¿Chuqui jiñi i Yumʌntel Dios?

 1. ¿Baqui bʌ oración wen cʌmbil bʌ mi caj lac tsajin ti ili cʌntesʌntel?

CABɅL wiñicob xʼixicob (quixtañujob) cʌmbilob i chaʼan jiñi oración chaʼan padrenuestro. Jesús tsiʼ cʼʌñʌ ili wen cʌmbil bʌ oración chaʼan cheʼʌch miʼ melob (chaʼleñob) jiñi xcʌntʼañob i chaʼan. ¿Chuqui tsiʼ cʼajti Jesús ti jiñi oración? ¿Chucoch ñucʌch i cʼʌjñibal mi lac chʼʌmben i sujm iliyi?

 2. ¿Baqui bʌ jiñi uxchajp ñuc bʌ i cʼʌjñibal tsiʼ cʌntesayonla Jesús chaʼan mi laj cʼajtin ti oración?

² Jesús tsiʼ yʌlʌ: «Chaʼlenla oración cheʼ bajcheʼ jini: ‹C Tat lojon añet bʌ ti panchan, laʼ chʼujutesʌntic a cʼabaʼ. Laʼ tilic a yumʌntel. Laʼ mejlic chuqui a wom ti pañimil cheʼ bajcheʼ ti panchan›» (pejcan Mateo 6:9-13). ¿Chucoch tsiʼ cʌntesayonla Jesús chaʼan mi laj cʼajtin ili uxchajp? (Qʼuele jiñi nota 19).

 3. ¿Chuqui mi caj laj qʼuel ti ili cʌntesʌntel?

³ Tsaʼix laj cʌñʌ chaʼan i cʼabaʼ Dios jiñʌch Jehová. Cheʼ jaʼel, tsaʼ laj qʼuele chuqui yom chaʼan jiñi quixtañujob yicʼot ili Pañimil. Pero ¿chuqui yom i yʌl Jesús cheʼ bʌ tsiʼ yʌlʌ: «La tilic a yumʌntel»? Ti ili cʌntesʌntel mi caj laj qʼuel chuqui jiñi i Yumʌntel Dios, chuqui mi caj i mel yicʼot bajcheʼ mi caj i sʌqʼuesʌben i cʼabaʼ Dios.

 4. ¿Chuqui jiñi i Yumʌntel Dios, i majqui i Rey?

⁴ Jiñi i Yumʌntel Dios jumpʼejlʌch yumʌl tsaʼ bʌ i waʼchoco Jehová yaʼ ti panchan. Dios tsiʼ yajca Jesús chaʼan miʼ yochel bajcheʼ Rey ti ili Yumʌntel. Jiñi Biblia miʼ yʌl chaʼan Jesús jiñʌch «i Rey jini reyob, i Yum jini yumʌlob» (1 Timoteo 6:15). Jesús ñumen cabʌl chuqui miʼ mejlel i mel ti lac tojlel, mach cheʼic bajcheʼ yambʌ yumʌl. Cheʼ jaʼel, anquese jiñi yumʌlob ti pañimil (mulawil) miʼ luʼ tempañob i bʌ, Jesús ñumen an i pʼʌtʌlel.

 5. ¿Chuqui mi caj i yuman jiñi i Yumʌntel Dios, i baqui mi caj i mel?

⁵ Cheʼ bʌ añix 40 qʼuin i chaʼ chʼojyel Jesús, tsaʼ letsi majlel ti panchan. Ti wiʼil, Jehová tsiʼ waʼchoco bajcheʼ Rey chaʼan jiñi Yumʌntel (Hechos 2:33). Cʼʌlʌl yaʼ ti panchan, jiñi i Yumʌntel Dios mi caj i yuman ili Pañimil (Apocalipsis [Revelación] 11:15). Jin chaʼan, jiñi Biblia miʼ yʌl chaʼan jumpʼejlʌch yumʌntel am bʌ ti panchan (2 Timoteo 4:18).

