«Luʼ añix c chaʼan tsaʼ c ñaʼta»

Tsaʼ chʼocʼayon ti Montreal, jiñi colem bʌ tejclum am bʌ ti Quebec, Canadá. Joñon yicʼot uxtiquil querañob tsaʼ coliyon lon ti jumpʼejl barrio i cʼabaʼ Rosemont i jiñi c tatob wen utsob. Tijicña tsaʼ coliyon lojon.

Mic wen mulan c pejcan jiñi Biblia cheʼ bʌ alobonto. Cheʼ bʌ 12 c jabilel, cʼajal c chaʼan chaʼan mic pejcan jiñi Nuevo Testamento, baʼ miʼ yʌl chaʼan i cuxtʌlel Jesús i mi c wen mulan. Mi c wen mulan bajcheʼ tsiʼ pʌsʌ i cʼuxbiya yicʼot i pʼuntaya, i cheʼʌch com c mel tsaʼ cʌlʌ jaʼel. Pero cheʼ tsaʼ cajiyob ti bej colel i tsaʼ c teche c ñochtañob jiñi mach bʌ weñobic i melbal, tsaʼ qʼuextʌyi c pensar.

Jiñi c papá yujil wusol jiñi saxofón, i ti wiʼil, tsaʼ cʌyle quicʼot jiñi i saxofón yicʼot tsaʼ c wen mulaj jaʼel jiñi música. I jiñʌch tsaʼ bʌ c ñumen acʼʌ ti ñuc tij cuxtʌlel. Come tsaʼ c wen mulaj, mach jalic tsaʼ j cʌñʌ c jatsʼ jiñi guitarra. Ti wiʼil, tsaʼ c tempa camigojob chaʼan mic tech lon c jatsʼ jiñi música rock, i tsaʼ cajiyon lon ti majlel baʼ miʼ yujtel tac qʼuiñijel. Cheʼ jiñi, an xmel músicajob wen cʌmbiloʼ bʌ tsaʼ bʌ i pejcayoñob i tiʼ subeyoñob chaʼan miʼ mejlel i yʌcʼob tiʼ wen cʌjñel jiñi j cʼay, i tsaʼ c mele jumpʼejl contrato yicʼot jumpʼejl compañia wen cʌmbil bʌ. Jiñi c música tsaʼ wen cʌjñi i tsaʼ caji ti ñusʌntel yaʼ ti radio chaʼan Quebec.

Luʼ añix c chaʼan yilal. Wen cʌmbilon yicʼot mic taj cabʌl taqʼuin cheʼ mic mel muʼ bʌ c ñumen mulan. Cheʼ ti qʼuiñil, mic majlel ti gimnasio, mic melbentel entrevista, mi cʌcʼ autógrafo yicʼot mic ñumel ti televisión. Cheʼ ti acʼʌlel, mic ñijcan música yicʼot mic majlel ti qʼuiñijel tac. Chaʼan mij cuch, pejtelel jiñi quixtañujob muʼ bʌ i tsajcañoñob, mic jap lembal yicʼot tsaʼ caji j cʼʌn droga tac. Wen bibiʼ jax jiñi c melbal i mach c wentajic mi an i wocolel.

Cabʌl majqui tsiʼ mulaj bajcheʼ chumulon come tijicñayon yilal. Pero tic pusicʼal mach cheʼiqui, ñumento cheʼ c bajñel jach. Mic wen ubin c chʼijiyemlel yicʼot cabʌl jax chuqui mic ñaʼtan. Chʼijiyem tic jax tsaʼ bʌ ujti cheʼ woliʼ c wen taj c ñuclel, tsaʼ chʌmi chaʼtiquil muʼ bʌ i coltañoñob tiʼ caj sida. Maʼañic tsaʼ mejli c ñop yubil. Mic wen mulan jiñi música, pero wen biʼiltic jax yaʼ baqui añon.

Anquese joñon cabʌl chuqui woli c taj, tsaʼ j qʼuele chaʼan ili pañimil woliʼ ñumen asiyel. ¿Chucoch miʼ wen mejlel mach bʌ tojic? Mic wen cʼajtiben c bʌ chucoch maʼañic chuqui miʼ mel Dios. Tsaʼto c pejca ti oración yicʼot tsaʼ j cʼajtibe i jacʼbal. Ti jumpʼejl bʌ qʼuin, cheʼ maʼañic baqui tsaʼ majliyon, tsaʼ c chaʼ pejca jiñi Biblia. Maʼañic tsaʼ c wen chʼʌmbe i sujm, pero tsaʼ cʼoti c ñaʼtan chaʼan lʌcʼʌlix i jilibal ili pañimil.

