¿Chuqui yom maʼ mel chaʼan utsʼat maʼ ñusan ti a ñujpuñel?

 1. Anquese lʌcʼʌ tiʼ pejtelel ora tijicña miʼ tejchel jumpʼejl ñujpuñel, ¿chuqui yom miʼ ñaʼtañob chaʼan mi caj i tajob jiñi muʼ bʌ i ñujpuñelob? (Qʼuele jiñi foto am bʌ tiʼ tejchibal).

CHEʼ bʌ juntiquil chʼiton yicʼot xchʼoc miʼ cʼotel i wen cʼuxbiñob i bʌ, miʼ ñujpuñelob. Wen tijicñayob cheʼ miʼ taj i qʼuelob i bʌ tiʼ yorajlel ñujpuñel. Cheʼ jiñi miʼ yʌcʼob i tʼan chaʼan chʌn xucʼul mi caj i yajñelob. Pero cheʼ tsaʼix ñujpuñiyob, an chuqui yom miʼ melob chaʼan chʌn temel miʼ yajñelob. Jehová tsiʼ mele jiñi ñujpuñel, i yom chaʼan tijicña yicʼot utsʼat miʼ yajñel jiñi xñujpuñelob. Jin chaʼan, tsiʼ cʌybeyob wen tac bʌ ticʼojel yaʼ ti Biblia (Proverbios 18:22). Pero xmulilonla ti lac pejtelel. Jin chaʼan miʼ yʌl jiñi Biblia chaʼan muʼ bʌ i ñujpuñelob mi caj i tajob «wocol» (1 Corintios 7:28). ¿Chuqui yom miʼ melob jiñi xñoptʼañob ñujpuñemoʼ bʌ chaʼan maʼañic miʼ wen tajob wocol? ¿Chuqui miʼ mejlel i melob chaʼan wen miʼ ñusañob tiʼ ñujpuñel?

 2. ¿Baqui tac bʌ cʼuxbiya yom an ti jumpʼejl xñujpuñel?

² Jiñi Biblia miʼ pʌs chaʼan jiñi cʼuxbiya jiñʌch wen ñuc bʌ i cʼʌjñibal. Pero mach junchajpic jach jiñi cʼuxbiya yom bʌ miʼ pʌsbeñob i bʌ jiñi xñujpuñelob. Yom miʼ pʌsbeñob i bʌ jiñi cʼuxbiya bajcheʼ i yamigojoʼ bʌ i bʌ yicʼot jiñi cʼuxbiya muʼ bʌ i pʌsbeñob i bʌ chaʼtiquil muʼ bʌ i mulañob i bʌ. Mi añob i yalobil, ñuc i cʼʌjñibal jiñi cʼuxbiya ti familia. Pero chaʼan wen miʼ yajñel jumpʼejl xñujpuñel, ñumen ñuc i cʼʌjñibal jiñi cʼuxbiya chucul bʌ ti principio tac chaʼan xñoptʼan. Jiñi apóstol Pablo tsiʼ yʌlʌ bajcheʼ yilal ili cʼuxbiya: «Ti jujuntiquiletla yom mi laʼ cʼuxbin laʼ wijñam cheʼ bajcheʼ mi laʼ bajñel cʼuxbin laʼ bʌ. Jini xʼixic laʼ i qʼuel ti ñuc i ñoxiʼal» (Efesios 5:33).

 3. ¿Bajcheʼ cʼamel yom miʼ cʼuxbiñob i bʌ jumpʼejl xñujpuñel?

