Jiñi xpejcaya juñob miʼ cʼajtibeñob i bʌ

Ili jiñʌch junchajp chucoch lecoj tsiʼ chaʼleyob tʼan tiʼ tojlel Jesús yicʼot jiñi xcʌntʼañob i chaʼan. Mi juntiquil an lecoj bʌ i tsoy, o mi tsiʼ tʌlʌ juntiquil quixtañu o juncojt añimal chʌmeñix bʌ, o mi an chuqui woli (choncol) i ñusan tiʼ bʌcʼtal, cheʼ bajcheʼ juntiquil xʼixic am bʌ tiʼ mes, yaʼ tiʼ Mandar Moisés tsaʼ ajli chaʼan jin tacʌch muʼ bʌ i yʌcʼ ti qʼuejlel ti bibiʼ i chʼujutesaya jiñi quixtañu. ¿Chuqui yom miʼ mel juntiquil quixtañu chaʼan sʌc miʼ chaʼ ajñel? Yaʼ ti Mandar tsaʼ ajli chaʼan yom miʼ yʌcʼob tsʌnsʌbil bʌ majtañʌl, miʼ sʌqʼuesʌntelob ti jaʼ o mi tsijcañob chʼichʼ (Levítico, capítulo 11 cʼʌlʌl ti 15; Números, capítulo 19).

Jiñi ñaxañoʼ bʌ ti ñopbalʌl i chaʼan judíojob tsiʼ bajñel otsayob i tʼan yaʼ ti mandar. Jumpʼejl libro miʼ tsictesan chaʼan tsiʼ ñumen alʌyob bajcheʼ miʼ mejlel ti sujtel ti bibiʼ juntiquil quixtañu i bajcheʼ miʼ mejlel i bibʼesan yañoʼ bʌ. Tsiʼ meleyob jaʼel jumpʼejl lista chaʼan chuqui tac bibiʼ miʼ mejlel ti sujtel. Tsiʼ bajñel ñaʼtayob jaʼel chuqui tac yom miʼ mel jiñi wiñicob xʼixicob (quixtañujob) chaʼan sʌc miʼ chaʼ ajñelob.

Jiñi i contrajob Jesús tsiʼ cʼajtibeyob: «¿Chucoch miʼ ñusʌbeñob i subal lac ñojteʼel jini xcʌntʼañob a chaʼan? ¿Chucoch miʼ chaʼleñob weʼel cheʼ bibiʼob i cʼʌb?» (Marcos 7:5). Jiñi ñucoʼ bʌ i yeʼtel (troñel) ti ñopbalʌl mach chaʼañic yomob sʌc jiñi xcʌntʼañob cheʼ tsiʼ yʌlʌyob chaʼan yom miʼ pocob i cʼʌb. I bajñel jach tsiʼ ñaʼtayob chaʼan yom miʼ mulbentelob i cʼʌb jiñi muʼ bʌ i cajelob ti uchʼel. Yaʼ ti libro tsaʼ bʌ lac taja ti tʼan yaʼ ti yambʌ párrafo miʼ yʌl chaʼan jiñi ñucoʼ bʌ i yeʼtel ti ñopbalʌl miʼ wen alob bajcheʼ yilal bʌ pʼejt yom miʼ cʼʌjñel, bajcheʼ yilal bʌ jaʼ, majqui yom miʼ mul yicʼot baqui jaxʌl yom miʼ mulbentelob i cʼʌb.

¿Bajcheʼ yilal tsiʼ qʼuele Jesús ili i mandar wiñicob? Tsiʼ subeyob chaʼan chaʼchajp jax i pusicʼalob yicʼot chaʼan Jehová tsiʼ wʌn alʌ tiʼ tojlel jiñi xʼaltʼan Isaías: «Tiʼ yej jach miʼ subob c ñuclel jini winicob xʼixicob, pero tiʼ pusicʼal maʼanic miʼ lʌcʼoñoñob. Lolom jach miʼ chʼujutesañoñob, come jiñʌch i mandar tac winicob woli bʌ i cʌntesañob». I Jesús tsiʼ chaʼ alʌ: «Mi laʼ cʌyben i mandar Dios. Mi laʼ wen ñop i subal laʼ ñojteʼel» (Marcos 7:6-8).