Jehová miʼ cʼuxbin jiñi mucʼoʼ bʌ ti subtʼan tiʼ xucʼtʌlel

1, 2. a) ¿Bajcheʼ miʼ coltañonla cheʼ mi laj qʼuel yambʌ hermanojob mucʼoʼ bʌ ti subtʼan yaʼ baqui maʼañic miʼ wen jacʼob, i chucoch? (Qʼuele jiñi foto). b) ¿Chuqui tsiʼ yʌlʌ Jesús chaʼan jiñi subtʼan ti lac lumal? (Qʼuele jiñi nota).

SERGIO YICʼOT OLINDA jiñʌch jumpʼejl xñujpuñel ñumeñix bʌ ti 80 i jabilelob chumuloʼ bʌ ti Estados Unidos, i ochemob bajcheʼ precursor. Maxto wen jalic tsaʼ cajiyob ti cʼux i yoc, i wocol jax miʼ chaʼleñob xʌmbal. Anquese wocolʌch miʼ yubiñob, sʌcʼan jach miʼ majlelob ti jumpʼejl plaza baqui miʼ ñumel cabʌl lac piʼʌlob, miʼ yʌcʼob i bʌ yaʼ baqui miʼ cʼotel autobús i miʼ tech i pʌsob jiñi jun tac loqʼuem bʌ ti Biblia. Añix ora i cajelob i mel ili eʼtel (troñel). Anquese cabʌlob maʼañic bʌ miʼ jacʼob, ili hermanojob maʼañic miʼ cʌyob i bʌ, i tseʼecña miʼ chʌn qʼuelob jiñi wiñicob xʼixicob (quixtañujob). I cheʼ ti xinqʼuiñil, muqʼuix i cʼunteʼ sujtelob tiʼ yotot. Tiʼ yijcʼʌlel, sʌcʼan jach miʼ chaʼ majlelob. Ili hermanojob miʼ chaʼleñob subtʼan wʌcpʼejl qʼuin ti jumpʼejl semana.

² Cheʼ bajcheʼ Sergio yicʼot Olinda, cabʌl hermanojob tiʼ pejtelel pañimil (mulawil) miʼ chaʼleñob subtʼan yaʼ baqui maʼañic miʼ wen jacʼob jiñi wen tʼan. Mi cheʼʌch woli (choncol) a ñusan jaʼel, taja a tijicñʌyel come wolʌch a bej cuch.a Jiñi a melbal (chaʼlebal) miʼ mejlel i pʼʌtʼesan yambʌlob, jinto jaʼel jiñi añobix bʌ cabʌl i ñaʼtʌbal. Jumpʼejl ejemplo, laʼ laj qʼuel muʼ bʌ i yʌlob chaʼtiquil uxtiquil superintendentejob i chaʼan circuito: «Cheʼ bʌ mic chaʼlen subtʼan quicʼot ili xucʼul bʌ hermanojob, jiñi i melbalob miʼ wen pʼʌtʼesañon». «Jiñi i xucʼtʌlelob miʼ ñijcan c pusicʼal chaʼan mic chʌn chaʼlen subtʼan yicʼot c chʼejlel». «Pejtelel chuqui miʼ melob miʼ cʼotel tic pusicʼal».

 3. ¿Baqui bʌ jiñi uxpʼejl cʼajtiya mi caj laj qʼuel, i chucoch?

³ Ti ili temaj mi caj laj qʼuel uxpʼejl cʼajtiya: ¿Chuqui miʼ mejlel i yʌqʼueñonla lac chʼijiyemlel? ¿Bajcheʼ mi lac mejlel ti wut? ¿Chuqui mi caj i coltañonla chaʼan mi lac bej chaʼlen wut tiʼ xucʼtʌlel lac pusicʼal? Jiñi i jacʼbal mi caj i ñijcan lac pusicʼal chaʼan mi la cujtesan jiñi eʼtel tsaʼ bʌ i yʌqʼueyonla Jesús.

 4. a) ¿Bajcheʼ tsiʼ ticʼla Pablo cheʼ cabʌl judíojob maʼañic tsiʼ jacʼbeyob i tʼan? b) ¿Chucoch tsiʼ yubi i bʌ bajcheʼ jiñi?

