Laʼ lac wen qʼuel jiñi melbil tac bʌ chaʼan mi lac ñumen cʌn Jehová

 1. ¿Chuqui tsiʼ colta Job chaʼan miʼ ñumen cʌn Jehová?

JIÑI tsaʼ bʌ i ñumen colta Job tiʼ cuxtʌlel jiñʌch cheʼ bʌ tsiʼ chaʼle tʼan yicʼot Jehová. Jehová tiʼ sube chaʼan miʼ qʼuel jiñi melbil (pʌtbil) tac bʌ i chaʼan. Jiñi mi caj i coltan chaʼan miʼ qʼuel chaʼan Jehová wen an i ñaʼtʌbal yicʼot chaʼan mucʼʌch i cʌntan i wiñicob. Jumpʼejl ejemplo, Job tsaʼ mejli i qʼuel chaʼan, mi Dios miʼ cʌntan jiñi añimal tac, cheʼʌch mi caj i mel (chaʼlen) tiʼ tojlel jaʼel (Job 38:39-41; 39:1, 5, 13-16). Job cabʌl chuqui tsiʼ cʌñʌ tiʼ tojlel Dios cheʼ bʌ tsiʼ ñaʼta ili ejemplo tac.

 2. ¿Chucoch an i tajol wocol mi la cubin chaʼan mi laj qʼuel jiñi melbil tac bʌ?

² Joñonla jaʼel miʼ mejlel lac ñumen cʌn Dios cheʼ mi laj qʼuel jiñi melbil tac bʌ. Pero tajol wocol mi la cubin chaʼan mi lac mel. Mi chumulonla ti ciudad, tajol maʼañic miʼ mejlel lac wen taj laj qʼuel jiñi melbil tac bʌ. Anquese mach colemic baqui chumulonla, tajol maʼañix mi lac tajben i yorajlel mi la cubin chaʼan mi laj qʼuel. Jin chaʼan, laʼ laj qʼuel chucoch weñʌch cheʼ mi lac locʼben i yorajlel chaʼan mi laj qʼuel jiñi melbil tac bʌ. Cheʼ jaʼel, laʼ laj qʼuel bajcheʼ Jehová yicʼot Jesús tsiʼ cʼʌñʌyob chaʼan miʼ pʌsob ñuc tac bʌ i cʼʌjñibal, i chuqui miʼ mejlel lac mel chaʼan mi laj cʌn.

 3. ¿Bajcheʼ la cujil chaʼan Jehová yom tsiʼ yʌlʌ chaʼan Adán miʼ ñusan i bʌ ti jiñi melbil tac bʌ?

³ Jehová yom tsiʼ yʌlʌ chaʼan jiñi ñaxam bʌ wiñic miʼ ñusan i bʌ ti jiñi melbil tac bʌ. Tsiʼ yʌcʼʌ Adán ti jumpʼejl utsʼatax bʌ pʌcʼʌbʌl chaʼan miʼ cʌn yicʼot miʼ cʌntan majlel jinto miʼ luʼ sujtel ti paraíso (Gn. 2:8, 9, 15). Ñaʼtancu bajcheʼ yubil tsiʼ yubi Adán cheʼ bʌ tsiʼ qʼuele ti pasel yicʼot ti colel jiñi teʼ tac. Jumpʼejlʌch ñuc bʌ majtañʌl cheʼ miʼ cʌntan jiñi pʌcʼʌbʌl Edén. Cheʼ jaʼel, tsaʼ subenti chaʼan miʼ yotsʌben i cʼabaʼ jiñi añimal tac (Gn. 2:19, 20). Cheʼ cheʼic yom Jehová tsaʼ mejli i mel ili eʼtel (troñel), pero tsiʼ yʌqʼue tiʼ wenta Adán. Miʼ mejlel la cʌl chaʼan Adán tsiʼ wen qʼuele bajcheʼ yilal jiñi añimal tac chaʼan miʼ ñaʼtan bajcheʼ mi caj i yotsʌben i cʼabaʼ. Jumpʼejlʌch wen utsʼatax bʌ eʼtel, tsaʼ bʌ i colta chaʼan miʼ cʌmben i ñaʼtʌbal yicʼot chuqui tac miʼ mejlel i mel Jehová.

