Cʼʌñʌla jiñi melbil tac bʌ chaʼan mi laʼ cʌntesan laʼ walobilob

 1. ¿Chuqui yomob i mel jiñi tatʌlob xñoptʼañoʼ bʌ?

TATɅLOB, cujil lojon chaʼan laʼ wom laʼ coltan laʼ walobilob chaʼan miʼ cʌñob Jehová yicʼot miʼ cʼuxbiñob. Pero Dios mach tsiquilic, jin chaʼan ¿chuqui miʼ mejlel laʼ mel (chaʼlen) chaʼan jiñi laʼ walobilob miʼ qʼuelob chaʼan i sujmʌch yicʼot miʼ mejlel i lʌcʼtesañob i bʌ tiʼ tojlel? (Sant. 4:8).

 2. ¿Bajcheʼ miʼ mejlel i coltañob i yalobil jiñi tatʌlob chaʼan miʼ cʌñob Jehová yicʼot jiñi melbal tac am bʌ i chaʼan?

² Junchajp bajcheʼ jiñi tatʌlob miʼ mejlel i coltañob i yalobil chaʼan miʼ lʌcʼtesañob i bʌ ti Jehová jiñʌch cheʼ bʌ miʼ comol chaʼleñob ti estudiar jiñi Biblia (2 Tim. 3:14-17). Jiñi Biblia miʼ pʌs bajcheʼ yambʌ miʼ mejlel i cʌñob Jehová jiñi colelto bʌ mucʼob. Yaʼ ti libro chaʼan Proverbios miʼ yʌl chaʼan juntiquil tatʌl miʼ chaʼlen tʼan yicʼot i yalobil i miʼ suben chaʼan maʼañic miʼ ñajʌyel i chaʼan jiñi melbal (chaʼlibal) tac am bʌ i chaʼan Jehová, tsiquil bʌ ti jiñi melbil tac bʌ (Pr. 3:19-21). Wʌle mi caj laj qʼuel bajcheʼ jiñi tatʌlob miʼ mejlel i cʼʌñob jiñi melbil (pʌtbil) tac bʌ chaʼan jiñi i yalobilob miʼ cʌñob Jehová yicʼot jiñi melbal tac am bʌ i chaʼan.

 3. ¿Bajcheʼ yom miʼ coltañob i yalobil jiñi tatʌlob?

³ Jiñi Biblia miʼ yʌl chaʼan jiñi melbalʌl tac am bʌ i chaʼan Dios «jamʌ tsiquil cʼʌlʌl cheʼ tsaʼ mejli pañimil, come miʼ mejlel ti qʼuejlel ti jiñi melbil tac bʌ» (Rom. 1:20). Tatʌlob, ¿mach ba muqʼuic laʼ mulan ajñel ti jumpat laʼ wicʼot laʼ walobilob? Ti jimbʌ ora, coltanla i qʼuel bajcheʼ jiñi «melbil tac bʌ» miʼ pʌs jiñi utsʼatax bʌ melbalʌl tac am bʌ i chaʼan Jehová. Laʼ laj qʼuel chuqui miʼ mejlel i cʌñob tiʼ tojlel Jesús jiñi tatʌlob.

 4. ¿Bajcheʼ tsiʼ cʼʌñʌ Jesús jiñi melbil tac bʌ chaʼan miʼ cʌntesan jiñi xcʌntʼañob i chaʼan? (Lucas 12:24, 27-30).

