CɅNTESɅNTEL 30
¡Jiñi chʌmeñoʼ bʌ lac chaʼan miʼ mejlelob ti chaʼ chʼojyel!
Cheʼ bʌ an majqui miʼ chʌmel (sajtel) lac chaʼan mi lac wen ubin lac chʼijyemlel. Jin chaʼan, jiñi Biblia miʼ yʌl chaʼan jiñi chʌmel lajal bajcheʼ juntiquil laj contra (1 Corintios 15:26). Yaʼ ti cʌntesʌntel 27 tsaʼ cʌñʌ chaʼan Jehová mi caj i jisan jiñi chʌmel. ¿Pero ixcu jiñi tsaʼix bʌ chʌmiyob? Ti ili cʌntesʌntel mi caj a ñumen cʌn yambʌ chuqui utsʼatax bʌ mi caj i mel Jehová: Chaʼan mi caj i chʼojyesan cabʌl lac piʼʌlob chaʼan miʼ chumtʌlob tiʼ pejtelel ora. ¡Cuxul mi caj i chaʼ ajñelob! ¿I sujmʌch ba jiñi? ¿I baqui mi caj i chʼojyelob, yaʼ ti panchan o ila ti Lum?
1. ¿Chuqui yom i mel Jehová tiʼ tojlel jiñi tsaʼix bʌ chʌmiyob lac chaʼan?
Jehová yom i chaʼ chʼojyesan jiñi tsaʼix bʌ chʌmiyob. Job, juntiquil wiñic wen am bʌ i ñopoñel, yujil chaʼan Dios maʼañic mi caj i ñajʌyel i chaʼan cheʼ bʌ miʼ chʌmel, i chaʼan maʼañic mi caj i cʌy yaʼ baʼan chʌmeñoʼ bʌ, yom i yʌl, yaʼ ti mucoñibʌl. Tiʼ sube jiñi Dios: «Mi caj c jacʼ baʼ ora maʼ pʌyon» (pejcan Job 14:13-15).
2. ¿Bajcheʼ la cujil chaʼan mucʼʌch caj i chaʼ chʼojyelob jiñi chʌmeñoʼ bʌ?
Cheʼ bʌ Jesús wʌʼan ila ti Pañimil, Dios tsiʼ yʌqʼue i pʼʌtʌlel chaʼan miʼ chaʼ chʼojyesan lac piʼʌlob. Jin chaʼan, Jesús tsiʼ chaʼ chʼojyesa juntiquil alʌ xchʼoc 12 bʌ i jabilel yicʼot i yalobil juntiquil mebaʼ xʼixic (Marcos 5:41, 42; Lucas 7:12-15). Cheʼ jaʼel, Lázaro, juntiquil i yamigo, tsaʼ chʌmi. I anquese chʌmpʼejlix qʼuin chʌmen, Jesús tsiʼ chaʼ chʼojyesa. Cheʼ bʌ tsaʼ ujti i melben oración Dios, tsiʼ qʼuele jiñi mucoñibʌl i cʼam tsiʼ yʌlʌ: «¡Lázaro, loqʼuen tilel!». I «tsaʼ loqʼui jiñi chʌmen bʌ», ¡i chaʼ cuxulix! (Juan 11:43, 44). ¡Jiñi i familia yicʼot i yamigojob Lázaro wen tijicñayʌch tsiʼ yubiyob i bʌ!
3. ¿Muʼ ba caj i chaʼ chʼojyelob jiñi tsaʼix bʌ chʌmiyob lac chaʼan?
Jiñi Biblia miʼ yʌl chaʼan «mi caj i chaʼ chʼojyelob» (Hechos 24:15). Pejtelel jiñi tsaʼ bʌ i chʼojyesayob Jesús maʼañic tsaʼ majliyob ti panchan (Juan 3:13). Tijicña tsiʼ yubiyob i bʌ cheʼ bʌ tsaʼ chaʼ cuxtesʌntiyob ila ti Pañimil. Cheʼ bajcheʼ tsaʼ ujti ti jimbʌ ora, tsʼitaʼ jachix yom chaʼan Jesús mi caj i chaʼ chʼojyesan cabʌl lac piʼʌlob chaʼan miʼ chumtʌlob tiʼ pejtelel ora ila ti Pañimil cheʼ bʌ sujtemix ti jumpʼejl paraíso. Tsiʼ yʌlʌ chaʼan «pejtelel jiñi añoʼ bʌ ti mucoñibʌl chaʼan bʌ cʼajtesʌntel», yom i yʌl, pejtelel añoʼ bʌ tiʼ ñaʼtʌbal Dios, mi caj i chaʼ chʼojyelob, cheʼto jaʼel jiñi maʼañix bʌ majqui miʼ cʼajtesañob (Juan 5:28, 29, nota).
LAʼ LAC ÑUMEN ÑAʼTAN
Laʼ laj qʼuel chuqui tac miʼ yʌl jiñi Biblia muʼ bʌ i pʌs chaʼan jiñi chʌmeñoʼ bʌ mucʼʌch i mejlelob ti chaʼ chʼojyel yicʼot chaʼan cheʼʌch miʼ cajel. I laʼ laj qʼuel bajcheʼ miʼ mejlel i ñuqʼuesan a pusicʼal yicʼot i yʌqʼueñet a pijtaya cheʼ bʌ mucʼʌch caj i chaʼ chʼojyelob jiñi chʌmeñoʼ bʌ.
