¿Chuqui jiñi i Yumʌntel Dios?

 1. ¿Baqui bʌ jiñi oración wen cʌmbil bʌ mi caj lac tsajin?

BAJCʼɅL wiñicob xʼixicob (quixtañujob) tiʼ pejtelel pañimil (mulawil) wen cʌmbil i chaʼañob jiñi oración chaʼan padrenuestro. Jiñʌch jumpʼejl oración tsaʼ bʌ i mele Jesús chaʼan lac pʌsbentel yicʼot wen an bʌ i sujmlel. Laʼ lac ñaxan tsajin jiñi uxchajp tsaʼ bʌ i cʼajti, cheʼ jiñi, mi caj lac ñaʼtan chuqui miʼ cʌntesañonla tiʼ sujmlel jiñi Biblia.

 2. Alʌ baqui bʌ jiñi uxpʼejl tʼan tsaʼ bʌ i pʌsbe Jesús jiñi xcʌntʼañob i chaʼan yom bʌ miʼ cʼajtiñob ti oración.

² Cheʼ tiʼ tejchibal jiñi wen cʌmbil bʌ oración, Jesús tsiʼ sube jiñi choncol bʌ i ñʌchʼtañob: «Chaʼlenla oración cheʼ bajcheʼ jiñi: C Tat lojon añet bʌ ti panchan, laʼ chʼujutesʌntic a cʼabaʼ. Laʼ tilic a yumʌntel. Laʼ mejlic chuqui a wom ti pañimil cheʼ bajcheʼ ti panchan» (Mateo 6:9-13). ¿Chuqui yom i yʌl jiñi uxpʼejl tʼan?

 3. ¿Baqui bʌ jiñi wen ñuc bʌ i cʼʌjñibal yom bʌ mi laj cʌn chaʼan i Yumʌntel Dios?

³ Cabʌlix chuqui tsaʼ laj cʌñʌ chaʼan jiñi i cʼabaʼ Dios, Jehová. Cheʼ jaʼel tsaʼix laj cʌlʌ chuqui yom Dios, cheʼ bajcheʼ jiñi tsaʼix bʌ i mele yicʼot muʼto bʌ caj i mel tiʼ tojlel quixtañujob. Pero ¿chuqui yom i yʌl Jesús cheʼ bʌ tsiʼ yʌlʌ ili tʼan «Laʼ tilic a yumʌntel»? ¿Chuqui jiñi i Yumʌntel Dios? Cheʼ bʌ miʼ tilel jiñi i Yumʌntel Dios, ¿bajcheʼ mi caj i yʌcʼ ti chʼujutesʌntel o ti sʌqʼuesʌntel i cʼabaʼ? ¿Chucoch ñuc i cʼʌjñibal miʼ tilel jiñi Yumʌntel chaʼan miʼ tsʼʌctiyel chuqui yom Dios ti pañimil yicʼot ti panchan?

 4. ¿Chuqui jiñi i Yumʌntel Dios yicʼot majqui jiñi Rey?

⁴ Jiñi i Yumʌntel Dios jiñʌch juntiquil yumʌl waʼchocobil bʌ i chaʼan Jehová. Jiñʌch tsiʼ yajca majqui miʼ yochel bajcheʼ Rey ti jiñi Yumʌntel. ¿Majqui jiñi Rey? Jiñʌch Jesucristo. Ñumen ñucʌch i mach lajalic bajcheʼ tiʼ pejtelel jiñi yumʌlob wʌʼ ti Pañimil. Jin chaʼan cʌmbil bajcheʼ «i Rey jiñi reyob, i Yum jiñi yumʌlob» (1 Timoteo 6:15). Jesús añʌch cabʌl i pʼʌtʌlel chaʼan miʼ mel chuqui ñumen wem bʌ, mach bʌ mejlic i melob jiñi yumʌlob wʌʼ ti Pañimil.

