Mach junsujtel jach tsaʼ c chaʼ qʼuele jiñi pornografía

Cheʼ ti 1949, jiñi c papá tsaʼ loqʼui ti Alemania i tsaʼ majli ti Australia chaʼan miʼ sʌclan i yeʼtel yaʼ baqui miʼ mejlel luz. Tsaʼ cʼoti ti chumtʌl ti Victoria, jumpʼejl estado i chaʼan Australia, yaʼ baqui tsaʼ ñujpuñi yicʼot c mamá. Joñon tsaʼ quila pañimil ti 1953.

Maʼañic jaypʼejl jab tsaʼ ñumi, jiñi c mamá tsaʼ caji ti estudio yicʼot jiñi i testigojob Jehová, i jiñʌch cʼajal bʌ c chaʼan jaʼel cheʼ bʌ chutonto. Jiñi c papá maʼañic miʼ mulan mi jumpʼejlic ñopbalʌl. Wen jontol tsaʼ sujti. Jiñi c mamá tsiʼ wen bʌcʼña, pero tsaʼʌch bej caji ti estudio anquese mucul jach. Tsaʼ cʼoti i wen mulan jiñi woli bʌ i cʌn. Cheʼ jiñi c papá mach yaʼic an ti otot, jiñi c mamá miʼ subeñon lojon yicʼot quijtsʼin chuqui woli bʌ i cʌn. Miʼ subeñon lojon chaʼan ili Pañimil mi caj i sujtel ti jumpʼejl paraíso i chaʼan tijicña mi caj lon cajñel mi mucʼʌch lon c jacʼ muʼ bʌ i yʌl jiñi Biblia (Salmo 37:10, 29; Isaías 48:17).

Pero tsaʼ loqʼuiyon ti cotot cheʼ bʌ 18 c jabilel come jiñi c papá wen jontol. Anquese tsaʼʌch c ñopo tsaʼ bʌ i pʌsbeyon jiñi c mamá, maʼañic tsaʼ c wen qʼuele ti ñuc jin chaʼan maʼañic tsaʼ c jacʼʌ muʼ bʌ i yʌl jiñi Biblia. Tsaʼ cajiyon ti eʼtel bajcheʼ xmel luz yaʼ ti mina tac i tsaʼ ñujpuñiyon cheʼ 20 c jabilel. Cheʼ bʌ uxpʼejlix jab lon c ñujpuñel tsiʼ yila pañimil jiñi ñaxam bʌ lon calʌ chʼoc, jiñi tsiʼ yʌqʼueyon c ñaʼtan chuqui jiñi ñumen ñuc bʌ tij cuxtʌlel. Cujil chaʼan jiñi Biblia miʼ mejlel i coltan jiñi c familia, jin chaʼan tsaʼ cajiyon ti estudio yicʼot i testigojob Jehová. Pero jiñi quijñam tsʼaʼ miʼ qʼuel jiñi Testigojob. Cheʼ bʌ tsajñiyon ti jumpʼejl tempa bʌ tsiʼ jamʌ subeyon chaʼan mi maʼañic mi caj cʌy jiñi estudio mi caj i chocon loqʼuel ti cotot. Tsaʼ c jacʼʌ tsaʼ bʌ i subeyon i tsaʼ j cʌyʌ c ñochtan jiñi Testigojob. Pero ti wiʼil tsaʼ c chaʼ ñaʼta c bʌ come cujil chuqui yom bʌ mic mel.

Ti jumpʼejl bʌ qʼuin, jiñi c piʼʌlob ti eʼtel tsaʼ caji i pʌsbeñoñob jiñi pornografía. Anquese biʼiltic jax, pero tsaʼʌch c mulaj j qʼuel i an c mul tsaʼ caji cubin c bʌ. Cheʼ mij cʼajtesan tsaʼ bʌ j cʌñʌ yaʼ ti Biblia mic ñaʼtan chaʼan Dios mi caj i yʌqʼueñon c toj c mul. Pero come tsaʼ caji c ñumen qʼuel chuqui jiñi biʼiltic jax bʌ maʼañix bajcheʼ yubil tsaʼ caji cubin c bʌ, tsaʼ c wen mulaj i maʼañix tsaʼ mejli j cʌy.

Ti jiñi 20 jab tsaʼ bʌ ñumi tsaʼ c junyajl ñajʌtesa tsaʼ bʌ i pʌsbeyon c mamá. Pejtelel muʼ bʌ j qʼuel tsaʼ caji i yʌsibeñob c pensar, tsaʼ cajiyon ti tsucu tʼan, i biʼiltic jax chuqui mi cʌl cheʼ mic chaʼlen alas tʼan. Mach weñix chuqui tac tsaʼ caji c ñaʼtan chaʼan bʌ jiñi piʼleya i tsaʼ caji c piʼlen yambʌ xʼixicob, anquese añʌch quijñam. Ti jumpʼejl bʌ qʼuin tsaʼ j qʼuele c bʌ ti espejo i tsaʼ caji c biʼlen c bʌ. Maʼañix j cʼʌjñibal tsaʼ j qʼuele.

Tsaʼ c chaʼle lojon c bʌ ti divorciar i wen wocol tsaʼ c ñusa. Cheʼ jiñi tsaʼ c pejca Jehová ti jumpʼejl c pusicʼal. Tsaʼ c chaʼ teche estudio anquese añix 20 jab tsaʼ ñumi. Ti jimbʌ ora jiñi c papá tsaʼix chʌmi, i jiñi c mamá tsaʼix sujti tiʼ testigo Jehová.

