¿Majqui jiñi Jesucristo?

1, 2. a) ¿Chucoch maʼañic miʼ mejlel a wʌl chaʼan wen a cʌñʌyix juntiquil quixtañu mi cojach a cʌmbe i cʼabaʼ? b) ¿Chuqui miʼ yʌjlel tiʼ tojlel Jesús?

ILI ora an cabʌl quixtañu wen cʌmbiloʼ bʌ ila ti pañimil (mulawil), tajol an a cʌmbeyoʼ bʌ i cʼabaʼ. Pero ¿yom ba i yʌl chaʼan wen a cʌñʌyobix mi cojach a cʌmbeyob i cʼabaʼ? Maʼañic. ¿Chucoch? Come mach a cʌñʌyic bajcheʼ yilal chumulob yicʼot bajcheʼ yilalob i melbal (chaʼlibal).

² Anquese ñumeñix cheʼ bʌ 2,000 jab tsajñi Jesús ila ti Lum, tajol ubibil a chaʼan tiʼ tojlel. Pero cabʌl mach bʌ yujilobic majqui jiñi Jesús. An muʼ bʌ i yʌlob chaʼan juntiquilʌch wem bʌ wiñic. Yambʌ miʼ yʌlob chaʼan juntiquil xʼaltʼan. I an muʼ bʌ i yʌlob chaʼan jiñʌch Dios. ¿Bajcheʼ a wʌlʌ jatet? (Qʼuele jiñi nota 12).

 3. ¿Chucoch ñuc i cʼʌjñibal cheʼ maʼ cʌn i sujmlel tiʼ tojlel Jehová yicʼot Jesús?

³ Ñuc i cʼʌjñibal cheʼ maʼ cʌn i sujmlel tiʼ tojlel Jesús. ¿Chucoch? Come jiñi Biblia miʼ yʌl: «Jiñʌch i cuxtʌlel mach bʌ anic miʼ jilel, cheʼ miʼ cʌñetob jini mero Dios, jini cojach bʌ, yicʼot Jesucristo, tsaʼ bʌ a choco tilel» (Juan 17:3). Cheʼ maʼ cʌn tiʼ tojlel Jehová yicʼot Jesús mi caj a mejlel ti chumtʌl tiʼ pejtelel ora ti jumpʼejl Paraíso ila ti Pañimil (Juan 14:6). Cheʼ jaʼel, cheʼ maʼ cʌn Jesús mi caj i coltañet ili ora come jiñʌch tsaʼ bʌ i pʌsbeyonla bajcheʼ yom mi lac chumtʌl yicʼot bajcheʼ yilal yomonla tiʼ tojlel yambʌlob (Juan 13:34, 35). Yaʼ ti cʌntesʌntel 1, tsaʼ laj cʌñʌ i sujmlel tiʼ tojlel Dios. Ti ili cʌntesʌntel mi caj laj qʼuel chuqui miʼ pʌs jiñi Biblia tiʼ tojlel Jesús.

 4. ¿Chuqui yom i yʌl jiñi tʼan «Mesías»?

⁴ Cheʼ jalto yom chaʼan miʼ tilel Jesús ila ti Lum, Jehová tsiʼ wʌn alʌ chaʼan mi caj i choc tilel jiñi Mesías o Cristo. Jiñi tʼan «Mesías» yom i yʌl «Yajcʌbil bʌ», juntiquil yajcʌbil bʌ ti Dios chaʼan miʼ mel jumpʼejl ñuc bʌ eʼtel (troñel). Iliyi jiñʌch bajcheʼ miʼ cʌjñel Jesús come Dios tsiʼ yajca chaʼan miʼ mel jumpʼejl ñuc bʌ eʼtel. Cheʼ jaʼel, mi caj i yʌcʼ ti tsʼʌctiyel pejtelel chuqui albil i chaʼan Dios.

 5. ¿Tsaʼ ba i ñopoyob jiñi xcʌntʼañob chaʼan Jesús jiñʌch jiñi Mesías?