³ Pablo tiʼ tsʼijbu: «Winicob, cʼuxbin laʼ wijñam cheʼ bajcheʼ Cristo tsiʼ cʼuxbi i chaʼañoʼ bʌ. Tsiʼ yʌcʼʌ i bʌ ti chʌmel chaʼañob» (Efesios 5:25). Ili ora, jiñi xñoptʼañob miʼ cʼuxbiñob i bʌ cheʼʌch bajcheʼ Jesús tsiʼ cʼuxbi jiñi xcʌntʼañob i chaʼan (pejcan Juan 13:34, 35; 15:12, 13). ¿Bajcheʼ cʼamel yom miʼ cʼuxbiñob i bʌ jiñi xñoptʼañob ñujpuñemoʼ bʌ? Yom miʼ wen cʼuxbiñob i bʌ anquese yom miʼ yʌcʼob i cuxtʌlel tiʼ tojlel i piʼʌl. Pero tajol jumpʼejl xñujpuñel miʼ ñaʼtan chaʼan mach wen pʼʌtʌlobic i cʼuxbiya cheʼ bʌ añob ti tsʌts bʌ wocol. ¿Chuqui miʼ mejlel i coltañob? Jiñʌch jiñi cʼuxbiya chucul bʌ ti principio. ¿Chucoch? Come «miʼ ñusan pejtel wocol, miʼ ñop pejtelel chuqui tac isujm, miʼ chaʼlen pijtaya tiʼ xucʼtʌlel i pusicʼal, miʼ ñusan ti utsʼat pejtelel chuqui tac miʼ yujtel» yicʼot mach yujilic jilel (1 Corintios 13:7, 8). Jiñi ñujpuñemoʼ bʌ yom miʼ cʼajtesañob chaʼan tsiʼ yʌcʼʌyob i tʼan chaʼan mi caj i cʼuxbiñob i bʌ yicʼot xucʼul mi caj i lajal ajñelob. Jiñʌch mi caj i coltañob i sʌclan i coltʌntel ti Jehová yicʼot ti comol troñel chaʼan miʼ lajmesañob i wocol tac.

4, 5. a) ¿Chuqui ti eʼtel an i chaʼan jiñi wiñic ñujpuñem bʌ? b) ¿Bajcheʼ yom miʼ qʼuel jiñi eʼtel am bʌ i chaʼan jiñi xʼixic tiʼ familia? c) ¿Chuqui tsiʼ mele jumpʼejl xñujpuñel?

⁴ Pablo tiʼ tsictesa baqui bʌ i yeʼtel jiñi wiñic yicʼot xʼixic. Tsiʼ yʌlʌ: «Xʼixicob, acʼʌ laʼ bʌ ti utsʼat tiʼ wenta laʼ ñoxiʼal cheʼ bajcheʼ mi laʼ jacʼben lac Yum. Come jini winic i yumʌch xʼixic cheʼ bajcheʼ Cristo i yumʌch xñoptʼañob» (Efesios 5:22, 23). Jiñi wiñic ñujpuñem bʌ yom miʼ pʌs i cʼuxbiya cheʼ bajcheʼ Jesús, i jol bʌ jiñi congregación. Jiñi xʼixic maʼañic miʼ ñaʼtan chaʼan maʼañic i cʼʌjñibal tiʼ caj jin an i yeʼtel i ñoxiʼal. Jehová tsiʼ yʌcʼʌ ti ñaʼtʌntel chaʼan ñuc i cʼʌjñibal jiñi eʼtel muʼ bʌ i mel. Tsiʼ yʌlʌ: «Mach utsʼatic miʼ yajñel tiʼ bajñelil jini winic. Mi caj c melben i yaj coltaya chaʼan miʼ yajñel yicʼot» (Génesis 2:18). Jiñi xʼixic yom miʼ coltan i ñoxiʼal chaʼan miʼ sujtel ti wem bʌ i jol i familia. Mi jiñi wiñic yujil cʼuxbiya bajcheʼ Jesús, tijicña i yijñam. Cheʼ jaʼel, mach wocolic miʼ yubin chaʼan miʼ qʼuel ti ñuc yicʼot miʼ jacʼ chuqui miʼ ñaʼtan i ñoxiʼal.

⁵ Juntiquil hermana i cʼabaʼ Cathy miʼ yʌl: «Cheʼ c bajñel jaxto, maʼañic majqui miʼ subeñon yom bʌ mic mel yicʼot c bajñel mij cʌntan c bʌ. Pero tsaʼ j cʌñʌ j qʼuel ti ñuc c ñoxiʼal cheʼ bʌ tsaʼ ñujpuñiyon». Cathy miʼ yʌl chaʼan mach tiʼ pejtelelic ora cʼun tsiʼ yubi tiʼ melol, pero cheʼ miʼ melob bajcheʼ miʼ yʌl Jehová añʌch i ñumen lʌcʼtesayob i bʌ tiʼ chaʼticlel^[1] (qʼuele jiñi nota am bʌ tiʼ yujtibal ili temaj). Jiñi i ñoxiʼal i cʼabaʼ Fred miʼ yʌl: «Tiʼ pejtelel ora wocol mi cubin chaʼan mic ñaʼtan chuqui yom mic mel. Ñumen wocol to ti jiñi ñujpuñel come mach lac bajñelic jach yom mi lac ñaʼtan lac bʌ. Pero ti jujumpʼejl qʼuin mic ñumen ñaʼtan bajcheʼ yom, come mij cʼajtiben i coltaya Jehová yicʼot mic wen ñʌchʼtan chuqui miʼ subeñon quijñam. Lajal mij coltan lon c bʌ mi cubin».