 5. ¿Baqui mi caj i yajñel i Yumʌntel Dios cheʼ ba ora miʼ cajel ti yumʌntel yicʼot baqui miʼ caj i cʼʌn i pʼʌtʌlel chaʼan miʼ chaʼlen yumʌntel?

⁵ ¿Baqui mi caj i yajñel i Yumʌntel Dios cheʼ baʼ ora miʼ cajel ti yumʌntel? Cheʼ jiñi, ¿baqui an Jesús? Cheʼ bajcheʼ tsaʼix laj cʌñʌ, cheʼ bʌ tsaʼ ujti i chʼijob yaʼ ti teʼ yicʼot cheʼ bʌ tsaʼ chaʼ tejchisʌnti, tsaʼ letsi majlel ti panchan (Hechos 2:33). Jin chaʼan, i Yumʌntel Dios yaʼʌch an ti panchan. Yaʼ ti Biblia miʼ subentel bajcheʼ jiñi ‹yumʌl am bʌ ti panchan› (2 Timoteo 4:18). Pero anquese yaʼan ti panchan, mi caj i cʼʌn i pʼʌtʌlel chaʼan miʼ yuman jiñi Pañimil (pejcan Apocalipsis [Revelación] 11:15).

6, 7. ¿Chucoch maʼañic yambʌ Rey bajcheʼ Jesús?

⁶ Maʼañic yambʌ Rey bajcheʼ Jesús. ¿Chucoch mi la cʌl jiñi? Ñaxan come maʼañic baqui ora mi caj i chʌmel. Jiñi Biblia mi yʌl chaʼan Jesús mach lajalic bajcheʼ jiñi yumʌlob ti pañimil come jiñʌch «jiñi cojach bʌ mach bʌ añic miʼ chʌmel, jiñi chumul bʌ tiʼ sʌclel baʼ mach mejlic lac lʌcʼtesan lac bʌ» (1 Timoteo 6:16). Mi caj i yajñel tiʼ pejtelel ora chuqui wem bʌ miʼ mel. Cabʌlʌch chuqui mi caj i mel.

⁷ Qʼuele chuqui muʼ bʌ i wʌn al jiñi Biblia tiʼ tojlel Jesús: «Mi caj i yajñel Chʼujul bʌ i chʼujlel [o i yespíritu] Dios tiʼ tojlel jiñi Wiñic. Mi caj i yʌqʼuentel wem bʌ i ñaʼtʌbal yicʼot cabʌl i pusicʼal, yicʼot i yeʼtel ti cʌntesa yicʼot i pʼʌtʌlel, yicʼot wen bʌ i cʼʌjñibal, yicʼot i bʌcʼñʌntel lac Yum. Mi caj i mulan i jacʼbentel lac Yum. Mach jelchojquic mi caj i mel wiñicob. Maʼañic mi caj i ñop uʼyaj tʼan yicʼot lot. Mi caj i coltan jiñi pʼumpʼuñoʼ bʌ yicʼot jiñi utsoʼ bʌ muʼ bʌ i ticʼlʌntelob. Tiʼ tʼan jach mi caj i jisan jiñi tsʌtsoʼ bʌ i pusicʼal yicʼot xjontolilob» (Isaías 11:2-4). Ili texto miʼ cʌntesañonla chaʼan Jesús mi caj i chaʼlen yumʌntel tiʼ tojlel jiñi quixtañujob ti toj yicʼot pʼuntaya. ¿Mach ba muqʼuic a mulan chaʼan miʼ yumañet juntiquil yumʌl bajcheʼ jiñi?

 8. ¿Majqui mi caj i chaʼleñob yumʌntel yicʼot Jesús?

