Mach la cotsan lac bʌ ti política ti ili pañimil

 1. ¿Bajcheʼ miʼ mejlel lac jacʼben i tʼan Dios yicʼot jiñi yumʌlob ti pañimil?

JIÑI Biblia miʼ pʌs chaʼan yom mi lac jacʼben i tʼan añoʼ bʌ i yeʼtel. Pero miʼ pʌs jaʼel chaʼan yom mi lac jacʼben i tʼan Dios tiʼ pejtelel ora (Hechos 5:29; Tito 3:1). ¿Bajcheʼ miʼ mejlel lac mel ili chaʼchajp? Yaʼ ti Biblia an jumpʼejl principio muʼ bʌ i coltañonla. Jesús tsiʼ yʌlʌ: «Aqʼuenla César i chaʼan bʌ César. Aqʼuenla Dios i chaʼan bʌ Dios» (Mateo 22:21)^[1] (qʼuele jiñi nota am bʌ tiʼ yujtibal ili temaj). ¿Bajcheʼ mi la cʌqʼuen «César i chaʼan bʌ César»? Jiñʌch cheʼ mi lac jacʼben i tʼan yumʌlob, mi laj qʼuelob ti ñuc yicʼot cheʼ mi lac tsʼʌctesan jiñi tojoñel tac (Romanos 13:7). Pero ¿ixcu miʼ jiñi yumʌlob miʼ xicʼoñobla lac mel maʼañic bʌ miʼ mulan Dios? Maʼañic mi cajel lac jacʼ. Pero tiʼ pejtelel ora mi laj qʼuelob ti ñuc.

 2. ¿Bajcheʼ mi lac pʌs chaʼan maʼañic mi la cotsan lac bʌ tiʼ chaʼan bʌ política?

² Junchajp bajcheʼ mi la cʌqʼuen «Dios i chaʼan bʌ Dios» jiñʌch cheʼ maʼañic mi la cochel ti política. Yom i yʌl chaʼan cheʼ miʼ tajtʌl ti tʼan, maʼañic majqui mi caj la cʌqʼuen laj coltaya (Isaías 2:4). ¿Bajcheʼ mi lac pʌs iliyi? Maʼañic mi laj contrajin yumʌlob come la cujil chaʼan Jehová miʼ yʌcʼ chaʼan laʼ ajñicob. Cheʼ jaʼel, maʼañic mi lac mel muʼ bʌ i yʌcʼ ti ñaʼtʌntel chaʼan jin ñumen wen lac país (Romanos 13:1, 2). Maʼañic baʼ ora mi lac ñop laj qʼuextan yumʌlob yicʼot maʼañic majqui mi lac ñop lac suben chuqui yom miʼ mel. Cheʼ jaʼel, maʼañic mi lac majlel ti votación mi muqʼuic la cotsan lac bʌ ti política.

 3. ¿Chucoch mach yomic mi la cotsan lac bʌ ti política?

³ ¿Chucoch mach yomic Dios cheʼ mi la cotsan lac bʌ ti política? An cabʌl chucoch. Ñaxam bʌ, come mi lac mel tsaʼ bʌ i mele Jesús. Tsiʼ yʌlʌ: «Joñon mach i chaʼañonic pañimil». Jin chaʼan, maʼañic baqui ora tsiʼ yotsa i bʌ ti política mi tsaʼic i chaʼle guerra (Juan 6:15; 17:16). Yambʌ, yom cheʼ maʼañic mi la cotsan lac bʌ come cojach mi la cʌcʼ laj coltaya tiʼ Yumʌntel Dios. Cheʼ muqʼuic laj coltan juntiquil yumʌl ti pañimil (mulawil), ¿bajcheʼ miʼ mejlel lac suben tiʼ sujm wiñicob xʼixicob (quixtañujob) chaʼan cojach i yumʌntel Dios mi caj i tojʼesan lac wocol? Cojix bʌ, yomʌch cheʼ maʼañic mi la cotsan lac bʌ come miʼ coltañonla chaʼan chʌn temel mi la cajñel la quicʼot la quermañojob tiʼ pejtelel pañimil. Jiñi mach bʌ isujmic ñopbalʌl miʼ tʼox quixtañujob come miʼ yotsañob i bʌ ti política (1 Pedro 2:17).

