Laʼ laj qʼuel ti ñuc bajcheʼ miʼ yubin i bʌ yambʌlob

 1. Cheʼ bajcheʼ miʼ yʌl 1 Pedro 3:8, ¿chucoch tijicña mi la cubin cheʼ añonla la quicʼot muʼ bʌ i chʼʌmob ti ñuc bajcheʼ yubil mi la cubin yicʼot bajcheʼ añonla?

TI LAC pejtelel tijicña mi la cubin cheʼ añonla la quicʼot muʼ bʌ i chʼʌmob ti ñuc bajcheʼ yubil mi la cubin yicʼot bajcheʼ añonla. Come miʼ chaʼleñob wersa i chʼʌmbeñob isujm chuqui mi lac ñusan, jiñi am bʌ ti lac pensar yicʼot bajcheʼ yubil mi la cubin lac bʌ. Miʼ ñaʼtañob chuqui i cʼʌjñibal lac chaʼan i miʼ subeñoñobla i coltaya anquese maxto laj cʼajti. Mi lac wen qʼuel ti ñuc jiñi muʼ bʌ i yubiñob bajcheʼ yubil mi la cubin lac bʌ o miʼ pʼuntañoñobla,b cheʼ bajcheʼ miʼ yʌl 1 Pedro 3:8 (pejcan).

 2. ¿Chucoch wocol mi la cubin chaʼan mi lac chʼʌm ti ñuc bajcheʼ miʼ yubin i bʌ yambʌlob?

² Jiñi xñoptʼañonbʌla la com la cubin bajcheʼ miʼ yubiñob i bʌ yambʌlob. Pero an qʼuiñil wocol mi la cubin chaʼan mi lac mel (chaʼlen). ¿Chucoch? Junchajp jiñʌch cheʼ xmulilonla i yom mi lac chaʼlen wersa chaʼan mach cojach mi lac bajñel ñaʼtan lac bʌ (Ro. 3:23). I an wocol bʌ mi la cubin tiʼ caj bajcheʼ tsaʼ coliyonla yicʼot chuqui an lac ñusa. I cheʼ jaʼel, tajol an lac toybe i melbal jiñi wiñicob xʼixicob (quixtañujob) come ti ili cojix bʌ qʼuin mach i wentajob bajcheʼ miʼ yubin i bʌ yambʌlob, jin jach miʼ cʼuxbiñob i bʌ (2 Ti. 3:1, 2). ¿Chuqui miʼ mejlel i coltañonla chaʼan mi lac mʌlben (jotben) tac iliyi i mi lac chʼʌm ti ñuc bajcheʼ miʼ yubiñob i bʌ yambʌlob?

 3. a) ¿Chuqui mi caj i coltañonla chaʼan mi lac ñumen chʼʌm ti ñuc bajcheʼ mi yubiñob i bʌ yambʌlob? b) ¿Chuqui mi caj laj qʼuel ti ili temaj?

³ Muʼ bʌ caj i coltañonla chaʼan mi lac ñumen pʌs chaʼan mi lac chʼʌm ti ñuc bajcheʼ miʼ yubiñob i bʌ yambʌlob jiñʌch cheʼ mi lac lajin Jehová yicʼot Jesucristo. Jehová jiñʌch juntiquil Dios wen yujil bʌ cʼuxbiya i miʼ pʌsbeñonla bajcheʼ yom mi lac mel (1 Jn. 4:8). Jesús tsiʼ pʌsʌ jiñi wen tac bʌ i melbal i Tat (Jn. 14:9). Cheʼ wʌʼto an ti Pañimil, tsiʼ pʌsʌ chaʼan jiñi quixtañujob mejlʌch i pʌsob jiñi pʼuntaya. Ti ili temaj, mi caj lac ñaxan tsajin bajcheʼ an i pʌsʌyob Jehová yicʼot Jesús chaʼan miʼ chʼʌmob ti ñuc bajcheʼ miʼ yubiñob i bʌ yambʌlob, i ti wiʼil mi caj laj qʼuel bajcheʼ miʼ mejlel lac lajiñob.