⁸ Laʼ laj qʼuel yambʌ junchajp chaʼan jiñi i Yumʌntel Dios: Jesús mach i bajñel jach mi caj i chaʼlen yumʌntel, mi caj i chaʼlen yumʌntel yicʼot yambʌ reyob. Jiñi apóstol Pablo tsiʼ sube Timoteo: «Mi woli lac lʌtʼ wocol, mux caj lac tem chaʼlen yumʌl la quicʼot» (2 Timoteo 2:12). Pablo, Timoteo yicʼot yambʌ quixtañujob xucʼuloʼ bʌ yajcʌbiloʼ bʌ ti Dios, mi caj i chaʼleñob yumʌntel yicʼot Jesús yaʼ tiʼ Yumʌntel ti panchan. ¿Jaytiquil mi caj i chaʼleñob yumʌntel yicʼot Jesús?

 9. ¿Jaytiquil mi caj i chaʼleñob yumʌntel yicʼot Jesús yicʼot jalix tsiʼ teche i yajcan Dios?

⁹ Cheʼ bajcheʼ tsaʼ laj cʌñʌ ti cʌntesʌntel 7 ti ili libro, jiñi apóstol Juan tsiʼ qʼuele tiʼ ñajal «jiñi Tiñʌmeʼ [Jesucristo] tiʼ pam wits i cʼabaʼ Sión [i yajñib o i buchlib jiñi Rey yaʼ ti panchan] yicʼot waxʌclujumpic (144,000) wiñicob xʼixicob. Yaʼ tiʼ pamob tsʼijbubil i cʼabaʼ jiñi Tiñʌmeʼ yicʼot i cʼabaʼ i Tat». ¿Majquiyob jiñi 144 mil? Juan miʼ chaʼ tsictesan: «Miʼ tsajcañob jiñi Tiñʌmeʼ baqui jach miʼ majlel. Tsaʼ mʌjñiyob loqʼuel tiʼ tojlel i piʼʌlob. Jiñobʌch jiñi ñaxan pacʼ tiʼ tojlel Dios yicʼot jiñi Tiñʌmeʼ» (Apocalipsis 14:1, 4). Jiñi woli (choncol) bʌ i tsajcañob Jesús jiñʌch xucʼuloʼ bʌ, muʼ bʌ caj i chaʼleñob yumʌntel yicʼot yaʼ ti panchan. Cheʼ bʌ tsaʼix chʌmiyob yicʼot cheʼ tsaʼix chaʼ tejchiyob bajcheʼ ángelob yaʼ ti panchan, mi caj i chaʼleñob eʼtel (troñel) bajcheʼ «yumʌl ti pañimil» yicʼot Jesús (Apocalipsis 5:10). Cheʼ bʌ tiʼ yorajlel jiñi apóstolob, Dios tsiʼ teche i yajcan jiñi xñoptʼañob xucʼuloʼ bʌ chaʼan miʼ tsʼʌctʌyelob jiñi 144 mil.

10. ¿Chucoch tsiʼ wen pʌsʌ i cʼuxbiya Jehová cheʼ bʌ tsiʼ yʌlʌ chaʼan Jesús yicʼot jiñi 144 mil miʼ chaʼleñob yumʌntel tiʼ tojlel quixtañujob?

¹⁰ Jehová tsiʼ wen pʌsʌ i cʼuxbiya cheʼ bʌ tsiʼ yʌlʌ chaʼan Jesús yicʼot jiñi 144 mil miʼ chaʼleñob yumʌntel tiʼ tojlel quixtañujob. Jesús tsajñi wʌʼ ti Pañimil, jin chaʼan cʌmbilix i chaʼan i wocol tac jiñi quixtañujob. Pablo tsiʼ yʌlʌ chaʼan tiʼ tojlel Jesús: «Yujil i pʼuntañonla come yujil cʼuñonla. Tsaʼ pʌjyi ti chajp ti chajp bʌ mulil jaʼel, cheʼ bajcheʼ mi lac pʌjyel ti mulil, pero maʼañic tsiʼ jacʼʌ» (Hebreos 4:15; 5:8). Jiñi muʼ bʌ caj i chaʼleñob yumʌntel yicʼot Jesús an i lʌtʼʌyob ilaya wocol jaʼel cheʼ bajcheʼ joñonla. Yicʼot jaʼel, an i chaʼleyob wersa chaʼan maʼañic miʼ yajlelob ti mulil yicʼot an i lʌtʼʌyob cʼamʌjel tac. Jin chaʼan, yujilob jiñi wocol muʼ bʌ i ñusañob jiñi quixtañujob.