⁴ Qʼuele bajcheʼ Jesús tsiʼ cʼʌñʌ ti cʌntesa jiñi melbil tac bʌ. Tiʼ sube jiñi xcʌntʼañob i chaʼan chaʼan miʼ qʼuelob jiñi xmateʼmut yicʼot ñichteʼ tac (pejcan Lucas 12:24, 27-30). Cheʼic yom, yambʌ chuqui tsiʼ taja ti tʼan. Pero tsiʼ yajca jiñi xmateʼmut yicʼot jiñi ñichteʼ, wen i cʌñʌyoʼ bʌ jiñi xcʌntʼañob i chaʼan. Tajol qʼuelbil i chaʼañob ti wejlel jiñi xmateʼmut yicʼot ti colel jiñi ñichteʼ tac. I Jesús tajol woli (choncol) i tuchʼ iliyi cheʼ bʌ tsiʼ taja ti tʼan. ¿I chuqui tsiʼ mele cheʼ bʌ tsaʼ ujti i yʌl pejtelel iliyi? Tsiʼ pʌsbe jiñi xcʌntʼañob i chaʼan chaʼan Jehová yujil tʼoxol chuqui an i chaʼan yicʼot wen uts: Mi caj i weʼsan yicʼot i yʌqʼuen i pislel jiñi xucʼul bʌ i wiñicob cheʼ bajcheʼ miʼ mel tiʼ tojlel jiñi xmateʼmut yicʼot jiñi ñichteʼ tac.

 5. ¿Chuqui miʼ mejlel i tajob ti tʼan jiñi tatʌlob chaʼan miʼ pʌsbeñob chaʼan bʌ Jehová jiñi i yalobil?

⁵ Tatʌlob, ¿bajcheʼ miʼ mejlel laʼ lajiben i cʌntesa Jesús? Jumpʼejl ejemplo, miʼ mejlel a suben a walobil junchajp muʼ bʌ laʼ wen mulan ti jiñi melbil bʌ, bajcheʼ jiñi teʼ o añimal muʼ bʌ a ñumen mulan. Yom maʼ suben chuqui miʼ pʌsbeñonla tiʼ tojlel Jehová. Cheʼ jiñi, maʼ cʼajtiben jiñi a walobil chuqui ti añimal o teʼ miʼ wen mulan. Mi jiñʌch maʼ taj ti tʼan chuqui miʼ mulan cheʼ bʌ maʼ wʌl chaʼan bʌ Jehová, tajol mi caj i ñumen mulan i ñʌchʼtañet.

 6. ¿Chuqui mi laj cʌn tiʼ tojlel i mamá Christopher?

⁶ Ili mach yomic i yʌl chaʼan jiñi tatʌlob yom miʼ wen chaʼleñob ti investigar jujuncojt añimal o ñichteʼ tac. Jesús maʼañic tsiʼ luʼ tsictesa chuqui miʼ cʼux jiñi xmateʼmut o bajcheʼ melbil jiñi ñichteʼ tac. Tajol jiñi a walobil mucʼʌch i wen mulan i cʌn jiñi, pero an i tajol jasʌl an chuqui maʼ pʼʌc subeñob o maʼ melbeñob jumpʼejl cʼajtiya chaʼan maʼ pʌsbeñob chaʼan bʌ Jehová. Jumpʼejl ejemplo, juntiquil hermano i cʼabaʼ Christopher miʼ yʌl: «Jiñi c mamá an chuqui tac miʼ subeñon lojon chaʼan jiñi an tac bʌ ti lon c joytʌlel chaʼan mi lon c ñumen qʼuel ti ñuc jiñi melbil tac bʌ. Cheʼ bʌ añon lon tiʼ tʼejl wits, miʼ yʌl: ‹¡Wen utsʼatax yicʼot wen colem jiñi wits! Wen pʼʌtʌlʌch Jehová, ¿ñomach?›. O cheʼ bʌ mic majlel lon ti mar, miʼ yʌl: ‹Wen pʼʌtʌl miʼ ñijcan i bʌ jiñi jaʼ! Dios wen pʼʌtʌlʌch›». Christopher miʼ yʌl: «Anquese mach cabʌlic chuqui miʼ subeñon lojon, añʌch chuqui miʼ yʌqʼueñon lojon c ñaʼtan».

 7. ¿Chuqui miʼ mejlel laʼ mel chaʼan maʼ cʌntesan a walobilob chaʼan miʼ chaʼleñob ti meditar jiñi melbil tac bʌ?

⁷ Cheʼ bʌ miʼ colel majlel jiñi laʼ walobilob, miʼ mejlel laʼ cʌntesañob chaʼan miʼ chaʼleñob ti meditar jiñi melbil tac bʌ yicʼot miʼ cʌñob bajcheʼ yilal Jehová. Miʼ mejlel a taj ti tʼan junchajp melbil bʌ i maʼ cʼajtiben: «¿Chuqui miʼ pʌsbeñet tiʼ tojlel Jehová iliyi?». Tajol miʼ toj sajtel a pusicʼal bajcheʼ miʼ jaqʼueʼ (Mat. 21:16).