 4. a) ¿Bajcheʼ la cujil chaʼan ñumen wocol miʼ cajel ti talto bʌ qʼuin cheʼ maʼañic mi la cotsan lac bʌ ti política? b) ¿Chucoch yom mi lac chajpan lac bʌ ili ora chaʼan maʼañic mi la cotsan lac bʌ?

⁴ Tajol chumulonla ti jumpʼejl tejclum baqui maʼañic mi lac subentel ochel ti jumpʼejl partido político. Pero cheʼ miʼ ñumen lʌcʼtiyel tilel i jilibal i pañimil Satanás, ñumen wocol mi caj la cubin chaʼan maʼañic mi la cotsan lac bʌ ti política. Cheʼ bajcheʼ miʼ yʌl 2 Timoteo 3:3, 4, ili ora jiñi quixtañujob wen bʌbʌqʼuen i chaʼlibalob i «mach chaʼ utsʼayob cheʼ michʼob» (Jini wen bʌ tʼan). I ti jujumpʼejl qʼuin mi caj i ñumen tʼoxob i bʌ. Mach yʌxʌlic la co miʼ mejlel ti qʼuextʌyel jiñi política ti jumpʼejl país. Ili añix ujtem ti yan tac bʌ tejclum, jiñi hermanojob an i tajayob tsʌts tac bʌ wocol. Jin chaʼan, ili ora yom mi lac chajpan lac bʌ chaʼan maʼañic mi la cotsan lac bʌ ti política anquese añonla ti tsʌts bʌ wocol. Laʼ laj qʼuel chʌnchajp muʼ bʌ mejlel i coltañonla lac chajpan lac bʌ.

 5. ¿Bajcheʼ yilal miʼ qʼuel Jehová jiñi yumʌlob ti pañimil?

⁵ Junchajp bajcheʼ miʼ mejlel lac chajpan lac bʌ chaʼan maʼañic mi la cotsan lac bʌ ti política jiñʌch cheʼ mi laj qʼuel jiñi yumʌlob cheʼ bajcheʼ miʼ qʼuel Jehová. Cheʼ bʌ Jehová tsiʼ mele quixtañujob, maʼañic tsiʼ yʌcʼʌ chaʼan miʼ yuman yañoʼ bʌ (Jeremías 10:23). Jehová miʼ qʼuel jiñi quixtañujob bajcheʼ jumpʼejl jach familia. Pero jiñi yumʌlob miʼ tʼoxob cheʼ bʌ miʼ yʌlob chaʼan ñumen weñob i país. Anquese an yumʌlob muʼ bʌ i chaʼleñob wersa i melob chuqui wen, maʼañic miʼ mejlel i tojʼesañob tiʼ pejtelel wocol. Yicʼot jaʼel, jiñi yumʌlob ti pañimil miʼ contrajiñob i yumʌntel Dios, tsaʼ bʌ tejchi cheʼ ti 1914. Jiñi i yumʌntel Dios mach jalix mi caj i jisan tiʼ pejtelel jiñi yumʌlob ti pañimil (pejcan Salmo 2:2, 7-9).

 6. ¿Bajcheʼ yilal yom mi laj qʼuelob añoʼ bʌ i yeʼtel ti yumʌl?