⁵ Jiñi xcʌntʼañob i chaʼan Jesús tsaʼʌch i ñopoyob chaʼan jiñʌch jiñi Mesías wʌn albil bʌ (Juan 1:41). Jumpʼejl ejemplo, jiñi apóstol Pedro tiʼ sube Jesús: «Jatet Cristojet» (Mateo 16:16). Laʼ laj qʼuel chucoch mucʼʌch i mejlel lac ñop jaʼel chaʼan Jesús jiñʌch jiñi Mesías.

 6. ¿Bajcheʼ miʼ coltañonla Jehová chaʼan mi laj cʌn jiñi Mesías?

⁶ Cheʼ bʌ anto yom cabʌl jab chaʼan miʼ chʼocʼan Jesús, jiñi xʼaltʼañob cabʌl chuqui tsiʼ wʌn alʌyob chaʼan jiñi wiñicob xʼixicob (quixtañujob) miʼ mejlel i cʌñob jiñi Mesías. ¿Bajcheʼ mi caj i coltañob jiñi? Chaʼan mi lac ñumen chʼʌmben i sujm, laʼ la cʌl jumpʼejl ejemplo. Ñaʼtancu chaʼan maʼ subentel majlel a pijtan juntiquil quixtañu yaʼ baqui miʼ cottʌl autobús, pero an cabʌl lac piʼʌlob i mach a cʌñʌyic jiñi tsaʼ bʌ majli a pijtan. Cojach miʼ mejlel a taj mi tsaʼ subentiyet bajcheʼ yilal i ñiʼ i wut yicʼot i pislel. Lʌcʼʌ lajalʌch tsiʼ mele (chaʼle) Jehová ti lac tojlel, tsiʼ cʼʌñʌ jiñi xʼaltʼañob chaʼan miʼ subeñonla chuqui mi caj i mel jiñi Mesías yicʼot chuqui mi caj i yujtel tiʼ tojlel. Jiñi yomoʼ bʌ i mel chuqui miʼ mulan Dios miʼ mejlelob i cʌn chaʼan Jesús jiñʌch jiñi Mesías o Cristo cheʼ bʌ miʼ qʼuelob bajcheʼ tsaʼ tsʼʌctiyi jiñi profecía tac.

 7. Alʌ chaʼpʼejl profecía muʼ bʌ i coltañonla lac ñaʼtan chaʼan Jesús jiñʌch jiñi Mesías.

⁷ Laʼ laj qʼuel chaʼpʼejl profecía. Jiñi ñaxam bʌ tsaʼ tsʼijbunti cheʼ bʌ anto yom 700 jab chaʼan miʼ yilan pañimil (chʼocʼan) Jesús. Jiñi xʼaltʼan Miqueas tsiʼ wʌn alʌ chaʼan mi caj i chʼocʼan ti jumpʼejl alʌ tejclum i cʼabaʼ Belén (Miqueas 5:2). Jesús yaʼʌch tsiʼ yila pañimil ti Belén (Mateo 2:1, 3-9). Jiñi i chaʼpʼejlel profecía tiʼ tsʼijbu jiñi xʼaltʼan Daniel. Tsiʼ yʌlʌ chaʼan jiñi Mesías mi caj i ñoj cʌjñel cheʼ ti jabil 29 (Daniel 9:25). I tsaʼʌch tsʼʌctiyi.a Ili chaʼpʼejl profecía miʼ coltañonla laj cʌn chaʼan Jesús jiñʌch jiñi Mesías tsaʼ bʌ wʌn ajli.

8, 9. ¿Bajcheʼ miʼ pʌs jiñi tsaʼ bʌ ujti cheʼ bʌ tsiʼ chaʼle chʼʌmjaʼ Jesús chaʼan jiñʌch jiñi Mesías?

