Jiñi xʼaltʼan Daniel tsiʼ wʌn alʌ jala mi caj i tilel jiñi Mesías

JIÑI xʼaltʼan Daniel tsaʼ chumle cheʼ bʌ anto yom 500 jab chaʼan miʼ yilan pañimil Jesús. Pero Jehová tsiʼ pʌsbe bajcheʼ miʼ mejlel ti ñaʼtʌntel chaʼan jala miʼ cajel ti waʼchocontel Jesús bajcheʼ jiñi Mesías, o Cristo. Daniel tsaʼ subenti: «Ñaʼtan ili chaʼan maʼ chʼʌmben isujm. Mi caj i ñumel wucpʼejl semana yicʼot chaʼpʼejl i chʌncʼal (62) semana cheʼ bʌ tsaʼ ajqʼui jiñi mandar chaʼan miʼ chaʼ waʼchocontel [o mejlel] Jerusalén, cʼʌlʌl baʼ ora miʼ tilel jiñi Yajcʌbil bʌ Yumʌl [«Mesías jiñi Yumʌl», TNM]» (Daniel 9:25).

Laʼ laj qʼuel bajcheʼ miʼ mejlel ti ñaʼtʌntel jalix tsaʼ tili jiñi Mesías. Ñaxan yom mi lac ñaʼtan jalix tsaʼ caji ti tsijquel jiñi i yorajlel muʼ bʌ i cajel ti ñumel cʼʌlʌl cheʼ bʌ miʼ julel jiñi Mesías. Jiñi profecía mi yʌl chaʼan tsaʼ caji ti tsijquel «cheʼ bʌ tsaʼ ajqʼui jiñi mandar chaʼan miʼ chaʼ mejlel Jerusalén». ¿Jalix «tsaʼ ajqʼui jiñi mandar»? Yambʌ wiñic tsaʼ bʌ i tsʼijbu jiñi Biblia, i cʼabaʼ Nehemías, tsiʼ yʌlʌ chaʼan jiñi mandar baqui miʼ yʌjlel chaʼan miʼ chaʼ waʼchocontel Jerusalén, tsaʼ ajqʼui «cheʼ ñumeñix [20] jab cheʼ woli ti yumʌntel jiñi rey Artajerjes» (Nehemías 1:1; 2:1, 5-8). Jiñi yujiloʼ bʌ chaʼan historia, miʼ yʌlob chaʼan melelʌch cheʼ jiñi rey Artajerjes tsiʼ chaʼle yumʌntel tsʼʌcʌl jumpʼejl jab cheʼ ti jabil 474 cheʼ bʌ maxto tilemic Cristo (m.t.C.). Cheʼ mi lac tech lac tsic, miʼ cʼotel lac ñaʼtan chaʼan jiñi 20 jab i yumʌntel Artajerjes miʼ tsʼʌctiyel cheʼ ti jabil 455 m.t.C. Jin chaʼan, jiñi profecía tsaʼ bʌ i wʌn alʌ Daniel tsaʼ tejchi ti tsʼʌctiyel ti jiñi jabil 455 m.t.C.

Daniel tsiʼ yʌlʌ jaypʼejl ora mi caj i ñumel cheʼ miʼ tejchel ti tsijquel ti jiñi jabil 455 m.t.C., cʼʌlʌl cheʼ miʼ tilel jiñi «Mesías jiñi Yumʌl, [TNM]». Jiñi profecía tsiʼ yʌlʌ chaʼan an «wucpʼejl [7] semana yicʼot 62 semana», cheʼ mi lac chaʼlen ti sumar miʼ yʌcʼ 69 semana. ¿Jaypʼejl mi caj i jalijel tiʼ sujmlel jiñi 69 semana? Cheʼ bajcheʼ mi yʌl yan tac bʌ Biblia, mach jumpʼejlic semana bajcheʼ cʌmbil bʌ lac chaʼan. Jiñi tʼan semana yom i yʌl jabil tac. Jujumpʼejl semana, yom i yʌl 7 jab. Jiñi judíojob tsaʼ bʌ chumleyob ti wajali yujilob bajcheʼ an i sujmlel cheʼ bʌ miʼ yʌjlel jiñi tʼan semana yom bʌ i yʌl jabil tac, o grupo chʼʌmʌl bʌ tilel i chaʼan 7 jab. Jumpʼejl ejemplo jiñʌch cheʼ bʌ miʼ ñumel jiñi 6 jab, jiñi jabil 7 miʼ chʼʌmob chaʼan miʼ cʼajob i yo, i jiñi jabil jiñʌch jumpʼejl jab bajcheʼ sábado (Éxodo 23:10, 11). Cheʼ bajcheʼ jiñi, jiñi 69 semana muʼ bʌ i yʌjlel yaʼ ti profecía, yom i yʌl 69 grupo, baqui jujumpʼejl grupo chʼʌmʌl tilel i chaʼan 7 jab, tiʼ pejtelel iliyi miʼ yʌcʼ 483 jab.

Yom bʌ mi lac mel wʌle jiñʌch cheʼ mi lac tsic ti utsʼat. Cheʼ muqʼuic lac tech lac tsic ti jiñi jabil 455 m.t.C., chaʼan mi laj qʼuel baqui jaxʌl miʼ tsʼʌctiyel jiñi 483 jab, mi laj cʼotel ti jiñi jabil 29 cheʼ bʌ tsajñix Cristo (t.C.). Jiñi jabil jiñʌch cheʼ bʌ Jesús tsiʼ chʼʌmʌ jaʼ yicʼot cheʼ bʌ tsaʼ waʼchoconti bajcheʼ jiñi Mesías (Lucas 3:1, 2, 21, 22).a Jiñi profecía am bʌ ti Biblia tsaʼʌch tsʼʌctiyi, ¿ñomach?