Ti lac pejtelel an laj cʼʌjñibal tiʼ congregación Jehová

 1. ¿Chuqui miʼ yʌqʼueñonla lac tijicñʌyel?

WEN tijicña mi la cubin cheʼ añonla tiʼ tejclum Jehová. Ñʌchʼʌl añonla yicʼot tijicñayonla come temel woli (choncol) lac chʼujutesan Jehová yicʼot la quermañujob yaʼ ti congregación. Pero ¿baqui bʌ laj cʼʌjñibal ti jujuntiquil yaʼ ti congregación?

 2. ¿Chuqui ti ejemplo tsiʼ cʼʌñʌ jiñi apóstol Pablo ti jiñi i carta tac?

² Ti jiñi carta tac tsaʼ bʌ i tsʼijbu jiñi apóstol Pablo tiʼ coltaya Dios, tsiʼ cʼʌñʌ jumpʼejl lajiya muʼ bʌ i cʌntesañonla chaʼan jiñi temaj. Tsiʼ yʌlʌ chaʼan jiñi congregación lajalʌch bajcheʼ jiñi lac bʌcʼtal, i chaʼan jiñi yaʼ bʌ ochemob ti jiñi congregación tac lajalʌch bajcheʼ jiñi an tac bʌ ti lac bʌcʼtal (Ro. 12:4-8; 1 Co. 12:12-27; Ef. 4:16).

 3. ¿Chuqui jiñi uxchajp muʼ bʌ caj laj qʼuel ti ili estudio?

³ Ti ili estudio, mi caj laj qʼuel uxchajp ñuc bʌ i cʼʌjñibal muʼ bʌ laj cʌn ti jiñi ejemplo tsaʼ bʌ i yʌlʌ Pablo. Ñaxam bʌ, mi caj laj qʼuel chaʼan jujuntiquilonla an laj cʼʌjñibal yaʼ tiʼ congregación Jehová.b I chaʼpʼejlel, mi caj laj cʌn chuqui miʼ mejlel lac mel mi wocol mi la cubin chaʼan mi laj qʼuel baqui bʌ laj cʼʌjñibal yaʼ ti congregación. I yuxpʼejlel, mi caj laj qʼuel chucoch yom mi lac xucʼchocon lac pensar lac mel tsaʼ bʌ i yʌqʼueyonla ti lac wenta Jehová.

 4. ¿Chuqui miʼ cʌntesañonla jiñi muʼ bʌ i yʌl Romanos 12:4, 5?

⁴ Jiñi muʼ bʌ lac ñaxan cʌn ti jiñi ejemplo tsaʼ bʌ i yʌlʌ Pablo jiñʌch chaʼan ti jujuntiquilonla wen an laj cʼʌjñibal tiʼ familia Jehová. Pablo tsiʼ teche i yʌl: «Ti lac bʌcʼtal an cabʌl chucbil tac bʌ. Mach junchajpic jach i cʼʌjñibal jini chucbil tac bʌ. Cheʼ jaʼel joñonla anquese cabʌlonla, jumpʼejl jach lac bʌcʼtal ti Cristo. Lac tem chaʼañʌch lac bʌ» (Ro. 12:4, 5). Yom bʌ i yʌl Pablo jiñʌch chaʼan ti jujuntiquilonla yʌñʌl tac bʌ eʼtel (troñel) mi lac mel yaʼ ti congregación, pero ti lac pejtelel an laj cʼʌjñibal.

 5. ¿Chuqui ti ‹majtañʌl tac› an i yʌqʼue Jehová jiñi congregación?

⁵ Cheʼ bʌ mi lac ñaʼtan majqui ñumen an i cʼʌjñibal yaʼ ti congregación, tajol mi lac waʼ ñaʼtan chaʼan jiñobʌch jiñi waʼchocobiloʼ bʌ chaʼan miʼ cʌntañonla (1 Ts. 5:12; He. 13:17). I sujmʌch chaʼan Jehová tiʼ coltaya Cristo tsiʼ yʌcʼʌ wiñicob yaʼ ti congregación bajcheʼ ‹majtañʌl tac› (Ef. 4:8). Yaʼʌch ochemob jiñi Junmojt muʼ bʌ i pʌsob bij yicʼot jiñi xcoltayajob i chaʼan, jiñi añoʼ bʌ bajcheʼ Comité i chaʼan sucursal, jiñi superintendentejob i chaʼan circuito, jiñi muʼ bʌ i yʌcʼob cʌntesa chaʼan i melol i yeʼtel Dios, jiñi ancianojob ti congregación yicʼot jiñi añoʼ bʌ bajcheʼ siervo ministerial. Tiʼ pejtelel ili hermanojob tsaʼ waʼchocontiyob ti chʼujul bʌ espíritu chaʼan miʼ cʌntañob jiñi cʼuxbibiloʼ bʌ i tiñʌmeʼ Jehová yicʼot chaʼan miʼ pʼʌtʼesañob jiñi congregación (1 P. 5:2, 3).