6, 7. ¿Chucoch jiñʌch Jesús jiñi ñumen wem bʌ rey?

⁶ Jiñi Biblia miʼ yʌl chaʼan Jesús jiñʌch ñumen wem bʌ yumʌl bajcheʼ juntiquil quixtañu, come jiñʌch «cojach bʌ mach bʌ anic miʼ chʌmel» (1 Timoteo 6:16). Tiʼ pejtelel jiñi yumʌlob miʼ chʌmelob (sajtelob), pero Jesús maʼañic. Jin chaʼan, pejtelel jiñi wen tac bʌ muʼ bʌ caj i mel maʼañic mi caj i jilel.

⁷ Cheʼ jaʼel, jiñi Biblia miʼ cʌntesañonla chaʼan Jesús juntiquilʌch toj bʌ Rey yicʼot yujil bʌ pʼuntaya. Jumpʼejl profecía miʼ yʌl chaʼan Jesús mi caj i chʼʌm «chʼujul bʌ i Chʼujlel [o i yespíritu] Dios [...]. Mi caj i yʌqʼuentel wen bʌ i ñaʼtʌbal yicʼot cabʌl i pusicʼal, yicʼot i yeʼtel ti cʌntesa yicʼot i pʼʌtʌlel, yicʼot wen bʌ i cʼʌjñibal, yicʼot i bʌcʼñʌntel lac Yum». Cheʼ jaʼel, miʼ yʌl: «Mach jelchojquic mi caj i mel winicob. Maʼanic mi caj i ñop uʼyaj tʼan yicʼot lot. Mi caj i coltan jini pʼumpʼuñoʼ bʌ» (Isaías 11:2-4). ¿Muʼ ba a mulan juntiquil rey bajcheʼ jiñi?

 8. ¿Bajcheʼ mi lac ñaʼtan chaʼan Jesús mach i bajñelic miʼ cajel ti yumʌntel?

⁸ Jiñi Biblia miʼ yʌl chaʼan Dios tsiʼ yajca chaʼtiquil uxtiquil quixtañujob chaʼan miʼ chaʼleñob yumʌntel yicʼot Jesús yaʼ ti panchan. Jumpʼejl ejemplo, jiñi apóstol Pablo tiʼ sube Timoteo: «Mi woli lac lʌtʼ wocol, mux caj lac tem chaʼlen yumʌl la quicʼot» (2 Timoteo 2:12). ¿Jaytiquil miʼ cajelob ti yumʌntel yicʼot Jesús?

 9. a) ¿Jaytiquil miʼ cajelob ti yumʌntel yicʼot Jesús? b) ¿Baqui ora tsiʼ teche i yajcan Jehová jiñi 144 mil?

⁹ Cheʼ bajcheʼ tsaʼ laj cʌñʌ yaʼ ti cʌntesʌntel 7, ti jumpʼejl ñajal, jiñi apóstol Juan tsiʼ qʼuele Jesús yaʼ ti panchan yicʼot 144 mil reyob. ¿Majquiyob jiñi? Juan miʼ yʌl chaʼan jiñobʌch ‹tsʼijbubiloʼ bʌ i cʼabaʼ jini Tiñʌmeʼ yicʼot i cʼabaʼ i Tat› tiʼ pamob (pejcan Apocalipsis 14:1). Cheʼ jaʼel, tsiʼ yʌlʌ: «Miʼ tsajcañob jini Tiñʌmeʼ baqui jach miʼ majlel. Tsaʼ mʌjñiyob loqʼuel tiʼ tojlel i piʼʌlob» (Apocalipsis 14:4). Jiñi tiñʌmeʼ jiñʌch Jesús, i jiñi 144 mil jiñobʌch jiñi xcʌntʼañob xucʼuloʼ bʌ tsaʼ bʌ yajcʌntiyob ti Dios chaʼan ‹miʼ chaʼleñob yumʌl› yicʼot Jesús. Cheʼ bʌ miʼ chʌmelob, miʼ chʼojyelob ti panchan (Apocalipsis 5:10). Jehová tsiʼ teche i yajcan jiñi 144 mil cheʼ ti ñaxam bʌ siglo.