 8. ¿Chuqui miʼ mejlel i melob jiñi israelitajob cheʼ bʌ añob «ti bij» yicʼotob i yalobil?

⁸ Jiñi israelitajob tsaʼ subentiyob chaʼan yom miʼ pʌsbeñob i mandar tac Jehová jiñi i yalobilob cheʼ bʌ añob «ti bij» (Dt. 11:19). Yaʼ tiʼ bijlel Israel an añimal tac yicʼot ñichteʼ tac. Jin chaʼan, miʼ mejlel i cʼʌñob tac iliyi chaʼan jiñi i yalobilob miʼ mulañob i cʌn jiñi melbil tac bʌ i chaʼan Jehová. Cheʼʌch miʼ mejlel i melob jaʼel jiñi tatʌlob ti ili ora. Laʼ laj qʼuel chuqui an i meleyob.

 9. ¿Chuqui maʼ cʌn tiʼ tojlel Punitha yicʼot Katya?

⁹ Juntiquil ñaʼʌl i cʼabaʼ Punitha, chumul bʌ ti jumpʼejl colem ciudad ti India, miʼ yʌl: «Cheʼ bʌ mic julaʼtan lojon jiñi lon c familia mach bʌ chumulobic ti ciudad, mic pʌsben lon calobilob jiñi melbil tac bʌ i chaʼan Jehová. Mij qʼueleʼ lojon chaʼan jiñi lon calobilob mach wocolic miʼ chʼʌmbeñob i sujm chuqui tac miʼ pʌsbeñob jiñi melbil tac bʌ cheʼ bʌ mach yaʼic añon lon ti jumpʼejl ciudad baqui cabʌl lac piʼʌlob yicʼot carro tac». Tatʌlob, tajol jiñi laʼ walobilob maʼañic baʼ ora mi caj i ñajʌyel i chaʼañob cheʼ bʌ mi laʼ ñusan qʼuin laʼ wicʼotob baqui mi laʼ taj laʼ qʼuel jiñi melbil tac bʌ. Katya, juntiquil hermana ti Moldavia, miʼ yʌl: «Cʼajalto c chaʼan cheʼ bʌ jiñi c tatob miʼ pʌyoñob majlel baqui cabʌlto teʼ tac. Mic wen qʼuel ti ñuc cheʼ cʼʌlʌl cheʼ bʌ alʌlonto tsiʼ pʌsbeyoñob j qʼuel jiñi melbil tac bʌ i chaʼan Jehová yicʼot chaʼan mic wen ñaʼtan jiñi melbalʌl tac am bʌ i chaʼan».

10. ¿Chuqui miʼ mejlel i melob jiñi tatʌlob mi wocol miʼ yubiñob chaʼan miʼ loqʼuelob ti ciudad? (Qʼuele jiñi recuadro «Coltʌntel chaʼan jiñi tatʌlob»).