 6. Cheʼ bʌ an wocol ti jumpʼejl xñujpuñel, ¿chucoch miʼ yʌcʼob ti tem ajñel jiñi cʼuxbiya?

⁶ Chaʼan pʼʌtʌl miʼ yajñel jumpʼejl xñujpuñel, ¿chuqui yom? Jiñi Biblia miʼ yʌl: «Cuchben laʼ bʌ laʼ sajtemal. Ñusʌben laʼ bʌ laʼ mul». Jiñi wiñic yicʼot xʼixic ñujpuñem bʌ, mi caj i tajob i sajtemal yicʼot wocol tac come xmulilob. Mi cheʼ miʼ yujtel, miʼ mejlelob i cʌn i ñusʌbeñob i bʌ i mul yicʼot i pʌsbeñob i bʌ cʼuxbiya chucul bʌ ti principio tac am bʌ ti Biblia. Ili cʼuxbiya jiñʌch muʼ bʌ i ‹yʌcʼonla ti tem ajñel› (Colosenses 3:13, 14). Jiñi ñujpuñemoʼ bʌ, miʼ pʌsob i cʼuxbiya cheʼ yujilob pijt yicʼot utsob, ‹maʼañic miʼ lotob tiʼ pusicʼal› chuqui miʼ yujtel (1 Corintios 13:4, 5). Ti orajach yom miʼ ñopob i lajmesan i wocol, cheʼ bʌ maxto ñumeñic jumpʼejl qʼuin (Efesios 4:26, 27). Yom añob i pecʼlel yicʼot i chʼejlel chaʼan miʼ yʌlob: «Ñusʌbeñon chuqui tsaʼ c subeyet». Pero mucʼʌch i mejlel ti lajmel jiñi wocol yicʼot miʼ ñumen lʌcʼtiyelob tiʼ chaʼticlel cheʼ miʼ cʼajtiñob i ñusʌbentel i mul.

7, 8. a) ¿Baqui bʌ ticʼojel tac miʼ yʌcʼ jiñi Biblia chaʼan jiñi piʼleya ti jumpʼejl xñujpuñel? b) ¿Chucoch yom miʼ pʌsbeñob i bʌ cʼuxbiya jiñi ñujpuñemoʼ bʌ?

⁷ Jiñi Biblia miʼ yʌcʼ wen tac bʌ ticʼojel chaʼan wen bajcheʼ yom miʼ qʼuelob jiñi piʼleya jiñi ñujpuñemoʼ bʌ (pejcan 1 Corintios 7:3-5). Wen i cʼʌjñibal cheʼ bʌ juntiquil miʼ yʌcʼ ti ñuc bajcheʼ yubil miʼ yubin i bʌ i piʼʌl yicʼot chuqui yom. Mi jiñi wiñic maʼañic miʼ pʌsben i yutslel i yijñam, tajol maʼañic mi caj i yubin i tijicñʌyel ti piʼleya. Jiñi Biblia miʼ yʌl chaʼan jiñi wiñic yom miʼ qʼuel ti ñuc i yijñam (1 Pedro 3:7). Jiñi wiñic mach yomic miʼ wersa suben chaʼan miʼ chaʼlen piʼleya yicʼot i yijñam mi yomic miʼ xicʼ. Tiʼ chaʼticlelob yom miʼ lajal ubiñob chaʼan yomob piʼleya. Lʌcʼʌ tiʼ pejtelel bʌ ora miʼ ñumen ñaʼtan piʼleya jiñʌch jiñi wiñic. Pero jin yom miʼ melob cheʼ tiʼ chaʼticlelob tijicñayob.

⁸ Jiñi Biblia maʼañic miʼ jamʌ al bajcheʼ tac yilal yom bʌ miʼ melob tiʼ bajñelil jiñi xñujpuñelob chaʼan miʼ pʌsbeñob i bʌ cʼuxbiya. Pero miʼ pʌs chaʼan i cʼʌjñibalʌch miʼ pʌsbeñob i bʌ (Cantares 1:2; 2:6). Jiñi xñoptʼañob yomʌch miʼ pʌsbeñob i bʌ i yutslel.