 4. ¿Bajcheʼ miʼ pʌs Isaías 63:7-9 chaʼan Jehová miʼ chʼʌm ti ñuc bajcheʼ yubil miʼ yubiñob i bʌ jiñi i wiñicob?

⁴ Jiñi Biblia miʼ yʌl chaʼan Jehová miʼ chʼʌm ti ñuc bajcheʼ yubil miʼ yubin i bʌ jiñi i wiñicob. Jumpʼejl ejemplo, laʼ laj qʼuel bajcheʼ tsiʼ yubi i bʌ cheʼ bʌ jiñi israelob tsiʼ ñusayob wocol tac. Jiñi i Tʼan Dios miʼ yʌl: «Tiʼ pejtelel i wocol c tat lojon tsaʼ wubi wocol» (pejcan Isaías 63:7-9). Ti wiʼil, tsiʼ cʼʌñʌ jiñi xʼaltʼan Zacarías chaʼan miʼ yʌcʼ ti ñaʼtʌntel chaʼan cheʼ miʼ ticʼlʌntel i tejclum cheʼʌch bajcheʼ jin woli (choncol) i ticʼlʌntel. Tiʼ sube jiñi i wiñicob: «Jini muʼ bʌ i ticʼlañetla miʼ ticʼlan Dios jaʼel» (Zac. 2:8). Tsiquil chaʼan Jehová mucʼʌch i wen qʼuel ti ñuc i tejclum.

 5. Alʌ jumpʼejl ejemplo chaʼan am bʌ i mele Jehová chaʼan miʼ coltan jiñi i wiñicob cheʼ woliʼ ñusañob wocol.

⁵ Cheʼ miʼ yubiñob wocol jiñi i wiñicob Jehová, mach cojach miʼ pʼuntañob, cheʼ jaʼel, an chuqui miʼ mel chaʼan miʼ coltañob. Laʼ laj qʼuel jumpʼejl ejemplo. Cheʼ bʌ jiñi israelob yaʼ cʌchʌlob ti Egipto, Jehová cʼux tsiʼ yubi chaʼan chuqui woli (yʌquel) i ñusañob, i jin tsiʼ ñijca chaʼan miʼ coltañob. Tiʼ sube Moisés: «Tsaʼix j qʼuelbe i wocol c winicob xʼixicob [...]. Tsaʼix cubibe i yoñel [...]. Cʌmbil c chaʼan i wocol. Tsaʼix jubiyon tilel chaʼan mic locʼsañob ti jini lum» (Éx. 3:7, 8). Come tsiʼ wen pʼuntayob, tsiʼ coltayob chaʼan libre miʼ yajñelob. Ti wiʼil, cheʼ yaʼix añob ti jiñi Lum tsaʼ bʌ wʌn Subentiyob, tsaʼ caji i contrajintelob ti yambʌ tejclum tac. ¿Chuqui tsiʼ mele Dios? Jiñi Biblia miʼ yʌl chaʼan «tsiʼ yubibeyob i yajcʌn cheʼ bʌ tsaʼ ticʼlʌntiyob». Tsaʼʌch i chaʼ coltayob come tsiʼ chʼʌmʌ ti ñuc bajcheʼ miʼ yubiñob i bʌ, jin chaʼan tsiʼ choco cʼotel juezob chaʼan miʼ cojlelob tiʼ contrajob (Jue. 2:16, 18).