 6. Cheʼ bajcheʼ miʼ yʌl 1 Tesalonicenses 2:6-8, ¿chuqui muʼ bʌ i chaʼleñob wersa i mel jiñi hermanojob waʼchocobiloʼ bʌ ti chʼujul bʌ espíritu?

⁶ Jiñi hermanojob miʼ waʼchocontelob ti jiñi chʼujul bʌ espíritu chaʼan miʼ melob jiñi eʼtel aqʼuebiloʼ bʌ. Cheʼ bajcheʼ jiñi laj cʼʌb, la coc yicʼot yan tac bʌ am bʌ ti lac bʌcʼtal miʼ coltañonla cheʼ bʌ an chuqui mi lac mel, jiñi hermanojob tsaʼ bʌ waʼchocontiyob miʼ chaʼleñob eʼtel chaʼan miʼ coltañob jiñi congregación. Miʼ chaʼleñob wersa i ñuqʼuesʌbeñob i pusicʼal jiñi hermanojob i mach chaʼañic miʼ bajñel sʌclañob i ñuclel (pejcan 1 Tesalonicenses 2:6-8). Mi la cʌqʼuen wocolix i yʌlʌ Jehová cheʼ bʌ tsiʼ yʌqʼueyonla yaʼ ti congregación ili hermanojob añoʼ bʌ i ñaʼtʌbal muʼ bʌ i yʌcʼob ti ñaxan i wenlel yambʌlob.

 7. ¿Chuqui ti bendición an i tajayob jiñi precursorob yicʼot jiñi misionerojob?

⁷ Tajol yaʼ ti laj congregación añob misionerojob, añob precursor especial o añob precursor regular. Tiʼ pejtelel pañimil (mulawil) an hermanojob yicʼot hermanajob muʼ bʌ i yʌqʼueñob i yorajlel chaʼan miʼ chaʼleñob subtʼan tiʼ pejtelel ora yicʼot miʼ sujtesañob ti xcʌntʼan jiñi yambʌlob. Cheʼ bajcheʼ ili, an i colta cabʌl wiñicob xʼixicob (quixtañujob) chaʼan miʼ sujtelob ti xcʌntʼan i chaʼan Cristo Jesús. Ili hermanojob mach wen cabʌl chuqui añob i chaʼan, pero Jehová an i yʌqʼueyob cabʌl bendición (Mr. 10:29, 30). ¿Mach ba muqʼuic la cubin lac tijicñʌyel chaʼan yaʼañob ili cʼuxbibil bʌ hermanojob ti laj congregación?

 8. ¿Chucoch miʼ qʼuel ti ñuc Jehová jujuntiquil xsubtʼañob?

⁸ Cheʼ jiñi, ¿jin jach ba jiñi hermanojob waʼchocobiloʼ bʌ yicʼot jiñi muʼ bʌ i melbeñob i troñel Jehová tiʼ pejtelel ora ñumen añoʼ bʌ i cʼʌjñibal yaʼ ti congregación? Maʼañic. Jujuntiquil xsubtʼan ñuc i cʼʌjñibal i chaʼan Jehová yicʼot jiñi congregación (Ro. 10:15; 1 Co. 3:6-9). Ili i sujmʌch come jiñi junchajp ñuc bʌ i cʼʌjñibal i chaʼan jiñi congregación jiñʌch cheʼ miʼ sujtesʌntel jiñi yambʌlob ti xcʌntʼan i chaʼan Cristo (Mt. 28:19, 20; 1 Ti. 2:4). Tiʼ pejtelel jiñi xsubtʼañob, chʼʌmbil bʌ i chaʼañob jaʼ o maʼañic, miʼ chaʼleñob wersa chaʼan ili eʼtel jiñʌch ñumen ñuc bʌ miʼ yʌcʼob tiʼ cuxtʌlel (Mt. 24:14).