11. ¿Chucoch tsiʼ yʌlʌ Jesús chaʼan jiñi xcʌntʼañob yom miʼ cʼajtibeñob Dios chaʼan miʼ mejlel chuqui yom yaʼ ti panchan?

¹¹ Jesús mach cojach tsiʼ sube jiñi xcʌntʼañob i chaʼan, chaʼan miʼ cʼajtiñob miʼ tilel i Yumʌntel Dios, tsiʼ subeyob jaʼel chaʼan miʼ cʼajtiñob chaʼan miʼ mejlel chuqui yom Jehová «ti pañimil cheʼ bajcheʼ ti panchan». Yaʼ ti panchan baqui an Dios, jiñi xucʼul bʌ ángelob tiʼ pejtelel ora miʼ melob chuqui yom Jehová. Pero yaʼ ti cʌntesʌntel 3 ti ili libro tsaʼ laj cʌñʌ chaʼan juntiquil jontol bʌ ángel tsiʼ cʌyʌ i mel chuqui yom Dios yicʼot tsiʼ yʌcʼʌ ti yajlel ti mulil jiñi Adán yicʼot Eva. Yaʼ ti cʌntesʌntel 10 muʼto caj lac ñumen cʌn chuqui miʼ cʌntesañonla jiñi Biblia chaʼan jiñi ángel tsaʼ bʌ i chʼʌmʌ i cʼabaʼ bajcheʼ Satanás. Dios tsaʼ to i yʌcʼʌ chaʼan miʼ yajñelob ti panchan jiñi Satanás yicʼot jiñi jontol bʌ ángelob, cʌmbiloʼ bʌ bajcheʼ xibajob. Jin chaʼan, cheʼ bʌ tiʼ yorajlel Jesús, mach tiʼ pejtelelic jiñi ángelob añoʼ bʌ ti panchan tsiʼ meleyob chuqui yom bʌ Dios. Jin chaʼan, tsaʼ qʼuextʌyi cheʼ bʌ Jesucristo tsiʼ teche eʼtel ti yumʌl tiʼ Yumʌntel Dios yicʼot cheʼ bʌ tsiʼ chaʼle guerra tiʼ contra Satanás (pejcan Apocalipsis 12:7-9).

12. ¿Chuqui jiñi chaʼchajp tsaʼ bʌ ujti mi yʌl yaʼ ti Apocalipsis 12:10?

¹² Jiñi yambʌ profecía tac miʼ subeñonla chuqui miʼ caj ti ujtel: «Tsaʼ cubi cʼam bʌ tʼan ti panchan. Tsiʼ yʌlʌ: Tsaʼix tili i coltʌntel wiñicob xʼixicob yicʼot i pʼʌtʌlel yicʼot i yumʌntel lac Dios yicʼot i pʼʌtʌlel Cristo. Come tsaʼix chojqui jubel jiñi [Satanás] muʼ bʌ i sub i mul la quermañojob. Miʼ sub lac mul tiʼ tojlel Dios ti qʼuiñil ti acʼʌlel» (Apocalipsis 12:10). Ti jiñi texto mi yʌl chaʼchajp chuqui tsaʼ bʌ ujti, ¿tsaʼix baʼ qʼuele? Ti ñaxan jiñʌch cheʼ tsiʼ teche i chaʼlen yumʌntel Jesucristo tiʼ Yumʌntel Dios. Tiʼ chaʼyajlel jiñʌch cheʼ bʌ Satanás tsaʼ chojqui loqʼuel ti panchan i tsaʼ jubi tilel wʌʼ ti Pañimil.

