CɅNTESɅNTEL 10
¿Chucoch weñʌch cheʼ maʼ majlel tiʼ tempa bʌ jiñi i testigojob Jehová?
¿Am ba ajñemet tiʼ tempa bʌ jiñi i testigojob Jehová? Mi maʼañic baʼ wis ajñemet tajol maʼ bʌcʼñan majlel. I tajol maʼ cʼajtiben a bʌ: «¿Chuqui miʼ melob ti jiñi tempa bʌ tac? ¿Chucoch wen ñucʼ i cʼʌjñibal i chaʼañob? ¿Yom ba mic majlel jaʼel?». Ti ili cʌntesʌntel mi caj a cʌn chaʼan jiñi tempa bʌ tac miʼ mejlel i ñumen lʌcʼtesañet tiʼ tojlel Dios yicʼot miʼ mejlel i coltañet.
1. ¿Chucoch ñuc i cʼʌjñibal cheʼ mi lac tempan lac bʌ?
Juntiquil tsaʼ bʌ i tsʼijbu jiñi Biblia tsiʼ yʌlʌ chucoch wen ñuc i cʼʌjñibal: «Mic chʼujutesan lac Yum baʼ mi lac tempan lac bʌ» (Salmo 26:12). Ili ora, jiñi i testigojob Jehová miʼ tempañob i bʌ jaʼel, i jiñi miʼ wen aqʼueñob i tijicñʌyel. Tiʼ pejtelel pañimil (mulawil) miʼ tempañob i bʌ ti jujumpʼejl semana chaʼan miʼ chʼujutesañob Dios, miʼ cʼʌyiñob yicʼot miʼ melbeñob oración. Cheʼ jaʼel, ti jujumpʼejl jab miʼ melob colem tempa bʌ tac.
2. ¿Chuqui mi caj a cʌn yaʼ ti tempa bʌ tac?
Ti jiñi tempa bʌ tac miʼ cʼʌjñel i Tʼan Dios, i yaʼi miʼ ñumen tsictesʌntel chuqui yom i yʌl (pejcan Nehemías 8:8). Mi jatet mucʼʌch a majlel, mi caj a ñumen cʌn Jehová yicʼot jiñi wen tac bʌ i melbal (chaʼlibal). Cheʼ bʌ miʼ cʼotel a ñumen cʌn chaʼan miʼ wen cʼuxbiñet, mi caj a ñumen mulan sujtel tiʼ yamigo. Cheʼ jaʼel, mi caj a qʼuel bajcheʼ miʼ mejlel i coltañet Jehová chaʼan tijicña maʼ chumtʌl (Isaías 48:17, 18).
3. ¿Bajcheʼ mi caj i coltañetob jiñi muʼ bʌ caj a cʌñob yaʼ ti tempa bʌ tac?
Jehová miʼ subeñonla chaʼan yom mi «laj comol ñaʼtan lac bʌ chaʼan mi lac ñijcʌben lac bʌ lac pusicʼal lac pʌs cʼuxbiya yicʼot chaʼan mi lac mel chuqui tac wen, pero mach laj cʌy lac tempan lac bʌ» (Hebreos 10:24, 25). Yaʼ ti lon c tempa bʌ tac mi caj a cʌn lac piʼʌlob tiʼ sujm bʌ miʼ cʼuxbiñob i bʌ i yomoʼ bʌ i ñumen cʌn Dios jaʼel cheʼ bajcheʼet. I yaʼi mi caj a wubin tʼan tac loqʼuem bʌ ti Biblia muʼ bʌ i ñuqʼuesʌbeñonla lac pusicʼal (pejcan Romanos 1:11, 12). Cheʼ jaʼel, mi caj a cʌn lac piʼʌlob ñujpuñemobix bʌ yicʼot maxto bʌ ñujpuñemobic am bʌ i lʌtʼʌyob cabʌl wocol. Pejtelel iliyi miʼ pʌsbeñonla chucoch yom Jehová chaʼan mi lac ñʌmtesan lac bʌ chaʼan mi lac majlel ti tempa bʌ tac.
LAʼ LAC ÑUMEN ÑAʼTAN
Laʼ laj qʼuel bajcheʼ yilal miʼ melob i tempa bʌ jiñi i testigojob Jehová i chucoch yomʌch mi lac chaʼlen wersa chaʼan mi lac majlel.
4. Jiñi i tempa bʌ jiñi i testigojob Jehová
Cheʼ ti ñaxam bʌ siglo, jiñi xñoptʼañob miʼ tempañob i bʌ chaʼan miʼ chʼujutesañob Jehová (Romanos 16:3-5). Pejcanla Colosenses 3:16 i tem alʌla iliyi:
¿Bajcheʼ tsiʼ chʼujutesayob Jehová jiñi ñaxam bʌ xñoptʼañob?
Ili ora, jiñi i testigojob Jehová miʼ tempañob i bʌ jaʼel chaʼan miʼ chʼujutesañob Dios. Chaʼan maʼ ñaʼtan bajcheʼ yilal miʼ mejlel jiñi tempa bʌ tac, qʼuelela jiñi VIDEO. Cheʼ jiñi, qʼuelela jiñi dibujo baqui miʼ pʌs chaʼan woli jumpʼejl tempa bʌ i tem alʌla iliyi:
Ti jiñi muʼ bʌ i yʌl Colosenses 3:16, ¿chuqui tac miʼ mejlel ti jumpʼejl i Yotlel tempa bʌ?
Ti jiñi tsaʼ bʌ a qʼuele yaʼ ti video yicʼot yaʼ ti dibujo, ¿chuqui jiñi tsaʼ bʌ a ñumen mulaj ti jiñi muʼ bʌ mejlel yaʼ ti tempa bʌ tac?