⁶ Dios woli (choncol) to i yʌcʼ chaʼan añob jiñi yumʌlob come miʼ chaʼleñob coltaya chaʼan ñʌchʼʌl yicʼot chaʼan wen miʼ yajñel jiñi quixtañujob. Ili miʼ coltañonla chaʼan mi lac sub jiñi i Yumʌntel Dios (Romanos 13:3, 4). Cheʼ jaʼel, Jehová miʼ subeñonla chaʼan yom mi lac taj ti oración jiñi añoʼ bʌ i yeʼtel, chaʼan tijicña miʼ mejlel lac chʼujutesan Jehová (1 Timoteo 2:1, 2). Mi an majqui miʼ toʼol ticʼlañonla, miʼ mejlel laj cʼajtiben i coltaya jiñi yumʌlob cheʼ bajcheʼ tsiʼ mele jiñi apóstol Pablo (Hechos 25:11). Isujmʌch chaʼan jiñi Biblia miʼ yʌl chaʼan Satanás an tiʼ cʼʌb jiñi yumʌlob, pero maʼañic miʼ yʌl chaʼan an tiʼ cʼʌb jujuntiquil am bʌ i yeʼtel ti jumpʼejl yumʌl (Lucas 4:5, 6). Jin chaʼan mach yomic mi la cʌl chaʼan Satanás woli (yʌquel) i xicʼ juntiquil quixtañu muʼ bʌ ti eʼtel (troñel) yicʼot yumʌl. Jiñi Biblia miʼ yʌl chaʼan yom mi laj qʼuelob ti ñuc jiñi yumʌlob yicʼot mach yomic mi la cʌl mach bʌ weñic tiʼ tojlelob (Tito 3:1, 2).

 7. ¿Chuqui mach bʌ yomic mi lac ñaʼtan?

⁷ Maʼañic mi cotsan lac bʌ ti política, mi muqʼuic cʌqʼuen laj coltaya jumpʼejl partido político come com lac jacʼben i tʼan Dios. Wocolʌch iliyi, ñumento cheʼ miʼ ñaʼtañob i mel chuqui miʼ mejlel i coltañonla. Jumpʼejl ejemplo, laʼ lac ñaʼtan chaʼan jiñi wiñicob xʼixicob baqui chumulonla miʼ contrajiñob jiñi yumʌlob come an pʼojlesayob cabʌl wocol. Tajol an i ticʼla jaʼel jiñi i testigojob Jehová. ¿Chuqui mi caj lac mel? Tiʼ sujm, maʼañic mi caj la cotsan lac bʌ la quicʼotob. Pero ¿muʼ ba caj laj qʼuel ti wen i mi la cʌl ti lac pusicʼal chaʼan yomʌch cheʼ muqʼuic i mejlel chuqui yomob? (Efesios 2:2). Mi mach la com la cotsan lac bʌ ti política, yom wen tsajilonla ti chuqui mi la cʌl yicʼot mi lac mel. Pero ñuc bʌ jaʼel jiñʌch cheʼ maʼañic mi la cʌl ti lac pusicʼal chaʼan añʌch junmojt wem bʌ chuqui woliʼ mel o ñumen wen bajcheʼ jiñi yambʌ.

 8. Cheʼ wocol mi la cubin chaʼan maʼañic mi la cotsan lac bʌ ti política, ¿bajcheʼ miʼ mejlel lac pʌs lac pʼipʼlel yicʼot la cutslel?

⁸ I chaʼchajplel bajcheʼ yom mi lac chajpan lac bʌ chaʼan maʼañic mi la cotsan lac bʌ ti política jiñʌch cheʼ pʼipʼonla «cheʼ bajcheʼ lucum» pero utsonla jeʼel «bajcheʼ xʼujcuts» (pejcan Mateo 10:16, 17). ¿Chuqui miʼ mejlel lac mel chaʼan pʼipʼonla? Miʼ mejlel lac ñaʼtan chuqui tac tajol miʼ mejlel i tilel ti lac tojlel. ¿I bajcheʼ utsonla mi lac mejlel ti ajñel? Jiñʌch cheʼ maʼañic mi la cotsan lac bʌ ti política cheʼ bʌ an wocol. Mi caj laj qʼuel jiñi muʼ bʌ lac ñusan yicʼot muʼ bʌ caj i coltañonla chaʼan maʼañic mi la cotsan lac bʌ ti política.

 9. ¿Bajcheʼ yom tsajilonla cheʼ mi lac chaʼlen tʼan yicʼot yañoʼ bʌ?