 6. Alʌ junchajp baqui Jehová tsiʼ chʼʌmʌ ti ñuc bajcheʼ tsiʼ yubi i bʌ juntiquil mach bʌ tojic bajcheʼ tsiʼ ñaʼta.

⁶ Jehová miʼ chʼʌm ti ñuc bajcheʼ miʼ yubin i bʌ i wiñicob, cheʼto jeʼel cheʼ mach tojic chuqui miʼ ñaʼtañob. Laʼ laj qʼuel chuqui tsaʼ ujti tiʼ tojlel jiñi xʼaltʼan Jonás. Jehová tsiʼ choco majlel ti Nínive chaʼan miʼ suben jiñi quixtañujob chaʼan mi caj i tojob i mul. Pero Dios tsiʼ ñusʌbeyob i mul come tsiʼ tojʼesayob i melbal. Jonás maʼañic tsiʼ mulaj jiñi, «tsaʼ wen michʼa» come maʼañic tsaʼ tsʼʌctiyi bajcheʼ tsiʼ lon subu. Pero Jehová maʼañic tsaʼ michʼa yicʼot Jonás i tsiʼ colta chaʼan miʼ tojʼesan i pensar (Jon. 3:10–4:11). Ti wiʼil, Jonás tsiʼ chʼʌmbe i sujm chucoch tsaʼ ujti bajcheʼ jiñi, i Dios tsiʼ yʌqʼue i tsʼijbun tsaʼ bʌ ujti tiʼ tojlel chaʼan lac wenlel (Ro. 15:4).c

 7. ¿Chuqui miʼ mejlel lac ñop tiʼ tojlel Jehová cheʼ bʌ mi laj qʼuel am bʌ i mele tiʼ tojlel i wiñicob?

⁷ Ti jiñi tsaʼ bʌ i mele tac Jehová, miʼ yʌqʼueñonla lac ñop chaʼan mucʼʌch i yubin cheʼ bajcheʼ miʼ yubin i bʌ i wiñicob. Wen yʌxʌl i yo ti jiñi wocol tac muʼ bʌ lac ñusan ti jujuntiquil. Miʼ wen «cʌmbeñob i pusicʼal» jiñi quixtañujob (2 Cr. 6:30). Miʼ chʼʌmben i sujm jiñi wen tam bʌ an ti lac pensar yicʼot bajcheʼ mi la cubin lac bʌ, i chaʼan pʼisbil jach chuqui miʼ mejlel lac mel. Yicʼot jaʼel miʼ yʌcʼ i tʼan chaʼan maʼañic mi caj i cʌy chaʼan mi la quilan wocol baʼ mach mejlix laj cuch (1 Co. 10:13). ¿Mach ba muqʼuic i tijicñesan lac pusicʼal cheʼ la cujil iliyi?

8-10. ¿Chuqui tac tsiʼ colta Jesús chaʼan miʼ chʼʌm ti ñuc yambʌlob?

⁸ Cheʼ bʌ Jesús tsajñi wʌʼ ti Pañimil, tsiʼ pʌsʌ chaʼan miʼ wen chʼʌm ti ñuc yambʌlob. Miʼ mejlel la cʌl uxchajp tsaʼ bʌ i colta chaʼan cheʼʌch miʼ mel. Ñaxam bʌ, cheʼ bajcheʼ tsaʼix laj qʼuele, utsʼat tsiʼ pʌsʌ i melbal i Tat. Tsiʼ cʼuxbi jiñi quixtañujob cheʼ bajcheʼ Jehová. Tijicñayʌch tsiʼ yubi cheʼ tsiʼ colta i Tat chaʼan miʼ mel (pʌt) pejtelel chuqui an, pero tsaʼ cʼoti i wen cʼuxbin jiñi quixtañujob (Pr. 8:31, TNM). Jiñi cʼuxbiya tsiʼ ñijca chaʼan miʼ chʼʌm ti ñuc bajcheʼ miʼ yubin i bʌ jiñi quixtañujob.

⁹ I chaʼpʼejlel, cheʼ bajcheʼ Jehová, Jesús tsaʼ mejli i qʼuel chuqui an tiʼ pusicʼal jiñi quixtañujob, ili yom i yʌl chaʼan tsaʼ mejli i cʌn chuqui woliʼ yubiñob (Mt. 9:4; Jn. 13:10, 11). Jin chaʼan, cheʼ bʌ miʼ qʼuel chaʼan chʼijiyemob yicʼot cʼuñob, miʼ ñuqʼuesʌbeñob i pusicʼal come tsiʼ yubi jaʼel cheʼ bajcheʼ miʼ yubiñob i bʌ (Is. 61:1, 2; Lc. 4:17-21).

