I tojol laj coltʌntel: Ñuc bʌ lac majtan ti Dios

1, 2. a) ¿Chuqui miʼ yʌqʼueñet a qʼuel ti ñuc jumpʼejl majtañʌl? b) ¿Chucoch jiñʌch ñumen ñuc bʌ lac majtan ti Dios jiñi i tojol laj coltʌntel?

¿BAQUI bʌ jiñi ñumen wem bʌ majtañʌl an i yʌqʼueyetob? ¿Chuqui miʼ yʌqʼueñet a qʼuel ti ñuc jumpʼejl majtañʌl? Mach jiñic mi lets i tojol. Mi mucʼʌch i yʌqʼueñet a tijicñʌyel o i cʼʌjñibalʌch a chaʼan mi caj a qʼuel ti ñuc.

² Tiʼ pejtelel jiñi majtañʌl aqʼuebil bʌ i chaʼañonla Dios, an jumpʼejl wen i cʼʌjñibal bʌ lac chaʼan. Jiñʌch ñumen ñuc bʌ lac majtan ti Dios. Tsiʼ yʌqʼueyonla cheʼ bʌ tsiʼ choco tilel i Yalobil chaʼan i tojol laj coltʌntel. I cheʼ bajcheʼ jiñi mi lac mejlel ti chumtʌl tiʼ pejtelel ora (pejcan Mateo 20:28). Cheʼ bʌ Jehová tsiʼ choco tilel Jesús, tsiʼ pʌsʌ chaʼan miʼ cʼuxbiñonla tiʼ sujm. Ti ili cʌntesʌntel cabʌl chuqui mi caj laj cʌn chaʼan ili majtañʌl.

 3. ¿Chucoch mi lac chʌmel?

³ Jiñi i tojol laj coltʌntel jiñʌch tsaʼ bʌ i yʌcʼʌ Dios chaʼan miʼ locʼsañonla ti mulil yicʼot chʌmel (Efesios 1:7). Chaʼan mi lac chʼʌmben i sujm chucoch i cʼʌjñibalʌch lac chaʼan, yom mi lac ñaʼtan chuqui tsaʼ ujti tiʼ tojlel Adán yicʼot Eva yaʼ ti pʌcʼʌbʌl Edén. Tsiʼ chaʼleyob mulil i tsaʼ chʌmiyob (sajtiyob). Ti lac pejtelel tsaʼ lac toybe i mul Adán yicʼot Eva. Jin chaʼan, mi lac chʌmel (qʼuele jiñi nota 9).

 4. ¿Chuqui wen tac bʌ tsaʼ aqʼuenti Adán ti Jehová?

⁴ Jiñi ñaxam bʌ wiñic tsiʼ mele (pʌtʌ) Dios jiñʌch Adán. An chuqui wen ñuc bʌ tsiʼ yʌqʼue: Toj bʌ i cuxtʌlel. Adán toj i ñaʼtʌbal yicʼot i bʌcʼtal, yom i yʌl chaʼan maʼañic baʼ ora miʼ cʼamʼan yicʼot miʼ chʌmel. Come Jehová jiñʌch tsaʼ bʌ i mele Adán, lajalʌch bajcheʼ i Tat (Lucas 3:38). Dios ti bele ora tsiʼ pejca Adán yicʼot tiʼ tsictesʌbe chuqui yom tiʼ tojlel. Cheʼ jaʼel, tsiʼ yʌqʼue utsʼatax bʌ i yeʼtel (troñel) (Génesis 1:28-30; 2:16, 17).

 5. ¿Chuqui yom i yʌl cheʼ Adán tsaʼ mejli «tiʼ yejtal» Dios?

⁵ Adán tsaʼ mejli «tiʼ yejtal» Dios (Génesis 1:27). Ili yom i yʌl chaʼan an tac i melbal (chaʼleya) bajcheʼ i chaʼan Jehová, bajcheʼ cʼuxbiya, i ñaʼtʌbal, i tojel yicʼot i pʼʌtʌlel. Adán mach lajalic bajcheʼ jumpʼejl robot yom bʌ miʼ subentel chuqui yom miʼ mel. Dios tsiʼ mele chaʼan miʼ mejlel i bajñel yajcan chuqui yom. Miʼ mejlel i yajcan i mel chuqui wen o mach bʌ weñic. Cheʼ tsaʼic i yajca i jacʼben i tʼan Jehová tijicña tsaʼ mejli ti chumtʌl tiʼ pejtelel ora.