¹⁰ ¿Ixcu mi wocol maʼ wubin chaʼan maʼ majlel baqui anto teʼ tac? Amol, chumul bʌ jaʼel ti India, miʼ yʌl: «Yaʼ baqui chumulon yom miʼ wen chaʼleñob eʼtel (troñel) jiñi tatʌlob, i lets i tojol chaʼan mi lac majlel baqui anto teʼ tac. Pero yaʼ ti parque o tiʼ pat la cotot miʼ mejlel lac taj laj qʼuel jiñi melbil tac bʌ i mi la cʌl bajcheʼ yilal Jehová». Tatʌlob, mi mucʼʌch laʼ wen qʼuel chuqui tac an ti laʼ joytʌlel, mucʼʌch caj i mejlel laʼ wʌl laʼ wicʼotob laʼ walobil jiñi melbil tac bʌ (Sal. 104:24). Tajol mi laʼ qʼuel xmateʼmut, yan tac bʌ añimal, teʼ tac o yan tac bʌ. Karina, chʼoyol bʌ ti Alemania, miʼ yʌl: «Jiñi c mamá miʼ wen mulan jiñi flor tac. Jin chaʼan, cheʼ bʌ chutonto i mic loqʼuel lojon ti xʌmbal, miʼ pʌsbeñon jiñi utsʼatax bʌ flor tac am bʌ ti bij». Cheʼ jaʼel, miʼ mejlel laʼ cʼʌn jiñi video tac yicʼot publicación tac muʼ bʌ i taj ti tʼan jiñi melbil tac bʌ. Mucʼʌch i mejlel laʼ coltan laʼ walobilob chaʼan miʼ qʼuelob chuqui tac melbil i chaʼan Dios, mach yʌlʌyic baqui chumuletla. Wʌle mi caj laj qʼuel jiñi melbalʌl tac am bʌ i chaʼan Jehová muʼ bʌ i mejlel laʼ wʌl laʼ wicʼotob laʼ walobil.

11. ¿Chuqui miʼ mejlel i mel jiñi tatʌlob chaʼan miʼ coltañob i yalobilob chaʼan miʼ qʼuelbeñob i cʼuxbiya Jehová?

¹¹ Chaʼan mi laʼ coltan i qʼuelob i cʼuxbiya Jehová jiñi laʼ walobilob, alʌla bajcheʼ miʼ wen cʌntan i yal jiñi añimal tac (Mat. 23:37). Cheʼ jaʼel, miʼ mejlel laʼ wʌl chaʼan mach junchajpic jach chuqui melbil yicʼot wen utsʼatax. Karina, tsaʼ bʌ ajli yaʼ ti yambʌ párrafo, miʼ yʌl: «Cheʼ bʌ mic loqʼuel lojon ti xʌmbal, jiñi c mamá miʼ subeñon waʼtʌl j qʼuel chaʼan mach junlajalic jiñi flor tac i chaʼan jiñi i yutsʼatlel miʼ pʌs i cʼuxbiya Jehová. Anquese ñumeñix cabʌl jab, muqʼuixto c bej mel jiñi. Pejtelel jiñi miʼ cʼajtesʌbeñon chaʼan Jehová miʼ wen cʼuxbiñonla».

12. ¿Chuqui miʼ mejlel i melob jiñi tatʌlob chaʼan miʼ coltañob i yalobil chaʼan miʼ cʌmbeñob i ñaʼtʌbal Jehová? (Salmo 139:14; qʼuele jaʼel jiñi foto tac).

¹² Coltan i cʌmbeñob i ñaʼtʌbal Jehová jiñi laʼ walobilob, jiñʌch ñumen am bʌ i ñaʼtʌbal (Rom. 11:33). Jumpʼejl ejemplo, miʼ mejlel laʼ tsictesʌben chaʼan jiñi jaʼ miʼ sujtel ti tocal i jiñi icʼ miʼ pʌy majlel ti yan tac bʌ parte (Job 38:36, 37). Miʼ mejlel laʼ wʌl jaʼel bajcheʼ melbilonla (pejcan Salmo 139:14). Qʼuelela tsaʼ bʌ i mele juntiquil tatʌl i cʼabaʼ Vladimir. Miʼ yʌl: «Ti jumpʼejl bʌ qʼuin, jiñi lon calobil tsaʼ yajli tiʼ bicicleta i tsaʼ lojwi. Tiʼ chaʼpʼejl uxpʼejlel qʼuin tsaʼ lajmi jiñi i lojweñal. Joñon quicʼot quijñam tsaʼ c sube lojon chaʼan jiñi lac célula tac tsaʼ bʌ i mele Jehová miʼ mejlel i chaʼ bajñel tojʼesan i bʌ. I tsaʼ c sube lojon jaʼel chaʼan mach cheʼic miʼ yujtel tiʼ tojlel jiñi muʼ tac bʌ i melob jiñi lac piʼʌlobb. Jumpʼejl ejemplo, juncojt carro maʼañic miʼ mejlel i bajñel tojʼesan i bʌ cheʼ bʌ miʼ jatsʼ i bʌ. Cheʼ bajcheʼ iliyi, jiñi lon calobil tsiʼ chʼʌmbe i sujm bajcheʼ cʼamel i ñaʼtʌbal Jehová».