10. ¿Chucoch mucʼʌch i pʌs i cʼuxbiya Jehová cheʼ tsiʼ yajca Jesús yicʼot jiñi 144 mil quixtañujob chaʼan miʼ yumañoñobla?

¹⁰ Jehová miʼ wen cʼuxbiñonla jin chaʼan tsiʼ yajca quixtañujob chaʼan miʼ chaʼleñob yumʌl yicʼot Jesús. Jesús wem bʌ yumʌl miʼ cajel come tsaʼ chumle bajcheʼ wiñic yicʼot tsiʼ yila wocol. Jiñi apóstol Pablo tsiʼ yʌlʌ chaʼan Jesús miʼ ñaʼtan bajcheʼ yubil mi la cubin yicʼot «yujil cʼuñonla» come «tsaʼ pʌjyi ti chajp ti chajp bʌ mulil jaʼel, cheʼ bajcheʼ mi lac pʌjyel ti mulil» (Hebreos 4:15; 5:8). Cheʼ jaʼel, jiñi 144 mil miʼ ñaʼtañob bajcheʼ yubil mi la cubin come tsiʼ chaʼleyob wersa i mʌlbeñob (jotbeñob) jaʼel jiñi i sajtemal yicʼot cʼamʌjel tac. Jin chaʼan, miʼ mejlel lac ñop chaʼan Jesús yicʼot jiñi 144 mil mi caj i ñaʼtañob muʼ bʌ la cubin yicʼot lac wocol tac.

11. ¿Chucoch tsiʼ yʌlʌ Jesús chaʼan yom miʼ cʼajtintel chaʼan miʼ mejlel chuqui yom Dios yaʼ ti panchan?

¹¹ Jesús tiʼ sube jiñi xcʌntʼañob chaʼan yom miʼ cʼajtiñob chaʼan miʼ mejlel chuqui yom Dios ila ti Pañimil yicʼot ti panchan. ¿Chucoch yomʌch miʼ cʼajtiñob chaʼan miʼ mejlel chuqui yom Dios yaʼ ti panchan? Ti jiñi cʌntesʌntel 3 tsaʼ laj cʌñʌ chaʼan Satanás tsiʼ contraji Dios. Jehová tsiʼ yʌcʼʌ chaʼan Satanás yicʼot jiñi xibajob muʼto i jumucʼ ajñelob yaʼ ti panchan. Jin chaʼan, mach tiʼ pejtelelobic yaʼ bʌ añob ti panchan miʼ melob chuqui yom Dios. Yaʼ ti cʌntesʌntel 10 mi caj lac ñumen cʌn tiʼ tojlel Satanás yicʼot jiñi xibajob.

12. ¿Chuqui jiñi chaʼchajp tsaʼix bʌ ujti miʼ yʌl Apocalipsis 12:10?

¹² Jiñi Biblia tsiʼ yʌlʌ chaʼan Jesús mi caj i contrajin Satanás cheʼ bʌ miʼ yochel bajcheʼ rey chaʼan i Yumʌntel Dios (pejcan Apocalipsis 12:7-10). Ti Apocalipsis 12:10 miʼ yʌl chaʼchajp chuqui ñuc bʌ tsaʼ ujti. Ñaxam bʌ, Jesús miʼ tech yumʌntel. I chaʼpʼejlel, Satanás miʼ chojquel jubel ila ti Lum. Cheʼ bajcheʼ mi caj laj qʼuel, ili chaʼchajp tsaʼix ujti.

13. ¿Chuqui tsaʼ ujti yaʼ ti panchan cheʼ bʌ Satanás tsaʼ chojqui loqʼuel?