 9. ¿Chucoch mi laj qʼuel ti ñuc jiñi hermanajob?

⁹ ¿Bajcheʼ yilal miʼ qʼuel Jehová jiñi hermanajob? Añʌch i cʼʌjñibal miʼ qʼuel yaʼ ti congregación. Miʼ qʼuel ti ñuc jiñi ijñamʌlob, jiñi ñaʼʌlob, jiñi tsaʼix bʌ chʌmiyob (sajtiyob) i ñoxiʼal yicʼot jiñi hermanajob maxto bʌ ñujpuñemobic xucʼul bʌ miʼ melbeñob i yeʼtel. Jiñi Biblia miʼ yʌl wem bʌ ejemplo tiʼ tojlel jiñi xʼixicob tsaʼ bʌ qʼuejliyob ti ñuc ti Dios chaʼan tsiʼ pʌsʌyob i ñaʼtʌbal, i ñopoñel, i tijicñʌyelob, i chʼejlelob, i yutslelob yicʼot wen tac bʌ i melbalob (Lc. 8:2, 3; Hch. 16:14, 15; Ro. 16:3, 6; Fil. 4:3; He. 11:11, 31, 35). Ti jujumpʼejl congregación, an hermanajob muʼ bʌ i pʌsob ili wen tac bʌ melbalʌl (chaʼlibal). Mi la cʌqʼuen wocolix i yʌlʌ Jehová cheʼ yaʼañob ili hermanajob ti laj congregación.

10. ¿Chucoch mi laj qʼuelob ti ñuc jiñi ñoxobix bʌ?

¹⁰ Cheʼ jaʼel, tijicña mi la cubin cheʼ yaʼ ti laj congregación an hermanojob añobix bʌ i jabilel. An cabʌlix bʌ jab cajel i melbeñob i yeʼtel Jehová ti xucʼul, i an maxto bʌ wen cabʌlic jab i cajelob. Tajol ili hermanojob wocolix miʼ ñusañob tiʼ caj chaʼan ñoxobix i maʼañix miʼ wen mejlelob ti coltaya ti congregación yicʼot ti subtʼan. Anquese wocolʌch miʼ ñusañob miʼ chaʼleñob wersa subtʼan, i jiñi i pʼʌtʌlelob miʼ cʼʌñob chaʼan miʼ cʌntesan yambʌlob yicʼot chaʼan miʼ ñuqʼuesʌbeñob i pusicʼal. ¡Cabʌl chuqui mi laj cʌn tiʼ tojlelob! Jehová utsʼatax miʼ qʼuelob i cheʼ joñonla jaʼel (Pr. 16:31).

11, 12. ¿Bajcheʼ miʼ ñuqʼuesan a pusicʼal jiñi muʼ bʌ i mel jiñi xcolelob yaʼ ti a congregación?

¹¹ Laʼ lac ñaʼtan tiʼ tojlel jaʼel jiñi xcolelob. Cheʼ bʌ woli (yʌquel) i colelob majlel miʼ ñusañob cabʌl wocol ti ili i pañimil Satanás come pam pujquem i ñaʼtʌbal (1 Jn. 5:19). Pero mucʼʌch i wen ñuqʼuesan lac pusicʼal cheʼ bʌ mi laj qʼuel chaʼan miʼ yʌcʼob i comentario yaʼ ti tempa bʌ, miʼ chaʼleñob subtʼan yicʼot cheʼ bʌ maʼañic miʼ bʌcʼñañob i yʌl jiñi ñopol bʌ i chaʼañob. xColelob, añʌch laʼ cʼʌjñibal tiʼ tejclum Jehová (Sal. 8:2).

¹² An hermanojob yicʼot hermanajob wocol bʌ miʼ yubiñob chaʼan miʼ ñopob mi añobʌch i cʼʌjñibal yaʼ ti congregación. ¿Chuqui miʼ mejlel i coltañonla laj qʼuel chaʼan ti jujuntiquil añʌch laj cʼʌjñibal yaʼ ti congregación? Laʼ laj qʼuel.

13, 14. ¿Chucoch an muʼ bʌ i ñaʼtañob chaʼan maʼañobic i cʼʌjñibal yaʼ ti congregación?