13. ¿Chuqui miʼ mejlel i melob jiñi tatʌlob chaʼan miʼ coltañob i yalobil i ñaʼtʌbeñob i pʼʌtʌlel Jehová? (Isaías 40:26).

¹³ Jehová miʼ subeñonla chaʼan mi laj qʼuel jiñi panchan i mi lac ñaʼtan bajcheʼ jiñi i pʼʌtʌlel miʼ yʌcʼ chaʼan jiñi ecʼ tac maʼañic miʼ ñijcan i bʌ yaʼ baqui tsaʼ ajqʼui (pejcan Isaías 40:26). Miʼ mejlel laʼ suben laʼ walobilob chaʼan miʼ qʼuelob jiñi panchan i miʼ ñaʼtañob chuqui tac miʼ tajob i qʼuel. Juntiquil hermana ti Taiwán i cʼabaʼ Tingting cʼajal i chaʼan tsaʼ bʌ ujti cheʼ bʌ alʌ xchʼocto. Miʼ yʌl: «Ti jumpʼejl bʌ qʼuin, joñon quicʼot c mamá tsaʼ majliyon lon ti xʌmbal i come ñajt añon lon yaʼ ti ciudad, tsaʼ c taja lon j qʼuel chaʼan wen jamʌl yicʼot cabʌl ecʼ yaʼ ti panchan. Ti jimbʌ ora woli (yʌquel) c ñusan wocol yaʼ ti escuela i mic bʌcʼñan c mel maʼañic bʌ miʼ mulan Jehová. Jiñi c mamá tiʼ subeyon c ñaʼtan jiñi i pʼʌtʌlel tsaʼ bʌ i cʼʌñʌ Jehová chaʼan miʼ mel jiñi ecʼ tac yicʼot j cʼajtesan chaʼan mi caj i coltañon c pʌs c xucʼtʌlel jaʼel. Cheʼ bʌ tsaʼ sujtiyon ti cotot, tsaʼ c mulaj c ñumen cʌn Jehová yicʼot c melben i yeʼtel, mach yʌlʌyic chuqui miʼ yujtel».

14. ¿Bajcheʼ miʼ mejlel i cʼʌñob jiñi melbil tac bʌ jiñi tatʌlob chaʼan jiñi i yalobilob miʼ qʼuelob chaʼan Jehová juntiquilʌch tijicña bʌ Dios?

¹⁴ Jiñi melbil tac bʌ miʼ pʌs chaʼan Jehová tijicña. Jiñi científicojob qʼuelbil i chaʼañob chaʼan lʌcʼʌ tiʼ pejtelel jiñi añimal tac miʼ chaʼlen alas, yicʼotʌch jiñi xmateʼmut yicʼot jiñi chʌy (Job 40:20, TNM). Tajol jiñi a walobilob miʼ tseʼtañob cheʼ bʌ miʼ qʼuelob chaʼan jiñi mis miʼ yajñesan chuqui jach miʼ taj i qʼuel o chaʼan jiñi alʌ tsʼiʼ miʼ chaʼlen alas. Baʼ ora miʼ tseʼtañob chuqui tac miʼ melob jiñi añimal tac, cʼajtesʌbeñob chaʼan jiñi muʼ bʌ lac melben i yeʼtel juntiquilʌch tijicña bʌ Dios (1 Tim. 1:11).

15. ¿Bajcheʼ miʼ mejlel i ñaʼtañob jiñi tatʌlob chuqui miʼ ñaʼtañob i yalobil? (Proverbios 20:5; qʼuele jaʼel jiñi foto).