 9. ¿Chucoch mach utsʼatic cheʼ mi lac pʌs chaʼan mi lac mulan yambʌ mach bʌ lac piʼʌlic?

⁹ An mach bʌ pʼʌtʌlix o tsaʼix bʌ jejmi i ñujpuñel tiʼ caj tsiʼ wen mulaj i qʼuel pornografía o tsiʼ mulaj yambʌ mach bʌ i piʼʌlic. Iliyi mach utsʼatic, yom mi lac chaʼlen wersa chaʼan maʼañic mi lac mel. Mi wen pʼʌtʌl laj cʼuxbiya ti Jehová yicʼot ti lac piʼʌl, maʼañic mi caj laj cʌy chaʼan chuqui jach o majqui jach miʼ mejlel i jisan lac ñujpuñel. Maʼañic chuqui yom mi lac mel muʼ bʌ i pʌs o i yʌcʼ ti cʌñol chaʼan mi lac mulan yambʌ mach bʌ lac piʼʌlic, come maʼañic woli lac pʌs cʼuxbiya bajcheʼ jiñi. Yom mi laj cʼajtesan chaʼan Dios luʼ yujil chuqui mi lac ñaʼtan yicʼot mi lac mel. Cheʼʌch mi caj lac ñumen mulan lac mel chuqui utsʼat tiʼ wut Dios i chaʼan xucʼulonla tiʼ tojlel lac ñoxiʼal o la quijñam (pejcan Mateo 5:27, 28; Hebreos 4:13).

10, 11. a) ¿Baqui jaxʌl cʼotem jiñi divorcio? b) ¿Chuqui miʼ yʌl jiñi Biblia chaʼan jiñi cʌy bʌ? c) ¿Chuqui mi caj i coltan jiñi ñujpuñemoʼ bʌ chaʼan mach bajcheʼic jach miʼ qʼuelob jiñi cʌy bʌ?

¹⁰ An muʼ bʌ i cʌyob i bʌ o miʼ chaʼleñob i bʌ ti divorciar cheʼ bʌ maʼañic miʼ mejlel i lajmesañob i wocol. An país tac baqui ñumen ti ojlil xñujpuñelob miʼ chaʼleñob i bʌ ti divorciar. Anquese mach cheʼic miʼ wen ujtel tiʼ tojlel i testigojob Jehová, pero woliʼ ñumen pʼojlel jiñi xñujpuñelob Testigojoʼ bʌ añoʼ bʌ tsʌts bʌ i wocol.

¹¹ Jiñi Biblia miʼ yʌl: «Jini xʼixic mach i lon cʌy i ñoxiʼal. Mi tsiʼ cʌyʌ i ñoxiʼal xʼixic laʼ ajnic tiʼ bajñelil. Mi mach yomic ajñel tiʼ bajñelil, laʼ i mel i bʌ ti utsʼat yicʼot i ñoxiʼal. Cheʼ jaʼel winic, mach i choc loqʼuel [i cʌy] i yijñam» (1 Corintios 7:10, 11). An xñujpuñelob muʼ bʌ i ñaʼtañob chaʼan wen tsʌtsob i wocol, i jin chaʼan miʼ ñaʼtañob i cʌy i bʌ. Pero Jesús tsiʼ pʌsʌ chaʼan mach bajcheʼic jach miʼ qʼuejlel jiñi cʌy bʌ. Tsiʼ chaʼ alʌ tsaʼix bʌ i wʌn alʌ Dios chaʼan jiñi ñujpuñel i tsiʼ yʌlʌ: «Mach i chaʼ tʼox winic chuqui tsiʼ tempa Dios» (Mateo 19:3-6; Génesis 2:24). Wen tsiquil chaʼan Jehová yom cheʼ temel miʼ yajñel jiñi xñujpuñelob (1 Corintios 7:39). Yom mi laj cʼajtesan chaʼan Jehová mi caj i chaʼlen meloñel ti lac tojlel. Jiñʌch mi caj i coltañonla chaʼan ti orajach mi lac lajmesan lac wocol, cheʼ bʌ maxto wen tsʌtsic.

12. ¿Chucoch miʼ mejlel i ñaʼtañob i cʌy i bʌ jiñi xñujpuñelob?