¹³ I chaʼpʼejlel muʼ bʌ laj cʌn ti jiñi ejemplo tsaʼ bʌ i yʌlʌ Pablo jiñʌch cheʼ miʼ yʌqʼueñonla lac ñaʼtan tiʼ tojlelob jiñi wocol bʌ miʼ yubiñob chaʼan miʼ ñopob chaʼan añobʌch i cʼʌjñibal yaʼ ti congregación. Pablo tiʼ tsʼijbu: «Jini la coc, mi tsiʼ yʌlʌ mach i chaʼanic lac bʌcʼtal come mach cʼʌbʌlic, ¿mach ba i chaʼanic lac bʌcʼtal cheʼ jini? Jini lac chiquin, mi tsiʼ yʌlʌ mach i chaʼanic lac bʌcʼtal come mach wutʌlic, ¿mach ba i chaʼanic lac bʌcʼtal cheʼ jini?» (1 Co. 12:15, 16). ¿Chuqui miʼ cʌntesañonla iliyi?

¹⁴ Cheʼ muqʼuic lac laj lac bʌ yicʼot yambʌ hermanojob, maʼañic baqui ora mi caj laj qʼuel chaʼan añʌch laj cʼʌjñibal. An hermanojob wen yujiloʼ bʌ cʌntesa, cabʌl bʌ chuqui yujilob chajpʌntel o wem bʌ xcʌntayajob. I tajol miʼ cʼotel lac ñaʼtan chaʼan maʼañic chuqui la wen cujil bajcheʼob. Ili weñʌch come miʼ pʌs chaʼan añʌch lac pecʼlel yicʼot chaʼan mi laj cʌn chaʼan añʌch baqui jaxʌl chuqui la cujil melol (Fil. 2:3). Pero yom tsajilonla. Mi tiʼ pejtelel ora mi lac laj lac bʌ la quicʼot jiñi wen yujiloʼ bʌ, chʼijiyem mi quej la cubin lac bʌ. Cheʼ bajcheʼ tsiʼ yʌlʌ Pablo, miʼ mejlel i cʼotel lac ñaʼtan chaʼan maʼañic laj cʼʌjñibal yaʼ ti congregación. ¿Chuqui miʼ mejlel i coltañonla chaʼan mi laj cʌy lac ñaʼtan bajcheʼ jiñi?

15. Cheʼ bajcheʼ miʼ yʌl 1 Corintios 12:4-11, ¿chuqui yom mi laj cʌn cheʼ bʌ an chuqui la cujil melol?

¹⁵ Laʼcu lac ñaʼtan iliyi: An xñoptʼañob ti ñaxam bʌ siglo am bʌ cabʌl chuqui yujilob come Jehová tsiʼ yʌqʼueyob jiñi chʼujul bʌ espíritu (pejcan 1 Corintios 12:4-11). Tiʼ pejtelelob añobʌch i cʼʌjñibal, anquese jujuntiquil xñoptʼañob mach junlajalic chuqui yujilob cheʼ bʌ Jehová tsiʼ mele milagro tiʼ tojlelob. I sujmʌch chaʼan ili ora, Jehová maʼañic miʼ mel milagro ti lac tojlel chaʼan la cujil melol chuqui jach, pero Jehová maʼañic miʼ wis qʼuextan i pensar. Tajol mach junlajalic chuqui la cujil melol, pero ti lac pejtelel an laj cʼʌjñibal tiʼ wut Jehová.

16. ¿Baqui bʌ i ticʼojel jiñi apóstol Pablo yom bʌ mi lac jacʼ?

¹⁶ Mach lac laj lac bʌ yicʼot yambʌ xñoptʼañob, laʼ jach lac jacʼ tsaʼ bʌ i yʌlʌ jiñi apóstol Pablo: «Jujuntiquil yom i bajñel ñaʼtyan bajcheʼ yilal muʼ bʌ i chaʼlen chaʼan miʼ ñaʼtyan mi wen o mi mach wen miʼ chaʼlen. Jini muʼ bʌ i ñaʼtyan weñʌch tiʼ chaʼle cʼajacña i yoj mi yubin. Mach yom miʼ lajeʼ tsaʼ bʌ i chaʼle yicʼot tsaʼ bʌ i chaʼle yambʌ i piʼʌlob chaʼan miʼ pʌs i bʌ ti ñuc» (Gá. 6:4, Jini wen bʌ tʼan).

17. ¿Bajcheʼ mi caj i coltañonla cheʼ mi lac jacʼben i ticʼojel Pablo?