 4. a) ¿Chucoch junchajp yom mi laj qʼuel jiñi melbil tac bʌ? b) ¿Chuqui jiñi muʼ bʌ a ñumen mulan ti jiñi melbil tac bʌ?

⁴ Jehová yom chaʼan mi laj qʼuel jiñi melbil tac bʌ, jiñʌch junchajp chucoch yom mi lac mel. Miʼ subeñonla: «Letsan a wut chaʼan maʼ wen qʼuel chuqui an». Cheʼ jiñi miʼ cʼajtin: «¿Majqui i melbal jini ecʼ tac?». Tsiquilʌch jiñi i jacʼbal (Is. 40:26). Jehová mach cojach yaʼ ti panchan tsiʼ mele chuqui utsʼatax bʌ, yicʼotʌch ila ti lum yicʼot ti mar, i cabʌl chuqui miʼ mejlel laj cʌn cheʼ bʌ mi laj qʼuel (Sal. 104:24). Cheʼ jaʼel, ñaʼtancu bajcheʼ yilal tsiʼ meleyonla Dios. Miʼ mejlel laj qʼuelben i yutsʼatlel chuqui tac an. Cheʼ jaʼel, tsiʼ yʌqʼueyonla lac wut, lac chiquin, la cacʼ, lac ñiʼ yicʼot laj cʼʌb chaʼan mi lac ñusan lac bʌ ti jiñi melbil tac bʌ.

 5. Cheʼ bajcheʼ miʼ yʌl Romanos 1:20, ¿chucoch weñʌch cheʼ mi laj qʼuel jiñi melbil tac bʌ?

⁵ Jiñi Biblia miʼ subeñonla yambʌ junchajp chucoch yom mi laj qʼuel jiñi melbil tac bʌ: Miʼ coltañonla lac ñumen cʌn Jehová (pejcan Romanos 1:20). Jumpʼejl ejemplo, miʼ pʌs i ñaʼtʌbal Dios. I jiñi cʼuxbil tac bʌ miʼ pʌs chaʼan miʼ cʼuxbiñonla. Cheʼ mi laj qʼuel jiñi melbalʌl tac am bʌ i chaʼan Dios ti jiñi an tac bʌ miʼ coltañonla chaʼan mi lac ñumen cʌn yicʼot miʼ ñijcañonla chaʼan mi lac ñumen lʌcʼtesan lac bʌ tiʼ tojlel. Wʌle laʼ laj qʼuel bajcheʼ Jehová an i cʼʌñʌ jiñi melbil tac bʌ i chaʼan chaʼan miʼ pʌsbeñonla ñuc tac bʌ i cʼʌjñibal.

 6. ¿Chuqui miʼ mejlel laj cʌn tiʼ tojlel jiñi jaʼal pech?

⁶ Jehová an i chaʼan jumpʼejl horario. Ti jujumpʼejl jab, cheʼ tiʼ yujtibal majlel febrero yicʼot tiʼ yojlil majlel mayo, jiñi israelitajob miʼ qʼuelob chaʼan jiñi jaʼal pech miʼ majlelob tiʼ tojel norte. Jehová tiʼ sube jiñi israelitajob: «Jini jaʼal pech miʼ ñaʼtan cheʼ i yorajlelix miʼ sujtel tiʼ cʼuʼ» (Jer. 8:7). Tsiʼ waʼchoco jumpʼejl horario chaʼan ili añimal tac, cheʼʌch an i mele jaʼel chaʼan miʼ jisan jiñi i contrajob. Cheʼ mi laj qʼuel ti wejlel ili añimal tac miʼ cʼajtesʌbeñonla chaʼan Jehová tsaʼix i waʼchoco i yorajlel chaʼan miʼ jisan ili jontol bʌ pañimil (mulawil), i miʼ mejlel lac ñop chaʼan cheʼʌch mi caj i mel (Hab. 2:3).