Yaʼ ti Biblia miʼ yʌl chaʼan Jesús tsiʼ chaʼle chʼajb 40 qʼuin yaʼ ti tiquiñal lum (Mateo 4:​1, 2). Jin chaʼan, tsaʼ c ñaʼta chaʼan Dios mi caj i pʌsbeñon i bʌ miʼ cheʼʌch mic mel jaʼel, i tsaʼ c yajca chuqui ti tsic mi caj c tech. Cheʼ anto yom chaʼpʼejl semana chaʼan mic tech, tsaʼ cʼoti i jatsʼob i tiʼ cotot chaʼtiquil Testigojob, i ti orajach tsaʼ c subeyob ochel. Juntiquil i cʼabaʼ Jacques tsaʼ c wen qʼuele tiʼ wut i tsaʼ j cʼajtibe: «¿Bajcheʼ miʼ mejlel lac ñop chaʼan chumuloñixla ti cojix bʌ qʼuin ila ti pañimil?». Cheʼ jiñi, tsiʼ jamʌ i Biblia i tsiʼ pejcʌbeyon 2 Timoteo 3:​1-5. Tsaʼ c wen melbeyob cʼajtiya tac, i tsaʼ c mulaj bajcheʼ tiʼ tsictesayob, maʼañobic i bʌqʼuen yicʼot laj chuculʌch ti Biblia. Jasʌl tsiʼ julaʼtayoñob chaʼyajl uxyajl, i tsaʼ cʼoti j qʼuel chaʼan mach cʼʌñʌlic jiñi chʼajb.

Tsaʼ c teche jumpʼejl estudio loqʼuem bʌ ti Biblia yicʼot jiñi Testigojob. Ti wiʼil, tsaʼ c setʼe c jol i tsaʼ c teche majlel ti tempa bʌ tac yaʼ ti Yotlel Tempa bʌ. Jiñi i yutslelob tic tojlel cheʼ bʌ tsaʼ cʼotiyon tsiʼ ñumen aqʼueyon c ñop chaʼan jiñʌch i sujmlel.

Cabʌlʌch chuqui tsaʼ j qʼuexta tij cuxtʌlel chaʼan mic jacʼ woli bʌ j cʌn yaʼ ti Biblia. Tsaʼ j cʌyʌ jiñi droga tac yicʼot jiñi bibiʼ jax bʌ c melbal. Yicʼot jaʼel, tsaʼ j cʌyʌ c bajñel ñaʼtan c bʌ i tsaʼ c ñumen chʼʌmʌ ti ñuc yambʌlob. Cheʼ jaʼel, come woli c bajñel cosan chaʼtiquil calobilob, tsaʼ j cʌñʌ c ñumen cʌntañob tiʼ chaʼan bʌ Dios yicʼot chaʼan chuqui añob tiʼ pusicʼal. Jin chaʼan, tsaʼ j cʌyʌ jiñi queʼtel chaʼan música i tsaʼ ochiyon ti eʼtel ti jumpʼejl fábrica baʼ mach cʌlʌx letsic lac tojol.

Tiʼ sujm, wocolʌch tsaʼ cubi. Cheʼ woli c chaʼlen wersa j cʌy jiñi droga, an qʼuiñil mic chaʼ ñop come jiñi bʌcʼtal ñʌmʌlix i chʼʌm (Romanos 7:​19, 21-​24). Pero ñumen wocol tsaʼ cubi chaʼan mij cʌy jiñi bibiʼ bʌ c melbal. Cheʼ jaʼel, mic wen lujbʼan ti queʼtel, i mach jasʌlic mi cubin jiñi c tojol. Wʌle, jiñi muʼ bʌ c taj ti uxpʼejl uw ti chaʼpʼejl jach ora mic taj cheʼ mucʼonto ti eʼtel chaʼan música.

Jiñi oración tsiʼ wen coltayon yaʼ baqui ñumen wocol tsaʼ cubi. I wen añʌch i cʼʌjñibal jaʼel cheʼ mi lac chʌcʌ pejcan jiñi Biblia. Cʼajalto c chaʼan jiñi versículo tsaʼ bʌ i wen coltayon. Jumpʼejl jiñʌch 2 Corintios 7:1, baʼ miʼ yʌl chaʼan yom mi «lac poc loqʼuel pejtelel bibiʼ tac bʌ am bʌ ti lac bʌcʼtal yicʼot lac pusicʼal». Yambʌ tsaʼ bʌ i coltayon j cʌy jiñi tsucul c melbal jiñʌch Filipenses 4:​13, (TNM) muʼ bʌ i yʌl: «Miʼ mejlel j cuch tiʼ pejtelel chuqui jach wocolix i yʌlʌ jiñi muʼ bʌ i yʌqʼueñon c pʼʌtʌlel». Jehová tsiʼ jacʼbeyon coración tac i tsiʼ coltayon chaʼan mic chʼʌmben i sujm yicʼot mi cʌcʼ ti ñuc jiñi principio tac am bʌ ti Biblia. I jiñi tsiʼ ñijca c pusicʼal chaʼan mi cʌqʼuen j cuxtʌlel (1 Pedro 4:​1, 2). Tsaʼ c chʼʌmʌ jaʼ bajcheʼ i testigo Jehová ti 1997.

Cujil chaʼan, cheʼ machic tsaʼ j qʼuexta c melbal, wʌle chʌmeñoñix. Pero wʌle, an c chaʼan jiñi i sujm bʌ tijicñʌyel. Jiñi quijñam, Elvie, wen utsʼatax i melbal i jumpʼejlʌch bendición chaʼañon. Wʌle, woli c lajal melben lon i yeʼtel Jehová tiʼ pejtelel ora i mi cubin lon c tijicñʌyel cheʼ mi lon j cʌntesan yambʌlob chaʼan muʼ bʌ i yʌl jiñi Biblia. Wen tijicñayon. Ti jumpʼejl c pusicʼal mi cʌqʼuen wocolix i yʌlʌ Jehová cheʼ tsiʼ pʌyʌyon ochel tiʼ sujmlel (Juan 6:​44).