¹³ Jiñi ángelob tsaʼ bʌ i jacʼbeyob i tʼan Dios tijicña tsiʼ yubiyob cheʼ bʌ Satanás yicʼot i xibajob tsaʼ chojquiyob loqʼuel yaʼ ti panchan. Jiñi Biblia miʼ yʌl: «Yom tijicña panchan yicʼot chumuloʼ bʌ ti panchan» (Apocalipsis 12:12). Wʌle ñʌchʼʌlix añob yicʼot juntemelob come yaʼ bʌ añob yaʼi miʼ melob chuqui yom Dios.

14. ¿Chuqui ujtem ila ti pañimil cʼʌlʌl cheʼ tsaʼ chojqui jubel Satanás?

¹⁴ Pero wen qʼuexel bajcheʼ añonla ila ti Pañimil. Butʼul ti cabʌl wocol come jiñi «xiba tsaʼix jubi tilel» yicʼot «an cabʌl i michʼajel come yujil lʌcʼʌlix i yorajlel» (Apocalipsis 12:12). Satanás wen michʼ come tsaʼ chojqui loqʼuel ti panchan yicʼot yujil chaʼan lʌcʼʌlix mi caj i jisʌntel. Jin chaʼan, cabʌl chuqui miʼ mel chaʼan miʼ yʌqʼueñonla wocol.

15. ¿Chuqui yom Dios chaʼan ili Pañimil?

¹⁵ Pero maʼañic qʼuextʌyem jiñi yom bʌ Dios chaʼan ili Pañimil. Dios yom chaʼan ili Pañimil miʼ sujtel ti jumpʼejl paraíso yicʼot chaʼan tojobix jiñi quixtañujob i miʼ chumtʌlob tiʼ pejtelel ora (Salmo 37:29). ¿Bajcheʼ mi caj i mel iliyi jiñi i Yumʌntel Dios?

16, 17. ¿Chuqui miʼ cʌntesañonla chaʼan i Yumʌntel Dios jiñi profecía am bʌ ti Daniel 2:44?

¹⁶ Jiñi profecía am bʌ ti Daniel 2:44 miʼ yʌl: «Cheʼ woliyob ti yumʌntel, jini Dios am bʌ ti panchan mi caj i waʼchocon yambʌ Yumʌl, mach bʌ yujilic jilel. Mi caj i mʌjlel i chaʼan. Mi caj i laj jisan pejtel jini yumʌlob. Mi caj i yajñel tiʼ pejtelel ora». ¿Chuqui miʼ cʌntesañonla ili profecía chaʼan jiñi i Yumʌntel Dios?

¹⁷ Ñaxam bʌ, miʼ cʌntesañonla chaʼan jiñi i Yumʌntel Dios mi caj i waʼchocontel «cheʼ woliyob ti yumʌntel» yambʌ yumʌlob. Ili yom i yʌl chaʼan mi caj i tech i yeʼtel cheʼ bʌ anto yambʌ yumʌlob ila ti Pañimil. I chaʼpʼejlel, jiñi i Yumʌntel Dios mi caj i yajñel tiʼ pejtelel ora yicʼot maʼañic yambʌ yumʌl muʼ bʌ caj i yochel tiʼ qʼuexol. I yuxpʼejlel, jiñi yumʌlob añoʼ bʌ ila ti Pañimil mi caj i contrajiñob jiñi i Yumʌntel Dios. Jiñi i Yumʌntel Dios jiñʌch muʼ bʌ caj i mʌl yicʼot cojach muʼ bʌ caj i yuman ili Pañimil. Cheʼ bʌ miʼ tsʼʌctiyel ili profecía, jiñi quixtañujob mi caj i yumantelob ti ñumen wem bʌ yumʌl.

18. ¿Chuqui i cʼabaʼ jiñi guerra muʼ bʌ caj i mel jiñi i Yumʌntel Dios yicʼot jiñi yumʌlob ti Pañimil?