 7. ¿Chuqui mi laj cʌn chaʼan bajcheʼ mucʼ ti wejlel jiñi xmateʼmut? (Isaías 40:31).

⁷ Jehová miʼ pʼʌtʼesan jiñi i wiñicob. Dios tsiʼ cʼʌñʌ jiñi xʼaltʼan Isaías chaʼan miʼ suben jiñi i wiñicob chaʼan baʼ ora cʼuñob o chʼijyemob mi caj i pʼʌtʼesañob i «mi caj i letselob cheʼ bajcheʼ xiyeʼ yujil bʌ wejlel» (pejcan Isaías 40:31). Jiñi israelitajob ñʌmʌl i qʼuelob cheʼ bʌ jiñi xiyeʼ miʼ coltan i bʌ ti jiñi icʼ chaʼan ñumen chan miʼ wejlel i maʼañic miʼ wen ñijcan i wichʼ. Ili miʼ cʼajtesʌbeñonla chaʼan Jehová miʼ mejlel i coltan yicʼot i pʼʌtʼesan i wiñicob cheʼ bajcheʼ miʼ coltan jiñi xiyeʼ. Jin chaʼan, cheʼ bʌ maʼ qʼuel juncojt xmateʼmut wen chan woli (choncol) ti wejlel i maʼañic woli (yʌquel) i wen ñijcan i wichʼ, cʼajtesan chaʼan Jehová miʼ mejlel i yʌqʼueñet a pʼʌtʌlel chaʼan maʼañic miʼ lujbʼesañet jiñi wocol tac.

 8. a) ¿Chuqui tsiʼ cʌñʌ Job ti jiñi melbil tac bʌ? b) ¿Chuqui mi laj cʌn joñonla?

⁸ Mucʼʌch i mejlel lac ñop tiʼ tojlel Jehová. Jiñi tsaʼ bʌ i yʌlʌyob tsiʼ colta Job chaʼan miʼ ñumen ñop tiʼ tojlel (Job 32:2; 40:6-8). Tsiʼ taja ti tʼan jiñi melbil tac bʌ bajcheʼ jiñi ecʼ, jiñi tocal yicʼot jiñi chajc. Yicʼot añimal tac bajcheʼ jiñi tat wacax yicʼot jiñi caballo (Job 38:32-35, TNM; 39:9, 19, 20). Ili ejemplo tac tsiʼ colta Job chaʼan miʼ qʼuel jiñi i cʼuxbiya yicʼot i ñaʼtʌbal Dios, i mach jiñic jach i pʼʌtʌlel. Jiñi tsaʼ bʌ i yʌlʌyob tsiʼ colta Job chaʼan miʼ ñumen ñop tiʼ tojlel Jehová (Job 42:1-6, TNM). Joñonla jaʼel, cheʼ bʌ mi lac chaʼlen ti estudiar jiñi melbil tac bʌ, mi laj cʼajtesan chaʼan Jehová ñumen an i ñaʼtʌbal yicʼot i pʼʌtʌlel bajcheʼ joñonla. Cheʼ jaʼel, miʼ mejlel i jisan jiñi lac wocol tac, i mucʼʌch caj i mel. Cheʼ mi lac ñaʼtan iliyi miʼ coltañonla lac ñumen ñop tiʼ tojlel.

9, 10. ¿Chuqui miʼ pʌsbeñonla tiʼ tojlel Jehová jiñi qʼuin yicʼot jiñi jaʼal?

