3. ¿Chucoch mach yomic miʼ mʌctañet jiñi a bʌqʼuen chaʼan maʼ chʼʌmjaʼ?

An muʼ bʌ i bʌcʼñañob chaʼan miʼ chaʼleñob mulil i chaʼan maʼañic miʼ tsʼʌctesañob tsaʼ bʌ i subeyob Jehová. Tajol mucʼʌch caj a mel mach bʌ weñic cheʼ bajcheʼ tsaʼ ujti tiʼ tojlel wiñicob yicʼot xʼixicob xucʼuloʼ bʌ muʼ bʌ i yʌjlelob yaʼ ti Biblia. Pero cʼajtesan chaʼan Jehová maʼañic miʼ pijtan chaʼan luʼ tojonla (pejcan Salmo 103:13, 14). Tijicña mi caj i yubin i bʌ cheʼ mucʼʌch a mel bajcheʼ cʼamel mi a mejlel. Cheʼ jaʼel, mi caj i coltañet. Dios miʼ yʌcʼ i tʼan chaʼan maʼañic chuqui «mi caj i mejlel i tʌtsʼonla tiʼ cʼuxbiya» (pejcan Romanos 8:38, 39).

Ti lac pejtelel jiñi xñoptʼañonbʌla mi laj contrajintel yicʼot mi lac ticʼlʌntel. ¿Yom ba mi lac bʌcʼñan?

1. ¿Chucoch mach toj sajtelic lac pusicʼal cheʼ an laj contrajintel?

Jiñi Biblia jamʌ tsiquil miʼ yʌl chaʼan «jiñi yomoʼ bʌ i chʼujutesañob Dios tiʼ cuxtʌlel bajcheʼ xcʌntʼañob i chaʼan Cristo Jesús mi caj i ticʼlʌntelob jaʼel» (2 Timoteo 3:12). Jesús tsaʼ contrajinti come mach i chaʼañic ili i pañimil (mulawil) Satanás. I come joñonla mach i chaʼañoñicla jaʼel ili pañimil, mach yomic miʼ toj sajtel lac pusicʼal cheʼ jiñi yumʌlob yicʼot jiñi ñopbalʌl tac miʼ tsʼaʼleñoñobla (Juan 15:18, 19).

2. ¿Bajcheʼ miʼ mejlel lac chajpan lac bʌ chaʼan jiñi contrajintel?

Yom mi lac pʼʌtʼesan lac ñopoñel ti Jehová ili ora. ¿Bajcheʼ miʼ mejlel lac mel? Yom mi la cʌqʼuen i yorajlel chaʼan mi lac chaʼlen oración yicʼot lac pejcʌben jiñi i Tʼan. Cheʼ jaʼel, mach yomic mi lac sʌt mi jumpʼejlic tempa bʌ. Pejtelel iliyi mi caj i yʌqʼueñet a chʼejlel chaʼan maʼ cuch jiñi ticʼlʌntel, mach yʌlʌyic mi yaʼ loqʼuem ti a familia. Jiñi apóstol Pablo, tsaʼ bʌ i wen taja contrajintel jaʼel, tiʼ tsʼijbu: «Jehová jiñʌch caj coltaya. Maʼañic mi caj c chaʼlen bʌqʼuen» (Hebreos 13:6).

Yambʌ muʼ bʌ i coltañonla lac taj lac chʼejlel jiñʌch cheʼ mi lac chaʼlen subtʼan tiʼ pejtelel ora. Jiñi subtʼan miʼ coltañonla chaʼan mi lac ñumen ñop Jehová yicʼot chaʼan maʼañic mi lac bʌcʼñan jiñi lac piʼʌlob (Proverbios 29:25). Mi jatet ili ora maʼ chaʼlen wersa chaʼan maʼ taj a chʼejlel, chajpʌbil mi caj a wajñel chaʼan maʼ bej chaʼlen subtʼan anquese jiñi yumʌlob miʼ ñopob i mʌctañonla (1 Tesalonicenses 2:2).

3. ¿Bajcheʼ miʼ coltañonla cheʼ mi lac lʌtʼ jiñi contrajintel?

Maʼañic mi lac mulan cheʼ mi laj contrajintel. Pero mi mucʼʌch lac lʌtʼ, mi caj i ñumen pʼʌtʼan jiñi lac ñopoñel ti Jehová. Cheʼ jaʼel, ñumen lʌcʼʌlonla ti Jehová mi la cubin come jiñʌch muʼ bʌ i coltañonla cheʼ bʌ maʼañix lac pʼʌtʌlel mi la cubin (pejcan Santiago 1:2-4). Jehová chʼijyem miʼ yubin i bʌ cheʼ miʼ qʼuel chaʼan woli (choncol) lac ñusan wocol, pero tijicña miʼ yubin i bʌ cheʼ miʼ qʼuel chaʼan maʼañic woli (yʌquel) lac lujbʼan. Jiñi Biblia miʼ yʌl: «Mi tsaʼ laʼ lʌtʼʌ wocol tac tiʼ caj mi laʼ mel chuqui wen, jiñi miʼ wen aqʼuen i tijicñʌyel Dios» (1 Pedro 2:20). Pejtelel muʼ bʌ i lʌtʼob jiñi contrajintel yicʼot xucʼulob ti Jehová, mi caj i yʌqʼuentelob i cuxtʌlel mach bʌ añic i jilibal ti jumpʼejl pañimil baqui maʼañic majqui mi caj i contrajin jiñi sʌc bʌ chʼujutesaya (Mateo 24:13).