¹⁵ An i tajol wocol miʼ yubiñob jiñi tatʌlob chaʼan jiñi i yalobilob miʼ yʌlob chuqui miʼ ñusañob. ¿Bajcheʼ miʼ mejlel a ñaʼtan chuqui miʼ ñaʼtañob a walobil mi cheʼ maʼ wubin jaʼel? (Pejcan Proverbios 20:5). An tatʌlob tajbil bʌ i chaʼañob i wenlel cheʼ bʌ miʼ chaʼleñob tʼan yicʼotob i yalobil baqui miʼ tajob i qʼuel chuqui tac melbil. ¿Chucoch? Junchajp come mach cabʌlic chuqui miʼ mejlel i mʌctañob ti tʼan. Juntiquil tatʌl ti Taiwán i cʼabaʼ Masahiko miʼ yʌl jaʼel: «Cheʼ bʌ mic chaʼlen lon xʌmbal quicʼot lojon calobil ti wits o ti playa, maʼañic miʼ wen bʌcʼñañob tʼan. Jin chaʼan, mach wocolic mi cubin chaʼan mic chaʼlen lojon tʼan yicʼot mi cubin chuqui miʼ ñaʼtañob yicʼot bajcheʼ yubil miʼ yubiñob». Katya, tsaʼ bʌ ajli ti párrafo 9, miʼ yʌl: «Cheʼ bʌ mic loqʼuel ti clase, jiñi c mamá miʼ pʌyon majlel ti jumpʼejl parque wen utsʼatax bʌ. Cheʼ bʌ yaʼañon yaʼi, mach wocolic mi cubin chaʼan mic suben c mamá chuqui mic ñusan ti escuela o chuqui mic pensarin».

16. ¿Bajcheʼ miʼ mejlel i ñusañob i bʌ ti melbil tac bʌ i chaʼan Jehová jiñi familia tac?

¹⁶ Jiñi melbil tac bʌ miʼ coltan jiñi familia tac chaʼan miʼ ñusañob i bʌ yicʼot chaʼan ñumen temel miʼ yajñelob. Jiñi Biblia miʼ yʌl chaʼan an i yorajlel mi lac chaʼlen tseʼñal yicʼot an i yorajlel mi lac chaʼlen tijpʼel (Ecl. 3:1, 4, nota, TNM). Jehová cabʌl chuqui utsʼatax bʌ melbil i chaʼan baqui miʼ mejlel lac mel chuqui tac mi lac mulan. Cabʌl familia miʼ mulañob i ñusan qʼuin ti mateʼel, ti wits o ti playa. An alobob muʼ bʌ i mulañob ajñel o alas ti parque, i qʼuelob jiñi añimal tac o chaʼan miʼ chaʼleñob ñuxijel. Tiʼ sujm, cabʌl bajcheʼ miʼ mejlel lac ñusan lac bʌ ti jiñi melbil tac bʌ i chaʼan Jehová.

17. ¿Chucoch jiñi tatʌlob yom miʼ coltañob i yalobilob chaʼan miʼ ñusañob i bʌ ti jiñi melbil tac bʌ i chaʼan Jehová?

¹⁷ Jiñi tatʌlob yicʼot i yalobilob mi caj i ñumen ñusañob i bʌ ti melbil tac bʌ i chaʼan Jehová yaʼ ti tsijiʼ bʌ pañimil. Maʼañix mi caj lac bʌcʼñan jiñi añimal tac, mi jiñicto mi caj i bʌcʼñañoñobla (Is. 11:6-9). Mi caj lac wen tajben i yorajlel chaʼan mi lac ñusan lac bʌ ti jiñi melbil tac bʌ i chaʼan Jehová (Sal. 22:26). Pero, tatʌlob, mach jinto yom mi laʼ pijtan jiñi chaʼan mi laʼ pʌsben laʼ walobilob chaʼan miʼ qʼuelob jiñi melbil tac bʌ yicʼot miʼ cʌñob tiʼ pejtelel jiñi. Mi ili ora mucʼʌch laʼ cʼʌn jiñi melbil tac bʌ chaʼan mi laʼ pʌsbeñob chaʼan bʌ Jehová jiñi laʼ walobilob, cheʼ mi caj i yubiñob i bʌ bajcheʼ jiñi rey David, tsaʼ bʌ i yʌlʌ: «C Yum, maʼanic yambʌ Dios cheʼ bajcheʼet. Maʼanic yambʌ lajal bʌ i melbal» (Sal. 86:8).