 6. a) ¿Chuqui tsiʼ chaʼle Adán cheʼ bʌ tsiʼ ñusʌbe i tʼan Dios? b) ¿Bajcheʼ tsiʼ ticʼlayonla jiñi i ñusatʼan Adán?

⁶ Adán wen lets tsiʼ tojo i ñusatʼan. Tsaʼ subenti chaʼan mi caj i chʌmel yicʼot tsiʼ ñajtʼesa i bʌ ti Jehová. Tsaʼ sujti ti xmulil yicʼot tsaʼ chojqui loqʼuel yaʼ ti Paraíso (Génesis 3:17-19). Jiñi i ñusatʼan tsiʼ yotsayonla ti wocol jaʼel. «Tsaʼ ochi mulil ti pañimil chaʼan tiʼ mul juntiquil winic i cʼabaʼ Adán. Jini mulil tsiʼ yʌcʼʌ ti chʌmel pejtel winicob xʼixicob. Jini chaʼan mi lac chʌmel ti lac pejtelel, come tsaʼ lac chaʼle mulil ti lac pejtelel» (Romanos 5:12). Cheʼ bʌ tsiʼ ñusatʼan, Adán yicʼot joñonla tsaʼ ochiyonla tiʼ pʼʌtʌlel mulil yicʼot chʌmel (Romanos 7:14). Adán yicʼot Eva maʼañobix i pijtaya come tsiʼ yajcayob i ñusʌbeñob i tʼan Dios. Ixcu joñonla, ¿anto ba lac pijtaya? Añʌch. Jehová tsiʼ chajpa i tojol laj coltʌntel.

7, 8. ¿Chuqui jiñi chaʼchajp muʼ bʌ i yʌcʼ ti ñaʼtʌntel jiñi tʼan i tojol laj coltʌntel?

⁷ ¿Bajcheʼ an i sujmlel cheʼ miʼ tojtʌl jumpʼejl coltʌntel? Jiñʌch cheʼ miʼ yʌjqʼuel i tojol chaʼan miʼ cojlel juntiquil quixtañu. Cheʼ bajcheʼ miʼ pʌs jiñi Biblia, yambʌ jiñʌch jiñi i tojol muʼ bʌ i yʌcʼ juntiquil quixtañu chaʼan chuqui miʼ mel o miʼ jem i yom lajal i tojol bajcheʼ tsaʼ bʌ i jeme.

⁸ Mi juntiquilic quixtañu xmulil bʌ miʼ mejlel i toj jiñi tsaʼ bʌ i sʌtʌ Adán cheʼ bʌ tsiʼ chaʼle mulil i tsiʼ yotsayonla tiʼ pʼʌtʌlel chʌmel. Pero Jehová an chuqui tsiʼ mele chaʼan miʼ locʼsañonla. Laʼ laj qʼuel chuqui tsaʼ mejli chaʼan miʼ tojtʌl laj coltʌntel yicʼot chuqui i wenlel mi lac taj.

 9. ¿Bajcheʼ yilal yom jiñi i tojol laj coltʌntel?

⁹ Jiñi i tojol chaʼan miʼ cojlel jiñi wiñicob xʼixicob (quixtañujob) lajalʌch yom bajcheʼ jiñi cuxtʌlel tsaʼ bʌ i sʌtʌ Adán. Jin chaʼan, Jesús «tsiʼ yʌcʼʌ i bʌ» come jiñi i cuxtʌlel lajalʌch bajcheʼ tsaʼ bʌ i sʌtʌ Adán (1 Timoteo 2:6). I cʼʌjñibalʌch juntiquil mach bʌ xmulilic. Pero bajcheʼ tsaʼ la cʌlʌ, maʼañic majqui miʼ mejlel i toj. ¿Chucoch? Come laj xmulilonla (Salmo 49:7, 8).

10. ¿Chuqui tsiʼ mele Jehová chaʼan miʼ yʌcʼ jiñi i tojol laj coltʌntel?