⁴ Cheʼ mi lac chaʼlen subtʼan baqui maʼañic majqui miʼ wen ubin jiñi wen tʼan, mucʼʌch i yʌqʼueñonla chʼijiyemlel. Mi añʌch a ñusa iliyi, miʼ mejlel a chʼʌmben isujm bajcheʼ tsiʼ yubi i bʌ jiñi apóstol Pablo. Tsiʼ chaʼle subtʼan cheʼ bʌ 30 jab, i tsaʼʌch i colta cabʌl quixtañu chaʼan miʼ sujtelob ti xcʌntʼan i chaʼan Cristo (Hch. 14:21; 2 Co. 3:2, 3). Pero mach cabʌlic judíojob tsaʼ sujtiyob ti xcʌntʼan. Cabʌlob maʼañic bʌ tsiʼ jacʼbeyob i tʼan, i an tsaʼto bʌ i tsʼaʼleyob (Hch. 14:19; 17:1, 4, 5, 13). Pablo tsiquil tsiʼ yʌlʌ chaʼan tsaʼʌch i wen ticʼla cheʼ cabʌl maʼañic bʌ tsiʼ jacʼʌyob. Tsiʼ yʌlʌ: «Wen chʼijiyem c pusicʼal. Cabʌl mic chaʼlen pensar tiʼ pejtelel ora» (Ro. 9:1-3). ¿Chucoch tsiʼ yubi i bʌ bajcheʼ jiñi? Come mucʼʌch i cʼuxbin jiñi subtʼan yicʼot jiñi quixtañujob. Tsaʼʌch i mulaj i coltan jiñi judíojob, i tsiʼ yubi i chʼijiyemlel cheʼ tsiʼ qʼuele chaʼan maʼañic miʼ qʼuelob ti ñuc i pʼuntaya Dios.

 5. a) ¿Chuqui miʼ ñijcan lac pusicʼal chaʼan mi lac chaʼlen subtʼan? b) ¿Chucoch an i tajol mucʼʌch la cubin lac chʼijiyemlel?

⁵ Cheʼ bajcheʼ Pablo, joñonla mucʼonla ti subtʼan come la comʌch laj coltan jiñi quixtañujob (Mt. 22:39; 1 Co. 11:1). Wen la cujil chaʼan jiñi ñumen wem bʌ miʼ mejlel lac mel jiñʌch i yeʼtel Jehová. Jin chaʼan, la com cheʼ jiñi quixtañujob ti lac lumal miʼ cʼotel i cʌñob chaʼan ñuc i cʼʌjñibal woli (yʌquel) bʌ i sʌtob. Jin chaʼan, mi lac chʌn subeñob i chaʼan bʌ Jehová yicʼot chuqui ñaʼtʌbil i chaʼan ti lac tojlel. Ili wen tʼan, lajalʌch bajcheʼ jumpʼejl majtañʌl woli bʌ lac chʼʌmbeñob majlel i la com chaʼan miʼ chʼʌmob. Pero, cheʼ bajcheʼ Pablo, cʼux mi la cubin cheʼ maʼañic miʼ jacʼob. ¿Chucoch? Come mi laj cʼuxbin jiñi subtʼan yicʼot jiñi quixtañujob, mach chaʼañic yomto mi lac ñumen ñop Dios. Pero maʼañic mi laj cʌy subtʼan anquese an i tajol mi laj cubin lac chʼijiyemlel. Juntiquil hermana i cʼabaʼ Elena, añix bʌ 25 jab i cajel bajcheʼ precursora, miʼ yʌl: «Wocolʌch mi cubin jiñi subtʼan, pero cujil chaʼan jiñʌch jiñi ñumen wem bʌ eʼtel miʼ mejlel c mel». ¿Mach ba cheʼicʌch mi lac ñaʼtan jaʼel?

 6. ¿Chuqui ti cʼajtiya mi caj lac tsajin?

⁶ Mach yʌlʌyic baqui mi lac chaʼlen subtʼan, mucʼʌch lac bej mejlel ti wut. ¿Chucoch miʼ mejlel lac ñop iliyi? Chaʼan mi lac jacʼ ili cʼajtiya, mi caj lac tsajin chaʼpʼejl lajiya tsaʼ bʌ i yʌlʌ Jesús baqui tsiʼ taja ti tʼan chaʼan i cʼʌjñibalʌch cheʼ mi lac chaʼlen wut (Mt. 13:23). Jiñi ñaxam bʌ jiñʌch chaʼan jiñi i yʌqʼuil tsʼusub.