Jiñi c melbal mach wis lajalic cheʼ bajcheʼ miʼ yʌl jiñi Biblia. Pero wʌle tsaʼix c ñaʼta chaʼan mi caj c chaʼlen wersa c sʌclan jiñi ñʌchʼtʌlel muʼ bʌ i yʌcʼ Dios. Tsaʼ j cʌyʌ cʌl jiñi tsucu tʼan yicʼot mach tac bʌ weñic c melbal. Tsaʼ j cʌyʌ jiñi tsʼiʼlel, alas taqʼuin yʌcʼʌjel yicʼot xujchʼ.

Jiñi c piʼʌlob maʼañic miʼ chʼʌmbeñob i sujm chucoch com j cʌy c mel jiñi mach bʌ weñic. Uxpʼejl jab tsiʼ wen xiqʼuiyoñob chaʼan mic mel jiñi mach tac bʌ weñic. Cheʼ bʌ mic michʼan i mi cʌl tsucu tʼan, ti cʼam bʌ tʼan miʼ yʌlob: «¡Orasi, chaʼ wʌʼix an la quicʼot Joe!». Cheʼ bʌ mi cubin jiñi miʼ wen aqʼueñon c chʼijyemlel, maʼañic woli c mejlel mi cubin.

Yaʼ baqui mic chaʼlen eʼtel cʌlʌxix miʼ qʼuejlel pornografía. Jiñi c piʼʌlob ti eʼtel miʼ chaʼleñob ti imprimir chaʼan miʼ pucbeñob i bʌ o miʼ qʼuelob ti computadora, cheʼ bajcheʼ mic mel jaʼel ti ñaxan. Lon woliyon ti wersa chaʼan mij cʌy, pero jiñi c piʼʌlob ti eʼtel mach yomobic chaʼan mij cʌyeʼ. Tsaʼ j cʼajti j coltʌntel yicʼot jiñi woli bʌ i yʌqʼueñon estudio. I wen jach tsiʼ ñʌchʼtayon cheʼ bʌ woli c laj suben. Tsiʼ pejcʌbeyon texto tac yicʼot tsiʼ pʌsbeyon chuqui miʼ mejlel c mel chaʼan mij cʌy. Cheʼ jaʼel, tiʼ subeyon chaʼan yom mic chʌcʌ mel oración chaʼan mij cʼajtiben i coltaya Jehová (Salmo 119:37).

Ti jumpʼejl bʌ qʼuin tsaʼ c pʌyʌyob pejtelel jiñi c piʼʌlob ti eʼtel, i tsaʼ c subeyob chaʼan miʼ yʌqʼueñob cerveza chaʼtiquil woliyoʼ bʌ ti wersa chaʼan miʼ cʌyob i jap. Tiʼ pejtelelob tsiʼ jacʼʌyob: «¡¿Bajcheʼ mi caj lon cʌqʼuen mi woliʼ chaʼleñob wersa chaʼan miʼ cʌyob?!». I joñon tsaʼ cʌlʌ: «Yicʼot joñon». Ti jimbʌ ora tsiʼ chʼʌmbeyob i sujm chaʼan woli c chaʼlen wersa chaʼan mij cʌy j qʼuel pornografía i maʼañix tsaʼ caji i chʌn xicʼoñob.

Yicʼot i coltaya Jehová tsaʼ mejli j cʌy jiñi c tsucu melbal. Tsaʼ c chʼʌmʌ jaʼ ti 1999. Mi cʌqʼuen wocolix i yʌlʌ Jehová cheʼ tsiʼ coltayon c tojʼesan c melbal yicʼot chaʼan tijicña mi cubin c bʌ.

Wʌle mic chʼʌmben i sujm chucoch Jehová tsʼaʼ miʼ qʼuel jiñi pornografía. Lajal bajcheʼ juntiquil tatʌl mach bʌ yomic mi lac taj wocol. I sujmʌch muʼ bʌ i yʌl Proverbios 3:5, 6: «Ñopo lac Yum tiʼ pejtelel a pusicʼal. Mach a bajñel ñaʼtan bajcheʼ jach a wom maʼ mel. Tiʼ pejtelel chuqui maʼ mel ñaʼtan lac Yum. Cheʼ jini mux caj i chajpʌbeñet a bijlel». Muʼ bʌ i yʌl jiñi Biblia miʼ cʌntañonla yicʼot miʼ coltañonla chaʼan tijicña mi la cajñel (Salmo 1:1-3).

Ti wajali tsaʼ c biʼle jiñi c melbal, pero wʌleʼli chaʼ añix j cʼʌjñibal mi cubin yicʼot tijicñayon. Wʌle sʌquix c melbal i mi cubin chaʼan Jehová tsaʼʌch i ñusʌbeyon c mul yicʼot miʼ coltañon. Cheʼ ti jabil 2000 tsaʼ ñujpuñiyon quicʼot juntiquil Testigo i cʼabaʼ Karolin. Miʼ cʼuxbin Jehová cheʼ bajcheʼ joñon. Tijicña chumulon lojon. Wen tijicñayon lojon cheʼ añon lon ti jumpʼejl familia am bʌ tiʼ pejtelel pañimil sʌc bʌ i melbalob yicʼot miʼ cʼuxbiñob i bʌ.