⁹ Jesús wen i cʌñʌ jiñi melbil tac bʌ come tsiʼ colta jiñi i Tat chaʼan miʼ mel jiñi universo (Pr. 8:30). I cheʼ bʌ wʌʼan ila ti Lum, tsiʼ taja ti tʼan jiñi melbil tac bʌ chaʼan miʼ ñumen cʌñob Jehová. Laʼ laj qʼuel chaʼpʼej uxpʼejl.

¹⁰ Jehová miʼ pʌsbeñonla i cʼuxbiya ti lac pejtelel. Yaʼ tiʼ Cʌntesa ti wits, Jesús tiʼ sube jiñi xcʌntʼañob i chaʼan chaʼchajp mach bʌ añic miʼ wen qʼuelob ti ñuc jiñi lac piʼʌlob: Jiñi qʼuin yicʼot jiñi jaʼal. Iliyi wen ñucʌch i cʼʌjñibal ti laj cuxtʌlel. Jehová mach chʌquic tiʼ tojlelob jiñi maʼañic bʌ miʼ chʼujutesañob, juntiquilʌch Dios yujil bʌ cʼuxbiya, i tiʼ pejtelel lac piʼʌlob miʼ yʌqʼueñob jiñi qʼuin yicʼot jiñi jaʼal (Mat. 5:43-45). Jesús tsiʼ cʼʌñʌ ili ejemplo chaʼan miʼ pʌsben jiñi xcʌntʼañob i chaʼan chaʼan Jehová yom chaʼan mi lac pʌsbeñob laj cʼuxbiya jiñi yañoʼ bʌ. Cheʼ bʌ mi laj qʼuel jumpʼejl icʼajel o jiñi wijwis jaʼal, laʼ lac ñaʼtan bajcheʼ cʼamel miʼ cʼuxbiñonla Jehová yicʼot chaʼan junlajal miʼ qʼuelonla. Jiñi i yejemplo miʼ mejlel i ñijcañonla chaʼan mi lac suben wen tʼan pejtelel lac piʼʌlob i cheʼ bajcheʼ jiñi mi lac pʌsbeñob cʼuxbiya.

11. ¿Bajcheʼ miʼ mejlel i coltañonla cheʼ bʌ mi laj qʼuel jiñi xmateʼmut tac?

¹¹ Jehová miʼ yʌqʼueñonla i cʼʌjñibal bʌ lac chaʼan. Jesús tsiʼ yʌlʌ ti jiñi i Cʌntesa yaʼ ti wits: «Wen qʼuelela jiñi xmateʼmut am bʌ ti panchan. Maʼañic miʼ chaʼleñob pacʼ yicʼot maʼañic miʼ lotob i bucʼbal tiʼ yotlel, pero jiñi laʼ Tat am bʌ ti panchan miʼ bucʼsañob». Tajol jiñi woli bʌ i ñʌchʼtañob Jesús tsiʼ qʼueleyob ti wejlel xmateʼmut cheʼ bʌ tsiʼ cʼajtibeyob: «¿Mach ba ñumen añic laʼ cʼʌjñibal jatetla?» (Mat. 6:26). Wen utsʼatax bajcheʼ tsiʼ cʼajtesʌbeyonla chaʼan Jehová mi caj i chʌn aqʼueñonla jiñi i cʼʌjñibal bʌ lac chaʼan (Mat. 6:31, 32). Jiñi muʼ tac bʌ laj cʌn ti jiñi melbil tac bʌ wolʌch i bej coltan jiñi i wiñicob Dios. Juntiquil precursora ti España chʼijyem tiʼ caj maʼañic woliʼ taj baqui miʼ chumtʌl. Pero tijicña tsiʼ yubi cheʼ bʌ tsiʼ qʼuele jiñi xmateʼmut tac woliʼ cʼuxob i wut tac teʼ. Miʼ yʌl: «Jiñi tsiʼ cʼajtesʌbeyon chaʼan, mi Jehová miʼ cʌntan jiñi xmateʼmut, mucʼʌch caj i cʌntañon jaʼel». Ti wiʼil, jiñi hermana tsiʼ taja baqui miʼ chumtʌl.

