumʌntel Dios? Mach laʼ bajñel lotin laʼ bʌ.* Jiñi xtsʼiʼleloʼ bʌ,* jiñi muʼ bʌ i chʼujutesañob jiñi melbil tac jach bʌ dios, jiñi muʼ bʌ i piʼleñob yambʌ mach bʌ i piʼʌlobic, jiñi wiñicob muʼ bʌ i yʌcʼob i bʌ ti piʼlentel tiʼ tojlel yambʌ wiñicob, jiñi wiñicob muʼ bʌ i piʼleñob yambʌ wiñic, 10 jiñi xujchʼob, jiñi muʼ bʌ i cʌlʌx mulañob chuqui an, jiñi xyʌcʼʌjelob,* jiñi muʼ bʌ i ticʼlañob yambʌlob tiʼ tʼan yicʼot jiñi muʼ bʌ i chaʼleñob lot chaʼan miʼ chʼʌmbeñob i chubʌʼan yambʌlob maʼañic mi caj i yʌqʼuentelob jiñi i Yumʌntel Dios. 11 Ti ñaxan, an cheʼetbʌla bajcheʼ jiñi. Pero tsaʼix pojquiyetla, tsaʼix sʌqʼuesʌntiyetla, tsaʼix qʼuejliyetla ti toj tiʼ cʼabaʼ lac Yum Jesucristo yicʼot tiʼ yespíritu lac Dios.
12 Mic laj aqʼuentel c mel, pero mach tiʼ pejtelelic miʼ yʌcʼ wenlel. Mic laj aqʼuentel c mel, pero maʼañic mi caj cʌcʼ chaʼan an chuqui miʼ chucon. 13 Jiñi bʌlñʌcʼʌl chaʼañʌch lac ñʌcʼ i jiñi lac ñʌcʼ chaʼañʌch jiñi bʌlñʌcʼʌl, pero Dios mi caj i jisan tiʼ chaʼpʼejlel. I jiñi lac bʌcʼtal mach chaʼañic tsʼiʼlel,* chaʼañʌch mi lac melben i yeʼtel lac Yum, i jiñi lac Yum miʼ yʌqʼuen chuqui i cʼʌjñibal i chaʼan lac bʌcʼtal. 14 Pero Dios tsiʼ chaʼ chʼojyesa* lac Yum i yicʼot i pʼʌtʌlel mi caj i chaʼ chʼojyesañonla jaʼel yaʼ baqui an chʌmeñoʼ bʌ.
15 ¿Mach ba laʼ wujilic chaʼan jiñi laʼ bʌcʼtal tsuyul tiʼ bʌcʼtal Cristo i miʼ sujtel ti jumpʼejl? ¿Muʼ ba caj c locʼsañetla tiʼ bʌcʼtal Cristo mi laʼ ñaʼtan i cheʼ jiñi mic tsuyetla tiʼ tojlel juntiquil xʼixic muʼ bʌ i chon i bʌ? ¡Maʼañic! 16 ¿Mach ba laʼ wujilic chaʼan majqui jach miʼ tem i bʌ yicʼot juntiquil xʼixic muʼ bʌ i chon i bʌ jumpʼejl jach i bʌcʼtal miʼ sujtel yicʼot jiñi xʼixic? Come Dios miʼ yʌl: «Jiñi chaʼtiquilob mi caj i sujtelob ti juntiquil». 17 Pero jiñi temel bʌ yicʼot lac Yum lajal i ñaʼtʌbal yicʼot. 18 ¡Putsʼtanla jiñi tsʼiʼlel!* Baqui jach bʌ yambʌ mulil muʼ bʌ i mel juntiquil wiñic maʼañic miʼ toj ticʼlan i bʌcʼtal, pero jiñi muʼ bʌ i chaʼlen tsʼiʼlel miʼ chaʼlen mulil tiʼ contra i bʌcʼtal. 19 ¿Mach ba laʼ wujilic chaʼan jiñi laʼ bʌcʼtal jiñʌch i templo jiñi chʼujul bʌ espíritu, jiñi am bʌ ti laʼ tojlel yicʼot jiñi muʼ bʌ i yʌqʼueñetla Dios? Cheʼ jaʼel, mach bajñel laʼ chaʼañix laʼ bʌ, 20 come tsaʼ mʌjñiyetla. Jin chaʼan, cʼʌñʌla jiñi laʼ bʌcʼtal chaʼan mi laʼ wʌqʼuen i ñuclel Dios.