⁸ Jehová jamʌ tsiquil tsiʼ pʌsʌ chaʼan Jesús jiñʌch jiñi Mesías. Dios tiʼ sube Juan jiñi xʼacʼ Chʼʌmjaʼb chaʼan mi caj i yʌqʼuen jumpʼejl señal chaʼan miʼ mejlel i cʌn jiñi Mesías. Cheʼ ti jabil 29, Jesús tsaʼ majli yaʼ ti Jordán jaʼ chaʼan Juan miʼ yʌcʼ ti chʼʌmjaʼ. Ti jimbʌ ora Juan tsiʼ qʼuele jiñi señal. Jiñi Biblia miʼ yʌl tsaʼ bʌ ujti: «Tsaʼ jubi tilel jini Chʼujul bʌ Espíritu baʼan Jesús. Cheʼ yilal cheʼ bajcheʼ xʼujcuts. Tsaʼ tili tʼan chʼoyol bʌ ti panchan. Tsiʼ subu: ‹Jatet Calobilet muʼ bʌ j cʼuxbin. Wen utsʼat mij qʼuelet›» (Lucas 3:22). Jiñi tsaʼ bʌ i yubi yicʼot i qʼuele Juan tsiʼ yʌqʼue i ñop chaʼan Jesús jiñʌch jiñi Mesías (Juan 1:32-34). Ti jimbʌ qʼuin, Jehová tsiʼ yʌcʼʌ jiñi chʼujul bʌ i yespíritu tiʼ tojlel Jesús. Ti jimbʌ ora, tsaʼ sujti ti Mesías o Cristo. Jiñʌch tsaʼ bʌ i yajca Dios chaʼan miʼ sujtel ti Yumʌl (Salmo 2:6; Isaías 55:4).

⁹ Jiñi profecía tac am bʌ ti Biblia, jiñi tsaʼ bʌ i mele tac Jehová yicʼot tsaʼ bʌ i yʌlʌ cheʼ bʌ tsiʼ chaʼle chʼʌmjaʼ i Yalobil, miʼ pʌs chaʼan Jesús jiñʌch jiñi Mesías. Pero ¿baqui tsaʼ tili Jesús? ¿Bajcheʼ yilal i melbal tac? Laʼ laj qʼuel chuqui miʼ yʌl jiñi Biblia.

10. ¿Chuqui miʼ pʌs jiñi Biblia tiʼ tojlel Jesús cheʼ bʌ maxto tilemic ti Pañimil?

¹⁰ Jiñi Biblia miʼ pʌs chaʼan Jesús wen jal tsaʼ chumle yaʼ ti panchan cheʼ bʌ maxto tilemic ti Pañimil. Jumpʼejl ejemplo, jiñi xʼaltʼan Miqueas tsiʼ yʌlʌ chaʼan jiñi Mesías juntiquilʌch «cuxul bʌ cʼʌlʌl ti oñiyi» (Miqueas 5:2). Cheʼ jaʼel, Jesús mach junsujtelic jach tsiʼ yʌlʌ chaʼan cheʼ bʌ maxto tilemic ti pañimil, wʌn chumulix ti panchan (pejcan Juan 3:13; 6:38, 62 yicʼot 17:4, 5). Jesús wen utsʼat tsaʼ ajñi yicʼot Jehová yaʼ ti panchan.

11. ¿Chucoch Jehová miʼ wen cʼuxbin Jesús?

¹¹ Jiñi i cʼuxbiya Jehová tiʼ tojlel Jesús wen qʼuexelʌch. ¿Chucoch? Come Jesús «jiñʌch yʌx alʌl bʌ i chaʼan cheʼ maxto anic melbil tac bʌ». Ili yom i yʌl chaʼan jiñʌch tsaʼ bʌ i ñaxan mele (pʌtʌ)Jehová (Colosenses 1:15).c Jesús wen qʼuexel bajcheʼ tsaʼ qʼuejli ti Dios come jiñʌch jiñi «cojach bʌ i Yalobil». Ili yom i yʌl chaʼan cojach Jesús tsaʼ bʌ bajñel mejli ti Jehová (Juan 3:16). Cheʼ jaʼel, cojach Jesús tsaʼ bʌ i colta Jehová tiʼ melol pejtelel chuqui an (Hebreos 1:2). Jin jach muʼ bʌ i subentel jaʼel bajcheʼ «Jini Tʼan», come pejtelel chuqui yom i suben Jehová jiñi ángelob yicʼot quixtañujob tsiʼ mele tiʼ tojlel Jesús (Juan 1:14).

12. ¿Bajcheʼ la cujil chaʼan Dios yicʼot Jesús mach lajalobic?