13. ¿Chuqui tsaʼ caji ti ujtel cheʼ bʌ Satanás tsaʼ chojqui loqʼuel yaʼ ti panchan?

¹³ Mi caj laj qʼuel chaʼan jiñi chaʼchajp muʼ bʌ i yʌjlel, tsaʼix tsʼʌctiyi. ¿Chuqui tsaʼ caji ti ujtel cheʼ jiñi? Laʼ laj qʼuel chuqui tsaʼ ujti yaʼ ti panchan: «Yom tijicña panchan yicʼot chumuloʼ bʌ ti panchan» (Apocalipsis 12:12). Jiñi xucʼul bʌ ángelob tsiʼ tajayob i tijicñʌyel come Satanás yicʼot i xibajob tsaʼix chojquiyob loqʼuel ti panchan, tsaʼ bʌ cʌyleyob yaʼ ti panchan jiñʌch jiñi xucʼul bʌ añob tiʼ tojlel Jehová Dios, añob tiʼ ñʌchʼtʌlel yicʼot temel añob. Jin chaʼan, yaʼ ti panchan wolix (yʌquelix) i mejlel chuqui yom Dios.

14. ¿Chuqui tsaʼ caji wʌʼ ti Pañimil cheʼ bʌ tsaʼ chojqui jubel jiñi Satanás?

¹⁴ ¿Chuqui miʼ mejlel laj cʌl chaʼan jiñi Pañimil? Jiñi Biblia mi yʌl: «Obol laʼ bʌ añet bʌ la ti pañimil yicʼot ti colem ñajb come jiñi xiba [o Diablo] tsaʼix jubi tilel baʼ añetla. An cabʌl i michʼajel come yujil lʌcʼʌlix i yorajlel» (Apocalipsis 12:12). Satanás wen michʼ come tsaʼ chojqui loqʼuel ti panchan yicʼot chaʼan tsʼitaʼ jachix ora cʌylem i chaʼan. Come an cabʌl i michʼajel, choncol i wen tech cabʌl wocol wʌʼ ti Pañimil. Ti yambʌ cʌntesʌntel mi caj lac ñumen cʌn chaʼan jiñi wocol tac. Pero chaʼan jiñi tsaʼix bʌ laj qʼuele, mi laj cʼajtiben lac bʌ: ¿Bajcheʼ mi caj i tsʼʌctesan jiñi Yumʌntel chuqui yom Dios wʌʼ ti Pañimil?

15. ¿Chuqui yom Dios chaʼan jiñi Pañimil?

¹⁵ Yom cʼajal a chaʼan chuqui yom Dios chaʼan ili Pañimil. Cheʼ bajcheʼ tsaʼ cʌñʌ yaʼ ti cʌntesʌntel 3, Jehová tsaʼix i pʌsʌ yaʼ ti pʌcʼʌbʌl i cʼabaʼ Edén chaʼan yom miʼ sujtel ti jumpʼejl paraíso jiñi Pañimil yicʼot chaʼan miʼ bujtʼel ti quixtañu tojoʼ bʌ maʼañix bʌ miʼ cajelob ti chʌmel. Cheʼ bʌ Satanás tsaʼʌch mejli i mel chaʼan miʼ chaʼlen mulil jiñi Adán yicʼot Eva, maʼañic tsaʼ tsʼʌctiyi chuqui yom Dios chaʼan jiñi Pañimil, pero maʼañic qʼuextʌyem chuqui yom Dios ti ñaxan. Jehová yom chaʼan miʼ tsʼʌctiyel ili tʼan: «Mi caj i yʌqʼuentelob jiñi pañimil jiñi tojoʼ bʌ. Mi caj i yajñelob ti pejtelel ora» (Salmo 37:29). Jiñi i Yumʌntel Dios mi caj i mel iliyi. ¿Bajcheʼ?