¹⁷ Miʼ mucʼʌch lac jacʼ jiñi i ticʼojel Pablo yicʼot mi lac wen ñaʼtan chuqui mi lac mel, mi caj lac tech laj qʼuel chaʼan añʌch chuqui la cujil melol i mach bʌ yujilobic i melol jiñi yambʌlob. Jumpʼejl ejemplo, tajol juntiquil anciano mach wen yujilic i yʌcʼol discurso tac, pero wen yujil i sujtesan ti xcʌntʼan yambʌlob. Tajol mach wen chajpʌbilic chuqui miʼ mel cheʼ bajcheʼ jiñi yambʌ ancianojob yaʼ ti congregación, pero cʌmbil chaʼan miʼ pʌs i cʼuxbiya i jiñi hermanojob miʼ cʼajtibeñob ticʼojel tac. O cʌmbil chaʼan miʼ wen pʌs i yutslel (He. 13:2, 16). Cheʼ bʌ la cujilix chuqui la cujil melol, mi quej lac wen ubin lac tijicñʌyel come mucʼʌch laj coltan jiñi congregación. Cheʼ jaʼel, maʼañic mi quej lac tsʼaʼlen jiñi la quermañujob chaʼan cabʌlʌch chuqui yujilob melol.

18. ¿Bajcheʼ mi lac mejlel ti sujtel ti ñumen wem bʌ xcʌntesa?

¹⁸ Ti lac pejtelel yom mi lac chaʼlen wersa lac ñumen weñʼesan lac subtʼan yicʼot laj cʌntesa, mach yʌlʌyic baqui bʌ la queʼtel an yaʼ ti congregación. Jin chaʼan, Jehová miʼ cʼʌn jiñi i yorganización chaʼan miʼ cʌntesañonla. Jumpʼejl ejemplo, yaʼ ti tempa bʌ Subtʼan yicʼot Melbalʌl mi laj cʌntesʌntel chaʼan bajcheʼ ñumen wen mi lac chaʼlen subtʼan. ¿Woli ba lac jacʼ ili cʌntesʌntel?

19. ¿Chuqui miʼ mejlel lac mel chaʼan mi lac majlel yaʼ ti Cʌntesʌntel chaʼan xsubtʼañob chaʼan bʌ i yumʌntel Dios?

¹⁹ Cheʼ jaʼel, yaʼ ti Cʌntesʌntel chaʼan xsubtʼañob chaʼan bʌ i yumʌntel Dios, miʼ cʌntesʌntelob hermanojob yicʼot hermanajob muʼ bʌ i melbeñob i yeʼtel Jehová tiʼ pejtelel ora am bʌ i chaʼañob 23 cʼʌlʌl ti 65 i jabilelob. ¿Muʼ ba lac ñaʼtan chaʼan maʼañic baʼ ora mi caj lac majlel yaʼi? Mach lac ñaʼtan chuqui tiʼ caj mach mejloñicla ti majlel, laʼ jach lac ñaʼtan chucoch la comʌch majlel. Cheʼ jiñi, laʼ lac ñaʼtan chuqui yom mi lac mel chaʼan mucʼʌch lac majlel. Tiʼ coltaya Jehová yicʼot cheʼ mi lac chaʼlen wersa, mi caj lac majlel yaʼ baqui tsaʼ lac ñaʼta chaʼan maʼañic baʼ ora mi caj laj cʼotel.

20. ¿Chuqui miʼ cʌntesañonla Romanos 12:6-8?

²⁰ Jiñi uxchajp muʼ bʌ laj cʌn ti jiñi ejemplo tsaʼ bʌ i yʌcʼʌ Pablo mi lac taj ti Romanos 12:6-8 (pejcan). Ilayi, Pablo miʼ chaʼ al chaʼan mach junlajalic chuqui la cujil melol yaʼ ti congregación. Pero miʼ yʌl chaʼan yom mi laj cʼʌn chuqui la cujil melol chaʼan mi lac ñuqʼuesʌben i pusicʼal yicʼot mi lac pʼʌtʼesan jiñi hermanojob añoʼ bʌ ti laj congregación.

21, 22. ¿Chuqui miʼ mejlel laj cʌn ti jiñi tsaʼ bʌ i ñusa Robert yicʼot jiñi hermano Felice?