¹² An muʼ bʌ i ñaʼtañob chaʼan Dios yicʼot Jesús lajalob, pero jiñi Biblia mach cheʼic miʼ pʌs (qʼuele jiñi nota 14). Jiñi Biblia miʼ pʌs chaʼan Jesús tsaʼʌch mejli, ili yom i yʌl chaʼan maxto añic ti ñaxan. Pero Jehová toj añix cʼʌlʌl ti wajali. Jin tsiʼ mele pejtelel chuqui an (Salmo 90:2). Jiñi Biblia jamʌ tsiquil miʼ pʌs chaʼan jiñi Tatʌl ñumen ñuc bajcheʼ i Yalobil. Cheʼ jaʼel, Jesús maʼañic ba ora tsiʼ ñopo i laj i bʌ bajcheʼ i Tat (pejcan Juan 14:28; 1 Corintios 11:3). I cojach Jehová ‹Mach bʌ Añic i Pʼisol i Pʼʌtʌlel› (Apocalipsis 16:7). Jiñʌch jiñi ñumen ñuc bʌ yicʼot pʼʌtʌl bʌ.

13. ¿Chucoch miʼ yʌl jiñi Biblia chaʼan Jesús jiñʌch «i yejtal [...] Dios»?

¹³ Cheʼ bʌ maxto mejli jiñi panchan yicʼot Pañimil, Jehová yicʼot Jesús yonlel jab tsiʼ tem chaʼleyob eʼtel. Jal tsaʼ tem ajñiyob, jin chaʼan tsaʼ cʼoti i wen cʼuxbiñob i bʌ (Juan 3:35; 14:31). Jiñi Biblia miʼ yʌl chaʼan Jesús jiñʌch «i yejtal [...] Dios». ¿Chucoch? Come Jesús tsiʼ wen lajibe i melbal tac i Tat (2 Corintios 4:4).

14. ¿Bajcheʼ tsaʼ mejli i yilan pañimil Jesús?

¹⁴ Jesús tsaʼʌch i jacʼʌ i cʌy jiñi panchan chaʼan miʼ tilel ti Pañimil. Pero ¿bajcheʼ tsaʼ mejli i yilan pañimil bajcheʼ juntiquil quixtañu? Jehová tsiʼ mele jumpʼejl milagro. Tsiʼ cʼaxtesʌbe i cuxtʌlel i Yalobil tiʼ matriz juntiquil xchʼoc maxto bʌ piʼlebilic, i cʼabaʼ María. Jin chaʼan, maʼañic tsaʼ cʼʌjñibʌyi juntiquil wiñic chaʼan Jesús miʼ yilan pañimil. María tsiʼ yʌcʼʌ ti pañimil juntiquil i yalobil mach bʌ xmulilic, i tsiʼ yotsʌbe i cʼabaʼ bajcheʼ Jesús (Lucas 1:30-35).

15. ¿Bajcheʼ miʼ mejlel a ñumen cʌn Jehová?

¹⁵ Jesús tsiʼ yʌlʌ: «Jini tsaʼ bʌ i qʼueleyon, tsaʼix i qʼuele c Tat» (Juan 14:9). Mi jatet maʼ cʌn Jesús mi caj a ñumen cʌn Jehová come Jesús i yejtalʌch i Tat. Cheʼ maʼ pejcan jiñi Evangelio i chaʼan Mateo, Marcos, Lucas yicʼot Juan, miʼ mejlel a ñumen cʌmben i cuxtʌlel Jesús yicʼot bajcheʼ yilal i melbal.

16. a) ¿Chuqui tsiʼ yʌcʼʌ ti cʌñol Jesús? b) ¿Majqui tiʼ tojlel tsiʼ cʌñʌ chuqui tac tsiʼ pʌsʌ?

¹⁶ Cabʌl quixtañujob tiʼ subeyob Jesús ti «Maestro» (Juan 1:38; 13:13). Junchajp wen ñuc bʌ i cʼʌjñibal tsaʼ bʌ yʌcʼʌ ti cʌñol Jesús jiñʌch ‹jiñi wen tʼan chaʼan yumʌntel›. ¿Baqui bʌ yumʌntel? I Yumʌntel Dios, muʼ bʌ caj i yuman ili Pañimil cʼʌlʌl yaʼ ti panchan i mi caj i yʌqʼuen cabʌl bendición jiñi quixtañujob muʼ bʌ i jacʼbeñob i tʼan Dios (Mateo 4:23). ¿Baqui tsiʼ cʌñʌ Jesús pejtelel tsaʼ bʌ i pʌsʌ? Tiʼ tojlel Jehová. Jesús tsiʼ yʌlʌ: «Jini j cʌntesʌbal mach c chaʼanic. I chaʼañʌch c Tat tsaʼ bʌ i chocoyon tilel» (Juan 7:16). Jesús yujil chaʼan Dios yom chaʼan jiñi quixtañujob miʼ yubiñob jiñi wen tʼan, chaʼan jiñi i Yumʌntel Dios mi caj i yuman ili Pañimil.