¹⁰ ¿Chuqui tsiʼ mele Jehová chaʼan miʼ coltañonla? Tsiʼ choco tilel Jesús wʌʼ ti Lum, i Yalobil muʼ bʌ i ñumen cʼuxbin (1 Juan 4:9, 10). Jesús ti jumpʼejl i pusicʼal tsiʼ cʌyʌ i Tat yicʼot i chumlib ti panchan (Filipenses 2:7). Jehová tsiʼ cʼaxtesʌbe i cuxtʌlel Jesús tiʼ ñʌcʼ María. Cheʼ bajcheʼ jiñi, Jesús mach xmulilic tsiʼ qʼuele pañimil (chʼocʼa) (Lucas 1:35).

11. ¿Bajcheʼ la cujil chaʼan ti lac pejtelel mi lac mejlel ti coltʌntel tiʼ tojlel juntiquil wiñic?

¹¹ Bajcheʼ tsaʼix laj qʼuele, jiñi ñaxam bʌ wiñic tsiʼ ñusʌbe i tʼan Jehová i tsiʼ yʌqʼueyonla lac sʌt jiñi toj bʌ laj cuxtʌlel. ¿Muʼ ba i mejlel juntiquil wiñic i coltan pejtelel quixtañujob? Mucʼʌch. ¿Bajcheʼ la cujil? Jiñi Biblia miʼ yʌqʼuen i jacʼbal yaʼ ti Romanos 5:19 (pejcan). Jesús maʼañic ba ora tsiʼ chaʼle mulil, jin chaʼan tsaʼ mejli i yʌcʼ i cuxtʌlel chaʼan miʼ coltañonla loqʼuel tiʼ cʼʌb jiñi chʌmel (1 Corintios 15:21, 22, 45, TNM).

12. ¿Chucoch tsiʼ wen ñusa wocol Jesús?

¹² Jiñi Biblia miʼ tsictesan pejtelel jiñi wocol tsaʼ bʌ i ñusa Jesús cheʼ bʌ muqʼuix caj i chʌmel. Tsiʼ wen jatsʼʌyob, tsiʼ chʼijiyob ti teʼ, i xucʼu xucʼul tsaʼ chʌmi (Juan 19:1, 30; Hechos 10:39; qʼuele jiñi nota 15). ¿Chucoch tsiʼ wen ñusa wocol? Come Satanás tsiʼ yʌlʌ chaʼan maʼañic majqui xucʼul mi caj i yajñel ti Dios cheʼ miʼ taj tsʌts tac bʌ wocol. Pero Jesús tsiʼ pʌsʌ chaʼan juntiquil toj bʌ wiñic xucʼul miʼ mejlel ti ajñel anquese miʼ taj wen tsʌts bʌ wocol. ¡Jehová tsaʼʌch i wen taja i tijicñʌyel tiʼ tojlel i Yalobil! (Proverbios 27:11).

13. ¿Chuqui tsaʼ ujti chaʼan miʼ tojtʌl laj coltʌntel?

¹³ ¿Chuqui tsaʼ ujti chaʼan miʼ tojtʌl laj coltʌntel? Cheʼ ti 14 i chaʼan nisán ti jabil 33, Jehová tsiʼ yʌcʼʌ chaʼan Jesús miʼ tsʌnsʌntel tiʼ contrajob (Hebreos 10:10). Cheʼ ñumeñix uxpʼejl qʼuin, Jehová tsiʼ chaʼ cuxtesa bajcheʼ espíritu, mach cheʼix bajcheʼ juntiquil wiñic. Chaʼan miʼ yujtel ti tojtʌl jiñi laj coltʌntel, Jesús tsaʼ chaʼ letsi majlel baʼan Dios (Hebreos 9:24). Dios tsaʼʌch i chʼʌmʌ ti ñuc cheʼ Jesús tsiʼ yʌcʼʌ i cuxtʌlel. Cheʼ tojbilix jiñi laj coltʌntel, muqʼuix lac mejlel ti loqʼuel tiʼ cʼʌb jiñi mulil yicʼot chʌmel (pejcan Efesios 1:7).

14, 15. ¿Chuqui yom mi lac mel chaʼan Jehová miʼ ñusʌbeñonla lac mul?