⁹ Cheʼ bʌ mi lac chaʼlen tʼan yicʼot yañoʼ bʌ. Cheʼ bʌ jiñi quixtañujob miʼ techob i yʌl chaʼan política, yom wen tsajilonla. Jumpʼejl ejemplo, mi an majqui woli lac suben chaʼan bʌ i Yumʌntel Dios, maʼañic mi caj laj cʌl mi wen o mach weñic chuqui miʼ ñaʼtan i mel jiñi yumʌlob o jumpʼejl partido político. ¿Ixcu mi yom i subeñonla chuqui miʼ ñaʼtan i mel jiñi yumʌlob chaʼan miʼ tojʼesañob wocol? Laʼ lac pʌsben ti Biblia chaʼan cojach i Yumʌntel Dios mi caj i jisan tiʼ pejtelel ora jiñi wocol. ¿Ixcu mi yom i tech michʼajel tiʼ caj temaj tac chaʼan jiñi muʼ bʌ i toʼol chocob i yalobil o chaʼan jiñi laj bʌ wiñicob o xʼixicob miʼ ñujpuñelob? Yom mi lac suben chuqui miʼ yʌl jiñi Biblia, yicʼot mi lac tsictesʌben bajcheʼ miʼ tojʼesañonla. ¿Ixcu mi tsiʼ subeyonla chaʼan an chuqui yom miʼ locʼsʌntel o qʼuextʌyel ti jiñi mandar? Maʼañic chuqui yom mi caj la cʌl chaʼan jiñi temaj mi yomic to mi caj lac wersa ñop laj qʼuextʌben chuqui miʼ ñaʼtan.

10. Cheʼ bʌ an chuqui mi laj qʼuel ti televisión o cheʼ bʌ mi lac pejcan jun tac, ¿bajcheʼ miʼ mejlel lac pʌs chaʼan maʼañic woli la cotsan lac bʌ ti alol jiñi política?

¹⁰ Cheʼ bʌ mi lac pejcan o mi laj qʼuel noticia tac. An i tajol, an periódico yicʼot noticia tac muʼ bʌ i ñumel baqui miʼ yʌqʼueñob i coltaya jumpʼejl organización o jumpʼejl partido político. An país cheʼ bʌ miʼ mejlel iliyi come jiñi yumʌlob añob tiʼ wenta miʼ qʼuel chuqui yom miʼ ñusʌntel ti noticia tac. Mi jumpʼejl oficina chaʼan noticia o juntiquil periodista miʼ yʌcʼ i coltaya, yom mi laj qʼuel chaʼan mach cheʼic mi lac mel. Jumpʼejl ejemplo, yom mi laj cʼajtiben lac bʌ: «¿Muʼ ba c mulan c ñʌchʼtan chuqui miʼ yʌl juntiquil muʼ bʌ i ñusan noticia come lajal mic ñaʼtan bajcheʼ miʼ ñaʼtan chaʼan jiñi política?». Mi mach la comic la cotsan lac bʌ ti política, mach laj qʼuel o lac pejcan tiʼ pejtelel ora baqui miʼ yʌjlel chaʼan miʼ coltañob chaʼan política. Laʼ laj qʼuel periódico o noticia maʼañic bʌ miʼ yotsan i bʌ ti política. Cheʼ bʌ mi laj qʼuel o mi lac pejcan noticia tac, yom mi lac chʌcʌ cʼajtesan muʼ bʌ i cʌntesañonla jiñi Biblia (2 Timoteo 1:13).