16, 17. ¿Chuqui miʼ cʌntesañonla jiñi Daniel 2:44 chaʼan bʌ i Yumʌntel Dios?

¹⁶ Yaʼ ti Daniel 2:44 mi lac taj ili profecía: «Cheʼ woliyob ti yumʌntel, jiñi Dios am bʌ ti panchan mi caj i waʼchocon yambʌ Yumʌl, mach bʌ yujilic jilel. Mi caj i mʌjlel i chaʼan. Mi caj i laj jisan pejtel jiñi yumʌlob. Mi caj i yajñel ti pejtelel ora». ¿Chuqui miʼ cʌntesañonla ili profecía chaʼan i Yumʌntel Dios?

¹⁷ Ñaxan, mi yʌl chaʼan jiñi yumʌntel mi caj i yajñel «cheʼ woliyob ti yumʌntel [...] jiñi yumʌlob», yom i yʌl cheʼ añob to yan tac bʌ yumʌlob wʌʼ ti Pañimil. I chaʼchajplel, mi yʌl chaʼan jiñi Yumʌntel maʼañic baqui ora mi caj i jilel. Mi juntiquilic yumʌl ti pañimil mi caj i mejlel i jisan yicʼot maʼañic mi caj i mejlel i chʼʌmben i yajñib. I yuxchajplel, mi yʌl chaʼan jiñi i Yumʌntel Dios mi caj i chaʼlen guerra yicʼot jiñi yumʌlob ti pañimil, baqui jiñi i Yumʌntel Dios jiñʌch muʼ bʌ caj i mʌjlel i chaʼan. Tiʼ yujtibal, mi yʌl chaʼan cojach jiñi muʼ bʌ caj i yuman jiñi quixtañujob yicʼot maʼañic yambʌ ñumen wem bʌ mi caj i chaʼlen yumʌntel bajcheʼ jiñi.

18. ¿Chuqui i cʼabaʼ jiñi guerra muʼ bʌ caj i mel jiñi i Yumʌntel Dios tiʼ contra jiñi yumʌlob ti pañimil?

¹⁸ Jiñi Biblia cabʌl chuqui miʼ cʌntesañonla chaʼan jiñi guerra muʼ bʌ caj i mel i Yumʌntel Dios yicʼot jiñi yumʌlob ti mulawil. Jumpʼejl ejemplo, cheʼ miʼ lʌcʼtiyel tilel i jilibal ili pañimil, jiñi jontol bʌ ángelob mi caj i ñumen pucob cabʌl lot chaʼan miʼ lotiñob jiñi «reyob ti pejtelel pañimil». ¿Chucoch? «Chaʼan miʼ tempañob tilel ti guerra muʼ bʌ caj i yujtel ti jiñi ñuc bʌ qʼuin, i qʼuiñilel Dios Mach bʌ Añic i Pʼisol i Pʼʌtʌlel.» Jiñi reyob mi caj i tempʌntelob «ti lum, i cʼabaʼ Armagedón tiʼ tʼan hebreo» (Apocalipsis 16:14, 16). Cheʼ bajcheʼ tsaʼ laj qʼuele yaʼ tiʼ chaʼpʼejl versículo, jiñi guerra muʼ bʌ i caj ti ujtel tiʼ tojlel jiñi yumʌlob ti mulawil yicʼot jiñi i Yumʌntel Dios, cʌmbil bajcheʼ Armagedón.

19, 20. ¿Chucoch maʼañic yʌquel ti mejlel wʌle ora jiñi yom bʌ Dios chaʼan ili Pañimil?