¹⁰ I yuxpʼejlel, Jesús tsiʼ tʼox chumta jaʼel jiñi wocol tac. Jumpʼejl ejemplo, ñaʼtʌbil chaʼan tsaʼ coli ti jumpʼejl familia baʼ pʼumpʼuñob. Tsiʼ cʌñʌ i mel tsʌts bʌ eʼtel (troñel) come tsiʼ chaʼle eʼtel yicʼot i tat, jiñi José (Mt. 13:55; Mr. 6:3). Tajol tsiʼ yubi jaʼel jiñi i cʼuxel muʼ bʌ la cubin cheʼ miʼ sajtel juntiquil muʼ bʌ lac wen cʼuxbin, come tajol maxto i teche i subtʼan cheʼ bʌ José tsaʼ chʌmi (sajti). Cheʼ jaʼel, tsiʼ yubi bajcheʼ yilal cheʼ an mach bʌ xñoptʼañobic ti lac familia (Jn. 7:5). Pejtelel ili yicʼot yan tac bʌ tsiʼ colta chaʼan miʼ chʼʌmben i sujm i wocol jiñi quixtañujob yicʼot bajcheʼ miʼ yubiñob i bʌ.

11. ¿Baqui tsiʼ ñumen pʌsʌ Jesús chaʼan miʼ wen chʼʌm ti ñuc bajcheʼ miʼ yubiñob i bʌ jiñi yambʌlob? (Qʼuele jiñi dibujo am bʌ tiʼ tejchibal).

¹¹ Jesús tsiʼ ñumen pʌsʌ chaʼan miʼ chʼʌm ti ñuc bajcheʼ miʼ yubiñob i bʌ yambʌlob cheʼ tsiʼ mele milagro tac. Mach xicʼbilic tsiʼ mele, tsiʼ coltayob jiñi añoʼ bʌ i wocol come an i pʼuntaya (Mt. 20:29-34; Mr. 1:40-42). Jumpʼejl ejemplo, laʼ lac ñaʼtan bajcheʼ tsiʼ yubi i bʌ cheʼ bʌ tsiʼ pʌyʌ loqʼuel baʼan quixtañujob chaʼan miʼ tsʼʌcan jiñi xcojc bʌ wiñic o cheʼ bʌ tsiʼ chaʼ tejchesa cojach bʌ i yalobil juntiquil mebaʼ xʼixic (Mr. 7:32-35; Lc. 7:12-15). Jesús tsiʼ yubi chuqui woliʼ ñusañob ili quixtañujob, jin chaʼan tsiʼ mulaj i coltañob.

12. Cheʼ bajcheʼ miʼ yʌl Juan 11:32-35, ¿bajcheʼ tsiʼ pʌsʌ Jesús chaʼan tsiʼ pʼunta Marta yicʼot María?

¹² Cheʼ bʌ Lázaro tsaʼ chʌmi, Jesús tsiʼ pʼunta jiñi Marta yicʼot María. Cheʼ bʌ tsiʼ qʼueleyob ti uqʼuel, «tsiʼ chaʼle uqʼuel» jaʼel (pejcan Juan 11:32-35). Maʼañic tsiʼ chaʼle uqʼuel chaʼan maʼañix mi caj i chʌn qʼuel i yamigo Lázaro, come yujil chaʼan mi caj i chaʼ tejchesan. Tsiʼ chaʼle uqʼuel come cʼux tsiʼ yubi cheʼ tsiʼ qʼuele woli bʌ i ñusan i yamigajob.

13. ¿Chucoch miʼ yʌqʼueñonla lac tijicñʌyel cheʼ la cujil chaʼan Jesús tsiʼ yubi bajcheʼ miʼ yubin i bʌ jiñi quixtañujob?

¹³ Miʼ ñuqʼuesan lac pusicʼal cheʼ mi laj cʌn chaʼan Jesús tsiʼ yubi bajcheʼ miʼ yubin i bʌ jiñi quixtañujob. Mi laj cʼuxbin come wen chuqui tsiʼ mele tiʼ tojlel quixtañujob (1 P. 1:8). Cheʼ la cujil chaʼan wʌle añix bajcheʼ Rey tiʼ Yumʌntel Dios yicʼot chaʼan lʌcʼʌlix mi caj i jisan jiñi wocol tac, miʼ yʌqʼueñonla lac tijicñʌyel. Come tsaʼ chumle bajcheʼ juntiquil wiñic wʌʼ ti Pañimil, jiñʌch jiñi ñumen wem bʌ chaʼan miʼ jisan pejtelel am bʌ i ticʼlayonla tiʼ caj i yumʌntel Satanás. Miʼ wen aqʼueñonla lac tijicñʌyel cheʼ an juntiquil lac Rey «yujil [bʌ] i pʼuntañonla, come yujil cʼuñonla» (He. 2:17, 18; 4:15, 16).