¹⁸ ¿Chuqui mi caj i yujtel cheʼ bʌ lʌcʼʌlix jiñi guerra tiʼ tojlel jiñi yumʌlob ti Pañimil yicʼot i Yumʌntel Dios? Jiñi xibajob mi caj i lotiñob jiñi «reyob ti pejtelel pañimil chaʼan miʼ tempañob tilel ti guerra muʼ bʌ caj i yujtel ti jini ñuc bʌ qʼuin, i qʼuiñilel Dios Mach bʌ Anic i Pʼisol i Pʼʌtʌlel». Ili guerra jiñʌch Armagedón, yaʼʌch baqui miʼ cajelob ti guerra jiñi yumʌlob ti Pañimil yicʼot i Yumʌntel Dios (Apocalipsis 16:14, 16; qʼuele jiñi nota 10).

19, 20. ¿Chucoch i cʼʌjñibalʌch lac chaʼan jiñi i Yumʌntel Dios?

¹⁹ ¿Chucoch i cʼʌjñibalʌch lac chaʼan jiñi i Yumʌntel Dios? An uxchajp chucoch. Ñaxam bʌ, come xmulilonla, mi laj cʼamʼan yicʼot mi lac chʌmel. Pero cheʼ bʌ añonla tiʼ tojlel i Yumʌntel Dios maʼañic ba ora mi caj lac chʌmel. Jiñi Biblia miʼ yʌl: «Come cheʼi tsiʼ wen cʼuxbi jini añoʼ bʌ ti pañimil Dios. Tsiʼ yʌcʼʌ cojach bʌ i Yalobil. Majqui jach miʼ ñop i Yalobil, maʼanic miʼ sajtel. Miʼ taj i cuxtʌlel mach bʌ anic miʼ jilel» (Juan 3:16).

²⁰ I chaʼpʼejlel, chumulonla ti pañimil baqui wen an jontoloʼ bʌ. Miʼ chaʼleñob lot yicʼot miʼ wen melob tsʼiʼlel i joñonla maʼañic miʼ mejlel lac mʌctañob. Pero Jehová mucʼʌch i mejlel. Mi maʼañic miʼ qʼuextañob i melbal mi caj i jisʌntelob ti Armagedón (pejcan Salmo 37:10). Jiñi i yuxchajplel, jiñi yumʌlob wen jontolob, yujilob lot o xujchʼ yicʼot maʼañic miʼ mejlel i tojʼesañob lac wocol. Cheʼ jaʼel, mach yomobic i coltan jiñi quixtañujob chaʼan miʼ jacʼbeñob i tʼan Dios. Jin chaʼan, jiñi Biblia miʼ yʌl chaʼan jiñi quixtañujob miʼ «cʼʌñob i pʼʌtʌlel chaʼan miʼ jisañob i piʼʌlob» (Eclesiastés 8:9).

21. ¿Chuqui mi caj i mel jiñi Yumʌntel chaʼan miʼ mejlel chuqui yom bʌ Dios ila ti Pañimil?

²¹ Cheʼ bʌ miʼ yujtel Armagedón, jiñi Yumʌntel mi caj i yʌcʼ ti mejlel yom bʌ Dios ila ti Pañimil. Jumpʼejl ejemplo, Satanás yicʼot i xibajob mi caj i ñujpʼelob (Apocalipsis 20:1-3). Cheʼ miʼ ñumel majlel ora, maʼañix majqui mi caj i cʼamʼan yicʼot i chʌmel. Wocolix i yʌlʌ jiñi i tojol laj coltʌntel, pejtelel jiñi muʼ bʌ i jacʼbeñob i tʼan Dios mi caj i chumtʌlob tiʼ pejtelel ora ti jumpʼejl Paraíso (Apocalipsis 22:1-3; qʼuele jiñi nota 20). Cheʼ jaʼel, jiñi Yumʌntel mi caj i yʌcʼ ti sʌqʼuesʌntel i cʼabaʼ Dios. ¿Chuqui yom i yʌl jiñi? Cheʼ bʌ jiñix i Yumʌntel Dios woli (choncol) i mel i yeʼtel ila ti Pañimil, pejtelel jiñi quixtañujob mi caj i qʼuelob ti ñuc i cʼabaʼ Dios.