 7. a) ¿Majqui woliʼ taj ti tʼan jiñi acʼ, jiñi xpora yicʼot i cʼʌb jiñi acʼ? b) ¿Chuqui ti cʼajtiya yom mi lac jacʼ?

⁷ (Pejcan Juan 15:1-5, 8). Jesús tiʼ tsictesa: «Joñon jini Isujm bʌ Acʼon. C Tat jiñʌch Xpora». Jiñi xcʌntʼañob i chaʼan lajalobʌch bajcheʼ i ‹cʼʌb› jiñi acʼ. Ti wiʼil, Jesús tiʼ sube jiñi i yapóstolob: «Miʼ caj ti pʌstʌl i ñuclel c Tat, cheʼ mi laʼ wʌcʼ cabʌl laʼ wut. Cheʼ jini, xcʌntʼañetla c chaʼan».b Jin chaʼan, ¿chuqui yom i yʌl cheʼ mi la cʌcʼ lac wut? Ti ili lajiya, Jesús maʼañic tiʼ tsictesa chuqui yom i yʌl, pero añʌch chuqui tsiʼ yʌlʌ muʼ bʌ i coltañonla lac ñaʼtan.

 8. a) ¿Bajcheʼ la cujil chaʼan cheʼ mi lac chaʼlen wut mach jiñic yom i yʌl cheʼ mi lac sutqʼuin ti xcʌntʼan yambʌlob? b) ¿Bajcheʼ yilal chuqui miʼ cʼajtin Dios?

⁸ Jesús tsiʼ yʌlʌ tiʼ tojlel i Tat: «Jini miʼ tsep loqʼuel pejtelel j cʼʌb mach bʌ anic miʼ yʌcʼ i wut». Ili yom i yʌl chaʼan yom mi la cʌcʼ lac wut mi la com chaʼan Jehová miʼ qʼuelonla tiʼ wiñic (Mt. 13:23; 21:43). Jin chaʼan, cheʼ yom mi la cʌcʼ lac wut miʼ yʌl jiñi texto, mach jiñic yom i yʌl cheʼ mi lac sutqʼuin ti xcʌntʼan yañoʼ bʌ (Mt. 28:19). ¿Chucoch? Come mi cheʼ bajcheʼ jiñi, jiñi yambʌ hermanojob maʼañic bʌ miʼ mejlel i sutqʼuiñob ti xcʌntʼan yambʌlob tiʼ caj maʼañic miʼ wen ñʌchʼtʌntelob yaʼ baqui mucʼob ti subtʼan, lajalob yubil bajcheʼ jiñi tsaʼ bʌ i yʌlʌ Jesús maʼañic bʌ miʼ yʌcʼob i wut. Pero iliyi mach cheʼiqui come maʼañic majqui miʼ mejlel lac wersa xicʼ chaʼan miʼ jacʼ jiñi wen tʼan. Cheʼ jaʼel, Jehová miʼ cʼuxbiñonla i maʼañic miʼ choconla tiʼ cajach maʼañic mi lac taj chuqui mach bʌ mejlic lac mel. Maʼañic miʼ cʼajtibeñonla chuqui mach mejlic lac taj (Dt. 30:11-14).

 9. a) ¿Chuqui ti eʼtel yom mi lac mel chaʼan mi lac chaʼlen wut? b) ¿Baqui bʌ lajiya mi caj laj qʼuel wʌleʼli, i chucoch?

⁹ Cheʼ jiñi, ¿chuqui yom i yʌl cheʼ mi lac chaʼlen wut? Iliyi jiñʌch muʼ bʌ i mejlel lac mel ti lac pejtelel. ¿Chuqui ti eʼtel aqʼuebil i chaʼan i wiñicob Jehová? Jiñʌch i subol jiñi wen tʼan chaʼan i Yumʌntel (Mt. 24:14).c Muʼ bʌ i coltañonla lac ñaʼtan iliyi jiñʌch jiñi lajiya tsaʼ bʌ i yʌcʼʌ Jesús chaʼan juntiquil xpacʼ. Laʼ laj qʼuel iliyi.