¹⁹ ¿Chuqui mi caj i mel i Yumʌntel Dios cheʼ bʌ miʼ chʼʌm tilel jiñi Armagedón? Jiñʌch chaʼan miʼ chaʼ sujtel ti jumpʼejl paraíso ili pañimil yicʼot miʼ bujtʼel ti wiñicob xʼixicob tojoʼ bʌ muʼ bʌ i melbeñob i yeʼtel come jiñʌch chuqui yom bʌ Jehová tsiʼ yʌlʌ. ¿Chucoch wʌle ora maʼañic choncol ti mejlel jiñi yom bʌ Jehová chaʼan ili Pañimil? Ti ñaxan come xmulilonla, jin chaʼan mi laj cʼamʼan yicʼot mi lac chʌmel. Pero yaʼ ti cʌntesʌntel 5 tsaʼix laj qʼuele chaʼan Jesús tsaʼ chʌmi chaʼan mi lac chumtʌl tiʼ pejtelel ora. Tajol cʼajal a chaʼan jiñi tʼan yaʼ bʌ an ti Evangelio tsaʼ bʌ i tsʼijbu Juan: «Come cheʼi tsiʼ wen cʼuxbi jiñi añoʼ bʌ ti pañimil Dios. Tsiʼ yʌcʼʌ cojach bʌ i Yalobil. Majqui jach miʼ ñop i Yalobil, maʼañic miʼ sajtel. Miʼ taj i cuxtʌlel mach bʌ añic miʼ jilel» (Juan 3:16).

²⁰ Yambʌ wocol jiñʌch cheʼ an cabʌl wiñicob xʼixicob wen jontol bʌ miʼ melob i bʌ. Miʼ chaʼleñob lot, miʼ lotiñob i piʼʌlob yicʼot mach sʌcobic tiʼ cuxtʌlel yicʼot miʼ melob tsʼiʼlel. Mach yomobic i mel chuqui yom Dios. Pero jiñi muʼ bʌ i melob jontolil mi caj i jisʌntelob tiʼ guerra Dios i cʼabaʼ Armagedón (pejcan Salmo 37:10). Yambʌ chucoch cheʼ maʼañic yʌquel i mejlel chuqui yom Dios chaʼan ili Pañimil jiñʌch cheʼ jiñi yumʌlob ti mulawil maʼañic miʼ subeñob jiñi quixtañujob chaʼan miʼ melob chuqui yom Jehová. Cabʌl maʼañic miʼ mejlelob i mel chuqui miʼ ñaʼtañob, jontolob yicʼot mach weñic chuqui miʼ melob. Wen tsiquil chuqui mi yʌl jiñi Biblia: Jiñi wiñicob miʼ «cʼʌñob i pʼʌtʌlel chaʼan miʼ jisañob i piʼʌlob» (Eclesiastés 8:9).

21. ¿Bajcheʼ mi caj i mel jiñi Yumʌntel chaʼan miʼ mejlel chuqui yom Dios wʌʼ ti Pañimil?

²¹ Cheʼ miʼ ñumel jiñi Armagedón, jiñi wiñicob xʼixicob juntiquil jachix yumʌl mi caj i yumañob, jiñʌch i Yumʌntel Dios. Jiñi Yumʌntel mi caj i tsʼʌctesan chuqui yom Jehová yicʼot mi caj i chʼʌm tilel cabʌl bendición. Mi caj i jisan Satanás yicʼot i xibajob (Apocalipsis 20:1-3). Jiñi xucʼuloʼ bʌ quixtañu maʼañix mi caj i cʼamʼañob, maʼañix mi caj i chʌmelob yicʼot mi caj i mejlelob ti chumtʌl tiʼ pejtelel ora come tsaʼix i tojo lac mul Jesús (pejcan Apocalipsis 22:1-3). Yicʼot jaʼel mi caj i sujtesan ili Pañimil ti jumpʼejl paraíso. Cheʼ bajcheʼ jiñi, jiñi Yumʌntel mi caj i mel jiñi yom bʌ Dios wʌʼ ti Pañimil yicʼot miʼ chʼujutesʌntel i cʼabaʼ Dios. ¿Chuqui yom i yʌl jiñi? Wocolix i yʌlʌ jiñi Yumʌntel, tiʼ pejtelel jiñi quixtañu mi caj i qʼuelob ti ñuc Jehová yicʼot mi caj i ñuqʼuesʌbeñob i cʼabaʼ.