14. Cheʼ bajcheʼ miʼ yʌl Efesios 5:1, 2, ¿chuqui la com lac mel?

¹⁴ Cheʼ mi lac tsajin jiñi am bʌ i mele Jehová yicʼot Jesús, miʼ ñijcañonla lac ñumen pʌs chaʼan mi lac chʼʌm ti ñuc bajcheʼ miʼ yubiñob i bʌ yambʌlob (pejcan Efesios 5:1, 2). Tiʼ sujm, mach mejlic laj cʌn chuqui an tiʼ pusicʼal jiñi quixtañujob, pero miʼ mejlel lac ñop lac chʼʌmben i sujm bajcheʼ miʼ yubiñob i bʌ yicʼot chuqui i cʼʌjñibalob i chaʼan (2 Co. 11:29). Mach lajaloñicla bajcheʼ jiñi quixtañujob jin jach bʌ miʼ bajñel ñaʼtañob i bʌ, come mi lac chaʼlen wersa lac mel tsaʼ bʌ i yʌlʌ jiñi Pablo: «Mach jinic jach laʼ bajñel wenlel yom mi laʼ ñaʼtan pero i wenlel laʼ piʼʌlob jaʼel» (Fil. 2:4).

15. ¿Majqui yom miʼ ñumen pʌsob chaʼan miʼ chʼʌmob ti ñuc bajcheʼ miʼ yubiñob i bʌ yambʌlob?

¹⁵ Jiñi ancianojob ti congregación jiñʌch yom bʌ miʼ ñumen pʌsob chaʼan miʼ chʼʌmob ti ñuc bajcheʼ miʼ yubiñob i bʌ yambʌlob. Yujilob chaʼan Jehová mi caj i cʼajtin mi tsaʼʌch i cʌntayob jiñi tiñʌmeʼob am bʌ i cʌybeyob tiʼ wenta (He. 13:17). Chaʼan miʼ coltañob i yermañojob, yom miʼ chʼʌmbeñob isujm chuqui miʼ yubiñob. ¿Bajcheʼ miʼ pʌsob?

16. ¿Chuqui miʼ mel jiñi ancianojob muʼ bʌ i chʼʌmbeñob i sujm bajcheʼ miʼ yubiñob i bʌ i yermañojob, i chucoch ñuc i cʼʌjñibal iliyi?

¹⁶ Jiñi ancianojob muʼ bʌ i chʼʌmbeñob i sujm bajcheʼ miʼ yubiñob i bʌ i yermañojob, miʼ yʌqʼueñob i yorajlel chaʼan miʼ coltañob. Miʼ melbeñob cʼajtiya tac yicʼot yujilob pijt cheʼ miʼ ñʌchʼtañob. Ili wen ñuc i cʼʌjñibal cheʼ juntiquil xñoptʼan yom i jam i pusicʼal, pero maʼañic miʼ taj i tʼan chaʼan miʼ tsictesan (Pr. 20:5). Cheʼ bʌ jiñi ancianojob miʼ wen aqʼueñob i yorajlel chaʼan miʼ coltañob i yermañojob, miʼ ñumen qʼuelob i bʌ ti ñuc, miʼ sujtelob ti ñumen wem bʌ i yamigojob i bʌ yicʼot miʼ cʼuxbiñob i bʌ (Hch. 20:37).

17. ¿Chuqui miʼ ñumen qʼuelob ti ñuc cabʌl hermanojob tiʼ tojlel jiñi ancianojob? Alʌ jumpʼejl ejemplo.