Pejcanla 2 Corintios 9:7 i tem alʌla iliyi:
¿Chucoch maʼañic miʼ cʼajtiñob taqʼuin tiʼ tempa bʌ jiñi i testigojob Jehová?
Comol qʼuele a wicʼot jiñi woli bʌ i cʌntesañet chuquiyes mi caj i qʼuejlel ti jiñi tempa bʌ muʼ bʌ caj i mejlel ti jiñi semana.
¿Baqui bʌ maʼ ñumen mulan ti jiñi muʼ bʌ caj i qʼuejlel yaʼ ti tempa bʌ?
¿A wujilix ba?
Yaʼ ti jw.org miʼ mejlel a qʼuel baqui yicʼot chuqui ti qʼuin miʼ mejlel jiñi tempa bʌ tac tiʼ pejtelel pañimil.
Yaʼ ti lon c tempa bʌ miʼ ñusʌntel discurso tac, demostración tac yicʼot video tac. Miʼ tejchel yicʼot jumpʼejl cʼay yicʼot oración i cheʼʌch jaʼel cheʼ bʌ miʼ yujtel.
Jiñi yaʼ bʌ tempʌbilob an baqui miʼ mejlel i yʌcʼob i comentario jaʼel.
Majqui jach miʼ mejlel i cʼotel ti tempa bʌ, mi wiñic, mi xʼixic, mi jiñi añix bʌ i jabilel yicʼot chʼitoñob.
Jiñi tempa bʌ tac muʼ bʌ i melob jiñi i testigojob Jehová mach tojbilic. Maʼañic miʼ tempʌntel taqʼuin yicʼot maʼañic mi lac toj la cochib.
5. Yom mi lac chaʼlen wersa chaʼan mi lac majlel ti tempa bʌ tac
Laʼcu lac ñaʼtan tiʼ tojlel i familia Jesús. Tsaʼ chumleyob ti Nazaret, i ti jujumpʼejl jab yom miʼ majlelob yaʼ ti templo ti Jerusalén, pero yom miʼ chaʼleñob xʌmbal cheʼ bʌ uxpʼejl qʼuin. Pejcanla Lucas 2:39-42 i tem alʌla iliyi:
¿Yomʌch ba miʼ chaʼleñob wersa maʼ wʌl chaʼan miʼ cʼotelob ti Jerusalén?
¿Am ba chuqui miʼ mejlel i mʌctañet maʼ wʌl chaʼan maʼ majlel ti tempa bʌ?
¿Am ba i cʼʌjñibal cheʼ mucʼʌch a chaʼlen wersa? ¿Chucoch?
Jiñi Biblia miʼ yʌl chaʼan ñuc i cʼʌjñibal cheʼ mi lac majlel ti tempa bʌ chaʼan mi lac chʼujutesan Jehová. Pejcanla Hebreos 10:24, 25 i tem alʌla iliyi:
¿Chucoch yomʌch mi lac ñʌmtesan lac bʌ chaʼan mi lac majlel ti tempa bʌ?
AN MUʼ BɅ I YɅLOB: «Mach cʼʌñʌlic mic tempan bʌ quicʼot yambʌlob chaʼan mic chʼujutesan Dios, jasʌl mic pejcan c Biblia ti cotot».
¿Chuqui ti texto o ejemplo am bʌ ti Biblia miʼ pʌs chuqui miʼ pijtan Jehová chaʼan mi lac mel?
TSAʼ BɅ LAJ CɅÑɅ
Cheʼ maʼ majlel ti tempa bʌ tac mi caj i coltañet chaʼan maʼ ñumen cʌn Jehová, chaʼan maʼ ñumen lʌcʼtesan a bʌ tiʼ tojlel yicʼot chaʼan temel maʼ chʼujutesan a wicʼot yambʌlob.
¿Chuqui tsaʼ cʌñʌ?
¿Chucoch miʼ subeñonla Jehová chaʼan mi lac majlel ti tempa bʌ tac?
¿Chuqui mi caj a cʌn tiʼ tempa bʌ jiñi i testigojob Jehová?
¿Bajcheʼ tac miʼ mejlel i coltañet maʼ wʌl jiñi tempa bʌ tac?
CɅÑɅ YAN TAC BɅ
¿Muʼ baʼ bʌcʼñan majlel ti tempa bʌ? Juntiquil wiñic cheʼ bʌ tsiʼ yubi i bʌ bajcheʼ jiñi tsaʼ cʼoti i wen mulan cheʼ bʌ tsajñi. Qʼuele chucoch.
¡Maʼañic mi caj i ñajʌyel lon c chaʼan bajcheʼ tsaʼ pejcʌntiyon lon! (4:16)
Cʌñʌ tiʼ tojlel juntiquil xcolel tsaʼ bʌ i wen mulaj jiñi tempa bʌ tac i qʼuele chuquiyes tsiʼ mele chaʼan maʼañic miʼ cʌy majlel.
Qʼuele chuqui miʼ yʌlob chaʼtiqui uxtiquilob chaʼan jiñi tempa bʌ tac.
«¿Chucoch yomʌch mi lac majlel ti tempa bʌ tac?» (Tema am bʌ ti jw.org)
Qʼuele bajcheʼ juntiquil wiñic tsiʼ cʌyʌ i mel mach tac bʌ weñic cheʼ bʌ tsajñi tiʼ tempa bʌ jiñi i testigojob Jehová.
«Tiʼ pejtelel ora an quicʼot c juloñib» (Lac Tsictesʌbentel, 1 i chaʼan julio, 2014)