11. Cheʼ mi lac wen cʼuxbin lac chubʌʼan, ¿chuqui miʼ mejlel ti ujtel?

¹¹ Mi ñuc mi laj qʼuel am bʌ lac chaʼan. Wocol mi caj la cubin chaʼan maʼañic mi la cotsan lac bʌ ti política mi wen ñuc mi la cʌcʼ jiñi taqʼuin yicʼot chubʌʼañʌl tac. Laʼ laj qʼuel jumpʼejl ejemplo. Ti jiñi país Malaui, cheʼ bʌ tsaʼix ñumi jiñi jabil 1970, yonlel Testigojob tsiʼ cʌyʌyob chuqui an i chaʼañob come maʼañic tsiʼ jacʼʌyob i yotsañob i bʌ ti jumpʼejl partido político. Pero juntiquil hermana i cʼabaʼ Ruth tsiʼ yʌlʌ chaʼan an maʼañic bʌ tsiʼ cʌyʌyob i chubʌʼañob. Anquese tsaʼ majliyob ti putsʼel baqui añob yambʌ i testigojob Jehová, ti wiʼil tsaʼ ochiyob ti jiñi partido político chaʼan miʼ chaʼ mejlelob ti sujtel tiʼ yotot. Lʌcʼʌl tiʼ pejtelel i wiñicob Dios, maʼañic tsiʼ jacʼʌyob ochel ti política anquese mach cabʌlobic i taqʼuin o miʼ sʌtob tiʼ pejtelel chuqui añob i chaʼan (Hebreos 10:34).

12, 13. a) ¿Bajcheʼ yilal miʼ qʼuel Jehová jiñi quixtañujob? b) ¿Bajcheʼ miʼ mejlel lac ñaʼtan mi ñuc woli laj qʼuel lac bʌ chaʼan lac país?

¹² Mi ñuc mi la cubin lac bʌ chaʼan lac país o laj cultura. Ti ili pañimil jiñi quixtañujob cʌmbilob chaʼan miʼ chanʼesañob i bʌ yicʼot chaʼan miʼ qʼuelob ti ñuc i país, i colorlel i pʌchʌlel yicʼot i lumalob o i cultura. Pero Jehová maʼañic miʼ yʌl chaʼan an juntiquil o junmojt quixtañu ñumen yujilob. Lajal jach miʼ luʼ qʼuelonla. La cujil chaʼan Dios mach junlajal tsiʼ meleyonla. Miʼ mejlel lac taj lac tijicñʌyel laj qʼuel jiñi, yicʼot jiñi chuqui am bʌ. Jehová mach yomic mi laj cʌy laj cultura. Pero mach yomic jaʼel chaʼan ñumen ñuc mi la cubin lac bʌ tiʼ tojlel yañoʼ bʌ (Romanos 10:12).

¹³ Mach yomic mi lac chanʼesan lac bʌ chaʼan lac país i mi lac ñaʼtan chaʼan ñumen wen bajcheʼ yan tac bʌ. Mach wocolic mi caj la cotsan lac bʌ ti política mi cheʼ mi la cubin lac bʌ bajcheʼ jiñi. Cheʼ tsaʼ ujti tiʼ yorajlel ñaxam bʌ xñoptʼañob. Cabʌl xñoptʼan hebreojoʼ bʌ tsiʼ meleyob mach bʌ weñic tiʼ tojlel mebaʼ xʼixicob xñoptʼañoʼ bʌ chʼoyoloʼ bʌ ti Grecia (Hechos 6:1). ¿Bajcheʼ mi lac ñaʼtan mi woli lac tech lac chanʼesan lac bʌ? La lac ñaʼtan: «¿Chuqui mic mel mi juntiquil hermano chʼoyol bʌ ti yambʌ país miʼ subeñon chuqui yom mic mel? ¿Maʼañic ba mic jacʼ come mic ñaʼtan chaʼan ñumen wen bajcheʼ miʼ mejlel tic país?». Mi cheʼ mi lac ñaʼtan, yom mi laj cʼajtesan chaʼan yom pecʼonla miʼ yʌl jiñi Biblia yicʼot mi lac ñaʼtan chaʼan jiñi yañoʼ bʌ ñumen ñucob (Filipenses 2:3).

14. a) ¿Bajcheʼ mi mejlel i coltañonla jiñi oración? b) Acʼʌ jumpʼejl ejemplo loqʼuem bʌ ti Biblia baqui miʼ pʌs chaʼan añʌch i pʼʌtʌlel jiñi oración.