²¹ Laʼ laj qʼuel chuqui tsaʼ ujti tiʼ tojlel juntiquil anciano i cʼabaʼ Robert. Cabʌl jab tsiʼ melbe i yeʼtel Jehová ti yambʌ país, i ti wiʼil tsaʼ chojqui majlel ti Betel ti jiñi país baqui chʼoyol. Anquese tiʼ subeyob chaʼan mach tiʼ cajic chaʼan tsiʼ mele mach bʌ weñic cheʼ tsaʼ qʼuextʌnti, tsiʼ yʌlʌ: «Cabʌl uw tsaʼ ñumi ti col mach bʌ weñic, tsaʼ cubi c bʌ chaʼan maʼañic j cʼʌjñibal. Mach junsujtel jach tsaʼ c ñaʼta chaʼan mic loqʼuel majlel ti Betel». ¿Bajcheʼ tsiʼ chaʼ taja i tijicñʌyel? Juntiquil anciano tsiʼ cʼajtesʌbe chaʼan jiñi muʼ bʌ i cʌntesañonla Jehová ti jiñi yan tac bʌ eʼtel am bʌ lac mele, miʼ coltañonla lac mel jiñi eʼtel am bʌ lac chaʼan ili ora. Robert tiʼ chʼʌmbe i sujm chaʼan mach yomix miʼ chʌn ñaʼtan jiñi tsaʼix bʌ ñumi, i cojachix yom miʼ ñaʼtan muʼ bʌ i mejlel i mel ili ora.

²² Jiñʌch tsaʼ bʌ ujti tiʼ tojlel jaʼel jiñi hermano Felice Epíscopo. Jiñi hermano yicʼot i yijñam tsajñiyob ti Galaad cheʼ ti 1956 i tsaʼ ajñiyob bajcheʼ superintendente i chaʼan circuito yaʼ ti Bolivia. Ti 1964 tsaʼ tiliyob juntiquil i yalobil. Jiñi hermano Felice tsiʼ yʌlʌ: «Wocol tsaʼ lon cubi chaʼan mi lon j cʌy ajñel bajcheʼ circuito. Tsaʼ c sʌtʌ jumpʼejl jab tiʼ caj chaʼan tsaʼ c chʌn ñaʼta tsaʼ bʌ ujti. Pero Jehová tsiʼ coltayon chaʼan mij qʼuextan c pensar, i tsaʼix caji c ñaʼtan bajcheʼ miʼ mejlel c mel queʼtel bajcheʼ tatʌl». ¿Cheʼ ba mi la cubin lac bʌ bajcheʼ Robert yicʼot Felice? ¿Chʼijiyem ba mi la cubin lac bʌ come mach wolix lac mel jiñi eʼtel am bʌ lac chaʼan ti ñaxan? Mi cheʼʌchi, mi caj i yʌqʼueñonla la cubin lac tijicñʌyel cheʼ cojach jin mi lac ñaʼtan chuqui miʼ mejlel lac mel ili ora chaʼan mi lac ñumen melben i yeʼtel Jehová yicʼot mi laj coltan jiñi la quermañujob. Laʼ jach la cʌcʼ ti lac jol laj coltan la quermañujob yicʼot laʼ laj cʼʌn chuqui la cujil melol. I tijicña mi caj la cubin cheʼ bʌ mi lac ñuqʼuesʌben i pusicʼal jiñi la quermañujob ti congregación.

23. a) ¿Chuqui yom mi lac locʼsʌben i yorajlel? b) ¿Chuqui mi caj laj qʼuel yaʼ ti yambʌ estudio?

²³ Tiʼ wut Jehová, jujuntiquil i wiñic wen an i cʼʌjñibal. Yom chaʼan mi la cochel tiʼ familia. Mi mucʼʌch lac locʼsʌben i yorajlel chaʼan mi lac ñaʼtan chuqui yom mi lac mel chaʼan mi lac ñuqʼuesʌben i pusicʼal jiñi la quermañujob i mi lac chaʼlen wersa chaʼan mi lac mel jiñi, mi caj i coltañonla laj qʼuel chaʼan añʌch laj cʼʌjñibal yaʼ ti congregación. Pero ¿bajcheʼ yilal mi laj qʼuel jiñi yambʌlob? ¿Bajcheʼ miʼ mejlel lac pʌs chaʼan mucʼʌch laj qʼuelob ti ñuc? Ti jiñi yambʌ estudio, mi caj la cʌqʼuen i jacʼbal ili ñuc bʌ cʼajtiya tac.