4. Jesús tsiʼ pʌsʌ chaʼan mucʼʌch i mejlel i chaʼ chʼojyesan jiñi chʌmeñoʼ bʌ
Ñumen cʌñʌ tsaʼ bʌ i mele Jesús tiʼ tojlel i yamigo Lázaro. Pejcanla Juan 11:14 yicʼot 38-44, i tem alʌla iliyi:
¿Bajcheʼ la cujil chaʼan Lázaro chʌmeñʌch? (Qʼuelela jiñi versículo 39).
Mi Lázaro tsaʼix majli ti panchan, ¿chucochto Jesús tsiʼ chaʼ pʌyʌ tilel ila ti Lum?
5. ¡Cabʌlob mi caj i chaʼ chʼojyelob!
Pejcanla Salmo 37:29 i tem alʌla iliyi:
¿Baqui mi caj i chumtʌlob jiñi yonlel lac piʼʌlob muʼ bʌ caj i chaʼ chʼojyelob?
Jesús mach cojach mi caj i chaʼ chʼojyesan jiñi tsaʼ bʌ i chʼujutesayob Jehová, yicʼotʌch jaʼel cabʌl lac piʼʌlob. Pejcanla Hechos 24:15 i tem alʌla iliyi:
Cheʼ bʌ mi caj i chaʼ chʼojyelob jiñi chʌmeñoʼ bʌ, ¿majqui a wom a qʼuel?
Ñaʼtancu iliyi: Cheʼ bajcheʼ juntiquil tatʌl mach wocolic miʼ yubin chaʼan miʼ ñijcan jiñi i yalobil cheʼ wen wʌyʌl, Jesús jaʼel mach wocolic miʼ yubin chaʼan miʼ chaʼ cuxtesan jiñi chʌmeñix bʌ.
6. Jiñi chaʼ chʼojyel miʼ mejlel i ñuqʼuesan a pusicʼal yicʼot i yʌqʼueñet a pijtaya
Jiñi muʼ bʌ i yʌl jiñi Biblia tiʼ tojlel i yixicʼal Jairo an i ñuqʼuesʌbe i pusicʼal cabʌl lac piʼʌlob am bʌ majqui tsaʼ chʌmiyob i chaʼan. Pejcanla ili relato am bʌ ti Lucas 8:40-42 yicʼot 49-56.
Cheʼ bʌ Jesús maxto i chʼojyesʌbe i yixicʼal Jairo, tiʼ sube: «Mach a chaʼlen bʌqʼuen, ñopo jach» (qʼuelela jiñi versículo 50). ¿Bajcheʼ miʼ mejlel i coltañet jiñi pijtaya chaʼan chaʼ chʼojyel...
cheʼ bʌ an majqui miʼ chʌmel a chaʼan?
cheʼ bʌ maʼ mejlel ti chʌmel?
Qʼuelela jiñi VIDEO i tem alʌla iliyi:
¿Bajcheʼ an i ñuqʼuesʌbeyob i pusicʼal i papá i mamá Phelicity jiñi pijtaya chaʼan chaʼ chʼojyel?
AN MUʼ BɅ I YɅLOB: «Wocol mi cubin chaʼan mic ñop chaʼan jiñi chʌmeñoʼ bʌ chaʼ cuxul mi caj i yajñelob ila ti Pañimil».
¿Chuqui maʼ ñaʼtan jatet?
¿Chuqui ti texto miʼ mejlel a cʼʌn chaʼan maʼ pʌs chaʼan mucʼʌch caj i chaʼ chʼojyelob ila ti Pañimil jiñi chʌmeñoʼ bʌ?
TSAʼ BɅ LAJ CɅÑɅ
Jiñi Biblia miʼ yʌl chaʼan yonlel lac piʼʌlob mi caj i chaʼ chʼojyelob. Jehová yom chaʼan chaʼ cuxul miʼ yajñelob i an i yʌqʼue i pʼʌtʌlel Jesús chaʼan miʼ chaʼ chʼojyesañob.
¿Chuqui tsaʼ cʌñʌ?
¿Bajcheʼ la cujil chaʼan Jehová yicʼot Jesús yomobix i chaʼ cuxtesañob jiñi tsaʼ bʌ chʌmiyob?
¿Baqui mi caj i chumtʌlob jiñi yonlel lac piʼʌlob muʼ bʌ caj i chaʼ tejchelob, yaʼ ti panchan o ila ti Pañimil? ¿Chucoch cheʼ maʼ ñaʼtan bajcheʼ jiñi?
¿Chuqui miʼ yʌqʼueñet a ñop chaʼan jiñi chʌmeñoʼ bʌ a chaʼan mucʼʌch caj i chaʼ chʼojyelob?
CɅÑɅ YAN TAC BɅ
Pejcan chuqui tac miʼ mejlel a mel mi chʼijyemet chaʼan an majqui tsaʼ chʌmi a chaʼan.
«Coltʌntel chaʼan am bʌ majqui tsaʼ chʌmi i chaʼan» (¡Jamʌx a wut!, núm. 3 2018)
Mi juntiquil an majqui tsaʼ chʌmi i chaʼan, ¿mejl ba i coltan jiñi Biblia?
Qʼuele bajcheʼ miʼ mejlel a coltan juntiquil chʼiton o alʌ xchʼoc cheʼ bʌ an majqui tsaʼ chʌmi i chaʼan.
¿Am ba majqui mi caj i chʼojyel yaʼ ti panchan? ¿Am ba majqui maʼañic mi caj i chaʼ chʼojyel?
«¿Chuqui miʼ yʌl jiñi Biblia chaʼan jiñi chaʼ chʼojyel?» (Tema am bʌ ti jw.org)