12. Cheʼ bajcheʼ miʼ yʌl Mateo 10:29-31, ¿chuqui miʼ pʌsbeñonla tiʼ tojlel Jehová jiñi xpuruwoc?

¹² Jehová miʼ qʼuelonla ti ñuc ti jujuntiquilonla. Cheʼ bʌ Jesús muʼto caj i choc majlel ti subtʼan jiñi i yapóstolob, tsiʼ coltayob chaʼan maʼañic miʼ bʌcʼñañob tsʼaʼlentel (pejcan Mateo 10:29-31). Tsiʼ taja ti tʼan jiñi xpuruwoc wen cʌmbil bʌ yaʼ ti Israel. Ti jimbʌ ora mach junyajl letsic i tojol jiñi xpuruwoc. Pero Jesús tiʼ sube jiñi xcʌntʼañob i chaʼan: «Mi juncojtic muʼ bʌ i yajlel ti lum miʼ ñajʌyel i chaʼan laʼ Tat». I tsiʼ bej alʌ: «Jatetla ñumen an laʼ cʼʌjñibal bajcheʼ cabʌl xpuruwoc». Cheʼ bajcheʼ jiñi tiʼ subeyob chaʼan Jehová miʼ wen qʼuelob ti ñuc ti jujuntiquilob. Iliyi tsiʼ coltayob chaʼan maʼañic miʼ bʌcʼñañob jiñi tsʼaʼlentel. Miʼ mejlel lac ñaʼtan chaʼan jiñi xcʌntʼañob i chaʼan Jesús tsiʼ cʼajtesayob jiñi tsaʼ bʌ i yʌlʌ jajayajl tsiʼ qʼueleyob xpuruwoc cheʼ bʌ tsiʼ chaʼleyob subtʼan. Jajayajl maʼ taj a qʼuel jaʼel juncojt xmateʼmut cʼajtesan chaʼan Jehová miʼ qʼuelet ti ñuc come ñumen ñuc a cʼʌjñibal «bajcheʼ cabʌl xpuruwoc». Jehová mi caj i coltañet a taj a chʼejlel chaʼan maʼ lʌtʼ jiñi tsʼaʼlentel (Sal. 118:6).

13. ¿Chuqui yom mi lac mel chaʼan miʼ bej cʌntesañonla jiñi melbil tac bʌ?

¹³ Cheʼ bʌ mi laj qʼuel jiñi melbil tac bʌ mucʼʌch lac bej cʌn Jehová. Pero yomʌch mi lac locʼsʌben i yorajlel chaʼan mi laj qʼuel jiñi an tac bʌ ti lac joytʌlel i mi lac wen ñaʼtan chuqui miʼ pʌsbeñonla tiʼ tojlel Jehová. An i tajol tsʼitaʼ wocolʌch mi la cubin chaʼan mi lac mel. Juntiquil hermana ti Camerún i cʼabaʼ Géraldine miʼ yʌl: «Yom mic chaʼlen wersa chaʼan mij qʼuel jiñi melbil tac bʌ come ti ciudad tsaʼ coliyon». Juntiquil anciano i cʼabaʼ Alfonso miʼ yʌl: «Am bʌ i coltayon jiñʌch cheʼ mic locʼsʌben i yorajlel chaʼan c bajñel mi cajñel, mij qʼuel jiñi melbil tac bʌ yicʼot mic wen ñaʼtan chuqui miʼ pʌsbeñon tiʼ tojlel Jehová».

14. ¿Chuqui tsiʼ cʌñʌ David cheʼ bʌ tsiʼ wen ñaʼta jiñi melbil tac bʌ?