22. ¿Bajcheʼ mi lac ñaʼtan chaʼan jiñi i Yumʌntel Dios maʼañic tsaʼ tili cheʼ bʌ Jesús wʌʼ to an ti Pañimil, mi jiñic cheʼ bʌ tsaʼ jaxto tejchisʌnti?

²² Cheʼ bʌ Jesús tsiʼ sube jiñi xcʌntʼañob i chaʼan, chaʼan miʼ cʼajtibeñob Dios «laʼ tilic a yumʌntel», tsiʼ yʌcʼʌ ti ñaʼtʌntel chaʼan ti jiñi bʌ ora maxto tilemic jiñi Yumʌntel. ¿Jimba bʌ ora tsaʼ tili cheʼ bʌ Jesús tsaʼ majli ti panchan? Maʼañic, come Pedro yicʼot Pablo tsiʼ yʌlʌyob chaʼan cheʼ bʌ tsaʼ tejchi Jesús, tsaʼ tsʼʌctiyi jiñi profecía muʼ bʌ lac taj yaʼ ti Salmo 110:1: «Lac Yum [Jehová] tsiʼ sube c Yum: Buchib tic ñoj jin to mi cʌqʼueñet a tʼuchtan a contrajob» (Hechos 2:32-35; Hebreos 10:12, 13). Miʼ mejlel la cʌl chaʼan Jesucristo tsaʼ to i pijta chaʼan miʼ cʼotel i yorajlel.

23. a) ¿Baqui ora tsaʼ tejchi jiñi i Yumʌntel Dios? b) ¿Chuqui mi caj i cʌntesañonla jiñi yambʌ cʌntesʌntel?

²³ ¿Bajcheʼ jalel mi caj i chaʼlen pijt? Cheʼ bʌ tsaʼ ujti jiñi jabil tac 1800 i tsaʼ tejchi jiñi jabil 1900, junmojt xpejcaya bibliajob tsiʼ ñaʼtayob chaʼan jiñi pijt miʼ yujtel cheʼ ti jabil 1914. (Mi a wom to a bej cʌn majlel chaʼan jiñi jabil 1914, qʼuele jiñi apéndice «Jiñi jabil 1914 yaʼ ti profecía tac am bʌ ti Biblia wen ñuc i cʼʌjñibal».) Jiñi wocol tac choncol bʌ laj qʼuel ili ora tsaʼ bʌ tejchi cheʼ ti jabil 1914 miʼ pʌsbeñonla chaʼan weñʌch chuqui tsiʼ ñaʼtayob jiñi xpejcaya bibliajob. Cheʼ bʌ tsaʼ tsʼʌctiyi jiñi profecía tac am bʌ ti Biblia, miʼ pʌs chaʼan cheʼ ti jabil 1914, Jehová tsiʼ waʼchoco ti Rey jiñi Cristo, i cheʼ jaʼel jiñi i Yumʌntel am bʌ ti panchan tsiʼ teche i mel i yeʼtel bajcheʼ yumʌl. Jin chaʼan, ‹lʌcʼʌlix añonla tiʼ yorajlel› chaʼan miʼ jisʌntel jiñi Satanás (Apocalipsis 12:12; Salmo 110:2). Cheʼ jaʼel, miʼ mejlel la cʌl chaʼan jiñi Yumʌntel mach jalix mi caj i mel chuqui yom Dios wʌʼ ti Pañimil. ¿Mach ba jumpʼejlic wem bʌ tʼan maʼ wubin jiñi? ¿Muʼ baʼ ñop chaʼan i sujmʌch jiñi? Yaʼ ti yambʌ cʌntesʌntel mi caj i pʌsbeñet tiʼ sujmlel jiñi Biblia chaʼan jiñi.