¹⁷ Cabʌl hermanojob miʼ yʌlob chaʼan muʼ bʌ i wen qʼuelob ti ñuc tiʼ tojlel jiñi ancianojob jiñʌch cheʼ miʼ chʼʌmob ti ñuc bajcheʼ miʼ yubin i bʌ yambʌlob. ¿Chucoch? Adelaide miʼ yʌl: «Mach wocolic maʼ wubin chaʼan maʼ chaʼlen tʼan a wicʼotob come a wujil chaʼan mi caj i chʼʌmbeñetob i sujm». Miʼ bej al: «Miʼ cʼotel a cʌn chaʼan mucʼʌch i chʼʌmbeñob i sujm chuqui woli a ñusan cheʼ maʼ qʼuel bajcheʼ yilal miʼ jacʼob a tʼan». Juntiquil hermano miʼ cʼajtesan: «Cheʼ bʌ woli c suben juntiquil anciano jiñi c wocol, tsaʼ loqʼui i yaʼlel i wut. Maʼañic baʼ ora mi caj i ñajʌyel c chaʼan jiñi» (Ro. 12:15).

18. ¿Bajcheʼ miʼ mejlel lac pʌs chaʼan mi lac chʼʌm ti ñuc bajcheʼ miʼ yubiñob i bʌ yambʌlob?

¹⁸ Tiʼ sujm, ti lac pejtelel miʼ mejlel lac pʌs chaʼan mi lac chʼʌm ti ñuc bajcheʼ miʼ yubiñob i bʌ yambʌlob, mach cojach jiñi ancianojob. ¿Bajcheʼ miʼ mejlel lac pʌs? Laʼ lac chaʼlen wersa lac chʼʌmben i sujm jiñi wocol tac woli bʌ i ñusan jiñi lac familia yicʼot jiñi hermanojob. Laʼ lac chʼʌm ti ñuc jiñi xcolelob, cʼamoʼ bʌ, añobix i bʌ i jabilel yicʼot jiñi am bʌ majqui chʌmen i chaʼan. Laʼ laj cʼajtibeñob bajcheʼ añob i laʼ lac wen ñʌchʼtan muʼ bʌ i subeñoñobla. Laʼ lac pʌsbeñob chaʼan mucʼʌch lac chʼʌmben i sujm chuqui woliʼ ñusañob. I mi mucʼʌch i mejlel, laʼ la cʌqʼueñob laj coltaya. Cheʼ mi lac mel iliyi, mi lac pʌs chaʼan mucʼʌch lac wen cʼuxbiñob (1 Jn. 3:18).

19. ¿Chucoch yom mi lac ñaʼtan chuqui mi caj la cʌl cheʼ woli laj coltan yambʌlob?

¹⁹ Cheʼ woli laj coltan yambʌlob, yom mi lac ñaʼtan chuqui mi caj la cʌl, come jiñi quixtañujob mach junlajalic chuqui miʼ melob cheʼ bʌ añob i wocol. An mach bʌ wocolic miʼ yubiñob chaʼan miʼ chaʼleñob tʼan, pero an mach bʌ cheʼobic. Jin chaʼan, anquese la comʌch laj coltañob, mach yomic mi lac melbeñob cʼajtiya tac maʼañic bʌ miʼ mulañob (1 Ts. 4:11). Cheʼ jaʼel, cheʼ an majqui miʼ subeñonla bajcheʼ miʼ yubin i bʌ, tajol mach cheʼic mi lac ñaʼtan bajcheʼ woliʼ yʌl. Pero yom mi lac ñaʼtan chaʼan cheʼʌch miʼ yubin i bʌ. Jin chaʼan, yom mi lac wen ñʌchʼtañob i mach ti ora mi lac waʼ chaʼlen tʼan (Mt. 7:1; Stg. 1:19).

20. ¿Chuqui mi caj laj qʼuel ti yambʌ temaj?

²⁰ Mach cojach yom mi lac pʌs chaʼan mi lac chʼʌm ti ñuc bajcheʼ miʼ yubiñob i bʌ yambʌlob yaʼ ti congregación, cheʼʌch yom mi lac mel jaʼel ti subtʼan. ¿Bajcheʼ miʼ mejlel lac pʌs ili utsʼatax bʌ melbal cheʼ woliyonla ti subtʼan yicʼot cheʼ mi lac sujtesañob ti xcʌntʼan yambʌlob? Mi caj laj qʼuel yaʼ ti yambʌ temaj.