10. a) ¿Chuqui yom i yʌl jiñi pacʼ yicʼot lum tsaʼ bʌ i yʌlʌ Jesús tiʼ lajiya? b) ¿Bajcheʼ yilal i wut muʼ bʌ i yʌcʼ jiñi trigo?

¹⁰ (Pejcan Lucas 8:5-8, 11-15). Yaʼ ti lajiya baʼ tsaʼ ajli chaʼan jiñi xpacʼ, jiñi pacʼ jiñʌch «i tʼan Dios», o jiñi wen tʼan chaʼan Yumʌntel. Jiñi lum miʼ lajintel bajcheʼ i pusicʼal jiñi quixtañujob. Jiñi pacʼ tsaʼ bʌ yajli ti wem bʌ lum i tsiʼ yʌcʼʌ i wiʼ, utsʼat tsaʼ coli bajcheʼ jiñi trigo. Ti wiʼil, tsiʼ wen chaʼle wut. Pero ¿muʼ baʼ i yʌcʼ yambʌ i teʼel trigo bajcheʼ i wut? Mach cheʼiqui, jiñi i wut jiñʌch i bʌcʼ, muʼto bʌ i wiʼil mejlel ti colel. Ti ili lajiya, jumpʼejl jach i bʌcʼ trigo miʼ mejlel i yʌcʼ ti pʼojlel cabʌl i bʌcʼ. ¿Bajcheʼ miʼ taj i bʌ yicʼot lac subtʼan iliyi?

11. a) ¿Bajcheʼ miʼ taj i bʌ yicʼot lac subtʼan jiñi lajiya chaʼan bʌ jiñi xpacʼ? b) ¿Bajcheʼ miʼ mejlel lac pʼol yambʌ pacʼ chaʼan bʌ jiñi Yumʌntel?

¹¹ Laʼ lac ñaʼtan chaʼan jiñi lac tatob o yambʌ hermanojob tsiʼ cʌntesayoñobla tiʼ sujmlel. Wen tijicña tsiʼ yubiyob i bʌ cheʼ tsiʼ qʼueleyob chaʼan woli lac ñop jiñi wen tʼan chaʼan bʌ i Yumʌntel Dios. Jiñi pacʼ tsaʼ coli majlel jinto cheʼ weñix chaʼan miʼ yʌcʼ i wut. ¿Baqui bʌ? Jiñʌch yambʌ pacʼ chaʼan bʌ i Yumʌntel Dios, mach juntiquilic tsijiʼ bʌ xñoptʼan, lajal bajcheʼ jiñi i bʌcʼ trigo tsaʼ bʌ la cʌlʌ.d ¿Bajcheʼ miʼ mejlel? Jiñʌch cheʼ mi lac chaʼlen subtʼan. Cheʼ jajayajl mi lac sub jiñi wen tʼan lajal bajcheʼ woli lac chaʼ pʼujpʼun jiñi pacʼ tsaʼ bʌ coli ti lac pusicʼal jaʼel (Lc. 6:45; 8:1). Jin chaʼan, ili lajiya miʼ cʌntesañonla chaʼan mi mucʼʌch lac chʌn chaʼlen subtʼan mi caj lac bej chaʼlen wut tiʼ xucʼtʌlel lac pusicʼal.

12. a) ¿Chuqui mi laj cʌn ti jiñi lajiya chaʼan i yʌqʼuil tsʼusub yicʼot jiñi xpacʼ? b) ¿Bajcheʼ yubil maʼ wubin a bʌ cheʼ a wujil iliyi?

¹² ¿Chuqui mi laj cʌn ti jiñi lajiya chaʼan i yʌqʼuil tsʼusub yicʼot jiñi xpacʼ? Chaʼan cheʼ mi lac bej acʼ lac wut mach yaʼic cʌyʌl ti jaytiquil miʼ jacʼob jiñi wen tʼan, jiñʌch mi mucʼʌch lac chʌn chaʼlen subtʼan. Pablo cheʼʌch tsiʼ yʌcʼʌ ti ñaʼtʌntel cheʼ bʌ tsiʼ yʌlʌ: «Ti jujuntiquil mi caj i yʌqʼuentelob i chobejtʌbal cheʼ bajcheʼ an i yeʼtel» (1 Co. 3:8). Cheʼ bajcheʼ mi laj qʼuel, jiñi lac chobejtʌbal yaʼʌch cʌyʌl ti la queʼtel, mach jiñic chaʼan bajcheʼ cʼamel chuqui mi lac taj. Juntiquil hermana i cʼabaʼ Matilda añix bʌ 20 jab i cajel bajcheʼ precursora, miʼ yʌl: «Tijicña mi cubin cheʼ cujil chaʼan Jehová mucʼʌch i qʼuel ti ñuc la queʼtel».