¹⁴ Jiñi i tojol laj coltʌntel cabʌl bajcheʼ miʼ yʌqʼueñonla lac wenlel. Laʼ laj qʼuel bajcheʼ ili ñuc bʌ lac majtan tilem bʌ ti Dios miʼ yʌqʼueñonla lac wenlel ili ora yicʼot ti talto bʌ qʼuin.

¹⁵ Mi lac mejlel ti ñusʌbentel lac mul. Wocolʌch chaʼan tiʼ pejtelel ora mi lac mel chuqui wen. Ti lac pejtelel mi lac taj lac sajtemal, an qʼuiñil mi lac mel o mi la cʌl mach bʌ weñic. ¿Bajcheʼ miʼ mejlel ti ñusʌntel lac mul? Yom mi laj cʌy ti jumpʼejl lac pusicʼal yicʼot mi laj cʼajtiben Jehová ti lac pecʼlel chaʼan miʼ ñusʌbeñonla. Mi cheʼʌch mi lac mel, miʼ mejlel lac ñop chaʼan mucʼʌch caj i ñusʌbeñonla (Colosenses 1:13, 14; 1 Juan 1:8, 9).

16. ¿Chuqui yom mi lac mel chaʼan wen miʼ yajñel laj conciencia?

¹⁶ Wen miʼ mejlel ti ajñel laj conciencia. Cheʼ bʌ jiñi laj conciencia miʼ yʌl chaʼan an chuqui mach weñic tsaʼ lac mele, an lac mul mi la cubin. Tajol maʼañix laj cʼʌjñibal mi la cubin lac bʌ yicʼot maʼañix lac pijtaya. Pero mach yomic mi laj cʼunʼan. Cheʼ mi laj cʼajtiben Jehová ti wocol tʼan chaʼan miʼ ñusʌbeñonla, miʼ mejlel lac ñop chaʼan mucʼʌch caj i ñʌchʼtañonla yicʼot i ñusʌbeñonla (Hebreos 9:13, 14). Jehová yom chaʼan mi lac suben pejtelel lac wocol o laj cʼunlel (Hebreos 4:14-16). Cheʼ bajcheʼ ili, wen miʼ mejlel ti ajñel laj conciencia tiʼ tojlel.

17. ¿Baqui tac bʌ wenlel miʼ mejlel lac taj cheʼ tsiʼ yʌcʼʌ i cuxtʌlel Jesús?

¹⁷ Mi lac mejlel ti chumtʌl tiʼ pejtelel ora. «An i tojol mulil. Jini muʼ bʌ i chaʼleñob mulil wersa miʼ chʌmelob, jiñʌch i tojol. Pero lac majtan chʼoyol bʌ ti Dios jiñʌch laj cuxtilel mach bʌ anic miʼ jilel ti lac Yum Cristo Jesús» (Romanos 6:23). Wocolix i yʌlʌ Jesús cheʼ tsiʼ yʌcʼʌ i cuxtʌlel, an lac pijtaya chaʼan mi lac mejlel ti chumtʌl tiʼ pejtelel ora yicʼot lac taj laj cʼocʼlel (Apocalipsis [Revelación] 21:3, 4). Pero ¿chuqui yom mi lac mel chaʼan mi lac taj jiñi?

18. ¿Chucoch mucʼʌch lac ñop chaʼan Jehová yicʼot Jesús miʼ cʼuxbiñonla?

¹⁸ Ñaʼtancu bajcheʼ yubil mi la cubin cheʼ mi la cʌqʼuentel wen utsʼatax bʌ lac majtan. Jiñi ñumen ñuc bʌ lac majtan jiñʌch i tojol laj coltʌntel, i yom mi lac wen aqʼuen wocolix i yʌlʌ Jehová cheʼ tsiʼ yʌqʼueyonla. Ti Juan 3:16 miʼ yʌl chaʼan «tsiʼ wen cʼuxbi jini añoʼ bʌ ti pañimil Dios. Tsiʼ yʌcʼʌ cojach bʌ i Yalobil». La cujil chaʼan Jesús mucʼʌch i wen cʼuxbiñonla jeʼel, come ti jumpʼejl i pusicʼal tsiʼ yʌcʼʌ i bʌ ti chʌmel ti laj caj (Juan 15:13). Ili ñuc bʌ majtañʌl miʼ pʌsbeñonla chaʼan Jehová yicʼot Jesús mucʼʌch i cʼuxbiñonla tiʼ sujm (Gálatas 2:20).