17. a) ¿Baqui tsiʼ chaʼle cʌntesa Jesús? b) ¿Chucoch tsiʼ chaʼle wersa i cʌntesan quixtañujob?

¹⁷ ¿Baqui tsiʼ chaʼle cʌntesa Jesús? Jiñʌch baqui an quixtañujob. Tsiʼ chaʼle cʌntesa tiʼ bijlel cholel, ti ñuqui tejclum, ti alʌ tejclum, ti mercado, ti sinagoga yicʼot ti ototʌl tac. Jesús tsajñi i sʌclan jiñi quixtañujob, maʼañic tsiʼ pijta chaʼan jin miʼ cʼotelob yaʼ baqui an (Marcos 6:56; Lucas 19:5, 6). Tsiʼ wen chaʼle wersa yicʼot tsiʼ locʼsʌbe i yorajlel chaʼan miʼ chaʼlen cʌntesa. Cheʼʌch tsiʼ mele come yujil chaʼan jiñʌch yom bʌ Dios, i tiʼ pejtelel ora tsiʼ jacʼbe i tʼan i Tat (Juan 8:28, 29). Cheʼ jaʼel, tsiʼ chaʼle cʌntesa come tsiʼ pʼunta jiñi quixtañujob (pejcan Mateo 9:35, 36). Tsiʼ qʼuele chaʼan jiñi ñucoʼ bʌ i yeʼtel ti ñopbalʌl tac maʼañic miʼ pʌsob i sujmlel tiʼ tojlel Dios yicʼot i Yumʌntel. Jin chaʼan, tsiʼ mulaj i suben yonlel quixtañu jiñi wen tʼan chaʼan Yumʌntel.

18. ¿Chuqui maʼ ñumen mulan tiʼ tojlel Jesús?

¹⁸ Jesús tsiʼ cʼuxbi jiñi quixtañujob yicʼot tsiʼ chʼʌmʌyob ti ñuc. Wen uts, i jiñi quixtañujob tsiʼ wen mulayob i pejcan. Cheʼto jaʼel, jiñi alʌlob tijicña tsiʼ ñusayob yicʼot (Marcos 10:13-16). Tiʼ pejtelel ora tsiʼ mele chuqui toj. Tiʼ tsʼaʼle jiñi xujchʼ yicʼot toʼol ticʼlʌntel (Mateo 21:12, 13). Ti jimbʌ ora jiñi xʼixicob maʼañic miʼ qʼuejlelob ti ñuc. Pero Jesús tiʼ pejtelel ora tsiʼ qʼueleyob ti ñuc (Juan 4:9, 27). Cheʼ jaʼel, cabʌlʌch i pecʼlel. Jumpʼejl ejemplo, ti jumpʼejl bʌ qʼuin tsiʼ pocbe i yoc i yapóstolob. Iliyi cojach miʼ melob jiñi xyaj eʼtelob (Juan 13:2-5, 12-17).

19. ¿Chuqui ti ejemplo miʼ pʌs chaʼan Jesús yujilʌch chuqui yom jiñi quixtañujob i chaʼan yomʌch i coltañob?

¹⁹ Jesús yujil chuqui yomob jiñi quixtañujob i tsaʼʌch i mulaj i coltañob. Cheʼʌch tsiʼ pʌsʌ cheʼ bʌ tsiʼ cʼʌñʌ jiñi i pʼʌtʌlel tsaʼ bʌ i yʌqʼue Dios chaʼan miʼ tsʼʌcan quixtañujob (Mateo 14:14). Jumpʼejl ejemplo, juntiquil wiñic am bʌ leco bʌ i tsoy tsiʼ lʌcʼtesa i bʌ baqui an i tiʼ sube: «Mi a wom miʼ mejlel a lajmesañon». I wocol ili wiñic tsaʼʌch i ñijcʌbe i pusicʼal Jesús. Jin chaʼan tsiʼ pʼunta yicʼot tsiʼ colta. «Tsiʼ sʌtsʼʌ i cʼʌb. Tsiʼ tʌlʌ. Tsiʼ sube: ‹Com cu. Laʼ lajmiquet›». I jiñi wiñic tsaʼ cʼocʼa (Marcos 1:40-42). ¿Muʼ baʼ ñaʼtan bajcheʼ yubil tsiʼ yubi jiñi wiñic?