13, 14. Cheʼ bajcheʼ miʼ yʌl Romanos 10:1, 2, ¿chucoch jiñi Pablo tsiʼ chʌn subeyob wen tʼan jiñi mach bʌ añic miʼ jacʼob?

¹³ ¿Chuqui mi caj i coltañonla chaʼan mi lac bej chaʼlen wut? Tsaʼix laj qʼuele bajcheʼ yubil tsiʼ yubi i bʌ Pablo cheʼ cabʌl judíojob maʼañic tsiʼ jacʼʌyob jiñi wen tʼan. Pero maʼañic tsiʼ wis cʌyʌ i bʌ. Laʼ laj qʼuel tsaʼ bʌ i wiʼil tsʼijbube majlel jiñi xñoptʼañob ti Roma chaʼan chuqui tsiʼ yubi tiʼ tojlel jiñi judíojob: «Mij cʼajtiben Dios ti oración chaʼan miʼ coltʌntelob israelob. Jiñʌch com bʌ tiʼ pejtelel c pusicʼal. Come mic sub ti isujm, anquese chʼejlob chaʼan Dios, mach yujilobic chuqui yom Dios» (Ro. 10:1, 2). ¿Chucoch tsiʼ chʌn subeyob jiñi wen tʼan?

¹⁴ Ti ñaxan, tsiʼ yʌlʌ chaʼan jiñʌch yom bʌ tiʼ pejtelel i pusicʼal, chaʼan jiñi judíojob miʼ tajob i coltʌntel (Ro. 11:13, 14). I chaʼpʼejlel, tsiʼ yʌlʌ chaʼan tsiʼ cʼajtibe Dios ti oración chaʼan miʼ ñijcʌben i pusicʼal tʼoxol judíojob chaʼan miʼ jacʼob jiñi wen tʼan. I yuxpʼejlel, tsiʼ yʌlʌ: «Chʼejlob chaʼan Dios». Pablo tsiʼ qʼuele chuqui wem bʌ tiʼ tojlelob. Wen yujil chaʼan cheʼ juntiquil yomʌch bʌ i cʌn Dios wen mi cʼʌn i chʼejlel, miʼ mejlel ti sujtel ti juntiquil chʼejl bʌ xñoptʼan.

15. ¿Bajcheʼ miʼ mejlel lac tsajcan i melbal Pablo? Alʌ chuqui tac miʼ mel yambʌ hermanojob.

¹⁵ ¿Bajcheʼ miʼ mejlel lac tsajcan i melbal Pablo? Ñaxam bʌ, ti jumpʼejl lac pusicʼal yom mi lac chaʼlen wersa lac sʌclan jiñi «tsaʼ bʌ yajcʌntiyob chaʼan miʼ tajob i cuxtʌlel mach bʌ anic miʼ jilel». I chaʼpʼejlel, yom mi laj cʼajtiben Jehová ti wocol tʼan chaʼan miʼ jamben i pusicʼal jiñi quixtañujob (Hch. 13:48; 16:14). Silvana, juntiquil hermana añix bʌ cheʼ bʌ 30 jab bajcheʼ precursora, miʼ yʌl: «Cheʼ muʼto caj c pejcan juntiquil quixtañu, mic ñaxan cʼajtiben i coltaya Jehová chaʼan wen mij qʼuel jiñi c subtʼan». Laʼ laj cʼajtiben Dios ti wocol tʼan chaʼan jiñi i yángelob miʼ coltañonla lac taj jiñi quixtañujob utsoʼ bʌ i pusicʼal (Mt. 10:11-13; Ap. 14:6). Juntiquil hermano i cʼabaʼ Robert, ñumeñix bʌ ti 30 jab i cajel bajcheʼ precursor, miʼ yʌl: «Wen tijicña mi cubin cheʼ mic tem chaʼlen eʼtel quicʼot jiñi ángelob, come yujilob chuqui miʼ ñusan jiñi quixtañujob». I yuxpʼejlel, yom mi laj qʼuel chuqui wem bʌ tiʼ tojlel jiñi quixtañujob. Juntiquil anciano i cʼabaʼ Carl, ñumeñix bʌ ti 50 jab i chaʼle chʼʌmjaʼ, miʼ yʌl chaʼan miʼ sʌclan chuqui jach miʼ yʌqʼuen i ñaʼtan chaʼan utsʌch i pusicʼal jiñi quixtañu, bajcheʼ tiʼ tseʼñal, tiʼ ñiʼ i wut o mi tsiʼ mele jumpʼejl cʼajtiya. Mi mucʼʌch lac mel iliyi, mi caj lac bej acʼ lac wut, cheʼ bajcheʼ tsiʼ mele Pablo.