¹⁴ I yuxchajplel chaʼan maʼañic mi la cotsan lac bʌ ti política jiñʌch cheʼ mi laj cʼajtiben i coltaya Jehová. Jiñi oración miʼ wen coltañonla. Jumpʼejl ejemplo, miʼ mejlel laj cʼajtiben Dios chʼujul bʌ i yespíritu, ili miʼ coltañonla chaʼan la cujil pijt yicʼot mi lac ticʼ lac pusicʼal. Mi caj i coltañonla cheʼ bʌ jiñi yumʌl miʼ chaʼlen lot o miʼ mel mach bʌ weñic. Cheʼ jaʼel miʼ mejlel laj cʼajtiben Dios lac ñaʼtʌbal chaʼan maʼañic mi la cotsan lac bʌ ti política yicʼot chaʼan miʼ yʌqʼueñonla lac pʼʌtʌlel tiʼ melol chuqui wen (Santiago 1:5). Tajol mi caj lac chojquel majlel ti cárcel o mi laj cʌqʼuentel yambʌ wocol come xucʼulonla tiʼ tojlel Dios. Mi cheʼ tsaʼ ujtiyonla, laʼ laj cʼajtiben lac chʼejlel Jehová chaʼan mi lac tsictesan ti wen chucoch maʼañic mi la cotsan lac bʌ ti política. Jehová mi caj i chʌn coltañonla lac lʌtʼ jiñi wocol. Miʼ mejlel laj qʼuel jumpʼejl ejemplo chaʼan añʌch i pʼʌtʌlel jiñi oración yaʼ ti Hechos 4:27-31 (pejcan).

15. ¿Bajcheʼ miʼ mejlel i coltañonla jiñi Biblia chaʼan maʼañic mi la cotsan lac bʌ ti política? (Qʼuele jaʼel jiñi recuadro «I Tʼan Dios tsiʼ coltayob chaʼan chʌn xucʼul miʼ yajñelob»).

¹⁵ Jehová miʼ yʌqʼueñonla jiñi Biblia chaʼan mi lac taj lac pʼʌtʌlel. An versículo tac muʼ bʌ i coltañonla chaʼan maʼañic mi la cotsan lac bʌ ti política. Miʼ mejlel lac ñaʼtan texto tac i mi laj cʌcʼ ti laj col chaʼan miʼ coltañonla cheʼ baqui ora maʼañic lac Biblia. Miʼ mejlel i pʼʌtʼesan lac pijtaya jiñi wʌn albil bʌ i chaʼan Dios ti talto bʌ qʼuin. I cʼʌjñibalʌch lac chaʼan ili pijtaya chaʼan mi lac lʌtʼ jiñi ticʼlʌntel (Romanos 8:25). Laʼ lac sajcan versículo tac muʼ bʌ i taj ti tʼan jiñi tsijiʼ bʌ pañimil i laʼ lac ñaʼtan chuqui com lac mel ti jimbʌ ora.

16, 17. ¿Chuqui miʼ mejlel laj cʌn tiʼ tojlelob jiñi xucʼuloʼ bʌ i wiñicob Dios cheʼ maʼañic tsiʼ yotsayob i bʌ ti política? (Qʼuele jiñi foto am bʌ tiʼ tejchibal).