¹² ¿Chucoch an xñujpuñelob añoʼ bʌ tsʌts bʌ i wocol? An mach bʌ tijicñayobic o michʼob tiʼ caj mach cheʼic chumulob bajcheʼ tsiʼ lon ñaʼtayob. Miʼ wen tejchel wocol tiʼ caj mach lajalic bajcheʼ tsaʼ cosʌntiyob o chaʼan mach lajalic bajcheʼ miʼ yubiñob i bʌ. An i tajol miʼ techob wocol tiʼ cajob i familia, tiʼ caj taqʼuin o tiʼ cosʌntel i yalobilob. Pero tijicñajax cheʼ mi laj qʼuel chaʼan jiñi xñujpuñelob xñoptʼañoʼ bʌ miʼ sʌclañob bajcheʼ miʼ mejlel i lajmesañob i wocol come miʼ yʌcʼob i bʌ ti tojʼesʌntel ti Dios.

13. ¿Chuqui tiʼ caj miʼ mejlel ti ujtel jiñi cʌy bʌ?

¹³ An tacʌch chucoch miʼ mejlel i cʌyob i bʌ jumpʼejl xñujpuñel. An muʼ bʌ i cʌy i piʼʌl tiʼ caj mach yomic i mʌcʼlan i familia, miʼ cʌlʌx ticʼlʌntel o miʼ jajtsʼel tiʼ piʼʌl yicʼot cheʼ bʌ wen tsʌts jiñi wocol i maʼañix miʼ mejlel i melben i yeʼtel Dios. Cheʼ bʌ an tsʌts bʌ wocol, jiñi ñujpuñemoʼ bʌ yom miʼ cʼajtiñob i coltʌntel ti ancianojob. Ili hermanojob wen añob i ñaʼtʌbal yicʼot miʼ mejlel i coltañob i chʼujbibeñob i ticʼojel Dios. Cheʼ bʌ jiñi ñujpuñemoʼ bʌ miʼ cʼajtibeñob chʼujul bʌ i yespíritu Jehová, miʼ mejlel i yʌcʼob ti ñuc jiñi principio tac am bʌ ti Biblia i miʼ pʌsob wem bʌ i melbalob (Gálatas 5:22, 23)^[2] (qʼuele jiñi nota am bʌ tiʼ yujtibal ili temaj).

14. ¿Chuqui miʼ subentelob ti Biblia jiñi ñujpuñemoʼ bʌ yicʼot juntiquil mach bʌ Testigojic?

¹⁴ Jiñi Biblia miʼ pʌs chaʼan añʌch i sujmlel chucoch mach yomic miʼ cʌyob i bʌ jiñi ñujpuñemoʼ bʌ, anquese juntiquil maʼañic miʼ chʼujutesan Jehová (pejcan 1 Corintios 7:12-14). Jiñi mach bʌ Testigojic, chʼujul miʼ qʼuejlel come miʼ chʼujutesan Jehová jiñi i piʼʌl. Sʌc miʼ qʼuejlel jaʼel i yalobilob, jin chaʼan miʼ cʌntʌntelob ti Dios. Pablo tsiʼ sube xñoptʼañob: «Hermana, ¿mach ba a wujilic? Ticʼʌl miʼ mejlel a coltan a ñoxiʼal chaʼan miʼ ñop. Hermano, ¿mach ba a wujilic? Ticʼʌl miʼ mejlel a coltan a wijñam chaʼan miʼ ñop» (1 Corintios 7:16). An cabʌl ejemplo muʼ bʌ i pʌs chaʼan jiñi wiñic o xʼixic an i colta i piʼʌl chaʼan miʼ sujtel tiʼ testigo Jehová.

15, 16. a) ¿Baqui bʌ ticʼojel miʼ yʌqʼuentelob ti Biblia jiñi xʼixicob mach bʌ xñoptʼañobic i ñoxiʼal? b) ¿Bajcheʼ yilal miʼ cʌytʌl jiñi xñoptʼan mi tsaʼ loqʼui majlel i piʼʌl?