16, 17. a) ¿Chuqui miʼ mejlel laj cʌn ti jiñi tʼan muʼ bʌ i yʌl Eclesiastés 11:6? b) Acʼʌ jumpʼejl ejemplo muʼ bʌ i pʌs bajcheʼ miʼ mel i yeʼtel tiʼ tojlel yambʌ quixtañujob jiñi muʼ bʌ lac mel.

¹⁶ An i tajol mi laj qʼuel chaʼan jiñi wen tʼan maʼañic miʼ yochel tiʼ pusicʼal jiñi quixtañujob, pero ili mach yomic miʼ yʌqʼueñonla lac ñaʼtan chaʼan maʼañic i cʼʌjñibal mi lac bej mel ili eʼtel (pejcan Eclesiastés 11:6). Isujm, añʌch mach bʌ yomobic i ñʌchʼtañonla, pero mucʼʌch i qʼuelob bajcheʼ yilalonla. Miʼ taj i qʼuelob chaʼan wen mi lac xoj lac pislel, wen lac melbal yicʼot chʌn tseʼecñayonla. Tajol jiñi lac melbal miʼ coltañob chaʼan ti wiʼil miʼ qʼuextañob chuqui miʼ ñaʼtañob ti lac tojlel. Cheʼʌch tsaʼ ujti tiʼ tojlel Sergio yicʼot Olinda, tsaʼ bʌ la cʌlʌyob yaʼ ti ñaxam bʌ párrafo.

¹⁷ Sergio miʼ yʌl: «Tsaʼ c jumucʼ cʌyʌ lon majlel yaʼ ti plaza come tsaʼ cʼamʼayon lojon. I cheʼ bʌ tsaʼ chaʼ majliyon lojon, jiñi quixtañujob tsiʼ cʼajtiyob chuqui tsaʼ lon c chaʼle yicʼot tsiʼ yʌlʌyob chaʼan tsaʼʌch i cʼajtesayon lojon». Olinda miʼ yʌl: «Jiñi muʼ bʌ i ñijcañob autobús miʼ ñajti chaʼleñon lon ti saludar, i an muʼ bʌ i subeñon lojon: ‹Weñʌch jiñi laʼ weʼtel›. I muʼto lon j cʼajtibentel jiñi revista tac». Ti jumpʼejl bʌ qʼuin toj sajtelob i pusicʼal chaʼan chuqui tsaʼ ujti. Juntiquil wiñic tsaʼ waʼle yaʼ baqui miʼ yʌcʼob jiñi alʌ carro, tsaʼ aqʼuentiyob ñichteʼ tac yicʼot tsaʼ subentiyob wocolix i yʌlʌ chaʼan jiñi eʼtel muʼ bʌ i melob.

18. ¿Chucoch bej a womʌch a wʌcʼ a wut tiʼ xucʼtʌlel a pusicʼal?

¹⁸ Jiñi Biblia miʼ yʌl: «Yom maʼ chʌn chaʼlen pacʼ». Jin chaʼan, mi mucʼʌch lac bej sub jiñi wen tʼan chaʼan i Yumʌntel Dios, woliyonla ti coltaya chaʼan jiñi wen tʼan «miʼ yubintel tiʼ pejtelel pañimil» (Mt. 24:14). Pero ñumen tijicña mi caj la cubin lac bʌ cheʼ utsʼat miʼ qʼuelonla Jehová, come miʼ cʼuxbin pejtelel jiñi mucʼoʼ bʌ ti wut.