¹⁶ Jiñi cojix bʌ yom bʌ mi lac mel chaʼan maʼañic mi la cotsan lac bʌ ti política jiñʌch cheʼ mi lac ñaʼtan tsaʼ bʌ i mele jiñi xucʼul bʌ i wiñicob Jehová. Jiñi Biblia miʼ yʌl chaʼan ti wajali yonlel tsiʼ pʌsʌyob i chʼejlel yicʼot wen chuqui tsiʼ ñaʼtayob i mel, jiñʌch tsiʼ coltayob chaʼan maʼañic miʼ yotsañob i bʌ ti política. Jumpʼejl ejemplo, Sadrac, Mesac yicʼot Abednego maʼañic tsiʼ jacʼʌyob i chʼujutesan jumpʼejl imagen lajal bʌ bajcheʼ juntiquil yumʌl yaʼ ti Babilonia (pejcan Daniel 3:16-18). Ili miʼ wen coltan yonlel Testigojob ili ora chaʼan miʼ pʌsob i chʼejlel yicʼot maʼañic miʼ jacʼob i chʼujutesan i bandera jiñi país baqui chumulob. Laʼ lac ñaʼtan jaʼel jiñi ejemplo i chaʼan Jesús. Maʼañic tsiʼ yotsa i bʌ ti política mi jiñic baqui miʼ tech tʼox bʌ. Yujil chaʼan jiñi wem bʌ tsiʼ mele mi caj i coltan jiñi xcʌntʼañob i chaʼan. Jin chaʼan tsiʼ subeyob: «Tsac jisʌbe i yumʌntel pañimil» (Juan 16:33).

¹⁷ Ti ili ora yonlel Testigojob maʼañic miʼ yotsañob i bʌ ti política. An ticʼlʌbiloʼ bʌ, otsʌbiloʼ bʌ ti cárcel o an tsʌnsʌbilob tiʼ caj i xucʼtʌlelob ti Jehová. Ili miʼ yʌqʼueñonla lac chʼejlel jaʼel. Juntiquil hermano ti Turquía tsiʼ yʌlʌ: «Franz Reiter juntiquilʌch xcolel tsaʼ bʌ tsʌnsʌnti chaʼan maʼañic tsaʼ ochi tiʼ soldado Hitler. Jiñi carta tsaʼ bʌ i tsʼijbube i ñaʼ cheʼ cojix bʌ acʼʌlel cuxul, tsiʼ pʌsʌ chaʼan wen pʼʌtʌlʌch i ñopoñel (chʼujbiya) ti Dios. Cheʼʌch com c mel bajcheʼ tsiʼ mele cheʼ baqui ora mic taj tsʌts bʌ wocol bajcheʼ jiñi»^[2] (qʼuele jiñi nota am bʌ tiʼ yujtibal ili temaj).

18, 19. a) ¿Bajcheʼ miʼ mejlel i coltañoñobla jiñi hermanojob chaʼan maʼañic mi la cotsan lac bʌ ti política? b) ¿Chuqui a wom bʌ a mel ili ora?

¹⁸ Jiñi hermanojob miʼ mejlel i coltañoñobla chaʼan maʼañic mi la cotsan lac bʌ ti política. Mi añonla ti tsʌts bʌ wocol, laʼ lac suben jiñi ancianojob. Miʼ mejlel i yʌqʼueñoñobla wem bʌ ticʼojel loqʼuem bʌ ti Biblia. Cheʼ jaʼel, mi jiñi hermanojob ti congregación yujilob chuqui woli lac ñusan, miʼ mejlel i pʼʌtʼesañoñobla jaʼel. Miʼ mejlel lac subeñob chaʼan miʼ melob oración ti lac tojlel. Cheʼ jaʼel miʼ mejlel lac pʼʌtʼesañob i mi lac chaʼlen oración tiʼ tojlelob (Mateo 7:12). Yaʼ ti página chaʼan Internet www.jw.org/es miʼ mejlel a taj jumpʼejl lista chaʼan jiñi hermanojob añoʼ bʌ ti cárcel^[3] (qʼuele jiñi nota am bʌ tiʼ yujtibal ili temaj). Sʌclʌben i cʼabaʼ jiñi hermanojob i cʼajtiben Jehová chaʼan miʼ coltañob chaʼan chʼejl yicʼot xucʼul miʼ yajñelob (Efesios 6:18-20).

¹⁹ Cheʼ mi ñumen lʌcʼtiyel i jilibal ili pañimil, tajol jiñi yumʌlob mi caj i xicʼoñobla ochel ti jumpʼejl partido político. Jin chaʼan, wen i cʼʌjñibal cheʼ mi lac chajpan lac bʌ ili ora chaʼan maʼañic mi la cotsan lac bʌ ti política ti ili pañimil tʼoxbil bʌ.