20, 21. ¿Chucoch Jesús jiñʌch jiñi ñumen wem bʌ ejemplo chaʼan bajcheʼ yom mi lac jacʼben i tʼan Dios?

²⁰ Jesús jiñʌch ñumen wem bʌ ejemplo chaʼan bajcheʼ tsiʼ jacʼbe i tʼan Dios. ¿Chucoch? Come chʌn xucʼul tsaʼ ajñi tiʼ Tat anquese cabʌl chuqui tsiʼ ñusa yicʼot cabʌl chuqui tsaʼ melbenti tiʼ contrajob. Jumpʼejl ejemplo, Jesús maʼañic tsaʼ yajli ti mulil cheʼ bʌ Satanás tsiʼ yilʌbe i pusicʼal (Mateo 4:1-11). Cheʼ jaʼel, an lamital i familia maʼañic bʌ tsiʼ ñopoyob chaʼan jiñʌch jiñi Mesías i tsiʼ yʌlʌyob chaʼan sojquem. Pero Jesús tsaʼʌch i chʌn jacʼbe i tʼan Jehová (Marcos 3:21). Cheʼto jaʼel, cheʼ bʌ jiñi i contrajob tsiʼ ticʼlayob chʌn xucʼul tsaʼ ajñi ti Dios i maʼañic tsiʼ wis qʼuexta chuqui tsaʼ tumbenti (1 Pedro 2:21-23).

²¹ Jesús xucʼul tsaʼ ajñi ti Jehová anquese tsiʼ wen ubi wocol cheʼ bʌ tsaʼ tsʌnsʌnti (pejcan Hebreos 2:9). Ñaʼtancu pejtelel chuqui tsiʼ ñusa ti jiñi cojix bʌ qʼuin: Tsiʼ chucuyob, tsiʼ jopʼbeyob i mul chaʼan tsiʼ pʼaja Dios, jiñi jontol bʌ xmeloñelob tsiʼ yʌlʌyob chaʼan miʼ tsʌnsʌntel, tsaʼ wajlenti, i jiñi soldadojob i chaʼan Roma tsiʼ wen ticʼlayob yicʼot tsiʼ chʼijiyob ti teʼ. Cheʼ bʌ Jesús muqʼuix i cajel ti chʌmel (sajtel) tsiʼ yʌlʌ: «Tsaʼix tsʼʌctiyi» (Juan 19:30). Cheʼ bʌ añix uxpʼejl qʼuin i chʌmel, Jehová tsiʼ chaʼ chʼojyesa bajcheʼ espíritu (1 Pedro 3:18). Cheʼ bʌ ñumeñix 40 qʼuin, Jesús tsaʼ chaʼ sujti majlel ti panchan, «tsaʼ buchle yaʼ tiʼ ñoj Dios» i tsiʼ pijta chaʼan miʼ waʼchocontel bajcheʼ Rey (Hebreos 10:12, 13).

22. ¿Chuqui miʼ mejlel lac taj chaʼan i xucʼtʌlel Jesús tiʼ tojlel i Tat?

²² Wocolix i yʌlʌ chaʼan i xucʼtʌlel Jesús tiʼ tojlel i Tat, mi lac mejlel ti chumtʌl tiʼ pejtelel ora ila ti Pañimil cheʼ jumpʼejlix Paraíso. Jiñʌch yom bʌ Jehová cʼʌlʌl tiʼ tejchibal. Yaʼ ti yambʌ cʌntesʌntel mi caj laj qʼuel bajcheʼ mi caj i tsʼʌctiyel ili wen utsʼatax bʌ lac pijtaya tiʼ coltaya i cuxtʌlel Jesús.