¹⁴ Jiñi rey David tsaʼʌch i wen ñaʼta jiñi melbil tac bʌ. Tiʼ sube Jehová: «Cheʼ mij qʼuel a panchan, i melbal i yal a cʼʌb, Yicʼot jini uw yicʼot ecʼ tsaʼ bʌ a mele, Maʼanic mic chʼʌmben isujm chucoch maʼ pʼuntan winicob» (Sal. 8:3, 4). David mach jasʌlic tsiʼ yubi cheʼ bʌ miʼ qʼuel jiñi ecʼ tac, tsaʼʌch i wen ñaʼta chuqui miʼ pʌsben tiʼ tojlel Dios. Tsiʼ qʼuele chaʼan Jehová wen cabʌl i ñuclel. Cheʼ jaʼel, tsiʼ ñaʼta bajcheʼ tsaʼ coli majlel tiʼ ñʌcʼ i mamá. Cheʼ bajcheʼ jiñi, tsaʼ caji i ñumen qʼuel ti ñuc jiñi i ñaʼtʌbal Jehová (Sal. 139:14-17).

15. ¿Chuqui ti melbalʌl am bʌ i chaʼan Jehová qʼuelbil a chaʼan ti jiñi melbil tac bʌ? (Salmo 148:7-10).

¹⁵ Cheʼ bajcheʼ David, baqui jach mi lac taj laj qʼuel melbil tac bʌ muʼ bʌ i coltañonla chaʼan mi lac chaʼlen ti meditar. Mi caj a cʌn jiñi melbalʌl tac am bʌ i chaʼan Jehová cheʼ bʌ maʼ qʼuel chuqui tac an ti a joytʌlel. Jumpʼejl ejemplo, cheʼ bʌ maʼ wubiben i ticwʌlel jiñi qʼuin ñaʼtan bajcheʼ cʼamel i pʼʌtʌlel Jehová (Jer. 31:35). Cheʼ bʌ maʼ qʼuel juncojt xmateʼmut woli bʌ i mel i met ñaʼtan bajcheʼ cʼamel i ñaʼtʌbal Dios. Cheʼ bʌ maʼ qʼuel juncojt tsʼiʼ woli bʌ i yajñesan i ñej ñaʼtan chaʼan Jehová wen tijicñayʌch. I aqʼuen wocolix i yʌlʌ chaʼan jiñi i cʼuxbiya cheʼ bʌ maʼ qʼuel juntiquil ñaʼʌl woli bʌ ti alas yicʼot i yalʌl. Cheʼ bʌ mi laj qʼuel jiñi melbil tac bʌ cabʌlʌch chuqui miʼ mejlel laj cʌn tiʼ tojlel Jehová come pejtelel chuqui melbil i chaʼan mucʼʌch i yʌqʼuen i ñuclel, mach yʌlʌyic mi chut, mi colem, mi ñajt an o mi lʌcʼʌl jach (pejcan Salmo 148:7-10).

16. ¿Chuqui yom mi lac mel?

¹⁶ Maʼañic yambʌ bajcheʼ jiñi lac Dios ñumen am bʌ i ñaʼtʌbal, i cʼuxbiya, cabʌl bʌ chuqui yujil melol yicʼot wen am bʌ i pʼʌtʌlel. Miʼ mejlel laj qʼuel ili melbalʌl tac ti jiñi melbil tac bʌ i chaʼan, yom jach mi lac sʌclan. Laʼ lac locʼsʌben i yorajlel chaʼan mi lac ñusan lac bʌ ti jiñi melbil tac bʌ i chaʼan i mi lac ñaʼtan chuqui miʼ pʌsbeñonla tiʼ tojlel Jehová. Cheʼ bajcheʼ iliyi, mi caj lac ñumen lʌcʼtesan lac bʌ tiʼ tojlel (Sant. 4:8). Yaʼ ti yambʌ estudio, mi caj laj qʼuel bajcheʼ jiñi tatʌlob miʼ mejlel i cʼʌñob jiñi melbil tac bʌ chaʼan miʼ coltañob i lʌcʼtesañob i bʌ ti Jehová jiñi i yalobilob.