19. ¿Chuqui miʼ mejlel a mel chaʼan maʼ sujtel tiʼ yamigo Jehová?

¹⁹ Wʌle cheʼ tsaʼix laj cʌñʌ chaʼan Jehová miʼ wen cʼuxbiñonla, ¿bajcheʼ miʼ mejlel a pʌs chaʼan maʼ qʼuel ti ñuc jiñi i tojol laj coltʌntel? Yom bʌ maʼ ñaxan mel, jiñʌch maʼ cʌn Jehová yicʼot maʼ sujtel tiʼ yamigo (Juan 17:3). Mi cheʼʌch maʼ mel, mi caj a ñumen cʼuxbin yicʼot mi caj a mulan a mel muʼ bʌ i mulan. Jin chaʼan, bej cʌñʌ i chaʼan bʌ Jehová cheʼ maʼ pejcan jiñi Biblia (1 Juan 5:3).

20. ¿Bajcheʼ miʼ mejlel a pʌs chaʼan añʌch a ñopoñel ti i tojol laj coltʌntel?

²⁰ Acʼʌ a ñopoñel (chʼujbiya) tiʼ cuxtʌlel Jesús. Jiñi Biblia miʼ yʌl: «Jini muʼ bʌ i ñop i Yalobil Dios, an i chaʼan i cuxtʌlel mach bʌ anic miʼ jilel» (Juan 3:36). ¿Chuqui yom i yʌl cheʼ an lac ñopoñel ti Jesús? Yom i yʌl chaʼan mi lac mel cheʼ bajcheʼ tsiʼ cʌntesayonla (Juan 13:15). Mach cojach yom mi la cʌl chaʼan mi lac ñop Jesús, anto chuqui yom mi lac mel. Yom tsiquil ti lac melbal chaʼan añʌch lac ñopoñel tiʼ tojol laj coltʌntel. Ti Santiago 2:26 miʼ yʌl chaʼan «mi toʼol tʼan jach woli lac ñop Dios cheʼ maʼanic wen bʌ lac melbal, chʌmeñonixla yubil».

21, 22. a) ¿Chucoch yom mi lac majlel tiʼ Cʼajtesʌntel i chʌmel Jesús ti jujumpʼejl jab? b) ¿Chuqui mi caj laj cʌn yaʼ ti cʌntesʌntel 6 yicʼot 7?

²¹ Yom maʼ majlel tiʼ Cʼajtesʌntel i chʌmel Jesús. Cheʼ ti 14 i chaʼan nisán ti acʼʌlel, Jesús tsiʼ yʌlʌ chaʼan yom mi laj cʼajtesan cheʼ tsaʼ chʌmi. Iliyi ti jujumpʼejl jab miʼ mejlel, cʌmbil bajcheʼ i Cʼajtesʌntel i chʌmel Jesús (1 Corintios 11:20; Mateo 26:26-28). Jesús yom cheʼ mi laj cʼajtesan chaʼan tsiʼ yʌcʼʌ i cuxtʌlel chaʼan miʼ coltañonla. Tsiʼ yʌlʌ: «Cheʼʌch yom mi laʼ mel chaʼan c ñaʼtʌntel» (pejcan Lucas 22:19). Cheʼ mi lac majlel tiʼ Cʼajtesʌntel i chʌmel Jesús, mi lac pʌs chaʼan cʼajalʌch lac chaʼan jiñi i tojol laj coltʌntel yicʼot bajcheʼ cʼamel miʼ cʼuxbiñonla Jehová yicʼot Jesús (qʼuele jiñi nota 16).

²² Maʼañic yambʌ majtañʌl ñumen ñuc bʌ bajcheʼ i tojol laj coltʌntel (2 Corintios 9:14, 15). Yaʼ ti cʌntesʌntel 6 yicʼot 7 mi caj laj cʌn bajcheʼ yonlel chʌmeñoʼ bʌ mi caj i tajob i wenlel chaʼan jiñi i tojol laj coltʌntel.