¹⁵ Jiñi apóstol Pedro tsiʼ yʌqʼue ticʼojel jiñi xʼixicob chaʼan yom miʼ qʼuelob ti ñuc i ñoxiʼal, tsiʼ subeyob chucoch: «Mi maʼanic miʼ ñopob laʼ ñoxiʼal, mi caj i ñopob chaʼan utsʼat bʌ laʼ melbal, mach chaʼanic laʼ tʼan. Mi caj i qʼuelob toj bʌ laʼ melbal cheʼ mi laʼ jacʼbeñob ti utsʼat». Jiñi xʼixic xñoptʼan bʌ yom miʼ pʌs i ‹yutslel yicʼot i ñʌchʼtʌlel i pusicʼal, come jiñʌch cʼax utsʼat bʌ tiʼ wut Dios› (1 Pedro 3:1-4). Mi juntiquil hermana miʼ jacʼ ili ticʼojel, tajol miʼ mejlel i coltan chaʼan miʼ sujtel ti Testigo i ñoxiʼal, i mach cʼʌñʌlic mi caj i wen suben chuqui ñopol i chaʼan.

¹⁶ Pero ¿ixcu mi juntiquil wiñic mach bʌ Testigojic miʼ cʌy i bʌ yicʼot i yijñam? Jiñi Biblia miʼ yʌl: «Mi yom loqʼuel majlel jini mach bʌ anic miʼ ñop lac Yum, laʼ loqʼuic. Cheʼ jini juntiquil hermano mi winic mi xʼixic mach chʌn anix tiʼ pʼʌtʌlel i piʼʌl mi tsaʼ loqʼui i piʼʌl. Tsaʼix i pʌyʌyonla Dios chaʼan ñʌchʼʌl mi la cajñel» (1 Corintios 7:15). Cheʼ bajcheʼ mi laj qʼuel, jiñi Testigo bʌ mach yomic miʼ wersa xicʼ ti cʌytʌl i piʼʌl mach bʌ Testigojic. Anquese bej añix ñʌchʼtʌlel cheʼ miʼ cʌyob i bʌ, jiñi Biblia maʼañic miʼ yʌl chaʼan libre miʼ chaʼ ñujpuñel jiñi Testigo. Ti wiʼil, tajol miʼ chaʼ ñaʼtan i tojʼesan i ñujpuñel jiñi mach bʌ Testigojic. I ti wiʼil bʌ qʼuin, muʼto i mejlel ti sujtel tiʼ testigo Jehová.

17. ¿Chuqui yom ñumen i cʼʌjñibal i chaʼañob jiñi xñujpuñelob xñoptʼañoʼ bʌ?

¹⁷ Come añoñixla tiʼ yujtibal jiñi «cojix bʌ qʼuin», wen wocol jax bajcheʼ chumulonla (2 Timoteo 3:1-5). Jin chaʼan, yom mi lac sujtel ti wem bʌ i yamigo Jehová chaʼan miʼ mejlel laj cʌntan lac bʌ. Pablo tsiʼ yʌlʌ chaʼan «jumucʼ [jach] wʌʼañonla». Ti wiʼil tsiʼ yʌlʌ chaʼan «jini añoʼ bʌ i yijñam» yom miʼ melob bajcheʼ «mach bʌ añobic i yijñam», i tsiʼ yʌlʌ chaʼan jiñi «muʼ bʌ i cʼʌñob chuqui tac an ti pañimil» cheʼ yom bajcheʼ «mach bʌ anic miʼ cʼʌñob» (1 Corintios 7:29-31). Tiʼ sujm, Pablo maʼañic tsiʼ ñaʼta i yʌl chaʼan mach yomic miʼ cʌntan i ñujpuñel jiñi xñoptʼan. Pero ñumen i cʼʌjñibal mi lac melben i yeʼtel Jehová come chumuloñixla tiʼ yujtibal qʼuin (Mateo 6:33).

18. ¿Bajcheʼ miʼ mejlel i tajob i tijicñʌyel tiʼ ñujpuñel jiñi xñoptʼañob?

¹⁸ Ti ili qʼuin wen wocol jax bʌ, cabʌl xñujpuñel mach weñic bajcheʼ miʼ yujtel. ¿Bajcheʼ miʼ mejlel i tajob i tijicñʌyel yicʼot wen miʼ ñusañob? Jiñʌch cheʼ chʌn lʌcʼʌl miʼ yajñelob ti Jehová yicʼot i tejclum, miʼ jacʼob jiñi principio tac am bʌ ti Biblia yicʼot miʼ yʌcʼob i bʌ ti tojʼesʌntel ti jiñi chʼujul bʌ espíritu. Mi cheʼʌch miʼ melob, woliʼ qʼuelob ti ñuc tsaʼ bʌ i ‹tempa Dios› (Marcos 10:9).