LAʼ LAC ÑUMEN ÑAʼTAN

4. Mucʼʌch i mejlel a lʌtʼ jiñi contrajintel ti a familia

Jesús yujil chaʼan an lac familia maʼañic bʌ mi caj i mulañob cheʼ mi lac melben i yeʼtel Jehová. Pejcanla Mateo 10:34-36 i tem alʌla iliyi:

• Cheʼ bʌ an majqui miʼ tech i melben i yeʼtel Jehová, ¿chuqui mi caj i yʌlob jiñi i familia?

VIDEO: Jehová tsiʼ chʼʌmʌyon lojon tiʼ wenta (5:13)

• ¿Chuqui mi caj a mel mi jiñi a familia o juntiquil a wamigo miʼ wersa subeñet chaʼan maʼ cʌy a melben i yeʼtel Jehová?

Pejcanla Salmo 27:10 yicʼot Marcos 10:29, 30. Cheʼ tsaʼix ujti laʼ pejcan jiñi texto tac, tem alʌla iliyi:

• ¿Bajcheʼ miʼ coltañet ili texto tac chaʼan maʼ lʌtʼ jiñi contrajintel ti a familia o ti a wamigojob?

5. Chʌn chʼujutesan Jehová anquese an a contrajintel

VIDEO: Miʼ pʌsob i chʼejlel anquese an contrajintel (6:27)

• ¿Bajcheʼ miʼ coltañet jiñi tsaʼ bʌ a qʼuele yaʼ ti video chaʼan maʼ taj a chʼejlel?

Pejcanla Hechos 5:27-29 yicʼot Hebreos 10:24, 25. Cheʼ tsaʼix ujti laʼ pejcan jiñi texto tac, tem alʌla iliyi:

• ¿Chucoch wen ñucʌch i cʼʌjñibal cheʼ mi lac bej melben i yeʼtel Jehová anquese jiñi añoʼ bʌ i yeʼtel miʼ mʌctañob lac subtʼan o lac tempa bʌ?

6. Jehová mi caj i coltañet chaʼan maʼ lʌtʼ

VIDEO: Jehová miʼ yʌqʼueñon c pʼʌtʌlel (3:40)

• ¿Chuqui tsiʼ coltayob chaʼan miʼ lʌtʼob i contrajintel ili Testigojob?

Pejcanla Romanos 8:35 yicʼot 37-39, i cheʼ jaʼel Filipenses 4:13. Cheʼ tsaʼix ujti laʼ pejcan jiñi texto tac, tem alʌla iliyi:

• ¿Bajcheʼ miʼ pʌsbeñet ili texto tac chaʼan mucʼʌch mejlel a lʌtʼ baqui jach bʌ wocol?

Pejcanla Mateo 5:10-12 i tem alʌla iliyi:

• ¿Chucoch miʼ mejlel a wubin a tijicñʌyel anquese an a contrajintel?

TSAʼ BɅ LAJ CɅÑɅ

Jehová miʼ wen qʼuel ti ñuc cheʼ mi lac chaʼlen wersa lac melben i yeʼtel anquese mi laj contrajintel. ¡Yicʼot i coltaya miʼ mejlel lac lʌtʼ!

¿Chuqui tsaʼ cʌñʌ?

• ¿Chucoch mach yomic miʼ toj sajtel lac pusicʼal cheʼ an laj contrajintel?

• ¿Bajcheʼ miʼ mejlel a chajpan a bʌ ili ora chaʼan maʼ lʌtʼ jiñi contrajintel?

• ¿Chuqui miʼ yʌqʼueñet a ñop chaʼan maʼ mejlel a melben i yeʼtel Jehová mach yʌlʌyic chuqui miʼ yujtel?

CɅÑɅ YAN TAC BɅ

Qʼuele bajcheʼ Jehová tsiʼ colta juntiquil hermano xcolelto bʌ cheʼ bʌ tsaʼ otsʌnti ti cárcel chaʼan i xucʼtʌlel.

Laʼ laj cuch anquese an laj contrajintel (2:34)

Qʼuele chuqui tsiʼ colta jumpʼejl xñujpuñel chaʼan bej xucʼul miʼ melbeñob i yeʼtel Jehová anquese tsiʼ wen ñusayob contrajintel.

Tsaʼ lon c melbe i yeʼtel Jehová cheʼ bʌ an wocol (7:11)

Cʌñʌ bajcheʼ miʼ mejlel a lʌtʼ jiñi contrajintel.

«Laʼ lac chajpan lac bʌ ili ora chaʼan jiñi ticʼlʌntel» (Lac Tsictesʌbentel, julio i chaʼan 2019)

¿Chuqui yom la cujil chaʼan jiñi contrajintel ti lac familia? ¿Bajcheʼ mi lac mejlel ti ajñel ti ñʌchʼtʌlel la quicʼot yambʌlob yicʼot xucʼul mi la cajñel ti Jehová?

«Jiñi i sujmlel miʼ chʼʌm tilel espada, mach ñʌchʼtʌlelic» (Lac Tsictesʌbentel, octubre i chaʼan 2017)