22. ¿Bajcheʼ mi lac ñaʼtan chaʼan Jesús maʼañic tsiʼ teche i Yumʌntel cheʼ bʌ wʌʼto an ti Pañimil yicʼot cheʼ bʌ tsaʼ cʼoti ti panchan?

²² Cheʼ bʌ Jesús wʌʼto an ti Pañimil, tsiʼ cʌntesa jiñi xcʌntʼañob chaʼan miʼ cʼajtiñob ti oración: «Laʼ tilic a yumʌntel». Ili yom i yʌl chaʼan jiñi Yumʌntel maxto tilemic ti jimbʌ ora. Jehová yomʌch miʼ ñaxan waʼchocon jiñi Yumʌntel yicʼot miʼ yotsan Jesús bajcheʼ Rey. ¿Ti orajach ba tsiʼ waʼchoco bajcheʼ Rey cheʼ bʌ tsaʼ cʼoti yaʼ ti panchan? Maʼañic. Jesús yomixto miʼ pijtan. Cheʼ bʌ maxto wen añic ora i chaʼ chʼojyel Jesús, jiñi apóstol Pedro yicʼot Juan tiʼ tsictesayob iliyi. Tsiʼ yʌlʌyob chaʼan jiñi profecía muʼ bʌ i yʌl jiñi Salmo 110:1 miʼ tsʼʌctiyel ti Jesús. Ti jiñi profecía Jehová tsiʼ yʌlʌ: «Buchiʼ tic ñoj jinto mi cʌqʼueñet a tʼuchtan a contrajob» (Hechos 2:32-35; Hebreos 10:12, 13). Ili yom i yʌl chaʼan Jesús yomto miʼ pijtan chaʼan Jehová miʼ waʼchocon bajcheʼ Rey.

23. a) ¿Baqui ora tsiʼ teche i Yumʌntel Jesús bajcheʼ Rey yaʼ tiʼ Yumʌntel Dios? b) ¿Chuqui mi caj laj qʼuel ti jiñi yambʌ cʌntesʌntel?

²³ ¿Baqui ora tsiʼ teche i Yumʌntel Jesús? Ti 1914. Cheʼ bʌ anto yom miʼ cʼotel jiñi jabil, junmojt xcʌntʼañob tsiʼ ñaʼtayob chaʼan ti jiñi jabil 1914 cabʌl profecía miʼ caj ti tsʼʌctiyel. Pejtelel chuqui ujtem cʼʌlʌl ti 1914 miʼ pʌs chaʼan i sujmʌch tsaʼ bʌ i yʌlʌyob jiñi xcʌntʼañob. Jesús tsiʼ teche i yeʼtel ti jiñi jabil (Salmo 110:2; qʼuele jiñi nota 21). Cheʼ bʌ tsʼitaʼ ñumeñix ora, Satanás tsaʼ chojqui jubel ti Pañimil, wʌle «yujil lʌcʼʌlix i yorajlel» chaʼan miʼ jisʌntel (Apocalipsis 12:12). Yaʼ ti yambʌ cʌntesʌntel mi caj laj qʼuel chuqui tac miʼ pʌsbeñonla chaʼan chumuloñixla ti jiñi cojix bʌ qʼuin. Mi caj laj cʌn jaʼel chaʼan jiñi Yumʌntel lʌcʼʌlix mi caj i yʌcʼ ti tsʼʌctiyel chuqui yom bʌ Dios chaʼan ili Pañimil.